Juan 20
20
Jatz anq'in Jesús kyxol kyimni
Mateo 28.1-10; Marcos 16.1-8; Lucas 24.1-12
1Tuj tnejel q'ij te seman xi' Mariy aj Magdala ttzi pantyón primxix wen atxtoq qwitz; ex o til otoq tz'el q'i'n ab'j ttzi pantyón. 2Ajtztzun qelan ex ul tuk'il Simón Pedro ex tuk'il juntl xnaq'tzb'en aju k'ujla'nxix tu'n Jesús, ex xi tma'n kye:
—Ma tz'etz q'i'n t-ximlal Qajaw tuj pantyón, ex minti' b'a'n qu'ne jatum ma pon q'o'n, chi Mariy.
3Extzun Pedro tuk'ix juntl xnaq'tzb'en, e je'x ttzi pantyón. 4E je'x qelan junx kykab'il; atzun juntl xnaq'tzb'en mas kyuw ojqelan twitz Pedro, ex nej o kanun ttzi pantyón. 5Kub' mok'e' tu'n tokx tke'yin, ex o til qe xb'alun ax kykub'sa'n, ex minti' okx tuj pantyón. 6Ex lepchix t-xi' Simón Pedro ti'j, ex okx tuj pantyón, ex o til qe xb'alun ax kykub'sa'n, 7tuk'ix ju k'alb'il aju ajb'en k'alb'il twi' Jesús, mya junx tkub' kyuk'il qe xb'alun, b'alq'i'ntoq tten ex part tkub'. 8Ax ikx okx juntl xnaq'tzb'en aju pon nej ttzi pantyón; o til ex xi toksla'n. 9Tu'nju na'nxtoq tel kynik' ti'j ju tz'ib'amaj tuj Tu'jil qa ilxix ti'j tu'n tjatz anq'in Jesús kyxol kyimni. 10E ajtztzun meltz'aj qe xnaq'tzb'en ex e ul tuj kyja.
Kub' tyek'un tib' Jesús twitz Mariy aj Magdala
Marcos 16.9-11
11Atzunte Mariy wa'ltoq twitz pantyón in oq'; ex kukxtoq toq' kub' mok'e' tu'n tokx tke'yin tuj pantyón. 12Ex o til kab' anjel tok kyxb'alun saq, q'uql qe jatum kub' ten t-ximlal Jesús, q'uqltoq jun jatum kub' ten twi' Jesús, ex juntl jatum kub' ten tqan. 13Xitzun kyma'n anjel te Mariy:
—¿Tiqu'n in oq'a, nan?
Xi tma'n Mariy kye:
—In chin oq'e porke ma tzik' q'i'n t-ximlal Wajawe, ex minti' b'a'n wu'ne jatum ma pon q'o'n.
14Tej t-xi tma'n Mariy jlu, ajtz meltz'aj twitz, ex o til wa'ltoq Jesús, ex minti' el tnik' ti'j qa ate Jesús. 15Xitzun tma'n Jesús te:
—¿Tiqu'n in oq'a, nan? ¿Alkye in jyona ti'j?
Atzunte Mariy, tuj tnab'l qa ateju kwentil awal, xitzun tma'n te:
—Tat, qa aya ma txi q'inte t-ximlal Jesús, q'mantza jatum ma pon tq'o'na tu'ntzun t-xi wi'ne.
16Xitzun tma'n Jesús te:
—Mariy.
Ajtztzun meltz'aj twitz Mariy, ex xi tma'n te tuj yol hebreo:
Raboni. (Atzun in tma'n ju yol lu: Xnaq'tzal).
17Xi tma'n Jesús te:
—Mi'n chin kub' ttzyu'na porke na'nx waje tuk'il Nmane; txi'ya kyuk'il wermaniye, ex q'manxa kye, chin jawixe tuk'il Nmane ex Kymane, tuk'il Ndiose ex Kydiose, chi Jesús te.
