Jân 1
1
1Ndaga e diyakindi o jali, na Ndaga e diyakindi na Anyambě, na Ndaga tě e diyakindi Anyambě. 2Yâ tě e diyakidi na Anyambě o jali. 3Mâ nd‘ A velakidi belombo beěhěpi; o ’bě na elombo e velakudwě, A diye, e di velwěngo. 4Eměnâ e diyakind‘ o Mâ‐a jadi; eměnâ tě e diyakindi Bwe ya bato. 5Ndi Bwe tě e bumwakindi o ivititi; ndi ivititi viu yowakě yaâ. 6O diyaki na momo a lomakudwě oviya Anyambě a jadi, dina jaju ndi Jân. 7Mâ nd‘ a vakidi upakuwi, ka pakuwa o pělě ’a Bwe těně, na ovaně nd‘ o bato běhěpi ba ka kamidě Mâ. 8Au diyaka Bwe těně, ndi a a lomakudwěndi ka pakuwa o pělě ’a Bwe těně. 9Yâně e diyakindi Bwe ’a pâkwěpâkwě, e bumwakidě moto uěhěpi a vakě o he. 10A diyakind‘ o he, Mâ tepě a velakidi he, ndi he yu yowakě Mâ. 11A vakindi o ibaju mětě ba jadi, ndi ibaju mětě bu věhělěkidě Mâ. 12Ndi tango e věhělěkidě Mâ, yâ ndi eaju e věki ngudi ba bě bana ba Anyambě, ba kamakidě dina jaju: 13bu jakwě na makiya, na bâ bu jakwě na upango mua mehoni, bu jakwě tepě na upango mua moto, kabo mua Anyambě. 14Ndaga tě e ’lwakudwi mehoni, ka yâya diya o hwě ho jadi, (ka hwě hwa yěně ivenda jaju, pani ka ivenda ja mwana ua Hangwě u‘ umbâkâ,) A di londango ti na ehekwě na pâkwěpâkwě. 15Jân a pakwakindi o pěl‘ ’aju, ka mâ‐a yama, na, Mâ nd‘ ekaně uamě a vâki, na, A vakě o mbuhw‘ amě, A ndi wa n‘ umba; ’kabojana A diyakite ovaně mbi t‘ o diya. 16Ilonda jaju ndi ijahu ja běhěpi i di pahiyango, ehekwě o ehekwě. 17Ikabojana belekanako be věkudwěndi na Mosěs, ndi ehekwě na pâkwěpâkwě be vakindi na Jisus Kraist. 18O ’bě na moto a di yěněngo Anyambě o ’gombe t‘ egombe; Mwana u‘ umbâkâ, A jadi o ngonga ya Hangwě, Mâ ndi A di pakuwango o pel‘ ’aju.
19Upako mua Jân nd‘ ekamu, o Jiu ba lomakidi prist na ba Livai oviya Jěrusalěm, ka uwa mâ, na, Âvě lě nja? 20Ka mâ‐a měmě, â hâhâkâ; ndi a měměki, na, Mbi ’bě Kraist. 21Ka bâ‐ba uwa mâ, na, Nde lě? Âvě ndi Ilaias? Ka mâ‐a vâ, na, Mbi ’bě mâ. Âvě ndi usâki tě: Ka mâ‐a yavwana, na, Nyawě. 22Jâ ndi jabu ja vâ na ju, na, Ndi âvě lě nja? ho vale ka languwa ba ma loma hwě. O vâkâ lě na o pěl‘ ’âvě mětě? 23Ka mâ‐a vâ, na, Umba ndi joyi j‘ umbâkâ i yakě o nginga, na, Těkiděni njea ja Anyambě, pani ka usâki Iseyas a vâkidi. 24Ba lomakudwě ba diyakindi ba Farisi. 25Ka bâ‐ba uwa mâ, na, Nd‘ e lě nde ’âvě e baptaisakě, oningě na o ’bě Kraist, na Ilaias, na ba usâki tě? 26Jân a yavwanaki bâ, na, Mbi baptaisakandi na miba: ndi Umbâkâ a ndi de o inyěni o jadi, uanyu a ha ’wě: 27Mâ ndi A vakě o mbuhw‘ ’amě, A ndi pânwěngo oboho n‘ umba, mbi ’bě weyango na mbi unjuwaka ukâdi mua ikogo jaju. 28Belombo těkabe be hamakindi o Bětabera o pělě ’pâkwě ya Jâdan, o Jân a diyakidi a baptaisanaka.
