Luka 9

Əslən net gewleɗ kəlaw kiyit sula

(MAT 10:5-15; MAR 6:7-13)

1Yaŋ Yesu akkelet gewleɗ kəlaw kiyit sula, apsitik gagdak gəm gbogboŋ narɓih tuyeŋɗe gəm nanzaɗ gbəgbaɗe. 2Aslinik ərban wən na məlĩ na Maŋgəlva gəm əmbəlgit məs gbəgbaɗe. 3Aɓsit na: Kədawgəmaŋ zəga ka na tive ɓa, zleŋge ɓa, gabal ɓa, zəga nawzəma ɓa, deleɗ ɓa, mãy naway pak əgəm lukut sula ɓa, 4addəv gəla an məs kətoŋgoŋ pak məssoŋ adak hã gap pay nawmbat nokum. 5#WNM 13:51#LUK 10:4-11An mətafkumi a walaŋgəla-metiŋ van ɓa, məgil sə walaŋgəla-metiŋ nani, məttu hologudum səza təlkum dəsangən va zəga narba aketi. 6Agilyoŋko, azbetinik walaŋgəleɗe, arbanənək alabara neneke, ambəlgitinik məs gbəgbaɗe.

Əttap na Herodə

(MAT 14:1-12; MAR 6:14-29)

7 # MAT 16:14; MAR 8:28; LUK 9:19 Adan Herodə daya na dələv aprəm alabara net zəgeɗ en dədaɗɗaŋ pakə, attapəka. Vi ɗiy meɓɓet tay ənahaŋ na: Yohanna dəsil səka əmta. 8Ɗiy meɓɓet tamə aɓɗaŋ na: Eliya dərban zəni. Yaŋ əmpa ɗiy meɓɓet aɓɗaŋ na: Taka səret məskəleŋɗe en far dəsil səka əmta. 9Yaŋ Herodə amna: Intə nərsla ki Yohanna. As ɗəf naŋgay məs nədaprəm əpel wən vas akanəŋ di? Yaŋ akay tive kawlani.

Yesu tay əzəmgit ɗiy gabal sle'i

(MAT 14:13-21; MAR 6:30-44; YOH 6:1-14)

10Maslənɗe amilyoŋko, anah sənənək an məs aɗɗaŋ pakə. Andek takərgiti, ambataŋ a walaŋgəla-metiŋ məs adawyaŋ na Betsayda. 11Ɗiy pak aprəmnənka, azbanənka. Yesu atefike, apel sitik alabara na məlĩ na Maŋgəlva, ambəlgitik ɗiy en də wəray nawrəh əmbla.

12Adan pay go'oy aza ətəpa, gewleɗ kəlaw kiyit sula nek azaraŋgək azani, aɓsənən na: Anah sit ɗiy dəmbataŋ kəla weleŋgit gəleɗe, dərəhaŋgən təki nawdik gəm zəga nawzəma, vi aŋ a kapta-muyã mənani. 13Yesu aɓsit na: Munokum van məpsit əzəma. Yaŋ azlanən na: Məday ki meptekeɗ sle' gəm kilif sula tay avam ɓa kuzuŋ an kəŋgələk məlgən məlbahgən zəga nawzəm sit ɗiyiŋ pak kan soko? 14Vi zel vet wassoŋ zəga na gabal sle'i. Yaŋ Yesu anah sit gewleɗ nan na: Mənah sit dəssoŋgən ŋgbimŋgbim kaklaw sle sle'i. 15Aɗɗanənək vaska, asugitinik pakə. 16Yesu agimik meptekeɗ sle' dit kilif sula neki. Aslanək haran a disiŋ agəɗək soko sən Maŋgəlva aketi, yaŋ arɗeti, apsit gewleɗ nan vi duɗekningin sit ɗiyi. 17Ndəɗaŋ pak azəmaŋka, abaŋgək beymeti. Akkalanənək an dəmbərə, agəɗək gadagarɗe kəlaw kiyit sula.

Piyer tay ərban na Yesu iyi Kristu

(MAT 6:13-19; MAR 8:27-29)

18Yaŋ pay maɓɓani Yesu asan bitte əkkama, gəm gewleɗ nan azani. Assohẽtike: Ka nawa ɗiy adawɗiwən di? 19#MAT 14:1,2; MAR 6:14,15; LUK 9:7,8Azlanənka, aɓɗaŋ na: Azet ɗiy meɓɓet Yohanna məgəɗ baptem kənani, azet en meɓɓeti Eliya, en meɓɓet tamə taka neret məskəleŋɗe en far dəsil səka əmta. 20#YOH 6:68,69Yaŋ aɓsit na: Ya nokum nawa nan kədawnahaŋ di? Piyer agəm əpel amna: Istə Kristu na Maŋgəlva.

