Luka 6

Yesu gəm pay naffete

(MAT 12:1-8; MAR 2:23-28)

1 # ƏMS 23:26 Adan Yesu adawtoŋ dəddəv guli na haykəmari pay naffet dit gewleɗ nani, gewleɗ nan aŋzlaŋgək kiyən, asurotənək aza veti, ampərəni. 2Farisaɗe meɓɓet aɓsitin na: Vimi kədaɗɗaŋ zəga an məppani tive naɗɗan pay naffet ɓa di? 3Yesu azlan sitike: Kəŋɗanən ɗah an Davit agəɗ aka mãy ada ndən dit ɗiy en dəssoŋ dəndən ɓa sa? 4#MƏS 24:9#1SA 21:2-7Atoŋguk addəv Gəla na Maŋgəlva, agim memteke mipsin sən Maŋgəlva azəmə, apsitik ɗiy dəssoŋ dəndəni. Ɗəf tay də tive nawzimit abbər məsdəlveŋge kaka ɓa ɓa. 5Yaŋ aɓsit na: Wətən Ɗəf van afən pay naffeti.

Ɗəf va məmtəni

(MAT 12:9-14; MAR 3:1-6)

6Yaŋ pay naffet maɓɓan əmpa, Yesu atoŋ addəv gəla nakkal net Yudeɗi, atəŋ arbə wəna. Ɗəf məs van dəzəŋ məmtən tay adaka. 7Mərbaŋ-mahenziŋ dit Farisaɗe tay ətaɗən Yesu kuzuŋ wambəlgən ɗəf pay naffete, vi kawkay tive nawrah sən heslepe. 8Ya nan asənək əɗɗum neti. Aɓsən ɗəf va məmtən nak na: Asili, aziw addak təkiya, ndən le' ziw. 9Yaŋ Yesu aɓsit na: Nəssohõkum ɗa: Awani məppan tive naɗɗan pay naffet di? Əɗɗa wəza moggon sa awaniɓa wəza mbərayəni? Əkõhogən zeŋgile ɗəf sa, əzani? 10Abbalanək haran aket kiyən suləkə, yaŋ aɓsən ɗəf nak na: Appar voko. Apparəka, van nak ambəlka. 11Yaŋ gidivit adə, atawanən an adawgəɗ sənən Yesu.

Yesu tay əwel maslənɗe kəlaw kiyit sula

(MAT 10:1-4; MAR 3:13-19)

12Ya pay nani Yesu ambat aka mossorgo metiŋ vi kakkama, avoŋ kim aka əkkaman Maŋgəlva. 13Ya səza təki adaŋgə, ayek gewleɗ nani, awel kəlaw kiyit sula sə weleŋti, aye na maslənɗe. 14Simoŋ məs alvan na Piyer gəm Andre məlməni, Yakob, Yohanna, Filipi, Bartelemi, 15Matiye, Tomas, Yakob wətən Alfe, Simoŋ məs adawyaŋ na məŋglu dələv nani. 16Yuda wətən Yakob gəm Yudas Iskariyot məs dəkkpaŋ əzəm ki Yesu.

Yesu tay ərba wəna gəm ənzeɗ ɗiyi

(MAT 4:23-25)

17Səza aprik dənɗaŋ na, ndən ziw a təki məpəlayya də ŋgaɓa net gewleɗ nan gəm ŋgaɓa net ɗiy diyɗa səka dələv na Yude pakə, sə Yerusalem gəm səma pehe na Tir gəm na Sidon. 18Azzoŋ na, vi kaprəm əpel nani, gəm vi kanzaɗ səka gbəgba' neti. Ɗiy en məs tuyeŋge adawzəmgitin sahã ambəlaŋka. 19Ɗiy pak tay əkayaŋ ərəŋgəni, vi gbogboŋ tay əgilye səzani, əmbəlgit pakə.

Əzaɓa gəm əraya

(MAT 5:1-12)

20Yesu aslan haran aket gewleɗ nani, amna:

Əzaɓ akokum mənokum məssehẽŋɗe,

vi məlĩ na Maŋgəlva nokumi.

21Əzaɓ akokum munokum məs mãy adawda kakaŋka,

vi kawbokumi.

Əzaɓ akokum, munokum məzuhəmaŋ kakaŋka,

vi wakəmasaŋgə.

22 # 1PI 4:14 Əzaɓ akokum an ɗiy azelkumənko, agohkumənko, arokumənko azganənək iya nokum va mbərayən aka wəna Wətən Ɗəfa. 23#2AL 36:16; WNM 7:52Mənneken zukum pay nani, məɗɗələ, vi ərəh nokum metiŋgini a disiŋ. Vi efiŋgiɗit vas adaɗɗaŋ sitin məskəleŋɗe lahəŋka.

24Ya əray akokum, munokum, məsaryeɗi,

vi mokrokum avoŋguk səkayə.

25Əray akokum, munokum məs kəbaŋ kakaŋka,

vi mãy wadukum.

Əray akokum, munokum məzumasaŋ kakaŋka,

wakəzəmaŋ sahã gəm wakəhəmaŋgə.

26Əray akokum, an ɗiy pak tay əpeleŋ moggon akokum,

vi efiŋgiɗit vas anah sitin məskəleŋɗe məwaŋ wəna.

