Marcos 2
2
Jun xjal tzqijle'n tyab'il b'anix tu'n Jesús
Mateo 9.1-8; Lucas 5.17-26
1K'itzqetoq tetzlen Jesús tuj tnam Capernaum, pon juntl maj tuj tnam lu; ex o kyb'i xjal otoq pon Jesús tja. 2Jurat naj b'aj kychmon kyib' nimku xjal, minti' b'ant kyten xjal tuja, mi ttzi ja minti' b'ant kyten, ex xi tma'n Jesús tyol Dios kye xjal. 3E pontzun junjun xjal q'i'n jun yab' kyu'n, tzqijle'n tyab'il, iqan kyu'n kyaje xjal. 4Tu'nju minti' tumel tu'n kypon twitz Jesús tu'n tlaj nim xjal, ku'x kyjaqo'n twi ja jatum ta' Jesús; tejtzun tjaqet kyu'n, ku'x kyq'o'n yab' koẍl twitz tkoẍb'il, aju tzqijle'n tyab'il. 5Tejtzun tlonte Jesús qa at kyokslab'l xjal lu, xi tma'n teju yab':
—Nk'wa'l, qe tila ma che najset, chi Jesús te.
6Axtzun q'uql qe'toq junjun xnaq'tzal ti'j ley, in che ximan ti'j tuj kyanmi: 7¿Tiqu'n in yolin xjal lu ikju? In yolin mya b'a'n ti'j Dios. ¿Alkye b'a'n tkub' najsante kyil xjal? ¿Myapelo o'kx Dios? 8Jurattzun el tnik' Jesús ti'j ju in che ximan ti'j tuj kyanmi ex xi tma'n kye:
—¿Tiqu'n in kub' kyximane jlu tuj kyanmiye? 9¿Alkye mas jurat jaku b'ant? ¿Apeju tu'n t-xi nma'ne teju yab' tzqijle'n tyab'il: Qe tila ma che najset, ex qa aju tu'n t-xi nma'ne te: We'ktza, q'i'nktz tkoẍb'ila ex b'eta? 10Kxe'ltzun nyek'une kyeye tu'ntzun tel kynik'e ti'j, aqine sk'o'maj qine tu'n Dios tu'n ntene kyuk'il xjal ex at woklene twitz tx'otx' tu'n tnajset kyil xjal.
Xitzun tma'n Jesús teju xjal tzqijle'n tyab'il:
11—Teya kxel nma'ne: We'ktza, q'i'nktz tkoẍb'ila ex txi'ya tjaya.
12Jurattzun jaw we' ju xjal, jaw ti'n tkoẍb'il, etz kywitz kykyaqil xjal; kyja'tzun e lab'in kykyaqil xjal ti'j, ex jaw kynimsa'n tb'i Dios, in kyma'n:
—B'ajx qil jun b'inchb'en ik tza'n jlu.
Txokb'il te Leví tu'n Jesús
Mateo 9.9-13; Lucas 5.27-32
13Etztzun Jesús, xi' juntl maj ttzi laguna; kykyaqil xjal e pon tuk'il ex xi tq'o'n xnaq'tzb'il kye. 14Kyja' t-xi' Jesús tuj b'e, o til Jesús Leví aju tky'ajal Alfeo q'uqltoq tuj ja jatum nne'l peyin pwaq te gobierni. Xi tma'n Jesús te:
—Lpetza wi'je.
Jawtzun we' Leví ex ok lpe' ti'j Jesús.
15Axtoqtzun ta' Jesús tuj tja Leví q'uqltoq ti'j mes, ax ikx nimku peyil pwaq ex qe aj il q'uql qe'toq ti'j mes junx tuk'il Jesús ex kyuk'ix qe t-xnaq'tzb'en; ex nimku xjal otoq che ok lpe' ti'j. 16Tejtzun kylonte qe xnaq'tzal ti'j ley ex qe fariseo in wa'n Jesús kyuk'il peyil pwaq ex kyuk'il aj il, xi kyma'n kye t-xnaq'tzb'en:
—¿Ti tten jlu, in wa'n Jesús kyuk'il peyil pwaq ex kyuk'il aj il, ex in k'an kyuk'il?
