Luka 8

Gil məzəzbanən də Yesu

1Səɓɓa aska Yesu abbalək a walaŋgəleɗe gugriɗ dit walaŋgəleɗe meɓɓeti, arbək wəna, anah sitik alabara nenek na məlĩ na Maŋgəlva. Gewleɗ nan kəlaw kiyit sula tahəŋ dəndəni, 2#MAT 27:55,56; MAR 15:40,41; LUK 23:49gəm gil meɓɓet məs arɓih tuyeŋɗe səketi dit en ambəlgit səka gbəgba' neti. Ndəɗaŋgəŋ Miryam məs adawyaŋ na mə Magdala, akən məs tuyeŋge buhul agilyoŋ səkata, 3Yohanne, guluk na Huza gawla na məlĩ Herodə gəm Suzana dit gil meɓɓeti, məzəbbahaŋ sənən də arya neti.

Wənməkkpaŋga na məzənse

(MAT 13:1-9; MAR 4:1-9)

4Əkkal na vanday net ɗiy sə walaŋgəleɗe gugriɗ temtem, adek aza Yesu. Yaŋ apel wənməkkpaŋga: 5Məzənse agilik kawndol zeŋve nani. Adan adawndolni, zeŋve maɓɓan abətək aka tive, məndapani, biŋgeɗ ayaɗənənka. 6Zeŋve maɓɓan abətək aka soyomo; səza agili, aŋkəlka, vi təki zəzay tay ammban ɓa. 7Zeŋve maɓɓan əmpa abətək a walaŋgit gedirgeɗi, agilyoŋguk məstaka, azəmgənənək sahã. 8Ya maɓɓan abətək aka ba'arə, səza agili, aɓayka, aɗika, kiyən taka pak aɗiyək səkat səkatə. Adan apel wənɗeski, anahək də wəlan dayadaya na: Ɗəf an də sləman naprəma dəprəma.

Vimi Yesu adawpel də wənməkkpaŋga di?

(MAT 13:10-17; MAR 4:10-12)

9Yaŋ gewleɗ nan assohõnən va wənməkkpaŋga van aŋgəl ənaha. 10#ISA 6:9Yaŋ anah na: Nokum məpsukumi əsən na məɗama na məlĩ na Maŋgəlva, ya sit ɗiy meɓɓet na abbər də wənməkkpaŋga yi nawpel siti.

Də adawlaŋ pak tay an adawlaŋ ɓa,

də adaprəmən pak tay an adaprəmaŋ gabban ɓa.

Yesu tay əboton wənməkkpaŋga na məzənse

(MAT 13:18-23; MAR 4:13-20)

11Aŋki an wənməkkpaŋga van aŋgəl ənaha: Zeŋve ndəni əpel na Maŋgəlva. 12Ɗiy en va ba tive na, ndəɗaŋgə en dəprəməni, Satan payə, agəm əpel nak sə mekreti, vi adawtafənən dəkõhoŋgən ɓa. 13Ɗiy en va ki soyomo na, ndəɗaŋgə en dəprəmən əpele, dətafnən də zit neki, ya tahəŋ də suwerit ɓa. Ndəɗaŋ ətafən vi pay siɗikke ya an tatwãh adek na ndəɗaŋ əppanəni. 14Gedirgeɗ an zeŋve abət addivit tamə, ndəɗaŋgə en dəprəməni, ya əɗɗumɗe, arya gəm nenek negge azəmgənən sahã na əpel naka, asɓa ɓa. 15Təki moggon məs zeŋve abət akani, ndəni ɗiy en dəprəmən əpel na Maŋgəlva, dərmanən də mekret moggon salala, dəssoŋ ɓəlɓəl addəv ətafa, dədawtəraŋ wəraya.

Wənməkkpaŋga na lalam

(MAR 4:21-25)

16 # MAT 5:15; LUK 11:33 Ɗəf tay nasɗa offo addəv lalam kawɗup mosgoy akan ɓa, awaniɓa kawɗiyən ammba zəga nawvoŋ ɓa. Ya waɗi a təki nawɗi lalam, vi ɗiy nawtoŋgoŋ pak dulanəngən əkeɗeɗe'e. 17#MAT 10:26; LUK 12:2Vi an mətərən pak warbə appaka ta', tay an məɗama məs kawsənni ɓa ɓa.

