Luka 10

Wəslən maslənɗe kaklaw buhul kiyit sula

1Dərɓaga aska, Daya awelik gewleɗ meɓɓet kaklaw buhul kiyit sula, aslin sula sula aban addəv walaŋgəla-metiŋ də walaŋgəla məs ndən sən kiyən adaddan adaka. 2#MAT 9:37,38Aɓsit na: Əbəl tay diyɗa ya məɗɗaŋ wəza nan tahəŋ diyɗa ɓa. Məkkaman Afən əbəl kana vi dəsləngən məɗɗaŋ wəza a təki əbəl nani. 3#MAT 10:16Məddoŋgu, in tat əslənkum yaŋ va kirit timiŋgiɗ a weleŋgit kirɗemuyã. 4Kədawgəmaŋ pertete ɓa, nzəkkari ɓa, hensek ɓa. Kədasɗaŋ ɗəf tive tive ɓa'a. 5Gəla məs kədawtoŋgoŋ addəv pakə, mənah tagay na zay dəsan addəv gəlaŋka. 6An ɗəf na zay tay adaka, zazay nokum wasan akani. An tay ɓa, sessel wamil akokum. 7#1KO 9:14; 1TI 5:18Məssoŋ addəv gəla an vani, məzəmə, məsə an məpsukum pakə. Vi məgəɗ wəza aslək dərahgən iya nani. Kədaddoŋ addəv gəla ahã toŋ ahã toŋ ɓa. 8Addəv walaŋgəla-metiŋ awandi pak məs kətoŋgoŋgu, məs adawtafkumun adaka, məzəm an məpsukum pakə. 9Məmbəlgit məs gbəgbaɗe nadaka, mənah sit na: Məlĩ na Maŋgəlva adderik azokum. 10#WNM 13:51Ya addəv walaŋgəla-metiŋ awandi pak məs kətoŋgoŋgu, an dətafkumun adaka ɓa, məgil aket tiveɗ gugriɗ nani, mənah na: 11#MAT 10:7-14; MAR 6:8-11; LUK 9:3-5Hologudum na walaŋgəla-metiŋ nokum məs dərəm aza tələm dayday mənam tat əttu' sukum, ya məsən hara na məlĩ na Maŋgəlva go'oy. 12#VAA 19:24-28; MAT 11:24 MAT 10:15In tat ənah sukum, pay nan na, an nawgəɗ sən Sodom wasan ɗəɗah ki an na walaŋgəla-metiŋ vanəska.

Walaŋgəlaɗe gugriɗ məzuɓoŋgoŋ də wətaf

(MAT 11:20-24)

13 # ISA 23:1-18; EZE 26:1—28:26; YO' 4:4-8; AMO 1:9,10; ZAK 9:2-4 Əray azoko Korazin, əray azoko Betsayda. Va sekeneɗiŋ a Tir gəm a Sidon məɗɗet na, kəta aguloŋguk lukut na gəlabay farfarə, aggbo'oŋguk moŋglo aketi, aɗiyaŋgək marava. 14Vi vaski, pay nawtawwən na, an nawgəɗ sən Tir də Sidon wasan ɗəɗah kiyən nokum. 15#ISA 14:13-15Ya is Kafarnahum, wakəɓaygən zuk hã a disiŋ sa? Hã a təki nanziya net mimtit kədawpurkoko.

16 # MAT 10:40; MAR 9:37; LUK 9:48; YOH 13:20 Yaŋ anah sit na: Ɗəf dəprəm mokum maw aprəmə, məs dəzgokum, anaw azgə, məs dəzgaw tamə, ana ɗəf məs dəslənu azgə.

Əmilye net maslənɗe kaklaw buhul kiyit sula

17Maslənɗe kaklaw buhul kiyit sula nek amilyoŋguk də ənneken ziti, aɓɗaŋ na: Daya, əmpəsɗe mbəreyit dayday tay əɓe'eŋ səmən vi iya noko. 18Yaŋ Yesu aɓsit na: Nulak Satan əbəta hã sə disiŋ va uwiɗ na buna. 19#GLƊ 91:13Yaŋ na, nəpsukumək gagdak nawdaw dəket dohõɗe dit hərziyeɗi, gəm aka əɓap na məzuzele pakə, sessel zəga tay nawgəɗ sukum ɓa. 20Kədannekenən zukum vi əmpəsɗe mbəreyit aɓe'eŋ sukumən dərəŋ ɓa, mənneken zukum vi iya nokum məverni a disiŋ.

