Luka 7

Yesu tay əmbəlgən gawla na daya net məzəlpaŋ mə Rom

(MAT 8:5-13)

1Adan Yesu agrak əpel wən sit ɗiyi, ndən toŋ a Kafarnahum. 2Daya net məzəlpaŋ na Rom tay də gawla nan məs aŋgəl diyɗa gbəgba'a, go'i namta. 3Adan aprəm wən na Yesu, aslinik ɗiy məsɓet net mə Yudeɗ azani vi kakkaman dədegən əkõhgən gawla nan naka. 4Adan azzoŋ aza Yesu, akkamanənək sawɓa, aɓɗaŋ na: Aslək kəbbah səngəni, 5vi aŋgliwik ɗiy namə, ndən dərka səm gəla nakkala. 6Yaŋ Yesu ambat dənɗaŋ. Adan agap go'o də gəla, daya net məzəlpaŋ nak aslin bayneŋgiɗin aɓsənən na Mərbəzəga kəyan zuk ɓa, vi nəgap kətoŋgən a nawda ɓa. 7Vi vaski, nula zu na nəgap nawmbat azok dəvaw ɓa. Apel wən təttaka gawla naw wambələ. 8Vi naw ammba təl ɗəf gagdak nani, məzəlpaŋ tam tahəŋ ammba təlwa. An nənah sənək aŋka: Doko, ndən əmbata; sən maɓɓan na: Ade, ndən əzzani; sən balam nawa: Aɗɗa vana, ndən əɗɗani. 9Adan Yesu aprəm wənəska, aggətək aka wən nani. Yaŋ akkpaŋgə, aɓsit ɗiy məzəzbanən na: A weleŋgit mə Israyelɗe zlaŋ nərah ətaf zev aŋ ɓa. 10Yaŋ maslənɗe amilyoŋ eŋgili, arəhənək balam nak ambəlka.

Yesu tay əmbəlgən wətət gagəbaya

11Səɓɓan na Yesu ambat a walaŋgəla məs adawyaŋ na Nayin. Gewleɗ nan dit ɗiy diyɗa ambataŋgək dəndəni. 12Adan agap gba a maddamba na walaŋgəla-metiŋ, daka ɗiy tay əkaŋ ɗəf məmtəni, taka yi avat mani, ndət vatə ga gəbaytə. Ɗiy diyɗa sə walaŋgəla-metiŋ tahəŋ dəndəta. 13Adan Daya awləta awələk sahã akata amna kədawhəm ɓa. 14Yaŋ ambat arəŋgən kes na gəbay vani. Ɗiy məzuslanən aziweŋgi. Yesu amna: Gawla, in tat ənah suko: Asili 15Yaŋ ɗəf məmtən nak asil ɗewi, atəŋ əpele. Yaŋ Yesu apsət mani. 16Ɗiy pak ageslne'eŋke, agagdakanənək Maŋgəlva, aɓɗaŋ na: Məskəleŋ metiŋgin arbanək zən awalaŋmə, Maŋgəlva adek əbbah sit ɗiy nani. 17Alabara na Yesu atrayək aka dələv na Yude də aka kivadələv van tərwəslə.

Maslənɗe na Yohanna Məgəɗ baptem

(MAT 11:2-19)

18Yaŋ gewleɗ na Yohanna anah sənən wən nan pakə. Yaŋ Yohanna ayə ɗiy sula sə weleŋgit gewleɗ nan neki. 19Aslin aza Daya dawnəh na: Istə məs nazzokuŋ sa, awaniɓa məga ɗəf maɓɓani? 20Adan agapaŋ aza Yesu, aɓsənən na: Yohanna məgəɗ baptem dəslənəm azok əssohok na: Istə məs nazzokuŋ sa awaniɓa məga ɗəf maɓɓani? 21Daka aka dəpas na Yesu tay əmbəlgit məs gbəgbaɗe diyɗa də gbəgba' temtemi, mãy ɗiy mətemti, akoluk heret deŋgerɗe diyɗa. 22#ISA 35:5,6 ISA 61:1Yaŋ azlan sit maslənɗe na Yohanna nek na: Məddoŋ mənah an kəprəmaŋ də an kulaŋ sən Yohanna: Deŋgerɗe tay ulaŋgə, vədalɗe tay ədawaŋgə, məskokoleɗ abburoŋko, goryomɗe mərma hərzlumit tay əprəmaŋgə, ɗiy mimtit asilyoŋko, məs sahẽŋɗe tamə tay əprəmnən Wən Neneke. 23Əzaɓ aka ɗəf an məs nəsaw sən ka zəga nazbərgən ɓa.