29Jân a yěněkindi Jisus a vaka o mâ‐a jadi o buhwa bopâkwě, ka mua vâ, na, Umbwakiyateni Mwanudâmbě ua Anyambě, a věngěkidě bobe boa he. 30Mâ nd‘ ekaně uamě a vâki, na, Momo a vakandi o mbuhw‘ ’amě, A di pânwěngo oboho n‘ umba; ’kabojana a diyakite ovaně mbi t‘ o diya. 31Mbu yowakě Mâ: ndi A ka levudwěndi Israěl, ovaně nd‘ umba‐mbi viyedi ka baptaisa na miba. 32Ka Jân a pakuwa, na, Mbi yěněkindi Ilina i hubaka oviya oba pani ka mbenga, na jâ na batamaka o Mâ‐a jadi. 33Mbu yowakě Mâ: ndi A lomaki ’mba ka baptaisa na miba, Mâ nd‘ a vâki n‘ umba, na, Uâvě a ka yěně Ilina i hubaka na jâ‐ja diya o Mâ‐a jadi, Mâ ndi mâně a baptaisakě na Ilina Iyamu. 34K‘ umba mba yěně, k‘ umba mba pakuwa upako, na, ekaně a Mwana Anyambě.
35Buhwa bo vitakidě bopâkwě Jân a těměki pě na beyodwedi beaju bebale; 36a tamwakiya Jisus o Mâ‐a tamwakidi, ka mâ‐a vâ, na, Umbwakiyateni Mwanudâmbě ua Anyambě. 37Beyokwedi bebale be yokaki mâ‐a kalaka, ka beâ bea vitě Jisus. 38Jâ ndi ja Jisus ja ’luwa, ka Mâ‐a yěně bâ‐ba vitakě Mâ, ka Mâ‐a vâ na bâ, na, O vahaka li ndě? Ka bâ‐ba vâ na ju, na, Rabai, (yeně ndi, na, Uyokwidi oningě ja ’ludwě,) o diyaka lě ove? 39Ka Mâ‐a vâ na bâ, na, Vaka ka yěněkeni. Ka bâ‐ba viya ka yěně o Mâ‐a diyakidi, ka bâ‐ba nangiya buhwa těboně o Mâ‐a jadi: ’kabojana e diyaki ya bě mawěla manai. 40Umbâka ua babale ba yokaki Jân ba vitakidě, ndi Andru mwana nyangwě na Saimân Pitě. 41A duwakindi o bohoboho mwana nyangwě mětě Saimân, ka mâ‐a vâ na ju, na, Ho duwi Měsaias: i ndi, na, Kraist, oningě ja ’ludwě. 42Ka mâ‐a vana mâ o Jisus a jadi. O Jisus a yěni mâ ka Mâ‐a vâ, na, Âvě ndi Saimân mwan‘ ’a Jonas: o ka tubwi, na, Sifas, yeně ndi, na, ilale, oningě ja ’ludwě.
43Jisus a mbakindi o vala o Galili o buhwa bo vitakidě, ka Mâ‐a yěně Filip, ka Mâ‐a vâ na ju, na, Vitakě ’Mba. 44Filip a diyakindi ua Bětseda, mboka ya Andru na Pitě. 45Filip a duwakindi Nataneěl, ka mâ‐a vâ na ju, na, Ho duwi Mâ ua Mosěs o belekanako na basâki a lěnděkidi, na, Jisus ya Nasarět mwan‘ ’a Josěf. 46Ka Nataneěl a vâ na ju, na, Elombo eyam‘ e te vakiya o Nasarět? Filip a vâki na ju, na, Vaka ka yěněkě. 47Jisus a yěněkindi Nataneěl a vaka o Mâ‐a jadi, ka Mâ‐a vâ, na, Umbwakiyate ua Israěl mětě, a ha ’bě n‘ ukândâ. 48Nataneěl a vâki na ju, na, Wa yowě lě ’mba na ove? Ka Jisus a yavwana mâ, na, Mbi ma yěnět‘ âvě, o âvě o ma diya ibomako ja ele ya itâlâ ovaně Filip a t‘ o ndiya ’vě. 49Nataneěl a yavwanakindi ka mâ‐a vâ na ju, na, Rabai, o ndi Mwana Anyambě; âvě ndi Upolo mua Israěl. 50Jisus a yavwanakindi ka Mâ‐a vâ na ’ju, na, Ikabojana Mbi ma vwi na nâvě, na, Mbi ma yěnět‘ âvě o ibomako ja ele ya itâla o kamakiděte? o ka yěni belombo beněně wa na ekabe. 51Kâ Mâ‐a vâ na ju, na, Pâkwěpâkwě mětě Mbi vâki n‘ inyěni, na, Egombe těkae tombango, o ka yěněndini oba bwe, na enjěl ja Anyambě i betaka na jâ i hubaka o Mwana moto a jadi.
Nu geselecteerd:
Jân 1: BNG1895
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Published by the American Bible Society in 1895.