18 # MAT 25:29; LUK 19:26 Məzi zukum kan aza əprəm nokum. Vi ɗəf an də zəga avani kapsəni azani, ya ɗəf an tay avan ɓa kamgəmni an adaɗɗum nawrəh daydayə.

Ma Yesu dit milmiŋgiɗin

(MAT 12:46-50; MAR 3:31-35)

19Yaŋ ma Yesu dit milmiŋgiɗin azzoŋ ərəhəni, dərəhaŋ batam nawgap azan ɓa vi ɗiy diyɗa. 20Yaŋ mənah sən na: Mok dit milmiŋgiɗuk tahəŋ ziwziw appaka met aka uluko. 21Yaŋ azlani, aɓsit na: Əmma dit milmiŋgiɗu na ndəɗaŋgə məzəprəmən əpel na Maŋgəlva məzazbanəni.

Yesu tay əɓitgit barkataŋɗe

(MAT 8:23-27; MAR 4:35-41)

22Yaŋ pay maɓɓani Yesu apeŋ addəv bəlay dit gewleɗ nani, aɓsit na: Mədam dəgar ki bobok. Yaŋ ambataŋgə. 23Aka adaŋkoroŋgu, Yesu tay əleŋge. Yaŋ barkataŋ asil aket iŋkile, bəlay tay əknah dit iŋkile, ama əzaŋgə. 24Yaŋ gewleɗ addoŋ azan əfɗahanən dawnəh na: Mərbəzəga, mərbəzəga, mənam tat əza.

Səza afɗahə, ahayãnək səmyã dit vovolumɗe, aɓətaŋka. Təki agəɗək sləɓək. 25Aɓsit gewleɗ nan na: ngay ətaf nokum kandi?

Geslne armeke, aggətaŋka, aɓɗaŋ a walaŋ zit na: Naway aŋ van kandi? Ndən əheyẽt veŋvil dit iŋkile ndəɗaŋ əprəmən mani.

Yesu tay əmbəlgən ɗəf mətemin

(MAT 8:28-34; MAR 5:1-20)

26Yaŋ agapaŋ aka dələv net mə Gerasɗe, dəgar ki pehe dakadaka də Galile. 27Səza Yesu agil səddəv bəlay, ɗəf mətemin sə walaŋgəla-metiŋ vanəs pay ələm səni. Ɗəf nan anziyək məza awgul lukut ɓa, awsan addəv gəla ɓa, abbər addivit magamasɗe. 28Adan awla Yesu, aŋgəzlək vaŋvəla, askotuk abani, tay ənah də wəlan dayadaya na: Mi dəsopok də in di, Yesu, Wətən Maŋgəlva Məsəɗəɗə? Nəkkamokuko, kədawzəmgu sahã ɓa! 29Vi Yesu aɗiyək wən nan wətem dəgilgən səka ɗəf vani. Təl ɓəɓay adarmanən ɗəf mətemin vani, əɓruk tələn də van pak dit ngiyamɗe gəm əkkpa'ən dit sisele, vi kawgani, ya də as pak ndən əɓuhti, wətem əkan a kapta-muyã. 30Yesu assohõnko: Mbari iya nok di? Yaŋ azlan na: Iya naw na: Ngboŋgu, vi tuyeŋɗe diyɗa dətoŋgoŋ akani. 31Yaŋ tuyeŋɗe nek akkamanən Yesu vi adarɓihit dəddoŋgən a delŋgeɗek ɓa.

32Ngaɓa net vedemɗe tay adaka, tay ətaɗaŋ aka mossorgo metiŋ. Tuyeŋɗe nek akkamanənək Yesu, dəppetigin tive nawtoŋ aket vedemɗe veti, yas apəl sit tive. 33Yaŋ tuyeŋɗe nek agulyoŋ səka ɗəf naka, atoŋgoŋ aket vedemɗe. Vedemɗe pak arɓəzlaŋgə, alotoŋ səka təki səroho na mabuzgum na pehe, amtaŋ aret iŋkile.