17Tej tb'inte Jesús ju yol lu, xi tma'n kye:
—Qe xjal b'a'n, mya il ti'j jun q'anal kye, noq o'kx qe xjal yab'. Minti' ma chin ule txkol kye xjal tz'aqlxix, noq o'kx ma chin ule txkol kye xjal aj il, chi Jesús kye.
Tiqu'n minti' in kub' kyyo'n we'yaj qe t-xnaq'tzb'en Jesús
Mateo 9.14-17; Lucas 5.33-39
18Qe t-xnaq'tzb'en Juan kyuk'ix qe kyxnaq'tzb'en fariseo in kub' kyyo'ntoq we'yaj, e ultzun junjun xjal tuk'il Jesús, xi kyqanin te:
—¿Tiqu'n in kub' kyyo'n we'yaj qe t-xnaq'tzb'en Juan kyuk'ix qe kyxnaq'tzb'en fariseo, atzun qe teya t-xnaq'tzb'en minti' in kub' kyyo'n we'yaj? Che chi.
19Xi tma'n Jesús kye:
—¿Jakupe kub' kyyo'n we'yaj qeju otoq che txkonjtz tuj mejeb'le'n atxtoq chmilb'aj kyuk'il? Qa atxtoq chmilb'aj kyuk'il mlay kub' kyyo'n we'yaj. 20Ex tzul tq'ijlalil k'elel q'i'n ju chmilb'aj kyxol; maxitzun kb'el kyyo'n we'yaj.
21Minti' jun xjal nno'k tq'o'n jun piẍ xb'alun ak'aj te xb'uqb'ilte ju xb'alun ma b'aj; qa ma tz'ok tq'o'n, k'elel sb'it'j ju xb'alun ma b'aj tu'nju xb'uqb'il ak'aj, ex mas kb'ajel sb'it'j ik tza'n nej. 22Ex minti' jun xjal in ku'x tq'o'n ak'aj vin tuj jun bols tz'u'm ttx'aqan; qa ma ku'x tq'o'n, kb'ajel sb'it'j bols tz'u'm tu'n ak'aj vin ex kb'el qojl vin, ex che najel qe bols tz'u'm, kyja'tzun il ti'j tu'n tku'x q'ot ak'aj vin tuj bols tz'u'm ak'aj.
Qe t-xnaq'tzb'en Jesús el kyi'n triw twi tqan tuj q'ij te ojlab'l
Mateo 12.1-8; Lucas 6.1-5
23In b'ettoq Jesús kyxol awal tuj jun q'ij te ojlab'l kyuk'ix qe t-xnaq'tzb'en; in che b'ettoq ex e ok ten q'ilte triw twi tqan. 24Atzun kye fariseo xi kyma'n te Jesús:
—Kina, ¿tiqu'n in kyb'incha'n t-xnaq'tzb'ena jlu tuj q'ij te ojlab'l, aju mya q'o'n tu'n ley tu'n tb'inchanjtz? Che chi.
25Xi tma'n Jesús kye:
—¿B'ajxpe jaw kysch'i'ne tuj Tu'jil ti o tb'incha David tej minti'toq twa ex tzaj el tk'u'j kyuk'ix qeju ate'toq tuk'il? 26Okx David tuj tja Dios tej toktoq Abiatar te tnejel pal, xi twa'n David qe pan ky'iwla'maj, aju pan lu mya q'o'n tu'n ley tu'n t-xi kywa'n xjal, noq o'kx kye pal; ax ikx xi tq'o'n David kye qeju ate'toq tuk'il.
27Ax ikx xi tma'n Jesús kye:
—Aju q'ij te ojlab'l kyaj tq'o'n Dios tu'n tajb'en kye xjal, mya ate xjal tu'n tajb'en te q'ij te ojlab'l. 28Kyja'tzun aqine Tajaw q'ij te ojlab'l, aqine sk'o'maj qine tu'n Dios tu'n ntene kyuk'il xjal.
Markert nå:
Marcos 2: MAMNO
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
