Génesis 14
14
Jix Colcha Can El Naj Lot Yu Abram
1Jaꞌ yet jun tiempoal tuꞌ, jaꞌ naj Amrafel eyoc yin reyal bꞌey Babilonia, jaꞌ naj Arioc eyoc reyal bꞌey Elasár, jaꞌ naj Quedorlaómer, eyoc reyal bꞌey Elam, jaꞌ naj Tidal eyoc reyal bꞌey Goím. 2Jaꞌ ebꞌ canwan tiꞌ jix yakꞌle jowal ebꞌ yetoj jowanxa ebꞌ rey: Jaꞌton ebꞌ tiꞌ: Bera, sreyal Sodoma, Birsá sreyal Gomorra, Sinab sreyal Admá, Seméber sreyal Seboím, cꞌal yetoj sreyal Bela, jacꞌal oc jun conobꞌ tuꞌ chi yij pax Sóar. 3Jaꞌ ebꞌ jowan rey tiꞌ, jix swa alne ebꞌ, catuꞌ jix syambꞌan ey soldado ebꞌ bꞌey jun acꞌal chi yij Sidim, bꞌey ey jaꞌ Camnaj Mar. 4Jaꞌ ebꞌ rey tuꞌ, lacawebꞌxa abꞌil yeoc ebꞌ yalan ẍejbꞌanil naj rey Quedorlaómer, jaꞌ yet yoxlajonebꞌ abꞌil xin, jix snaꞌon ebꞌ tol cꞌamxa chi yakꞌ stoolabꞌal ebꞌ jaxca yalon sley naj rey tuꞌ. 5Jaꞌ yet junxa abꞌil, jix too naj rey tuꞌ yetoj ebꞌ oxwan rey eyoc yetoj, bꞌey yul yet Astarot Carnaim. Jaꞌ tituꞌ jix eyqꞌuey ebꞌ naj Refaíta yu ebꞌ, catuꞌ jix eyqꞌuey pax ebꞌ naj Zusita yu ebꞌ bꞌey yul yet Ham, jaꞌ ebꞌ naj Emita jix akꞌon eyqꞌuey ebꞌ bꞌey Savé-quiriataim. 6Jal ebꞌ naj a Horeo xin, jix eyqꞌuey ebꞌ naj bꞌey txꞌotxꞌ wonan chi yij Seír, ujtebꞌil oc ebꞌ naj masantaꞌcꞌal bꞌey jun miman acꞌal bꞌey Parán, bꞌey scawilal txꞌotxꞌ cusiltaj txꞌotxꞌ. 7Jaꞌ yet jix meltzotej naj rey Quedorlaómer cꞌal masanil ebꞌ jaꞌjun yetoj naj, jix apni oc ebꞌ bꞌey En-mispat, jacꞌal oc jun txꞌotxꞌ tuꞌ chi yij pax Cadés. Jaꞌ tituꞌ jix yakꞌ can lawoj el masanil tzet jix chaꞌlo yul-laj bꞌe yu ebꞌ, yul yet ebꞌ Amalecita. Quey pax tuꞌ jix yute cꞌal can ebꞌ Amorreo ey yul yet Hasesón-tamar.
8Jaꞌ ebꞌ jowan rey tuꞌ, jaꞌton naj yet Sodoma, naj yet Gomorra, naj yet Admá, naj yet Seboím, cꞌal naj yet Bela, jix too ebꞌ sjowanil bꞌey txꞌotxꞌ miman acꞌal yul yet Sidim. 9Jaꞌ tituꞌ jix yakꞌ jowal ebꞌ naj yetoj ebꞌ rey tuꞌ, jaꞌton Quedorlaómer, Tidal, Amrafel, cꞌal Arioc. Jaꞌ ebꞌ tiꞌ rey ebꞌ bꞌey Elam, bꞌey Goím, bꞌey Sinar cꞌal bꞌey Elasár. 10Jaꞌ masanil txꞌotxꞌ miman panan yet Sidim, ecꞌal bꞌey chi aol snukꞌ jun chi yij asfalto natural, laan yili jaxca scꞌolal teꞌ ta. Yu jun tuꞌ xin, jaꞌ yet jix ela ebꞌ sreyal Sodoma cꞌal Gomorra tuꞌ, ey ebꞌ soldado jix toocan bꞌey yul-laj wan jolan tuꞌ, jal wanxa ebꞌ xin, jix too ebꞌ yewbꞌa el sbꞌa bꞌey sjolomlaj wonan.
11Jaꞌ ebꞌ canwan rey jix akꞌon ganar jowal tuꞌ, jix bꞌet ebꞌ yiꞌ cantej masanil loꞌbꞌe, cꞌal masanil tzet caw ey stool bꞌey Sodoma, cꞌal bꞌey Gomorra, jix lawi tuꞌ catuꞌ jix too ebꞌ. 12Jal pax Lot, naj yuninal yuẍtaj Abram, jatuꞌ caan naj bꞌey Sodoma, yuxan jix iꞌletoj jaxca presowomal yu ebꞌ, yetoj masanil stzettaj yetal ey tet. 13Ey jun naj jix elcan xol jowal tuꞌ, jaꞌ naj jix bꞌet alon tet Abram, naj Hebreo, tol jix iꞌletoj Lot yin presowomal. Jatuꞌ caan naj bꞌey scawilal wan teꞌ jii sat xꞌotxꞌ naj chi yij Mamré, naj Amorreo. Jaꞌ naj Mamré tuꞌ, yuẍtaj sbꞌa yetoj naj Escol, cꞌal yetoj Aner. Jaꞌ ebꞌ tuꞌ, yetoj Abram eyoc ebꞌ.