Yesu tay ərban əmta gəm əsilye nan səka əmta

(MAT 16:20-28; MAR 8:30—9:1)

21Yaŋ Yesu abay meti, aɗi sit wən nan ka adawnah sənən ɗəf ɓa. 22Yaŋ amsak ənah na, aslək Wətən Ɗəf dəzəmgən sahã diyɗa, ɗiy məsɓeti, deyeɗe net məsdəlveŋge gəm mərbaŋ-mahenziŋ wazganəni, kawbayni, ya wasil səka əmta də əvoŋ mahokoni. 23#MAT 10:38; LUK 14:27Yaŋ anah sit ɗiy pakə. An ɗəf aŋgələk wəzbawa, dəppan əɗɗum aka zəni, dəgəmgən wəlaŋga məzliwrihe nan pay pakə, dəzbawgəni. 24#MAT 10:39; LUK 17:33; YOH 12:25Vi ɗəf an dəŋgəl əkõhgən zeŋgileni wazani. Ya məs dəzan zeŋgilen aka wən nawa, nan wakõhgəni. 25Mi adawtər sən ɗəf an arəhək mammba dələv gboŋ ka nan an azəka awaniɓa azanək kiyən zən di? 26Vi an wil adanənək ɗəf viwa awaniɓa vi əpel nawa, Wətən Ɗəf wagəɗ wil aka wən nan pay adazzan addəv gagdak nani, an na Afəni gəm net maslayɗe en salala. 27Gesiŋ gesiŋ nədawnah sukum ɗiy meɓɓet tahəŋ awalaŋgit ɗiy en dəssoŋ aŋkiŋki, sessel amtaŋ na tak dulanən məlĩ na Maŋgəlva ɓa ɓa.

Yesu akkpaŋganək zəni

(MAT 17:1-8; MAR 9:2-8)

28Əvoŋ dədopoɗo dərɓeget alabaraɗeski, Yesu agəmək Piyer, Yohanna gəm Yakob apeŋ aka mossorgo metiŋ vi kakkama. 29Aka adakkama, məɗa haran akkpaŋka, lukut nan akkpaŋgək babar ndaslə. 30Ɗiy yeŋ sula əpeleŋ dəndəni, mãy Moyis də Eliya əŋgə. 31Arbaŋgək addəv gagdaka, apeleŋgək aka ədda nan məs dədaɗɗa a Yerusalem. 32Sin armeninik mãy Piyer dit ɗiy en dəndən pakə, adan afɗahaŋgə, awlanənək gagdak na Yesu dit zel sula məs dəziweŋ dəndəni. 33Aka ɗiy vet adawɗakaŋ dəndəni, Piyer aɓsən Yesu na: Mərbəzəga moggoni məsamgən aŋka. Məzaɓsəm gizlirkeɗe hoku, taka viko, taka vi Moyis, taka əmpa vi Eliya, dəsən məs adawpel ɓa. 34Aka adawpel vaska, slaybuwən adeke, agulke. Ageslne'eŋke aka slaybuwna adawgulti. 35#ISA 42:1; MAT 3:17; 12:18; MAR 1:11; LUK 3:22#2PI 1:17,18Wəla adek səddəv slaybuwna naka, amna: Aŋki Wətu məs nəweli, məprəm mani. 36Səza wəla aprəmə, ɗəf tay abbər Yesu takərgəni. Aka dəpas na gewleɗ assoŋgu ɓataɓata'ə, ɗəf tay məs apeləŋ sənən wən net zəgeɗ məs awlaŋ ɓa.

Yesu tay əmbəlgən wiyən məs əmpəs mbərayən akani

(MAT 17:14-18; MAR 9:14-27)

