Exodo 12
12
An Paskwa
1Sa Egipto, nagtaram an Kagurangnan ki Moises asin ki Aaron: 2“An bulan na ini iyo an magigin enot na bulan kan taon para sa saindo. 3Sabihan nindo kaini an bilog na banwaan nin Israel: sa ikasampolong aldaw kan bulan na ini, an lambang pamayo kan harong mapili nin kordero o kanding para sa saiyang pamilya. 4Kun an sarong pamilya dai makakaubos nin sarong hayop, an pamilyang iyan asin an kataed na pamilya pwedeng magbanga kan hayop. An pagbanga gigibohon sosog sa bilang kan mga tawo asin sa kayang kakanon kan lambang saro. 5An pilion nindo pwedeng kordero o kanding alagad kaipuhan na sarong taon an edad kaiyan asin mayo nin kaninan. 6Aatamanon an mga hayop sagkod sa ikakatorseng aldaw kan bulan. Dangan bago magsolnop an aldaw, an mga hayop buburonoon kan bilog na komunidad. 7Makua sinda kan dugo dangan ilalahid ninda iyan sa mga hamba asin sa itaas kan mga pinto kan mga harong na kakakanan ninda kan mga hayop. 8Sa bangging iyan, iihawon an binunong hayop dangan kakakanon kaiba an mapait na gulay asin an tinapay na mayo nin lebadura. 9Dai nindo pagkakanon na hilaw o linabonan an arin man na parte kaini kundi bilog na inihaw, kairiba an payo, an mga bitis, sagkod an mga nasa laog kan tulak. 10Kaipuhan mayo nin matada kaiyan na maagahan pa; kun igwa, dapat na tutongon. 11Kakanon nindo ini nin hidali, asin kaipuhan nakasulot na kamo nin gubing na panlakaw, nakasandalyas asin kapot na an sugkod. Iyo ini an Pyesta kan Paskwa nin Kagurangnan.
12“Sa bangging iyan, maagi ako sa daga nin Egipto asin gagadanon ko an gabos na matuang lalaki, tawo man o hayop. Papadusahan ko an gabos na dios-dios kan Egipto. Ako an Kagurangnan. 13An dugo sa mga hamba asin sa itaas kan mga pintoan iyo an tanda kan mga harong na pinag-eerokan nindo. Sa oras na mahiling ko an dugo, lilihisan ko kamo asin mayo nin mangyayari saindo mantang pinapadusahan ko an mga Egipcio. 14Kaipuhan na selebraron nindo an aldaw na ini bilang sarong pyesta tanganing magiromdoman nindo an sakong ginibo. Gigibohon nindo ini sagkod pa man. Ako an Kagurangnan.”
An Pyesta kan Tinapay na Mayo nin Lebadura
15Nagtaram an Kagurangnan, “Pitong aldaw kamong magkakan nin tinapay na mayo nin lebadura. Sa enot na aldaw, hahaleon nindo an gabos na lebadura sa saindong mga harong huli ta an siisay man na magkakan nin tinapay na igwa nin lebadura sa laog kan pitong aldaw na iyan, dai ko na ibibilang na kaayon sa sakong banwaan. 16Sa enot asin sa ikapitong aldaw magtiripon kamo sa pagsamba. Dai kamo magtrabaho sa mga aldaw na iyan alagad pwede nindong andamon an saindong mga pagkakan. 17Giromdoma nindo ining pyesta kan tinapay na mayo nin lebadura huli ta sa aldaw na ini ilinuwas ko kamo sa Egipto. Giboha nindo an pyestang ini sa gabos na panahon. 18Magpoon sa banggi kan ikakatorseng aldaw kan enot na bulan sagkod sa banggi kan ikabeynte y unong aldaw, dai kamo magkakan nin tinapay na igwa nin lebadura. 19-20Sa laog nin pitong aldaw, kaipuhan na daing makuang lebadura sa saindong mga harong huli ta an siisay man, Israelita o dayuhan, na kumakan nin tinapay na igwa nin lebadura, dai ko na ibibilang na kaayon sa sakong banwaan.”
An Enot Na Paskwa
21Inapod ni Moises an gabos na lider nin Israel dangan sinabihan, “An lambang saro saindo magpili nin sarong kordero o sarong kanding dangan bunoon iyan tanganing an saindong pamilya makapagselebrar kan Paskwa. 22Kumua kamo kan sanga nin isopo, ibuntog nindo iyan sa dugo na nasa palanggana, asin ilahid sa mga hamba saka sa itaas kan mga pinto. Dangan mayo na sa saindong magluwas sa harong sagkod mag-aga. 23Malibot an Kagurangnan sa Egipto tanganing gadanon an mga Egipcio. Sa oras na mahiling niya an dugo sa mga hamba asin sa itaas kan mga pinto, dai niya tutugotan na lumaog an paragadan sa saindong mga harong tanganing gadanon kamo. 24Gibohon nindo an seremonyang ini bilang sarong pagboot sa saindo asin sa saindong mga aki sagkod pa man. 25Ipagpadagos nindo an paggibo kaini kun yaon na kamo sa dagang ipinanuga saindo nin Kagurangnan. 26Kun maghapot an saindong mga aki, ‘Ano an kahulogan kan seremonyang ini?’ 27Masimbag kamo, ‘Iyo ini an paggiromdom kan Paskwa nin Kagurangnan, huli ta ilinigtas niya kami kan lihisan niya an harong kan mga Israelita duman sa Egipto, alagad ginadan niya an mga Egipcio.’”
