Exodo 13
13
An Pagkonsagra kan Matuang mga Lalaki
1Nagtaram an Kagurangnan ki Moises, 2“Ikonsagra nindo sa sako an gabos na matuang lalaki, huli ta rogaring ko an lambang matuang lalaking Israelita asin an lambang matuang lalaking hayop.”
An Pyesta kan Tinapay na Mayo nin Lebadura
3Sinabihan ni Moises an mga tawo, “Giromdoma nindo an aldaw na ini—an aldaw kan paghale nindo sa Egipto, an lugar na nag-oripon saindo. Iyo ini an aldaw na ilinuwas kamo nin Kagurangnan huli kan saiyang kapangyarihan. Dai kamo magkakan nin tinapay na igwa nin lebadura. 4Naghahale kamo sa Egipto sa aldaw na ini, sa enot na bulan, an bulan nin Abib. 5Nanuga an Kagurangnan sa saindong mga ginikanan na itatao niya saindo an daga kan mga Cananeo, Heteo, Amoreo, Heveo asin mga Jebuseo. Kun darahon na niya kamo duman sa dagang mayaman sa gabos na bagay, gibohon nindo ining pyesta sa enot na bulan kan lambang taon. 6Sa laog nin pitong aldaw magkakan kamo nin tinapay na mayo nin lebadura asin sa ikapitong aldaw magpyesta kamo para sa Kagurangnan. 7Sa laog nin pitong aldaw dai kamo magkakan nin tinapay na igwa nin lebadura; kaipuhan mayo nin makuang lebadura o tinapay na igwa nin lebadura maski saen sa saindong daga. 8Pagpoon kan pyesta, ipasabot nindo sa saindong mga aki na ginigibo nindo an gabos na ini huli sa ginibo nin Kagurangnan para sa saindo kan maghale kamo sa Egipto. 9An paggibo kaini sarong pagiromdom, arog sa sarong bagay na nakagakod sa saindong kamot o sa saindong angog; magpapagiromdom iyan sa saindo na magpadagos kamo sa pag-adal kan Togon nin Kagurangnan, huli ta ilinuwas niya kamo sa Egipto huli kan saiyang dakulang kapangyarihan. 10Taon-taon gigibohon nindo an pyestang ini sa talaan na aldaw.
An Matuang mga Lalaki
11“Dadarahon kamo nin Kagurangnan sa daga kan mga Cananeo na ipinanuga niya saindo asin sa saindong mga ginikanan. Kun itao na niya iyan saindo, 12idolot nindo sa Kagurangnan an gabos na matuang lalaki. Sadiri nin Kagurangnan an gabos na matuang lalaki kan saindong mga hayop. 13Alagad kaipuhan tuboson nindo nin kordero an lambang matuang lalaking asno. Kun habo nindong tuboson an asno, barion nindo an liog kaiyan. Kaipuhan tuboson nindo an lambang matua nindong aking lalaki. 14Sa maabot na panahon, kun maghapot an saindong aking lalaki kun ano an boot sabihon kan ginigibo nindong ini, sabihan nindo, ‘Huli kan saiyang dakulang kapangyarihan, hinale kami nin Kagurangnan sa Egipto, saen nagin mga oripon kami. 15Kan nagmatagas an hade asin habo niya kaming tugotan na humale, ginadan nin Kagurangnan an lambang matuang lalaki sa daga nin Egipto, tawo man o hayop. Ini an dahelan kun tadaw ta inaatang mi sa Kagurangnan an lambang matuang lalaking hayop, alagad tinutubos mi an samong mga matuang aking lalaki. 16Ini arog sa sarong bagay na nakagakod sa samong kamot o sa samong angog; magpapagiromdom ini samo na ilinuwas kami nin Kagurangnan sa Egipto huli kan saiyang dakulang kapangyarihan.’”
An Hariging Panganoron asin an Hariging Kalayo
17Kan tugotan kan hade nin Egipto na humale na an mga Israelita, dai sinda pinaagi nin Dios sa daga kan mga Filisteo maski iyo ini an pinakaharaning dalan. Nagsaboot an Dios, “Tibaad magbasol an mga tawo asin magbalik sa Egipto kun mapalaban na tolos sinda.” 18Kaya pinalibot niya sinda sa kalangtadan pasiring sa Dagat na Pula,#13:18 DAGAT NA PULA: Sa Hebreyo ini Dagat na Mabariw. Kan itradusir ini sa Griyego, inapod nindang Dagat na Pula. maski andam sinda sa pakilaban pagluwas ninda sa Egipto.
19Dinara ni Moises an mga tolang ni Jose, sa pag-otob sa kahagadan kaini, kan magsabi si Jose, “Kun iligtas na kamo nin Dios, kaipuhan darahon nindo an sakong tolang paghale nindo sa lugar na ini.”
20Naghale sa Sukkot an mga Israelita asin nagkampo sa Etam na nasa tampi kan kalangtadan. 21Kun aldaw, an Kagurangnan nasa harigi nin panganoron, nangengenot tanganing itukdo sainda an dalan; kun banggi, nasa harigi siya nin kalayo tanganing magtao sainda nin liwanag, tanganing makabaklay sinda sa aldaw asin sa banggi. 22Danay na nangengenotan sa mga tawo an harigi nin panganoron kun aldaw asin an harigi nin kalayo kun banggi.
Nu geselecteerd:
Exodo 13: MBBBIK92
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Marahay na Bareta Biblia © Philippine Bible Society, 1992.
