Hechos 1
1
Tma Jesús qa attoq tulel Xewb'aj Xjan
1Aya Teófilo, tuj tnejel wu'je xi ntz'ib'ane ti'j tkyaqilju o tb'incha Jesús ex ti'j ju xnaq'tzb'il xi tq'o'n t-xe tnejel. 2O'kxtzun we' tu'n tq'onte xnaq'tzb'il tej taj q'i'n tuj kya'j. Ex na'nxtoq taj tuj kya'j e jaw t-sk'o'n qe apostol, ex tu'n Xewb'aj Xjan xi tma'n kye alkye tu'n kyb'inchante. 3Ex tkyimlenxi Jesús, kub' tyek'un tib' kywitz itz' te; ax tok jlu, porke o kyil apostol, nimku maj kub' tyek'un tib' Jesús kywitz tuj 40 q'ij, ex in yolintoq kyuk'il ti'j tkawb'il Dios.
4Atxtoq Jesús junx kyuk'il apostol xi tma'n kye tu'n mi'n kyex tuj Jerusalén.
—Ax che ayone ti'j ju tziyimaj kyeye tu'n Nmane, aju ma kyb'iye weye. 5Porke ax tok ate Juan o che b'yan xjal tu'n tuj a'; atzun kyeye ch'ix tul kanun q'ij tu'n kyb'yane tu'n Xewb'aj Xjan, chi Jesús xi tma'n kye.
Tej taj q'i'n Jesucrist tuj kya'j
6Atzun kye apostol kyb'uyintoq kyib' tuk'il Jesús xi kyqanin te:
—Tat, ¿apetzun tq'ijlalil ja'lo tu'n ttzaj tq'o'ntla kyoklen aj Israel tu'n kykawin juntl maj kyxolx? Che chi.
7Xi ttzaq'we'n Jesús:
—Minti' kyoklene ti'j tu'n kyb'inteye jtoj tu'n tb'ant jlu ex alkye q'ij; ate Nmane tajaw ex ximamajtl tu'n alkye q'ij tu'n tb'inchante. 8Ex ok tul Xewb'aj Xjan kyuk'ile, ok kyk'ma'ye kyipumale, ex che okele testiw wi'je tuj tnam Jerusalén, tuj tkyaqil tx'otx' Judea, tuj tx'otx' Samaria, ex tuj tkyaqil twitz tx'otx', chi Jesús kye.
9Tej tb'aj tma'n Jesús jlu, matoq in che ke'yin apostol ti'j, jaw q'i'n Jesús kywitz, aj q'i'n tuj muj ex minti'tl o kyil. 10In che ke'yintoq twitz kya'j kyja'toq tjax laq'e' Jesús, o kyil kub' kyyek'un kyib' kab'e xinaq e kub' we' kytxlaj, tok kyxb'alun saq ke'yin. 11Kymatzun qe xinaq kye:
—Aqeye xinaq aj Galilea, ¿tiqu'n in xi kyke'yine twitz kya'j? Axte Jesús aju xjaw q'i'n kywitze tu'n t-xi' tuj kya'j, ikxtzun tzul ik tza'n xkyile xi' tuj kya'j.
Jaw sk'et Matías te t-xel Judas
12Atzun kye apostol e ajtz meltz'aj twi witz Olivos tb'i, e pon tuj Jerusalén, niqayin kyxol, b'alo jun kilómetro. 13Tejtzun kypon tuj tnam e jax tuj tkab' kolin ja, jatum in che posadiyintoq kykyaqil, Pedro tuk'ix Jacobo, tuk'ix Juan, tuk'ix Andrés, tuk'ix Felipe, tuk'ix Tomás, tuk'ix Bartolomé, tuk'ix Mateo, tuk'ix Jacobo aju tky'ajal Alfeo, tuk'ix Simón aju toktoq te tajlal kyxol jun partid xjal cananista kyb'i ex tuk'ix Judas aju titz'in Jacobo. 14Kykyaqil qe jlu kukx nno'k kychmon kyib' tu'n kyna'n Dios, kyuk'ix qe xu'j, tuk'ix Mariy aju ttxu' Jesús, ex kyuk'ix qe titz'in Jesús, junx kyximb'etz kykyaqil.
15Kyujx qe q'ij lu jaw we' Pedro kyxol qe erman, atzun kyajlal b'aj kychmon kyib' b'alo 120, ex xi tma'n Pedro:
16—Aqeye erman, ilxix ti'j tu'n tjapun aju tz'ib'an tuj Tu'jil jatum o yolin David tu'n Xewb'aj Xjan ti'j Judas, ate Judas kub' nej kywitz qeju e tzaj tzyunte Jesús; 17porke tuk'ix Judas ok te tajlal qxole, ex tk'am toklen tu'n taq'nan quk'ile. 18Ate jlu laq'et jun piẍ tx'otx' tu'n tu'nju twi' tk'u'j tk'am tej tb'inchante mya b'a'n; ex tzaj t-xon tib' pich'l tten, b'i'x el sb'it'j tk'u'j, ex b'i'x etz chitpaj tkyaqil tuj tk'u'j. 19Ex el tqanil jlu kyxol kykyaqil xjal najl tuj Jerusalén, kyja'tzun Acéldama tb'i ju tx'otx' lu ok kyq'o'n tuj kyex kyyol, atzun in tma'n ju yol lu: Tx'otx' twi' chik'. 20Tu'nju at jun yol tz'ib'an tuj Salmo, chi kyja':
Tz'okwit tnajb'il minti' xjal tuj, ex mi junwt xjal ten tuj.
Ax ikx in tma'n:
Juntlxwit txi k'monte toklen, chi tuj Tu'jil.
21Kyja'tzun ilxix ti'j tu'n tjaw sk'et jun erman kyxol qe xinaq o che ten junx quk'il tkyaqil q'ij tej tten Qajaw Jesús qxol, 22ex o che ten quk'il atxix tej tb'yan Jesús tu'n Juan tuj a', ex ate'x quk'il tej tjaw q'i'n Jesús qxol tu'n t-xi' tuj kya'j; ilxixtzun ti'j tu'n tjaw sk'et jun erman kyxol qe jlu tu'n tok te testiw junx quk'il ti'j tjawlen anq'in Crist, chi Pedro xi tma'n kye.
23E yolintzun kyi'j kab'e xinaq alkye jun tu'n tkyaj: A José Barsabás aju Justo tkab'in tb'i, ex tuk'ix Matías. 24Ex e na'n Dios, kyma:
—Aya Tat, ojtzqi'n tu'na kyanmi kykyaqil xjal, yek'untza alkye sk'o'maj tu'na kyxol kab'e xinaq lu 25tu'ntzun tajb'en tuj aq'untl lu ex tu'n tok te apostol te t-xel Judas, porke tu'n tlaj kub' tz'aq Judas tuj il el tpa'n tib' tu'n tpon tuj tex tlugar, che chi.
26Jawtzun kyi'n swert ti'j alkye tu'n tkyaj, ate Matías kyaj, ex ok te tajlal kyxol junlajtl apostol.
Markert nå:
Hechos 1: MAMNO
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
