Luk 24
24
1Nandi o buhwa boa wiki boa bohoboho ka bâ na bapâkwě, ba punda n‘ ubwa ka bâ‐ba viya o malonga, ba valanaka belombo bea kango beabu be kanjakidě. 2Ka bâ‐ba kâbidě ilale vunguludwěngo oviya o malonga. 3Ka bâ‐ba ngiya, ndi bu kâbâkidě ekengo ea Upangiyi Jisus. 4E diyakindi, o bâ‐ba diyakidi ba nakaka opěla těně, hilakěte, bamo babale ba diyakidi na ngâi i panyakě de piělě na bâ; 5o bâ‐ba diyakidi ba bangaka ka bâ‐ba balidě meoho meabu o he, bâ na bâ, na, O butaka lě ni A di mihâ o ba wewe ba didi na nde? 6A ibě okava, ndi A pumbuwendi; yongakiděni ka Mâ‐a kalakidi n‘ inyěni o Mâ‐a diyakite a ngite o Galili, 7na, Mwana moto a ka bweyudwěndi o makadu ma bato babe, na Mâ‐a kâmudwě o krâs, o buhwa bo‘ ilalo na Mâ‐a umuwa pě. 8Ka bâ‐ba yongidě ndaga jaju. 9Ka bâ‐ba timba oviya malonga, na pâdě sango ea belombo těkabe beěhěpi o jomu n‘ umbâkâ na bapâkwě běhěpi. 10Ba diyakindi Meri Magdalini na Joana, na Meri nyangwě ea Jems, na bajo bapâkwě ba diyaki na bâ, ba langwakiyedi metodu belombo těkabe. 11Ndaga jabu i yěněněkindi o bâ‐ba jadi ka bekalěkalě; bu kamikidě bâ. 12Jâ ndi ja Pitě ja umuwa, na vala membila o malonga; ka mâ‐a balama, ka mâ‐a yěně menamba mea liněn iboko n‘ iviabu bya, ka mâ‐a timba, a kěkě a mamaka n‘ ulema muaju belombo tě be hamidi.
13Umbwakiyate, o boâ buhwa tě babale ibabu ba diyakidi ba kěkě o ibâkâ dina na Emaus, i diyakidi mabo ma furlâng utoba oviya Jěrusalěm. 14Ka bâ‐ba hova elâmbě bâ mětě na bâ mětě o pělě ea belombo tě be hamidi ekabe beěhěpi. 15E diyakindi, o bâ‐ba diyaki ba hovaka elâmbě, na bâ ba batanakě, ka Jisus Mâ mětě a bakama, na kěkě na bâ. 16Ndi mihâ mabu ma himbakudwěndi na ba yowakě Mâ. 17Ka Mâ‐a vâ na bâ, na, Ma lě nja mangâ e ma ndaga imanyu ma kěkě o kěkě o bomakani penda inyěni mětě n‘ inyěni mětě o inyěni o tamwakě na ngěbe ekama? 18Ka uabu umbâkâ, a diyakidi dina na Kliopas, a timbwana ka mâ‐a vâ na Mâ, na, O ndi mětě mwěngi o Jěrusalěm, ka âvě o ha wě yowakě belombo be di hamango omě o hwi těkadi ekabe? 19Ka Mâ‐a vâ na bâ, na, Nja belombo e? Ka bâ‐ba vâ na Ju, na, Bea Jisus ea Nasarět, momo a diyakidi usâki u kenakidi na behadi na ndaga o boho boa Anyambě na bato běhěpi: 20ka prist ja meolo na bapangiyi bahu ba bweyidě Mâ o yěkě e‘ iwedo, ka bâ‐ba kâmidě Mâ c krâs. 21Ndi ho ma pitakiděndi na Mâ nd‘ a ’mbakid‘ o vanguwa Israěl: ndi tombe beěhěpi ekabe, o buhwa ndi buhwa bo‘ ilalo na belombo těkabe na hama. 22E, na bajo ba njamb‘ ’ahu bâkâ ba ma punda o malonga, ba pangi hwě ho mamaka; 23o bâ‐ba ha duwedi ekengo ’aju, ka bâ‐ba timba, ka bâ‐ba vâ, na, ba ma yěně tepě ehihila ea enjěl, i ma languwa bâ na A bi mihâ. 24Ka ba di na hwě bâkâ ba vala tepě o malonga, ka bâ‐ba kâbidě tepě ka bajo ba ma vâ: ndi Mâ ndi uabu a ha yěněkidi. 