Matíe 7
7
Yɩ́ a ŋányɩ bhè yɩ́ a sipɩʋ so a núnúó
(Lúkɩ 6.37,38,41,42)
1«A ná cí a lía nyumosa, bhè a nɩ ka á nyumosa cí. 2Cémʋ́ a bhlile a lía kʋ́ a, sɩ́tɛ̀ mʋ́ á na ká amɔ kʋ́ bhli. Lɛ́ a bhá lé a mɩ́zɩɛ a, ɛ́mɛ́ á na ká sáà bhá lé a ká amɔ mɩ́zɩ̀. 3Cégbá mʋ́ ɩ́ kʋ lé ɩ̀ liyʋ a yɩ́ a mnɩ́ a ŋányɩɛ́ ɩ́mɩ́ ɩ̀ yɛ́ kʋ́ bhè nà nɩ yɩ́ a sipɩʋ kʋ̀ mɔ̀ a, nɩɩ́ yɩ́ʋ́ kʋ́ a? 4Ɛ̀kʋ̀ʋ̀ lé ɩ̀ srʋɛ ɩ̀ liyʋɔ́ mà: Kʋ ʋ́ ká mɔ̀ɔ nà yɩ́ a mnɩ́ a ŋányɩplʋɔ́ kʋ̀ mɔ̀ɔ a sa à, bhè na nɩ sipɩʋɔ́ kʋ̀ nà yɩ́ a mnɩ́ áa?. 5Yrʋnyɔɔ̀, sa fɩ́ɛ́ mɔ̀ɔ nànɩ yɩ́ a mnɩ́ a sipɩʋɔ́, bhʋ́ ɩ̀ yi kʋ́ yɛ́, lé ɩ̀ yi mɔ̀ɔ ɩ̀ liyʋɔ́ a nɩ yɩ́ a ŋányɩɛ́ mɔ̀ɔ sa à.
A ná nyɛ́ vʋ̀ʋ Lagɔ̀duú a lɛ́
6Lɛ́ ɛ̀ ŋwɔ́ɔ Lagɔ a lɛ́ a, a ná nyɛ́ɛ́ vʋ̀ʋ, ɛ̀kʋ̀ʋ̀ a? Vʋ̀ʋ nɩ ka lɛ amɔ kʋ́ yrɩ́bha, ʋ nɩ ka lɛ amɔ mnemnè. A ná páa sáà a glìgbàlɩ bhuzàlɩ drɩ̀, ɛ̀kʋ̀ʋ̀ a? Bhuzàlɩ nɩ ka lɛ a glìgbàlɩ̀ɛ̀ jɩ̀ cécreè.
Zrazrʋ́, mʋ́mɔɛ́ lé kplu a bhiteé
(Lúkɩ 11.9‑13)
7A zraà mà á yi amɔ nyɛ́; a mʋ́mɔɔ̀, mà a yi yɛ́, a bhɩtɩ kpli, mà á yii ka a. 8Mà nyɔ nɩ zra a, á nyɛ́ ɔ́, nyɔ nɩ mʋ́mɔ a, ɔ́ yɛ́; lé nyɔ nɩ bhɩtɩ kplu a, á kalʋʋ́. 9A nyièdɩ a nyɔ gbá ɔ̀ kɔ̀ɔ̀ yʋ́ nɩ zrɔɔ́ flɔ́ɔbhuo lé ɔ̀ yió cɔ́kpalɩ́bhuo nyɛ́ à? 10Ɩ́ zà ɔ nɩ zra zrɩ̀ lé ɔ̀ yió bɛbɛlɛ nyɛ́ à? 11Amɔ, mɔ́nyùmònyʋ̀àà lɩ̀à, a yì a yúó a námalɩ a nyɛ́ sa. A nɩ́ saá yì mà a Tʋ́ɔ́ ɔ̀ kʋ̀ lagɔɔ́ lé ɔ̀ kà námalɩɛ́ fɩ́ɛ́ a, nyɔ nɩ yrálɔɔ́ lɛ́ mʋ́ a, ɔ́ yi ɔ̀ mɛ́ nyɛ́ ɛ? 12Wɔlɩ́ɛ́ fɩ́ɛ́ a yrá lé nyʋa nɩ nɩ amɔ a, ɩ́mɩ́ a nɩ nɩ sáà nyʋa á zà! Wɔlɩ́ɛ́ lɩ̀à ɩ́mɩ́ Moyízɩ a Jràmáá yà Lagɔ a nékʋ́cinyʋaá sɔ́ a bɔ́gwɩ̀ɛ̀ yrálɛ àmɔ̀ mʋ́.
Sríni sɔ́ a dɔ̀
(Lúkɩ 13.24)
13A blée srínitòyilɛ̀ɛ̀! Mà sríni kádàà, kwɩ́ a nyúzɔ á gà klʋ́, bhