Juan 21
21
Kub' tyek'un tib' Jesús kywitz wuq t-xnaq'tzb'en
1Tb'ajlenxitzun jlu, kub' tyek'un tib' Jesús juntl maj kywitz qe t-xnaq'tzb'en ttzi laguna Tiberias tb'i; ex kub' tyek'un tib' kyja': 2Attoq Simón Pedro, tuk'ix Tomás aju yo'ẍ tb'i kyu'n xjal, tuk'ix Natanael aju aj Caná te Galilea, kyuk'ix qe tky'ajal Zebedeo, ex kyuk'ix kab'etl t-xnaq'tzb'en. 3Xitzun tma'n Simón Pedro kye tuk'il:
—Ma chinx weye tzyul kyiẍ.
Atzun kye tuk'il xi kyma'n te:
—Ax ikx qeye ma qo'xe tuk'ila.
E je'xtzun ex e okx tuj jun barc; ex aq'b'il kyu'n ex minti' jun kyiẍ tzyet kyu'n. 4Tejtzun ch'ixtoq tja'wil q'ij, lu Jesús wa'ltoq ttzi laguna; atzun kye t-xnaq'tzb'en minti' el kynik' ti'j qa ate Jesús. 5Xitzun tma'n Jesús kye:
—¿Atpe kyiẍ ma tzyet kyu'ne, aqeye wuk'ile?
—Minti', che chi.
6Xitzun tma'n Jesús kye:
—Kyq'onku'xe xyub' tuj a' ttxlaj barc tuj b'anq'ab'aj, kneteltzun kyiẍ kyu'ne, chi kye.
Ku'xtzun kyq'o'n ju xyub', ex ya minti' b'ant tu'n tjatz kyu'n tu'nju nim kyiẍ otoq tzyet kyu'n. 7Atzunte ju xnaq'tzb'en k'ujla'nxix tu'n Jesús xi tma'n te Pedro:
—Ate Qajaw jlu.
Tejtzun tb'inte Simón Pedro qa ate Qajaw, ok tq'o'n t-xb'alun (tu'nju otoq tz'el ti'n), ex ku'x tuj a'. 8Atzun qe txqantl xnaq'tzb'en e tzaj tuj barc, jawo'n xyub' kyu'n jatum kyku'x kyiẍ, porke mya najchaq ta' ttzi tx'otx', b'alo kyaje ech. 9Tej kyul kanun ttzi tx'otx' o kyil otoq kub' peq'chaj q'aq', ex tokx jun kyiẍ twitz q'aq', ex tuk'ix wab'j attoq. 10Xi tma'n Jesús kye:
—Kyi'ntze kab' ox kyiẍ aju ma xtzyet kyu'ne ja'lo, chi Jesús.
11Okxtzun Simón Pedro tuj barc, ex ik'tz ti'n xyub' ttzi tx'otx', nojni tu'n 153 kyiẍ matij; maske nim kyiẍ tuj xyub', ex minti' kub' tzaqj. 12Xitzun tma'n Jesús kye:
—Kytzaje, che wa'ne.
Ex mi jun xnaq'tzb'en ok tnimarin tib' tu'n t-xi tqanin: ¿Alkyeya? chiwt, porke b'a'n kyu'n qa ate Qajaw. 13Atzunte Jesús tzaj laq'e', ex tzaj ti'n wab'j, xi tq'o'n kye, ax ikx tzaj ti'n kyiẍ ex xi tq'o'n kye.
14Atzun toxinmaji'n jlu kub' tyek'un tib' Jesús kywitz qe t-xnaq'tzb'en tjatzlenxi anq'in kyxol kyimni.
In yolin Jesús tuk'il Simón Pedro
15Tejtzun kyb'aj wa'n, xi tqanin Jesús te Simón Pedro:
—Aya Simón tky'ajal Jonás, ¿maspe k'ujla'n qine tu'na ik tza'n kye jlu? Chi Jesús.
—K'ujla'na wu'ne, Tat; b'a'n tu'na qa k'ujla'na wu'ne, chi Pedro.
Xitzun tma'n Jesús te:
—Che tkwentin oka qe tal nẍne'le.
16Xitzun tma'n Jesús te tkab'maji'n:
—Aya Simón tky'ajal Jonás, ¿k'ujla'npe qine tu'na?
—K'ujla'na wu'ne, Tat; b'a'n tu'na qa k'ujla'na wu'ne, chi Pedro.
Xitzun tma'n Jesús te:
—Che tkwentin oka qe nẍne'le.
17Xitzun tma'n te toxinmaji'n:
—Aya Simón tky'ajal Jonás, ¿k'ujla'npe qine tu'na?
Tzajtzun tb'is Pedro tu'nju tzaj q'ma'n te toxinmaji'n: ¿K'ujla'npe qine tu'na? Xitzun ttzaq'we'n:
—Tat, tkyaqil b'a'n tu'na; b'a'n tu'na qa k'ujla'na wu'ne.
Xitzun tma'n Jesús te:
—Che tkwentin oka qe nẍne'le. 18Ax tok kxel nma'ne teya, tej matoq ku'xuna, ok tk'alo'n tk'u'ja, ex xi'ya noq jatum tajb'ila; oktzun ttijina, kjawil ti'n tq'ab'a, ex k'okel k'alo'n tk'u'ja tu'n juntl, ex kxel q'i'na jatum mya tajb'ila tu'n t-xi'ya.
19Tma Jesús jlu tu'n ttzaj tchik'b'a'n tza'n tten tu'n tkyim Pedro tu'ntzun tjaw nimsa'n tb'i Dios. Tej tmante jlu ax ikx xi tma'n:
—Lpe'ka wi'je.
Aju t-xnaq'tzb'en Jesús k'ujla'nxix tu'n
20Ajtz tke'yin Pedro ex o til lepcho'k kyi'j aju xnaq'tzb'en k'ujla'nxix tu'n Jesús, axju xnaq'tzb'en aju xi txale' twi' ttzi t-xu'k Jesús tej kywa'n ti'j mes ex xi tma'n te: Tat, ¿alkyetzun kxel q'onte teya tuj kyq'ab' xjal? 21Tej tlonte Pedro xnaq'tzb'en lu, xi tma'n te Jesús:
—Tat, ¿yajtzun te jlu ti kb'ajel ti'j?
22Xitzun tma'n Jesús te Pedro:
—Qa wajb'ile tu'n tkyaj ten atx okxi wule, ¿ti' taja ti'j? Lpe'k teya wi'je.
23Aju yol lu el laq'e' tqanil kyxol erman qa minti' tu'n tkyim ju xnaq'tzb'en lu. Ex minti' xi tma'n Jesús te tu'n mi'n tkyim, noq o'kx tma: Qa wajb'ile tu'n tkyaj ten atx okxi wule, ¿ti' taja ti'j?
24Atzunju xnaq'tzb'en lu in tchik'b'a'n axix tok ti'j tkyaqil jlu, ex ma kyaj ttz'ib'an tkyaqil jlu. Ex b'a'n qu'n aju yol tzaj tchik'b'a'n axix tok.
25Ex at nimku mastl o tb'incha Jesús, noqwit ma che kub' tz'ib'et teyle junjun, tuj nnab'le mlay b'ant kyten qe libro twitz tx'otx' noqwit ẍe tz'ib'anjtz. Ikxwitju.
Markert nå:
Juan 21: MAMNO
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