34Adan məzuteɗtin vedemɗe awlanən an məs dəgəɗə, anzoŋko, akanən alabara a walaŋgəla-metiŋ gəm a walaŋgəleɗe na mapoho nani. 35Ɗiy agilyoŋguk vi kawla an dəgəɗə. Azzoŋguk aza Yesu, arəhənək ɗəf məs tuyeŋɗe agulyoŋ səkan nak tay tuŋgo ammba təl Yesu də lukut azani, tay də maɗɗulani. Geslne' armeke. 36Ɗiy en dulanən an məs dəgəɗə, anah sitin va ɗəf mətemin van ambələ. 37Mə Gerasɗe naka vadələv nan pak akkamanənək Yesu dəmbatgən səka dələv neti, vi geslne' armek sawɓa. Yesu peŋ addəv bəlay buryoku. 38Ɗəf məs tuyeŋɗe agulyoŋ səkan nak man aka dəsangən də Yesu. Yaŋ avok man dawnah sən na: 39Amndok anok da, anah an Maŋgəlva agəɗ suk pak sit ɗiyi. Ndən mbatə, abbalan an Yesu agəɗ sən pak a walaŋgəla-metiŋ.

Wətən Zayrus dət guluk tərəŋgən lukut na Yesu

(MAT 9:18-26; MAR 5:21-43)

40Əmilye na Yesu na, ɗiy diyɗa atafnənka, vi ndəɗaŋ pak assoŋguk əgani. 41Yaŋ ɗəf məs adawyaŋ na Zayrus daya naddəv gəla nakkal net mə Yudeɗ ade, akdukuk ammba təl Yesu, akkamanək dətoŋgən eŋgil ananda. 42Vi wətən tat taka bəɗeŋbəɗeŋ, watəgəɗ əzva kəlaw kiyən sula, go'otə aza əmta.

Aka Yesu adawmbat adaka, ɗiy assoŋguk akan ɓəsɓəsə. 43Guluk tat adak də gbəgba' na əzəlaha əzva kəlaw kiyən sula. Təzanək zəga nat pak sit zloktorɗe, ya tay məs dəɓap əmbəlgət ɓa. 44Yaŋ təzar dərɓaga Yesu, tərəŋgən gabba lukut nani. Əslba net mbel nat nak ɗe' ləŋgə. 45Yesu assohko: Naway dərəŋgu di? Naway pak tay ənəh na intə ɓa. Piyer amna: Mərbəzəga, ɗiy tahəŋ ɓəsɓəs akok əhãslkuni. 46Yaŋ Yesu amna: Ɗəf tay dərəŋguwa, vi naw nəsənka, gbogboŋ agilik səzawa. 47Adan guluk nak tula na təɓap na kawɗaman zət ɓa, tədek də wəkkere, təkdukuk abani, tənahək aweleŋgit ɗiy pak an məs tərəŋgən Yesu akani, va təmbəl səka gbəgba' nat go'ləŋgə. 48Yaŋ Yesu aɓsət na: Wətuwa, ətaf nok akõhgukko, dok zayə.

49Aka Yesu adawpele tagay, ɗəf səŋgil ana daya na gəla nakkal net mə Yudeɗ da pay dawnəh na: Wətuk təmtəka, kədawyan mərbəzəga ɓa. 50Ya adan Yesu aprəm vaska, aɓsən Zayrus na: Kəgeslne' ɓa, nok ataf kaka'ə, watəmbələ. 51Adan agap eŋgili, dəppan tive sit ɗiy dətoŋgoŋgən dəndən abbər Piyer, Yohanna, Yakob gəm afət waŋ də mata ɓa. 52Tahəŋ əhəmaŋgə, tahəŋ wəskaŋ morkoyo akata. Yesu aɓsit na: Kədawhəmaŋ ɓa, vi təmtə ɓa, wəleŋ tədawleŋge. 53Amasaŋgək akani, vi asənənək na təmtəka. 54Yaŋ arma vata, anah dayadaya na: Wakə, afɗahə. 55Zeŋgilet amilik azata, təsilik go'ləŋgə. Yaŋ Yesu aɗi wən nan dəpsətəngən əzəma. 56Migilit waŋ aggətaŋka, yaŋ Yesu abay meti ka adawnah sənən zəga an dəgəɗəŋ sən ɗəf ɓa.

Nu geselecteerd:

Luka 8: GB

Markering

Deel

Kopiëren