25Ka Mâ‐a vâ na bâ, na, A! betiketike, na melema me di bodilo n‘ ikamidě ja beěhěpi bea basâki be kalakidi: 26Kraist au lukaka o yěně njuke těkadi, na ngiya o ivenda jaju? 27Ka Mâ‐a yalě na Mosěs na basâki bapâkwě běhěpi, A ka pěhěkiyě bâ Ilěndwě jěhěpi belombo bea pělě ’aju mětě. 28Ka bâ‐ba bakama o ibâkâ jabu i kěkidi: ka Mâ‐a ha bwěsě ona A ’mbaka o tomba yaviděngo kwěi. 29Ndi ba pinyilakidi Mâ, na, Yěngěkidě na hwě; ’kabojana ea bi kolo, na buhwa bo tângâmindi. Ka Mâ‐a ’la ka yěngidě o bâ‐ba jadi. 30E diyakindi, o bâ na Ju ba diyanakidě o beja, ka Mâ‐a nângâ pěmbě, ka Mâ‐a vambiya eâ ibâtâ, ka Mâ‐a pěhě, ka Mâ‐a vě bâ. 31Ka mihâ mabu ma bumuwa, ka bâ‐ba yowě Mâ; ka Mâ‐a nyângiyě bâ mihâ mabu. 32Ka bâ‐ba vâ bâ mětě na bâ mětě, na, Ulema muahu mu diyate u ka kandakiyate hwě utema, o Mâ‐a ma kala na hwě o njeya, na o Mâ‐a ma bumudě Malěndwě o hwě ho jadi? 33Ka bâ‐ba těmě o jâ iwěla tě ka bâ‐ba timba o Jěrusalěm, na bâ‐ba kâbidě jomu n‘ umbâkâ, na ba diyaki na bâ yolaněngo, 34na, Upangiyi a pumbuwendi pâkwěpâkwě, A ma pumiyand‘ o Saimân a didi. 35Ka bâ‐ba pakuwa belombo be hamakid‘ o njea, na nyang‘ ’abu e yowakidě Mâ, na ipěhě ja pěmbě.
36O bâ‐ba kalaki kakana, ka Jisus mâ mětě A těmě o hanganě ’abu, ka Mâ‐a vâ na bâ, na, Jonga n‘ inyěni. 37Ndi ba diyakindi na jângâ, na bâ‐ba pikiliya na ba yěnindi ilina. 38Ka Mâ‐a vâ na bâ, na, O yěněkě li njuke ea nde? mapikiliya ma umwaka li o melema meanyu na nde? 39Hilakěni makadu mamě na matambi mamě, na A t‘ Umba mětě: ta kupani ’Mba ni, oa yěněni; ’kabojana ilina i ’bě na mehoni na bevehe, k‘ inyěni o yěněki ’Mba ni Mbi jadi. 40O Mâ‐a bi nonaně vângo, ka Mâ‐a levidě bâ makadu maju na matambi maju. 41O bâ‐ba diyakidi ba t‘ o kamidě na mbya, ba mamaka, Mâ na bâ, na, O bi na beja okava? 42Ka bâ‐ba vě Mâ ekulu ea ’jaka bo upakwě, na ea ekoda ea boyi. 43Ka Mâ‐a nângâ beâ, ka Mâ‐a ja beâ o pwanj‘ ’abu.
44Ka Mâ‐a vâ na bâ, na, Ndaga jamě i kalakidi n‘ inyěni o ’Mba‐mbi diyakidi Mbi ngite n‘ inyěni, nd‘ ekadi; na belombo beěhěpi be ka timwěndi, be di lěndwěngo o Elekanako ea Mosěs, na o basâki, na o Psamu o pěl‘ ’amě. 45Jâ ndi jaju ja bumudě bâ mapikiliya mabu, na ba bweyakidě Malěndwě, 46ka Mâ‐a vâ na bâ, na, E lěndwěngo kakana, na kakana ka Kraist a lukaki na wa, na Mâ‐a pumbuwa o bawewe o buhwa bo‘ ilalo: 47n‘ iluwa ja melema n‘ ivěngidě ja bobe be ka pakwakudwě betomba beěhěpi o dina jaju, jali na Jěrusalěm. 48Inyěni ndi tali ja belombo těkabe. 49Hilakěteni, Mbi bandakiděndi mohano mua Paia o inyěni o jadi: ndi ta himbani o mboka Jěrusalěm, kabo inyěni o ka pugwi na ngudi oviya ’ba.
50Ka Mâ‐a valana bâ kwanga nala Bětana ka Mâ‐a betě makadu maju ka Mâ‐a vambiya bâ ibâtâ. 51E diyakindi, o Mâ‐a vambakiyi bâ ibâtâ, ka Mâ‐a palwanidě, na bâ, ka Mâ‐a betanwě o Hěvěn. 52Ka bâ‐ba kaliya Mâ, ka bâ‐ba timba o Jěrusalěm na mbya ’něně: 53ba diyakind‘ o těmpěl lilimiděngo, ba tumbwakidě na ba bendakě Anyambě. Aměn.
Nu geselecteerd:
Luk 24: BNG1895
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Published by the American Bible Society in 1895.
