Exodo 11
11
Ipinahayag ni Moises an Kagadanan kan mga Matuang Lalaki
1Dangan nagtaram an Kagurangnan ki Moises, “Saro na sanang padusa an ipapadara ko sa hade asin sa bilog na Egipto. Pakatapos kaiyan, bako sana niya kamong tutugotan na humale kundi isusubol pa niya kamo. 2Kaya sabihan mo an mga Israelita na maghagad nin mga alahas na bulawan saka plata sa saindang kataed.” 3Pinagmarahay nin Kagurangnan na igalang kan mga Egipcio an mga Israelita. Sa katotoohan, dakula an paghiling ki Moises kan mga opisyal kan hade asin kan gabos na tawo.
4Sinabihan ni Moises an hade, “Ini an itinaram nin Kagurangnan, ‘Diyan na matangang banggi malibot ako sa Egipto, 5asin magagadan an gabos na matuang lalaki sa Egipto, magpoon sa matua kan hade na magmamana kan trono sagkod sa matua kan babaeng oripon na paragiling nin trigo, siring man an gabos na matua kan mga hayop. 6Kaya magkakaigwa nin makosog na pagtangis sa bilog na Egipto na dai pa nangyari kaidto o mangyayari ngapit. 7Alagad mayo maski sarong ayam na mangarob sa mga Israelita o sa saindang mga hayop, tanganing maaraman mo na pinalaen ko an mga Israelita sa mga Egipcio.’” 8Tinapos ni Moises an saiyang pagtaram kan siya magsabi, “Marani dangan maluhod sako an gabos mong opisyal asin makikimaherak na humale na ako kaiba an sakong mga kahimanwa. Dangan mahale ako.” Pakasabi kaini, anggot na marahay na binayaan ni Moises an hade.
9Tinaraman nin Kagurangnan si Moises, “Dai ka dadangogon kan hade tanganing ikapahiling ko sa Egipto an dakul pang ngangalasan.” 10Ginibo ni Moises saka ni Aaron an mga ngangalasan na ini sa atubang kan hade, alagad pinatagas nin Kagurangnan an puso kan hade kaya dai niya tinugotan na humale sa saiyang daga an mga Israelita.
Nu geselecteerd:
Exodo 11: MBBBIK92
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Marahay na Bareta Biblia © Philippine Bible Society, 1992.
