Génesis 16
16
Ix Agar Yetoj Naj Yuneꞌ Chi Yij Ismael
1Jaꞌ ix Sarai yistil naj Abram, man cꞌaltaꞌ uneꞌwom ix oj ix, yu jun tuꞌ xin, ey jun ix yakꞌomal servil ix chi yij Agar, a Egipto ix. 2Jix yalon ix Sarai tet yichamil tuꞌ jaxca tiꞌ:
—Ilaꞌ tol cꞌam wuneꞌ chi yakꞌ Jehová, yuxan chi wal ey jaach an, tol chach wey yetoj ix wakꞌomal servil tiꞌ, tala chi jul junoj yuneꞌ ix tol chi oc wuneꞌ oj, ẍi ix.
Jix ẍaꞌ scꞌul naj Abram tzet jix yal ix Sarai tuꞌ. 3Jaꞌ yet laonebꞌxa abꞌil scaey ecꞌ ebꞌ bꞌey Canaán, jix yaon oc jun yakꞌomal servil ix Sarai tuꞌ yul skꞌabꞌ Abram tuꞌ, yet chi oc ix scaabꞌ yistiloj naj. 4Jix wey naj Abram yetoj ix Agar tuꞌ, catuꞌ jix can unin yin ix. Jaꞌ yet jix yabꞌen ix tol eyxa oc unin yin, yu jun tuꞌ, cꞌamxa yeloc apnoj ix Sarai tuꞌ yul sat ix. 5Jix lawi tuꞌ, jix yalon ix Sarai tet naj Abram tuꞌ jaxca tiꞌ:
—Ja wu cꞌal, yuxan yeynajil chin yute ix jix wakꞌ ja wistiloj tiꞌ. Ilaꞌ tol jain jix wakꞌ ix ja wistiloj, jajxam wal yet oj aloj yuneꞌ ix tuꞌ, yel xacꞌal mi miman oj yun yeloc apnoj ix ey jin chi yute snaꞌoni. Jaꞌ ojabꞌ Jehová chi naꞌon oc kin ja wetoj, jaach mi ey ja mul ma jain an, ẍi ix Sarai tuꞌ. 6Catuꞌ jix takꞌwi naj Abram tuꞌ jaxca tiꞌ:
—Jaꞌ ix kakꞌomal servil tiꞌ, yul ja kꞌabꞌ eyoc ix. Jaach cha naꞌ tzet cha wute ix, ẍi naj tet ix. Yu jun tuꞌ, jix oc ian yetnele ix Agar yu ix Sarai tuꞌ, masantaꞌcꞌal jix ela ix. 7Jaꞌ yet tuꞌ, ey jun yángel Jehová jix ẍaꞌle el sbꞌa yetoj ix bꞌey jun cusiltaj txꞌotxꞌ, bꞌey scawilal stiꞌ jun jaꞌ jaꞌ bꞌey chi toocan sbꞌeal Sur. 8Jix skꞌanlen tet ix jaxca tiꞌ:
—Jaach Agar, jaach yakꞌomal servil ix Sarai. ¿Bꞌeytuꞌ jix jaach titocoj? ¿Catuꞌ bꞌeytuꞌ chach toocoj? ẍi tet ix.
—Tol chin ela tet ix Sarai, ix chi wakꞌ servil, ẍi ix.
9Catuꞌ jix yalon jun yángel Jehová tuꞌ tet ix jaxca tiꞌ:
—Meltzaantoj bꞌey ix Sarai tuꞌ, jijem cha wute ja bꞌa tet ix, ẍi.
10Jix yalon cꞌal pax jun yángel Jehová tuꞌ tet ix jaxca tiꞌ:
Oj wakꞌ chꞌibꞌ sbꞌisil ebꞌ ja wicꞌaal, cꞌam mactxequel oj skeꞌ sbꞌischa yu.
11Yutol eyxa oc unin ja win, yuxan jaꞌ yet oj aloj jun ja wuneꞌ tuꞌ, Ismael,#16:11 Ismael chi yal yeloc apnoj, “chi yabꞌ Jehová”. oj ja wakꞌ yij sbꞌi, yutol jix yil Jehová ja cuscꞌulal.
12Yu jun tuꞌ, caw jelan oj eloc jun unin tuꞌ, jaxca junoj noꞌ xol-lajil teꞌ che. Oj yakꞌ jowal naj yetoj ebꞌ ánima, catuꞌ oj yakꞌon pax jowal ebꞌ ánima yetoj naj. Oj caey ecꞌ naj bꞌey chi yoche scꞌul caxcꞌal cꞌam chi chaꞌle naj yu ebꞌ yican, ẍi jun ángel tuꞌ.
13Yutol jix kꞌanabꞌ ix Agar yetoj Jehová, yu jun tuꞌ jix yalon ix yin Jehová jaxca tiꞌ: Jaꞌ Jehová wilomal. Caw yel jix wil yin Jehová, yutol jaꞌ chin iloni, ẍi ix. 14Yu jun tuꞌ, jix yakꞌon yij sbꞌi jun ucꞌbꞌal jaꞌ tuꞌ ix jaxca tiꞌ: Ucꞌbꞌal jaꞌ yet Jehová iquis, chin yilon pax oj, ẍi ix. Queytuꞌ sbꞌi jun ucꞌbꞌal jaꞌ ey snan xol Cadés yetoj Béred. Jix lawi tuꞌ, jix meltzo cꞌaltaꞌ ix bꞌey eyecꞌoj.
15Jix ali jun yuneꞌ ix Agar yetoj Abram, winaj unin, jix yakꞌon yij sbꞌi Ismael. 16Jaꞌ naj Abram ey 86 abꞌil skꞌinal, yet jix ali naj Ismael tuꞌ.
Nu geselecteerd:
Génesis 16: knj
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2016, Wycliffe Bible Translators, Inc. All rights reserved.
