Luk 23
23
1Ka ebimb‘ ’abu eěhěpi ea umwanidě, ka bâ‐ba valana Mâ o Pailat a jadi. 2Ka bâ‐ba yalě o bakidě Mâ, na, Ho duwindi ekaně a ulwakidě etomba, na a kandakidě na Sisa a věkwě pago, na na Mâ mětě ndi Kraist upolo. 3Ka Pailat a uwa Mâ, na, Âvě ndi Upolo mua Jiu? Ka Mâ‐a yavwana Mâ ka Mâ‐a vâ, na, O vâki eâ. 4Jâ ndi ja Pailat ja vâ na prist ja meolo na bebimba, na, Mbu duwa moto těkaně ebuke. 5Ka bâ‐ba loluwa n‘ iněně, na, A hihakidě bato, a yokwakidě o Judia eěhěpi, a yalakě o Galili na pâ ono okava. 6O Pailat a yokidi o pělě ea Galili, ka mâ‐a uwa n‘ ipě a ua Galili. 7O mâ‐a yowudě na a u‘ ipangiya ja Hěrod, ka mâ‐a validě Mâ o Hěrod a jadi, mâ mětě a diyakit‘ omě o Jěrusalěm hwi tědině.
8Hěrod a yěněkindi mbya ’něně, o mâ‐a yěněkidi Jisus: ’kabojana a diyakindi a vahaka o yěně Mâ ulingo uyaba, ’kabojana a diyakindi a yoka belombo beitě o pěl‘ ’aju; a yombwaka na t‘ a ka tand‘ o yěně Mâ a haka elembo. 9Ka mâ‐a uwa Mâ ndag‘ iitě; ndi A bu yavwanaka mâ elombo. 10Prist ja meolo na balěndi ba těměkindi ba ka bakakidě Mâ nangudi wa. 11Ka Hěrod na bamo baju ba ’duka ba hadividě Mâ, ba ka věhěkě Mâ, ka bâ‐ba bâtidě Mâ ibâtâ i panyakě, ka bâ‐ba timbě pě Mâ o Pailat a jadi. 12Boâ buhwa tě te boa Pailat na Hěrod bo lataki mboi; ’kabojana ba diyaki na ndoba ovyo bâ mětě na bâ mětě.
13O Pailat a bědi prist ja meolo na bapangiyi ba bato ndiyango, 14mâ na bâ, na, O vanakindi ’mba ni moto těkaně, na a ulwakiděndi bato; hilakěteni, mbi kâtite Mâ o boho boanyu, na mbi ’bě duwango moto těkaně njěnji o pělě ’a belombo t‘ ibeanyu be bakakidě Mâ: 15E! tombe na Hěrod: ’kabojana mbi validěte inyěni Mâ o mâ‐a jadi; ndi umbwakiyateni, o ’bě na elombo lukango n‘ iwedo e hawudwě o Mâ‐a jadi. 16Vâkâna mbi ka bomi Mâ, na huludě Mâ. 17Ikabojana o mala ndi imaju ma hulakidě umbâkâ o bâ‐ba jadi o Isango. 18Ka bâ‐ba yama njamba pâkâ, na, Věngěmě na moto těkaně ovaně, na nâvě oa hulidě hwě Barabas: 19(a vamakudwě o ndabo ’a meboka, o pělě ’a ivegwanidě n‘ ihuhu i hakudwě o mboka, n‘ iweyana.) 20Pailat a diyakindi n‘ upango mwa ihulidě ja Jisus, ka mâ‐a kala pě na bâ. 21Ndi ba yamaki, na, Kâmâkidě Mâ o krâs, kâmâkidě Mâ o krâs. 22Ka mâ‐a vâ na bâ njo e‘ ilalo, na, Na nd‘ e lě, a ma ha lě nja bob‘ ě? Mbi ’bě mâ duwango na tina e‘ iwedo: vâkâna mbi ka bomi Mâ, na validě Mâ. 23Ka bâ‐ba loluwa n‘ iněně moyi oba, ba uwaka na a kâmâkudwě o krâs: ka moyi mabu na ma prist ja meolo ma bala. 24Ka Pailat a lenidě na e diyake nyang‘ ’abu e ma jomba. 25Ka mâ‐a hulidě uabu a jombakidi, a ngakudwě o ndabo ’a meboka n‘ ivegwanidě n‘ iweyana; ndi a věkindi Jisus o itândidi vyabu.
26O bâ‐ba diyakidi ba valanaka Mâ, ka bâ‐ba bweya Saimân pâkâ, ua Sairini a viya o ’hiki, mâ ndi uabu a hikakidě krâs, na a bapakiyě yâ o mbuhwa ea Jisus.
27Ka njamba ea bato eněně, na bajo, ya vitě ba eyaka mâ na bâ‐ba tatabanaka naka. 28Ka Jisus a vonguwa o bâ‐ba jadi ka Mâ‐a vâ, na, Bajo ba Jěrusalěm, o eyaki ’Mba ni, ndi ’yakani o pěl‘ ’anyu, na bana banyu. 29Ikabojana umbwakiyateni hwi i vakandi, ijabu i ka vâyě, na, Ibâtâ na ba bekomba, na mahuhu ma ha jakidi, na mabě ma ha nyangakidě. 30Ba ka diyi ba ka yalakě o vâ na mekodi, na, Vihamakiyi hwě ni; na bekandangolo, na, Dibaki hwě ni. 31O věngě lě ba ha belombo těkabe o ele e di mihâ, ba ka ha lě ea yaheyahe na ě?