37Vit pumpum nani, səza aprikeŋ səka mossorgo metiŋ, ɗiy diyɗa azzoŋguk ələm sən Yesu. 38Yaŋ ɗəf aŋgəzl vaŋvəl sə weleŋgit ɗiy dawnəh na: Mərbəzəga nəkkamokuko, azi horok aka wətuwa, vi ndəni uwa naw gəɗeŋgəɗeŋ. 39Tuya ərmani, ndən əŋzla vaŋvəl girziki, ndən əɓirzliwgin də masla amani, ndən əgilyen səka sahãsahã, əppan londor. 40Nəkkametik gewleɗ nok dərɓahanəngəni, ya dəɓapən ɓa. 41Yesu agəmək əpel amna: Sayit ɗiy məs tahəŋ də ətaf ɓa gəm məreygiti, hã gap dewe nədawsan amoŋgovokum di? Pay gbəgbari nədazban əɓəskum di? Aki wətuk van aŋka. 42Aka dəɓəl əgap azan ɓa, tuya aslbaka, aɓlanək diyɗa. Yaŋ Yesu ahayãn əmpəs mbərayən naka, ambəlgən wiyən vani, amndagan sən afəni. 43Ɗiy pak aggətaŋgək aka memetiŋ na Maŋgəlva.

Yesu tay əmsak ərban wən na əmta nani

(MAT 17:22-23; MAR 9:30-32)

Adan ɗiy pak aggətaŋ aka an məs agəɗə, aɓsit gewleɗ nan na: 44Məprəm an məs nədawnah sukuməŋ lewlewi. Kapsəni Wətən Ɗəf avet ɗiyi. 45Ya gewleɗ nan Net aprəmnən gabba əpeləs ɓa, asan sitik məɗamən vi adaprəmnən gabba əpel van ɓa. Adawgeslne'eŋ dassohoni.

Naway dəday di?

(MAT 18:1-5; MAR 9:33-37)

46 # LUK 22:24 Yaŋ əɗɗum adazzan aket na, naway nawsan daya səret di? 47Adan Yesu asənək əɗɗum na mekreti, ndən muzliya gəm, aziwgin a maŋgavani, 48#MAT 10:40; LUK 10:16; YOH 13:20aɓsit na: Ɗəf dətaf muzliyaŋ aka iya nawa, anaw atafə; an dətafwa, ɗəf an dəslənu atafə; vi an muzliya faɗ nammbokum pakə, ndəni daya.

Ɗəf an dəzelkum ɓa nokumi

(MAR 9:38-40)

49Yaŋ Yohanna azlani, amna: Mərbəzəga, mulak ɗəf tay ərɓəh tuyeŋɗe də iya noko. Ya mətakəka, vi tay əzbok də mənam ɓa. 50Yesu azlan sənəka: Kədawtakənən ɓa, vi ɗəf an dəzelkum ɓa, nokumi.

Sə Galile a Yerusalem

(9:51—19:27)

Walaŋgəla na Samari dəŋgəm ətaf Yesu ɓa

51Adan pay nawmbat na a disiŋ go'oy, aynanək wən nan a makran ɓəlɓəl naddan a Yerusalem. 52Aslinik maslənɗe abani. Səza addoŋgu, atoŋgoŋguk a walaŋgəla net mə Samari vi kawzaɓan təki nawteh nani. 53Ya mətafni ɓa vi aziyək haran əmbat a Yerusalem. 54#2MI 1:9-16Adan Yakob də Yohanna awlanən vaska, aɓɗaŋ na: Daya wakəŋger məssohgən offo dəprigən sə disiŋ dəhhitgin sa? 55Yaŋ Yesu akkpaŋganək harani, ahayẽti. 56Yaŋ ambataŋ a walaŋgəla maɓɓani.

Ɗiy məs dəŋglaŋ əzban Yesu

(MAT 8:19-22)

57Aka adaddoŋ tive tive, ɗəf maɓɓan aɓsən na: Wanəzbok a təki kədaddok pakə. 58Yesu aɓsən na: Balwayɗe tahəŋ dit vovɗe, biŋgeɗ tahəŋ dit gəleɗe. Ya Wətən Ɗəf na, tay də təki nawvoŋ naffeten zən ɓa. 59Aɓsən ɗəf maɓɓan na: Azbawa. Ɗəf nak aɓsən na: Daya apəl su tive ndaw əndək əbba tagay. 60Yesu aɓsən na: Appet ɗiy mimtit dəndikin mimtit neti, nok dok ərban məlĩ na Maŋgəlva. 61#1MI 19:20Ɗəf maɓɓan əmpa aɓsən na: Daya wanəzboko ya apəl su tive nəmbat tagay ənah sit ɗiy na nawda na, naw nəmbatək kana. 62Yesu aɓsən na: ɗəf awan di pak dəɗi van aka bardaw, yaŋ adawla dirɓe, dəslə aza məlĩ na Maŋgəlva ɓa.

Nu geselecteerd:

Luka 9: GB

Markering

Deel

Kopiëren