Génesis 15
15
Swa Kꞌane Jehová Yetoj Naj Abram
1Jaꞌ yet jix lawi ecꞌ wan tuꞌ xin, jix kꞌanabꞌ Jehová yetoj Abram yin weyicheal, jix yalon Jehová tet naj jaxca tiꞌ:
—Jaach Abram, manche jaach xiwi, jain oj jaach jin coloꞌ, caw miman ja pajtzebꞌal oj ja chaꞌ, ẍi Jehová.
2-3Catuꞌ jix takꞌwi Abram jaxca tiꞌ:
—Jaach Waawil jin Reyal, ¿tzet wal yopiso jun spajtzebꞌal tuꞌ wu an? Ja wotaj sicꞌlebꞌil tol cꞌam junoj wuninal jix ja wakꞌa, yet chi yiꞌon can oc masanil tzet ey, ey jin, yuxan jaꞌ mactxequel oj iꞌon can oc masanil jin tzetyetal tiꞌ, jaꞌton naj jin chejabꞌ Eliézer, naj a Damasco.
4Jix yalon Jehová tet naj Abram jaxca tiꞌ:
—Cꞌamaj, jaꞌcaw jun ja cꞌaal oj iꞌon can ocoj, catuꞌ manaj naj comon ánima tuꞌ oj iꞌon can ocoj.
5Catuꞌ jix iꞌle eltej Abram tuꞌ stiꞌ na yu Jehová, jix yalon tet jaxca tiꞌ:
—Il ton abꞌ yili atoj satcan tuꞌ, bꞌiston abꞌ wan weycan tuꞌ, ta chi bꞌischa ebꞌ ja wu. Jaxca ton tuꞌ oj yun sbꞌisil ebꞌ ja wicꞌaal, ẍi Jehová. 6Jix yaon oc Abram yin scꞌul tzet jix yal Jehová, yu jun tuꞌ, caw watxꞌ cꞌal jix yun scan naj yul sat Jehová. 7Jix yalon pax Jehová tet naj jaxca tiꞌ:
—Jain ton Jehová jin, jain jix jaach wiꞌeltej bꞌey conobꞌ Ur, yul yet Caldeo yu wakꞌon jun ja majul txꞌotxꞌ tiꞌ ey jaach.
8—Jix yalon Abram jaxca tiꞌ: Jaach Waawil jin Reyal, ¿tzet wal chi yun wotajne el sicꞌlebꞌil, ta tol yel oj oc jun txꞌotxꞌ tiꞌ wetoj an? ẍi naj Abram tuꞌ. 9Jix yalon Jehová tet naj jaxca tiꞌ:
—Iꞌtej junoj noꞌ kꞌopo wacax ey jin, cꞌal junoj noꞌ chiw, yetoj junoj noꞌ icham meꞌ; oxebꞌ abꞌil skꞌinal junjun noꞌ, catuꞌ cha wiꞌontej junoj noꞌ cuateꞌ, cꞌal junoj noꞌ uch.
10Jix yiꞌontej masanil wan noꞌ noꞌ tuꞌ naj Abram sattaj Jehová, catuꞌ jix spoꞌon ey snan junjun noꞌ. Jaccombꞌa jix yute nannan noꞌ tuꞌ, jal noꞌ tzꞌiquin xin, ma spoꞌoey snan naj. 11Chi ey noꞌ miij yibꞌan noꞌ chiꞌbꞌe tuꞌ, jaꞌ naj Abram chi ujten el noꞌ. 12Jaꞌ yet jix kꞌejbꞌi eyoj, caw jix qꞌueyel scꞌul Abram tuꞌ yu weyan, caw jix xiwa sicꞌlebꞌil yutol caw kꞌej jolinaj xa. 13Jix lawi tuꞌ, jix yalon Jehová tet naj Abram jaxca tiꞌ:
—Sowalil cha wotajne eloj tol jaꞌ ebꞌ ja wicꞌaal, oj toj caey ebꞌ bꞌey junojxa txꞌoj conobꞌal, catuꞌ oj oc ebꞌ yin yakꞌomaloj servil. Oj etex ebꞌ sicꞌlebꞌil yin 400 abꞌil. 14Yu jun tuꞌ xin, jain oj waoc syaꞌilal yibꞌan jun conobꞌ bꞌey oj oc ebꞌ yin yakꞌomaloj servil tuꞌ. Oj lawoj tuꞌ xin, catuꞌ oj eltej ebꞌ ja wicꞌaal bꞌey jun conobꞌ tuꞌ, yetoj miman sbꞌeomal. 15Jal jaach, jaach tiꞌ xin, oj jaach cam yin watxꞌcꞌulal, yet caw icham jaachxa. 16Yet scan tujanxa icꞌaaleal ebꞌ ja wicꞌaal oj ecꞌ eloj, catuꞌ oj meltzo pax tej ebꞌ junelxa titiꞌ, yutol jaꞌ ebꞌ Amorreo caan ecꞌ tinaniꞌ caw pena sbꞌeybꞌal ebꞌ, yuxan ey jun cꞌual oj wiꞌel ebꞌ an, ẍi Jehová.
17Jaꞌ yet akꞌbꞌalilxa, catuꞌ jix xꞌoxon a sbꞌa jun miman kꞌakꞌ tol chi a smucꞌal, caw naat chi a xaj. Chi ecꞌ snan xol ẍiꞌbꞌeal noꞌ noꞌ jaccombꞌa ye tuꞌ, jaꞌton noꞌ makꞌbꞌil cam tuꞌ. 18Jaꞌ yet jun cꞌual tuꞌ, jix yal can jun swa kꞌane Jehová yetoj Abram yin junelne, jix yalon jaxca tiꞌ:
—Jaꞌ jun txꞌotxꞌ tiꞌ oj wakꞌ tet ebꞌ ja wicꞌaal, chi tit tacꞌal txꞌotxꞌ bꞌey jaꞌ jaꞌ bꞌey Egipto,#15:18 Jaꞌ jaꞌ chi bꞌey ecꞌtoj bꞌey Egipto chi yalaꞌ, manaj jaꞌ Nilo chi yalaꞌ, jaꞌton jaꞌ chi yij sbꞌi, “el Arish” tinaniꞌ, jaꞌ chi tit yin scꞌul wonan Sinaí, chi apni oc bꞌey stiꞌ jaꞌ Mar Mediterráneo. masantaꞌcꞌal bꞌey jaꞌ miman Éufrates. 19Chi yal yeloc apnoj, jaꞌton txꞌotxꞌ yet ebꞌ Quenita, ebꞌ Quenezeo, cꞌal ebꞌ Cadmoneo, 20txꞌotxꞌ yet ebꞌ Hitita, ebꞌ Ferezeo, ebꞌ Refaíta, 21cꞌal txꞌotxꞌ yet ebꞌ Amorreo, ebꞌ Cananeo, ebꞌ Gergeseo cꞌal ebꞌ Jebuseo, ẍi Jehová.
Nu geselecteerd:
Génesis 15: knj
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2016, Wycliffe Bible Translators, Inc. All rights reserved.