Dangan nagruluhod an mga Israelita asin nagsaramba. 28Pakatapos, nagpuli sinda asin ginibo an ipinagboot nin Kagurangnan ki Moises saka ki Aaron.
An Pagkagadan kan mga Matuang Lalaki
29Kan matangang banggi, ginadan nin Kagurangnan an gabos na matuang lalaki sa Egipto, magpoon sa matua kan hade na magmamana kan trono, sagkod sa matua kan bilanggo na nasa bilanggoan; ginadan man niya an gabos na matua kan mga hayop. 30Kan bangging idto, nagimata an hade, an saiyang mga opisyal, sagkod an gabos na Egipcio. Nagkaigwa nin makosog na pagtangis sa bilog na Egipto, huli ta mayo nin harong na dai nin gadan. 31Kan mismong bangging idto, ipinaapod kan hade si Moises saka si Aaron asin sinabihan, “Magharale na kamo digdi sa sakong banwaan, kamo asin an kapwa nindo Israelita! Lakaw asin sambaha nindo an Kagurangnan siring sa saindong hinahagad. 32Daraha nindo an saindong mga karnero, mga kanding, sagkod mga baka dangan humale na kamo. Ipamibi man nindo na mabendisyonan ako.”
33Pinapaghidali kan mga Egipcio an mga Israelita sa saindang paghale sa Egipto. Olay ninda, “Magagadan kami gabos kun dai pa kamo maghale digdi.” 34Kaya pinano kan mga Israelita an saindang mga mangko nin minasang arina na mayo nin lebadura, pinatos ini nin yamit dangan pinasan. 35Ginibo man kan mga Israelita an isinabi sainda ni Moises; an mga Egipcio hinagadan ninda nin mga alahas na bulawan saka plata asin mga gubing. 36Pinagmarahay nin Kagurangnan na igalang kan mga Egipcio an mga Israelita tanganing tawan sinda kan saindang hinahagad. Sa siring na paagi, nadara kan mga tawo an kayamanan kan mga Egipcio.
Naghale sa Egipto an mga Israelita
37Naglakaw an mga Israelita hale sa Rameses pasiring sa Sukkot. Maabot sa seis syentos mil an kalalakihan, dai pa kabilang an mga babae saka mga aki. 38Dakul na bakong mga Israelita an nag-iriba sainda. Nagsunod man sainda an dai mabilang na mga karnero, mga kanding, asin mga baka. 39Nagluto sinda nin tinapay na mayo nin lebadura hale sa dara nindang minasa, huli ta kan isubol sinda paluwas sa Egipto, dai na sinda nagkaigwa nin oras na mag-andam nin pagkakan o magmasa nin arina na igwa nin lebadura.
40Nag-erok sa Egipto an mga Israelita sa laog nin kwatro syentos treyntang taon. 41Naghale sinda sa Egipto sa huring aldaw kan ikakwatro syentos treyntang taon. 42An bangging idto iyo an banggi nin pagbantay kan Kagurangnan tanganing iluwas sinda sa Egipto; kaya an bangging idto sarong banggi nin pagbantay na itinalaan para sa Kagurangnan kan banwaan nin Israel sagkod pa man.
Mga Pagboot manongod sa Paskwa
43Nagtaram an Kagurangnan ki Moises asin ki Aaron, “Uya an mga pagboot manongod sa Paskwa: Dai pwedeng magkakan kan inandam para sa Paskwa an dayuhan, 44alagad an binakal nindong oripon pwede nang kumakan kaiyan kun sinerkomsisyon na nindo siya. 45Dai man pwedeng magkakan kaiyan maski an nakikisakat o an nagpapatandan. 46An lambang kordero kaipuhan kakanon sa laog kan harong na pinag-andaman kaiyan; dai nanggad nindo pagdarahon sa luwas an arin man na kabtang kaiyan asin dai nanggad nindo pagbarion an arin man na tolang. 47An bilog na banwaan nin Israel kaipuhan na magselebrar kan pyestang ini. 48Mayo nin siisay man na bakong serkomsisyonado an pwedeng kumakan kan Kordero Pangpaskwa. Kun an sarong dayuhan na nakikihimanwa saindo boot magselebrar kan Paskwa tanganing mag-omaw sa Kagurangnan, kaipuhan serkomsisyonon ngona nindo siya asin an gabos na lalaki sa saiyang harong. Dangan mimidbidon na siya siring sa sarong tunay na Israelita asin pwede na siyang makisumaro sa pagselebrar kan Paskwa. 49Sakop kan mga pagboot na ini an gabos na Israelita asin an mga dayuhan na nakikihimanwa saindo.” 50Nagkuyog an gabos na Israelita asin ginibo an ipinagboot nin Kagurangnan ki Moises saka ki Aaron. 51Kan aldaw na idto, ilinuwas nin Kagurangnan sa Egipto an mga tribu nin Israel.
Nu geselecteerd:
Exodo 12: MBBBIK92
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Marahay na Bareta Biblia © Philippine Bible Society, 1992.
