Marcos 1
1
Aju tpakb'ab'l Juan, aju in che b'yan xjal tu'n tuj a'
Mateo 3.1-12; Lucas 3.1-9,15-17; Juan 1.19-28
1Atzun jlu t-xe'tlen tqanil b'a'n in yolin ti'j Jesucrist, aju Tk'wa'l Dios.
2Ik tza'n tz'ib'an tuj tu'jil Isaías aju t-sanjel Dios, in tma'n:
Lu kxel nsama'ne nsanjele tu'n tkub' nej twitza b'inchalte tb'eya.
3In jaw tq'ajq'ajel twi' jun xjal tuj lugar minti' kynajb'il xjal tuj, in tma'n: Kyb'inchame tb'e Qman; kyb'inchame jun tb'e jiqun ti'j, chi Isaías.
4Kyja'tzun ul Juan ex e b'yan xjal tu'n tuj a' tuj lugar minti' kynajb'il xjal tuj, ex in pakb'an ti'j tu'n tajtz ti'j kyanmi xjal ex tu'n kyb'yan tuj a', tu'ntzun tnajset kyil. 5E tzajtzun kykyaqil xjal tuj tx'otx' Judea, kyuk'ix kykyaqil xjal tuj tnam Jerusalén, e pon tuk'il Juan; tej tjatz kypa'n kyil kykyaqiltzun e b'yan tu'n Juan tuj nima Jordán.
6In b'ettoq Juan tok t-xb'alun ttzmal chej camey, ex tz'u'm k'alb'il tk'u'j tok, ex ẍplon twa in xi' tuk'ix ta'l kab' tuj tze'. 7Ex in pakb'an Juan kye xjal in tma'n kyja':
—At jun xjal tzul wi'jxiye mas at tipumal nwitze, ex minti' woklene tu'n nkub' muk'e'ye pjulte taq'al t-xajab'. 8Ax tok, weye ma che b'yane wu'ne tuj a'; atzunju tzul wi'jxiye, che b'yale tu'n tuj junxitl tumel ok kyk'monteye Xewb'aj Xjan.
Tej tb'yan Jesús tuj a'
Mateo 3.13-17; Lucas 3.21-22
9Kukxtoq kyb'yan xjal tu'n Juan, etz Jesús tuj tnam Nazaret tuj tx'otx' Galilea, ex o b'yan Jesús tu'n Juan tuj nima Jordán. 10Tejtzun tjatz Jesús tuj a', o til jaqet ttzi kya'j, ex o til kub'il Xewb'aj Xjan tib'aj, ik ke'yin ik tza'n paloma. 11Ex tzaj jun tq'ajq'ajel wib'aj tuj kya'j in tma'n:
—Aya Nk'wa'le, k'ujla'nxixa wu'ne; in chin tzalaje ti'ja.
Tej tok Jesús tuj joyb'il ti'j
Mateo 4.1-11; Lucas 4.1-13
12Ex jurat naj xi q'i'n Jesús tu'n Xewb'aj Xjan, pon q'i'n tuj jun lugar minti' kynajb'il xjal tuj. 13Ex axtzun o kyaj ten 40 q'ij tuj lugar minti' kynajb'il xjal tuj, o ten kyxol jil; ex ok tuj joyb'il ti'j tu'n Satanás, ex e ul qe anjel tuk'il tu'n kyajb'en te.
Tej ttzyet taq'un Jesús tuj Galilea
Mateo 4.12-17; Lucas 4.14-15
14Otoq tz'okx q'o'n Juan tuj pres tej tpon Jesús tuj Galilea in pakb'an ti'j tqanil b'a'n ti'j tkawb'il Dios. 15Chi Jesús:
—Ma japun tq'ijlalil ex ma tzul laq'e' tq'ijlalil tu'n tkawin Dios; tajtz ti'j kyanmiye ex kyokslame tqanil kolb'il.
Kyaje xjal tzyul kyiẍ e txkonjtz tu'n Jesús
Mateo 4.18-22; Lucas 5.1-11
16In b'ettoq Jesús ttzi laguna tuj Galilea, o til Jesús Simón tuk'ix Andrés aju titz'in Simón, in ku'x kyq'o'n xyub' tuj a' te tzuyb'il kyiẍ, porke tzyul kyiẍ qe. 17Xitzun tma'n Jesús kye:
—Che lpe'tze wi'je, che okeltzun nq'o'ne te tzyul xjal ik tza'n in che tzyet kyiẍ kyu'ne.
18Jurattzun kyaj kyq'o'n kyxuyb', e ok lpe' ti'j Jesús.
19Ik'tzun Jesús, xi laq'e' ch'intl, ex o til Jesús Jacobo aju tky'ajal Zebedeo, tuk'ix Juan aju terman Jacobo, ate'toq tuj barc in che xb'uqin kyxuyb'. 20Jurattzun e tzaj ttxko'n Jesús; kyajtzun kyq'o'n kyman tuj barc, aju Zebedeo tb'i, kyuk'ix qe majen, e oktzun lpe' ti'j Jesús.
