Génesis 13
13
Skꞌaneal Yet Jix Spoꞌon Sbꞌa Abram Yetoj Naj Lot
1Jaꞌ yet jix el Abram yetoj yistil bꞌey Egipto yetoj cꞌal masanil stzettaj yetal, jix meltzotoj ebꞌ yul yet Négueb, jaꞌjun naj Lot jix too yetoj ebꞌ. 2Jaꞌ Abram tuꞌ caw bꞌeomxa, mimanxa stumin ey chꞌen oro cꞌal chꞌen plata ey tet naj, cꞌal noꞌ noꞌ jobꞌbꞌil yu. 3Jix el bꞌey Négueb tuꞌ. Cꞌuancꞌulal jix apni oc yul yet Betel bꞌey ecꞌnaj yet sbꞌabꞌelal, bꞌey snan xol Betel tuꞌ yetoj Ai. 4Jaꞌ tituꞌ waꞌnebꞌil can jun yet xaambꞌal yu yet tax yalantoj. Jaꞌ tituꞌ jix txali naj Abram tet Jehová junelxa.
5Jal Lot tuꞌ, caw bꞌeom cꞌal pax naj jaxca cꞌal pax yuẍtaj Abram tuꞌ, caw miman sbꞌisil smeꞌ yetoj swacax, cꞌal ẍejabꞌ chi mulna yetoj. 6Cꞌamxa chi yabꞌ txꞌotxꞌ txꞌotxꞌ bꞌey chi low sjobꞌbꞌeal noꞌ ebꞌ. Cꞌamxa chi skeꞌ tol junne chi eecꞌ ebꞌ scawanil. 7Jaꞌ ebꞌ naj yilomal smeꞌ Abram chi yakꞌle jowal ebꞌ naj yetoj ebꞌ naj yilomal smeꞌ naj Lot. Jaꞌ yet jun tiempoal tuꞌ, caan to ecꞌ ebꞌ Cananeo, cꞌal ebꞌ Ferezeo tituꞌ. 8Yuxan ey jun cꞌual jix yal Abram tet naj Lot jaxca tiꞌ: Caw wal jaonto cꞌal ocoj. Ma skeꞌ kakꞌlen jowal, tam wal ebꞌ naj yilomal cu meꞌ tiꞌ ma skeꞌ yakꞌlen jowal ebꞌ naj. 9Jaꞌ masanil jun cu txꞌotxꞌ tiꞌ, colan yin txꞌotxꞌ. Chi skeꞌ ja sicꞌlen bꞌey chach cani, yet watxꞌ chi cu poꞌole cu bꞌa. Ta chach can yinel tiꞌ, jain xa chin toocan yinoc tuꞌ. Ta chach can yinoc tuꞌ xin, jain xa chin can yinel tiꞌ, ẍi naj Abram tuꞌ tet naj Lot.
10Catuꞌ jix too tꞌanan naj Lot bꞌey jun miman acꞌal bꞌey stiꞌ jaꞌ Jordán tuꞌ, masantaꞌcꞌal chi apni bꞌey conobꞌ Sóar. Ey jun jaꞌ jaꞌ bꞌey jun miman acꞌal tuꞌ, laan yili jaxca Edén bꞌey ey teꞌ awbꞌeal teꞌ yu Jehová, ma jaxca yili txꞌotxꞌ txꞌotxꞌ bꞌey Egipto, jaxca wal tuꞌ yili jix yil naj. Jaꞌ yet jix yalon jun swa kꞌane naj Abram tuꞌ yetoj Lot, cꞌamto chi qꞌueyle el Sodoma cꞌal Gomorra yu Jehová. 11Jaꞌ jun spananil bꞌey stiꞌ jaꞌ Jordán tuꞌ, jaꞌ jix sicꞌ can el naj Lot. Yu jun tuꞌ, jix apni oc caan yetcꞌulal bꞌey chi aol cꞌu, jaxca ton tuꞌ jix yun spoꞌolen sbꞌa Abram yetoj Lot. 12Jal naj Abram xin, jix cancan yul yet txꞌotxꞌ Canaán, jal pax Lot xin, jix cancan xol ebꞌ txꞌoj conobꞌal bꞌey spananil stiꞌ jaꞌ Jordán, bꞌey scawilal conobꞌ Sodoma, jaꞌ tituꞌ jix caey ecꞌoj. 13Jaꞌ bꞌey jun conobꞌ tuꞌ caw cꞌam swatxꞌil sbꞌeybꞌal ebꞌ ánima, caw miman spenail chi el yunen ebꞌ sattaj Jehová.
14Jaꞌ yet jix too naj Lot tuꞌ xin, jix yalon Jehová tet Abram jaxca tiꞌ: Jaꞌ tinaniꞌ iltoj ja sattaj, cꞌal ja wintaj, cꞌal bꞌey chi aol cꞌu cꞌal bꞌey chi too cꞌu. 15Jaꞌ masanil jun txꞌotxꞌ lalan ja wilon tiꞌ, jain chi wakꞌ ey jaach yin junelne, catuꞌ yet cꞌal pax masanil ebꞌ ja wicꞌaal oj yun can ocoj. 16Jaxca wal spojojal txꞌotxꞌ txꞌotxꞌ, cꞌam mac chi skeꞌ sbꞌisoni, queytuꞌ oj yun sbꞌisil ebꞌ ja wicꞌaal. 17Jaꞌ tinaniꞌ xin, aan waanoj catuꞌ cha bꞌeytzen masanil steel cꞌal sat jun txꞌotxꞌ tiꞌ, yutol chi wakꞌ jun txꞌotxꞌ tiꞌ ey jaach, ẍi Jehová tet Abram tuꞌ.
18Yu jun tuꞌ xin, jix yiꞌon a naj Abram tuꞌ jun sna waꞌnebꞌil a yetoj kꞌap, catuꞌ jix too caey scawilal wan teꞌ jii bꞌey sat xꞌotxꞌ jun winaj chi yij Mamré, scawilal conobꞌ Hebrón. Jaꞌ tituꞌ jix swaꞌne a jun yet xaambꞌal yet chi yiꞌon ey sbꞌa sattaj Jehová.
Nu geselecteerd:
Génesis 13: knj
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2016, Wycliffe Bible Translators, Inc. All rights reserved.