Əŋglu məzuzelɗe

(MAT 5:38-48; 7:12)

27In tat ənah sukum, munokum məzəprəmwəni: Məŋglu məzuzelɗe nokum, məgəɗ moggon sit məzuzelokuməni. 28Məŋgəl əzaɓ sit məraygukuməni. Məkkam viyit məraygənən iya nokum. 29An ɗəf avərkuk aka tapaslayko, akkpaŋgan sən an maɓɓani. An ɗəf agəmək lukut metiŋgin noko, kəltakən dawgəmət akən muzliyak ɓa. 30Ɗəf an dəssoh zəga avoko, apsəni. Kədassohõn arya nok səva ɗəf an dəgəm ɓa. 31#MAT 7:12An məs kəŋglaŋ ɗiy dəɗɗan sukuməngəni, məgəɗ sit vaska'e tamə.

32An munokum tat əŋgluwin ɗiy en dəŋglukuməni, zəga na soko awan kədawgaŋ əmpa di? Məs mambrayɗe dayday tay əŋgluwin ɗiy en dəŋgluwini. 33An munokum tat əɗɗaŋ moggon sit ɗiy məɗɗaŋ sukumən moggon na, zəga na soko awan kədawgaŋ əmpa di? Məs mambrayɗe dayday vas adaɗɗaŋgə. 34An munokum tat əpsitin dəmən sit ɗiy en məs kədaɗɗumoŋ na wamndagan sukumuni na, zəga na soko awan kədawgaŋ əmpa di? Məs mambrayɗe dayday tay əpsitin sit məs mambrayɗe, vi dəmndan sitingin va dəslə. 35Ya məŋglu məzuzelɗe nokum, məgəɗ moggoni, məpsit dəmən məza əɗɗum na ərəh akan səbbərən ɓa. Ərəh nokum wasan diyɗa, wakəssoŋ kirtin Məsəɗəɗə, vi ɗəf moggoni azet məs awfeteŋ ɓa dit məs mambrayɗe pakə. 36Məsoŋ də ula sahã va Afukum asan məwəl sahã.

Kədawtaw wən aket ɗiy meɓɓet ɓa

(MAT 7:1-5)

37Kədawtawaŋ wən aka ɗəf ɓa, asna kawtawi wən akokum ɓa. Kədazlbenin ɗiy də ətawwən ɓa, asna kazlbukumi də ətawwən ɓa. Məvvuyon siti, asna kavvuyon sukumi. 38Məpsit zəga, asna kapsukumi, əsla moggon pa' setete hã əggbo' adawziyaŋ sukumun ama lukut nokum metiŋginiŋka. Vi zəga məs kədawslenin ɗiy dəndənəŋka, dəndəni adawslukuməni.

39 # MAT 15:14 Yesu apel sitik wənməkkpaŋga əmpa: Daŋgar waɓap əkdəh daŋgar sa? Sulegit pak abətaŋ na addəv vov ɓa sa? 40#MAT 10:24,25; YOH 13:16; 15:20Məzuyagan zəga aday na ki mərbəzəga nan ɓa, ya məzuyagan zəga an ayaganək təstəs na wasan va mərbəzəga nani.

41Vimi kədawla kevile ara məlmuko, ya nok kawla motoffo məs dəsan arok ɓa di? 42Mbari kədawɓap ənah sən məlmuk na: Məlmuwa, appaw nəgəm suk kevile səroko, yaŋ nok van motoffo tay aroko'e di? Məs muluvuluvu, agilgən motoffo sərok daabəŋ, asna akəwəl lewlew nawgəm kevile səra məlmuko.

Wəlaŋga də uwa nani

(MAT 7:16-20; 12:33-35)

43Wəlaŋga moggon tay dədawa kirtin mbəreyit ɓa, awaniɓa wəlaŋga mbərayən tay dədawa kirtin mogget ɓa. 44#MAT 12:33Wəlaŋga pak kawsəni də uwa nani. Kawɓuhi sokoyo səka gedirge ɓa, kawɓuhi uwa na megezlembirke səka dezize ɓa. 45#MAT 12:34Ɗəf moggon wagilgən zəga moggon sə təki wəzaɓ moggon na makrani. Ɗəf mbərayən, sə təki əzaɓ nan mbərayən adawgilgən mbərayən. Vi an dəknah a makra ɗəfi ma ɗəf adawpele.

Gəleɗe sula

(MAT 7:24-27)

46Vimi kədayuwən na Daya! Daya! Ya kaɗɗanən an məs nədawnah ɓaŋ di? 47Ɗəf məs dəde azaw pakə, məs dəprəm əpel nawa gəm məs dəgəɗ wəza dənɗaŋ na, wanərban sukum va naway agil di. 48Agilik va ɗəf mərkə gəla, aso'ək vov nan kpumu aɗiyək gabban aka milɓe. Iŋkile azzoŋko aziweŋgik ammba gəla naka, ya dəɓəsl ɓa, vi mərkani moggoni. 49Ya məs dəprəm əpel nawa, dəgəɗ wəza dəndən ɓa, agilik va ɗəf mərkə gəla aka dəlva, məza əso' vov nawɗi gabban ɓa. Adan iŋkile azzoŋ ammba gəla naka, aɓəslək ləŋ go'u, əbzla na gəla van daryawi sawɓa.

Nu geselecteerd:

Luka 6: GB

Markering

Deel

Kopiëren