Jun xinaq attoq ju'ẍ mya b'a'n tuj tanmi
Lucas 4.31-37
21E pontzun tuj tnam Capernaum; okx Jesús tuj ja te k'ulb'il tuj q'ij te ojlab'l, ex xi tq'o'n xnaq'tzb'il kye xjal. 22Ex e lab'in xjal ti'j ju t-xnaq'tzb'il; tu'nju at toklen tu'n t-xi tq'o'n xnaq'tzb'il, ex mya ik tten t-xnaq'tzb'il ik tza'n kye xnaq'tzal ti'j ley. 23Ex at jun xjal tokx tuj ja te k'ulb'il at ju'ẍ tuj tanmi, jaw sch'in, 24ex tma kyja':
—¿Ti toklena qi'je, Jesús aj Nazaret? ¿Maj ma tzula tu'n qnaje tu'na? B'a'n wu'ne alkyeya, aya xjan Tk'wa'l Dios, chi ju'ẍ.
25Xi tmayo'n Jesús aju ju'ẍ:
—K'ol ttzi'ya, ku tetza tuj tanmi xjal, chi Jesús.
26Atzunte xjal jaw lu'lunxix wen tu'n tipumal ju'ẍ; etztzun ju'ẍ tuj tanmi xjal in sch'in wen. 27Kykyaqiltzun xjal e lab'in ti'j, kyja'tzun e ok ten yolil ti'j kyxolx, in kyma'n:
—¿Ti t-xilen jlu? ¿Ti tten ju ak'aj xnaq'tzb'il lu? Tu'nju at toklen xjal lu tu'n tkawin kyi'j ju'ẍ, ex in xi niman tyol kyu'n, che chi xjal.
28Jurat naj el tqanil Jesús tuj tkyaqil lugar tuj tx'otx' Galilea.
B'anix ju xu'j tji' Pedro tu'n Jesús
Mateo 8.14-15; Lucas 4.38-39
29Tejtzun kyetz Jesús tuj ja te k'ulb'il, e pon kyja Simón ex Andrés, tuk'ix Jacobo pon ex Juan. 30Ex aju xu'j tji' Simón yab'toq tu'n kyaq, tx'ayl twi' watb'il; jurattzun xi kyma'n te Jesús ti'j yab'. 31Pontzun laq'e' Jesús ttxlaj, jaw ttzyu'n tq'ab' ex jaw twab'an; jurat naj ik' kyaq ti'j, ex ok ten xu'j ajb'el kye.
Nimku yab' e b'anix tu'n Jesús
Mateo 8.16-17; Lucas 4.40-41
32Tejtzun tok qax, otoq tz'ex q'ij, ul kyi'n xjal kykyaqil yab' tuk'il Jesús, kyuk'ix qeju at ju'ẍ tuj kyanmi. 33Kykyaqil xjal tuj tnam pon kychmon kyib' ttzi ja. 34Nimku xjal yab' e b'ant tu'n Jesús, ela' txkaj kyyab'il, ex nimku ju'ẍ e je'tz tlajo'n Jesús tuj kyanmi xjal; minti' xi tq'o'n Jesús amb'il tu'n kyyolin ju'ẍ, porke b'a'n kyu'n alkyete Jesús.
In b'et Jesús kyuj tnam te Galilea in pakb'an
Lucas 4.42-44
35Jaw we' Jesús primxix, atx qwitz, etz tuj tnam, xi' na'l Dios tuj jun lugar minti' kynajb'il xjal tuj. 36Xi'tzun Simón kyuk'ix qeju ate' tuk'il jyolte Jesús. 37Tejtzun tknet kyu'n, xi kyma'n te:
—Kykyaqil xjal in che jyon ti'ja, che chi.
38Xitzun tma'n Jesús kye:
—Qo'qe kyuj qe lugar niqayin ate' ax ikx tu'n t-xi npakb'a'ne tyol Dios kye xjal; ex atzun waq'une ma chin ule.
39Xi'tzun Jesús ex b'aj tb'etin tuj tkyaqil tx'otx' Galilea in pakb'an kyuj ja te k'ulb'il; ex e je'tz tlajo'n Jesús qe ju'ẍ at tuj kyanmi xjal.
Jun xjal nim tx'a'k ti'j b'anix tu'n Jesús
Mateo 8.1-4; Lucas 5.12-16
40Ultzun jun xjal tuk'il Jesús, nim tx'a'k ti'j minti' q'anb'il ti'j, o kub'san twitz Jesús ex kub' ẍmeje':
—Qa taja, jaku chin b'anixe tu'na, chi xjal.
41Tzajtzun q'aq'an tk'u'j Jesús ti'j, xi tnuqpi'n tq'ab' ok tmako'n ti'j:
—Wajb'ile, b'i'x kb'antela, chi Jesús.
42Tejtzun t-xi tma'n Jesús ju yol lu, b'i'x el ju tx'a'k ti'j xjal ex kyaj b'anix. 43Txi'ya, chi Jesús te xjal. Ex xi tkyuwsa'nxix te:
44—Mi'n txi tma'na kye xjal; noq o'kx txi'ya ex yek'unx tib'a twitz pal, ex q'onxa jun oyaj tu'nju ma b'anixa, ik tza'n kyaj tma'n Moisés, tu'n tel kynik' xjal ti'j qa ma b'anixa.
45Tejtzun tex ju xjal, ok ten q'ol tqanil, xi tma'n kye kykyaqil aju otoq tb'incha Jesús te. Kyja'tzun tten minti'tl okx tyek'un tib' Jesús tuj junjun tnam; atzun o ten ti'jxi tnam kyuj qe lugar minti' kynajb'il xjal tuj; ex e pon qe xjal tuk'il e tzaj tuj tkyaqil lugar.
Markert nå:
Marcos 1: MAMNO
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