18Xi'tzun Mariy aj Magdala q'malte tqanil kye xnaq'tzb'en, qa otoq ilwaj Qajaw tu'n ex qa ax Qajaw tzaj q'mante ju yol lu.
Kub' tyek'un tib' Jesús kywitz qe t-xnaq'tzb'en
Mateo 28.16-20; Marcos 16.14-18; Lucas 24.36-49
19Ax q'ij otoq tz'ok qax, aju tnejel q'ij te seman, ok kyb'uyin kyib' qe xnaq'tzb'en, ex etz kylamo'n qe tlamel ja jatum ate'toq tu'n tlaj in che xob'toq kywitz xjal judiy; ul Jesús kyuk'il, kub' we' kyxol, ex xi tma'n kye:
—Qe' kyk'u'je.
20Tejtzun t-xi tma'n jlu kye, xi tyek'un qe tq'ab' kye ex ju ttxlaj t-xu'k. Atzun qe xnaq'tzb'en e tzalaj tej kylonte Qajaw. 21Xitzun tma'n Jesús kye juntl maj:
—Qe' kyk'u'je. Ik tza'n ma chin tzaj sama'ne tu'n Nmane, ax ikxtzun kyeye che xe'l nsama'ne.
22Tejtzun tb'aj tma'n jlu, xi t-xupin kyi'j, ex xi tma'n kye:
—Kyk'monxe aju Xewb'aj Xjan. 23Alkye jun xjal ma kub' kynajsa'ne til, knajsetel til; ex alkye jun xjal minti' ma kub' kynajsa'ne til, atx til.
O til Tomás otoq jatz anq'in Jesús
24Atzunte Tomás, aju yo'ẍ tb'i kyu'n xjal, jun kyxol qeju kab'laj t-xnaq'tzb'en Jesús, mi a'ltoq kyuk'il txqantl xnaq'tzb'en tej tul Jesús. 25Xitzun kyma'n qe txqantl xnaq'tzb'en te Tomás:
—Ma qile Qajaw.
Xitzun tma'n Tomás kye:
—Qa minti' ma wile tokxlen klaws tuj tq'ab', ex qa minti' ma tz'okx nq'o'ne tal nq'ab'e tuj tokxlen klaws, ex qa minti' ma tz'ok nmako'ne tokxlen lans ttxlaj t-xu'k, mlay txi woksla'ne, chi Tomás.
26Tb'ajlenxitzun wajxaq q'ij, ate'toq juntl maj qe t-xnaq'tzb'en Jesús tuja, ex tuk'ix Tomás attoq kyuk'il. Maske lamo'n qe tlamel ja, ex pon Jesús kyuk'il, kub' we' kyxol, ex xi tma'n kye:
—Qe' kyk'u'je.
27Ex xi tma'n Jesús te Tomás:
—Q'o'nktz tal tq'ab'a tzalu, ex ke'yin oka qe nq'ab'e; ex q'ontz tq'ab'a, mako'nka jatum tokxlen lans ttxlaj nxu'ke. Mi'n tz'oka mya okslal, noq o'kx tu'n toka okslal, chi Jesús.
28Xitzun ttzaq'we'n Tomás:
—Aya Wajawe ex aya Ndiose.
29Xitzun tma'n Jesús te:
—Noq tu'nju ma chin tila, Tomás, ma txi toksla'na; at tzalajb'il kye qeju ma kyoksla maske minti' ma kyil, chi Jesús.
Tiqu'n o tz'ib'anjtz ju u'j lu
30Ax ikx o tb'incha Jesús nimku txqantl señ kywitz qe t-xnaq'tzb'en, mya tz'ib'an qe tuj ju libro lu. 31Ex aqeju señ lu ma che tz'ib'anjtz tu'ntzun t-xi kyoksla'ne qa ate Jesús ju Crist aju at toklen tu'n Dios, ex ax Tk'wa'l Dioste, ex tu'n tten kychwinqlale tu'n ok t-xi kyoksla'ne.
Markert nå:
Juan 20: MAMNO
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