14Jaꞌ yet jix yabꞌen Abram tol jix iꞌletoj Lot yin presowomal, catuꞌ jix syambꞌan oc masanil ebꞌ ẍejabꞌ tol cuybꞌil yin jowal, jaꞌton ebꞌ alinaj yul sna, ey 318 ebꞌ yin masanil. Jix lawi tuꞌ, catuꞌ jix oc tzajan ebꞌ yintaj ebꞌ canwan rey tuꞌ, jatuꞌ jix michꞌcha ebꞌ yu ebꞌ bꞌey conobꞌ Dan. 15Jaꞌ yet akꞌbꞌalil, jix poꞌole ecꞌ masanil ebꞌ winaj jaꞌjun yetoj naj Abram tuꞌ, catuꞌ jix too lemna ebꞌ yin jowal yin ebꞌ canwan rey tuꞌ, jix yujten ebꞌ masantaꞌcꞌal jix apni oc ebꞌ bꞌey Hobá. Jaꞌ jun txꞌotxꞌ tuꞌ, jatuꞌ ey sattajto conobꞌ Damasco. 16Jix iꞌle can ecꞌ masanil tzet yetbꞌi oc ebꞌ yu Abram. Jaxca tuꞌ jix yun scolcha can el naj Lot yetoj cꞌal masanil stzetyetal; jix colcha pax can el ebꞌ ix ix, cꞌal ebꞌ naj winaj jix iꞌletoj yu ebꞌ tuꞌ.
Jix Yal Watxꞌ Kꞌane Naj Melquisedec Yibꞌan Abram
17Jaꞌ yet jix eyqꞌuey naj rey Quedorlaómer yu ebꞌ rey eyoc yetoj naj Abram, jix meltzo naj yetoj ebꞌ jix colcha can yu tuꞌ, catuꞌ jix eltoj naj sreyal Sodoma tuꞌ ẍaꞌon Abram bꞌey jun spananil stiꞌ jun jobꞌe chi yij Savé, chi yij pax sjobꞌeal Rey. 18Jaꞌ Melquisedec, sreyal Salem, yalomal oc stiꞌ ebꞌ ánima tet Jehová, Naj tol Jaxa Cꞌal Ocoj, jix yakꞌ ixim pan yetoj yal uva tet naj Abram. 19Jix yalon watxꞌ kꞌane yibꞌan Abram jaxca tiꞌ:
Yakꞌ ojabꞌ swatxꞌcꞌulal Jehová ja wibꞌan, Naj tol Jaxa Cꞌal Ocoj, Naj jix waꞌnen satcan cꞌal txꞌotxꞌ txꞌotxꞌ tiꞌ.
20Al-le ojabꞌ watxꞌ kꞌane yin Jehová tol asanxane miman yeloc apnoj, jaꞌ jix colwa ja wetoj, yet jix eyqꞌuey ebꞌ ja cajat ja wu, ẍi tet Abram.
Jix lawi tuꞌ, jix yakꞌon sdiezmoal naj Abram tet Melquisedec jantaj tzet jix bꞌet yiꞌcan ecꞌ tet ebꞌ rey tuꞌ. 21Jix yalon naj sreyal Sodoma tet Abram jaxca tiꞌ:
—Asanne ebꞌ ánima cha wakꞌ ey jin, jal masanil tzetyetal xin, chi can ey jaach, ẍi naj tet Abram tuꞌ.
22Catuꞌ jix takꞌwi Abram tet jaxca tiꞌ:
—Tuxa jix wakꞌ jin tiꞌ tet Jehová Naj tol Jaxa Cꞌal Ocoj, Naj jix waꞌnen satcan, cꞌal txꞌotxꞌ txꞌotxꞌ tiꞌ, 23tol cꞌam niꞌoj tzet oj wiꞌtoj xol masanil tzetyetal ey, ey jaach, cꞌam cꞌal niꞌoj txꞌal ma junoj xꞌanil xanabꞌe oj wiꞌtoj, yet watxꞌ cꞌam cha walaꞌ tol ja wu catuꞌ oj jin oc bꞌeomal. 24Cꞌam niꞌoj tzet jix bꞌet wiꞌecꞌ tuꞌ chi woche chi waloc wetoj, asan tzet chi sloꞌ ebꞌ jin chejabꞌ jaꞌjun wetoj tiꞌ, jaꞌton Aner, Escol, cꞌal yetoj Mamré, jaꞌ ebꞌ naj tiꞌ, oj skeꞌ ẍaꞌon yet ebꞌ naj, ẍi naj Abram.
Nu geselecteerd:
Génesis 14: knj
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2016, Wycliffe Bible Translators, Inc. All rights reserved.