Yesu tay ənneken zəni

(MAT 11:25-27; 13:16-17)

21Avan avanəs ləŋ, Zeŋgile Salala aknahək Yesu də ənneke yaŋ amna: Intat əgagdokoko Əbba, Daya na disiŋ də dəlvafuŋ, vi kəɗemetik zəgeɗis səma heret məs maɗɗulet dit məs əsəna, kərbet sit kirin muzliyeɗi. Ha'aw, Əbba, vi vaski kəŋglu dəgəɗgən ama horoko.

22 # YOH 3:35 YOH 10:15 Zəga pak Ebba apsuka. Ɗəf tay dəsən Wətən an Afəni ɓa ɓa, ɗəf tay dəsən Afən an Wətəni ɓa ɓa, gəm ɗəf an Wətən aŋgəl narban səni.

23Yaŋ akkpaŋ azet gewleɗ nani, apel sit anet kaka'ə: Əzaɓ aka hara məzulaŋ an məs kədawlaŋ. 24Vi gesiŋ nədawnah sukum: Məskəleŋɗe diyɗa dit milyẽŋge diyɗa aŋglaŋgək ulanən an kədawlaŋgə, ya dulanən ɓa. Aŋglaŋgək əprəm an kədaprəmaŋgə, ya dəprəmnən ɓa.

Wənməkkpaŋga na məs mə Samari moggoni

25 # MAT 22:35-40; MAR 12:28-34 Yaŋ mərbə-mahenziŋ taka asil vi kawla nazani, aɓsən na: Mərbəzəga, mi nədaɗɗa nərahgən zeŋgile məza agrak na ɓa di? 26Yesu aɓsən na: Mi məverin addəv mahenziŋ di? Mi kədaŋɗan adak di? 27#ƏMS 6:5 MƏS 19:18Yaŋ azlan na: Aŋglu Daya Maŋgəlva nok də mokrok pakə, də megenegenok pakə, də gbogboŋ nok pakə, də maɗɗulok pakə. Aŋglu meggok va kəŋglu ki zuko. 28#MƏS 18:5Yesu aɓsən na: Kəzlanək moggoni, aɗɗa vaska, wakəsok modoroko.

29Ya nani, aɗiyək zən va təstəsə, aɓsən Yesu na: Naway meggew di? 30Yesu amna: Ɗəf tay dəsil sə Yerusalem əpirken a Yeriko. Abətək aket məvoŋgoŋ tive, agbukunək zəga səzani, arganənka, addoŋko, mbagən va məmtəni. 31Məsdələv maɓɓan adawək tive vani, awlak ɗəf naka amzla faraɗa, ndən toŋgu. 32Vaska'e mə levi adek kəla təki vani, awlak ɗəf naka. Amzla faraɗa, ndən toŋgu. 33#2AL 28:15Yaŋ mə Samari, məzəddan malaka, agapək aza ɗəf naka. Səza awla na, awlak sasãhni. 34Azarək azani, amə mẽlẽ də mbazla aket huweɗ nan neki, ayneti, aslan aka koro nani, aka addəv gəla net melekeɗi, azgək sləma akani. 35Vit pumpum nani, andek deleɗ na təbəz sula, apsənək afən gəla net melekeɗi, amna: Aga an kəzetik deleɗ daykiyit eski, an nəmilik na wanəmndeget suko. 36Yaŋ Yesu amna: Azok kana, sə weleŋgit ɗiy hokiski naway megge ɗəf məs dəbət aket məvoŋgoŋ tives di? 37Mərbə-mahenziŋ azlanka: Ɗəf məs dula sasãhnəŋki. Yesu aɓsən na: Doko, agəɗ vas tamə.

Yesu anat Marta da gəm Miryam

38 # YOH 11:1 Aka adaddoŋgu, ndən mbəzla a walaŋgəla maɓɓani, guluk maɓɓat məs adawyaŋ Marta tətafək anat da. 39Məlmət tat məs adawyaŋ na Miryam, təsatək ɗew ammba təl Daya əprəm əpel nani. 40Marta tat əgay də wəza temtemi. Tədeke, təmna: Daya assok məlmukəŋ təppaw nədawgay dit wəzeɗe takərguwəŋ ɓa sa? Anah sət tədegin əbbah su ɗa. 41Daya azlan sətəka: Marta, Marta, is tat nda'nda' əyan zuk dit zəgeɗ diyɗa. 42Zəga taka yi an nawtərwəraya, Miryam təgəmək haran an moggoni, kawtafni səvat ɓa.

Nu geselecteerd:

Luka 10: GB

Markering

Deel

Kopiëren