24Səza maslənɗe na Yohanna addoŋgu, Yesu təŋ əpel wən na Yohanna sit ɗiyi, amna: Mi kəddoŋ ula a kapta-muyã di? Eflere məs səmyã adaɓlan sa? 25Ya mi kəddoŋ ula kandi? Ɗəf dəgul lukutɗe na sləma sa? Ya ɗiy en dit lukutɗe mogget na sləma anet milyẽŋge da adassoŋgu. 26Ya mi kəddoŋ ula kandi? Məskəleŋ sa? In tat ənah sukum: Gesiŋ məday ki məskəleŋgi. 27#MAL 3:1Ndəni an məs məverin apel akani: In tat əslən maslən naw aboko, an dədawzaɓan tive nok səboko.

28Gesiŋ nədawnah sukum: Səwalaŋ uwa net gil pak tay an məs dəday ki Yohanna ɓa, ya an muzliya naddəv məlĩ na Maŋgəlva adayək kini.

29 # MAT 21:32; LUK 3:12 Ɗiy dit məkkalaŋ nzalaka dəprəmən pak, asənnənək təstəs Maŋgəlva, atafənək baptem na Yohanna. 30Ya Farisaɗe dit mərbaŋ-mahenziŋ, azganənək əŋgla na Maŋgəlva, dətafnən baptem səvan ɓa.

31Yesu anah na: Də mi nədawsla ɗiy na sayəŋ di? Va naway agilyoŋ di? 32Agilyoŋguk va kirin dəssoŋ a təki nakkala, tahəŋ əyanən zit ənahaŋ na: Məffon sukumək pozloro, kəskəlaŋ ɓa, məyə sukumək gəlya na gəlabaya, kəskaŋ morkoyo ɓa. 33Vi Yohanna məgəɗ baptem adeke awzəm way ɓa, awsa mbazla ɓa, yaŋ kəɓɗaŋ na mətemni. 34Wətən Ɗəf adeke, tay əzəma, tay əsa, kəɓɗaŋ na: Ɗəf məs golvoŋ yaŋka, məsə mbazla, baynet məkkalaŋ nzalaka gəm məɗɗaŋ mambraya. 35Ya maɗula arbək təstəs dit wəzeɗe nani.

Yesu tay ana Simoŋ mə Farisa da

36Yaŋ mə Farisa maɓɓan aya vi kawzəm dəndəni. Yesu ambatək kan eŋgil ana mə Farisa da naka, asanək əzəma. 37#MAT 26:7; MAR 14:3; YOH 12:3Guluk məs mambray tat a walaŋgəla-metiŋ nani. Adan təprəm na Yesu tay əzəm eŋgil ana mə Farisa da, təkiyək bəbər na tursan na nard məknəhən addəvən. 38Təziwik dərɓaga Yesu ammba təlni. Tat əhəma, hã təlɓanək təl Yesu dit sin nata, yaŋ təkəlɓit də muhur kiyta, tətuwəɗək tələn, təggbo' sənək tursan azani. 39Adan mə Farisa məs dəya nak awla vaska, aɗɗumuk a makrani: Va ɗəfəŋ məskəleŋgi na, kəta wasən na nawattə guluk məzurəŋgən kəŋ di, gəm an təsata: məs mambray tə. 40Yaŋ Yesu azlani, aɓsən na: Simoŋ, wən tay a maw nawnah suko. Simoŋ azlan sənək na: Apeli, Mərbəzəga. 41Yesu amna: Ɗəf maɓɓan tay də dəmən nan aket ɗiy sula. Ɗəf an taka suleyɗe səkat sle. Ɗəf maɓɓan tam suleyɗe kaklaw sle. 42Adan tahəŋ də zəga nawfaɗən ɓa, apan sitike, ndəɗaŋ sulegit pakə. Naway dədaŋgluwən day kan səmmbet di? 43Simoŋ azlanka, amna ɗəf an də dəmən akan dayəŋki. Yesu aɓsən na: Kətawək wən nan təstəsə.

44Yaŋ Yesu akkpaŋgan haran akat guluk nakə, aɓsən Simoŋ na: Kulətək guluk kəŋ sa? Nətoŋguk eŋgil anok da, kəvay iŋkile nawɗa təlu ɓa, ya nata təlɓanək də sin nata, təɗanək də muhur kiyta. 45Kəvoŋgən kiyuk azaw ɓa, ya nata səza nətoŋ anokda, təppan əppayan təlu ɓa. 46Kəppay sən mẽl na tursan sən kiyu ɓa, ya nata, təggbo'uk tursan aka təlwa. 47Vini nədawnah suko: Mambray nat ɗiyɗaŋka avviko vi əŋgla nat diyɗa yi. Ya an məvvuyon sən siɗikke, əŋgla nan siɗikke yi. 48Yaŋ anah sət guluk nak na: Mambray nok avvuyko. 49Məzuzəmaŋ dəndən atəŋgaŋgək ənahaŋ də makreti, aɓɗaŋ na: Naway aŋ van hara navvuyon mambrayəŋ di? 50Yesu anah sət guluk nak na: Ətaf nok akõhgukko, dok zayə.

Nu geselecteerd:

Luka 7: GB

Markering

Deel

Kopiëren