32O diyaki tepě na bapâkwě babale, ba haki bobe, ba valanakwě na Ju ka weywě.
33O bâ‐ba pâdi o iboko, vi ma tubakwě na Kalvari, ka bâ‐ba kâmidě Mâ omě, na ba haki bobe, ekaně o ’nâ eyomi, ekaně o ’nâ ea ’měngwě. 34Jâ ndi ja Jisus ja vâ, na, Paia, iyakidě bâ; ’kabojana ba ’wě nyang‘ ’abu e hakě. Ka bâ‐ba kabaniya ngâi ’aju na hoduwa kwai. 35Ka bato ba těmě imbuwa. Ka bâ na bapangiyi ba tâba tepě Mâ, na, A ma yongaki bapâkwě; a t‘ o yongě nyol‘ ’aju mětě, oningě na ekaně te Kraist ea Anyambě e di pânângo. 36Na sâjě tepě ba ka věhěkě Mâ, ba vaka o Mâ‐a jadi, ka věkě Mâ vinigar, 37na, Oningě na o ndi Upolo mua Jiu, yongakě nyol‘ ’âvě mětě. 38Ka ebuke ya lěndwě oba ea molo muaju na melěndâ mea Grik, na Latin, na Hibru, na, UPOLO MUA JIU ND‘ EKAMU.
39Ka moto a haki bobe umbâkâ a diyaki kělěměngo a kila Mâ, na, Oningě na o te Kraist, yongakě nyol‘ ’âvě na hwě tepě. 40Ndi k‘ upâkwě a yavwana n‘ a kandidě mâ, na, Oa bangaka Anyambě, âvě o jadi o jâ ikobwě tě? 41Hwě hohonganěngo mbambayě; ’kabojana ho pahiyendi mahomano ma behadi beahu: ndi momo těkaně a ’bě hango elombo ka ’lombo. 42Ka mâ‐a vâ na Jisus, na, Upangiyi, o ka yongakidě ’mba o âvě o ka pâyě o ipangiya jâvě. 43Ka Jisus a vâ na ju, na, Mbambayě, Mbi langwakiyand‘ âvě, na, O buhwa těkabo nd‘ âvě o ka diyě n‘ Umba o Paradais.
44E diyakindi ea bě hongodi ea ba jomu na mawěla mabale, na ivititi na diyaka o he eěhěpi kwanga nala mawěla malalo. 45Ka joba ja vinda, ka unamba uněně mua těmpěl mu a pehiyě na hanganě. 46O Jisus a yamidi na joyi ’něně ka Mâ‐a vâ, na, Paia, Mba bweyiděndi ilina jamě o makadu mâvě. O Mâ‐a bi nonaně vângo, ka Mâ‐a diba. 47O Sěnturiân a yěnidi be hamakidi, ka Mâ‐a bendě Anyambě, na, Ea bomwě penda, na, moto těkaně a diyakindi uyamu. 48Bebimba beěhěpi be yolanakidě ka yěně nyanga těkaně, o bâ‐ba hilidě belombo be hamakidi, ka bâ ba timbanidě, ba kěkě ba kumbaka ngonga jabu. 49Megangano meaju meěhěpi, na bajo ba vitakidě Mâ oviya Galili, ba těměkindi na masěyi, ba hilakě belombo těkabe.
50Hilakěte, o diyakindi na momo dina na Josěf, ua ’hoka; na mâ‐a diyaki tepě moto uyam‘, ua hohonganěngo: 51Mâ nd‘ a ha kamakidě ehok‘ ’abu n‘ ihadi viabu: a diyakindi ua Arimatia, mboka ea Jiu; na mâ mětě a diyaki tepě a vengaka ipangiya ja Anyambě. 52Momo těkaně a kěkind‘ o Pailat a jadi, ka mâ‐a jomba ekengo ea Jisus. 53Ka mâ‐a hubě eâ, ka mâ‐a dinga eâ na ivěla, ka mâ‐a nangidě eâ o malonga ma pudwakudwě ilale, ma diyakidi ma t‘ o nangudwě moto n‘ ivâkwě. 54Boâ buhwa těboně ndi bo diyakidi bo‘ ikengě na buhwa bo‘ Iyâjâ bo diyakindi bo bengakiya. 55Ka bajo tepě, ba vakiyedi na Ju o Galili, ba vitě, ka bâ‐ba hilě malonga, na nyanga ea ekengo ’aju e nangakudwě. 56Ka bâ‐ba timba, ka kenjě meyâmbâ na mavulě; ka bâ‐ba yâjâ o buhwa bo‘ Iyâjâ, hohonganěngo na elekanako.
Nu geselecteerd:
Luk 23: BNG1895
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Published by the American Bible Society in 1895.
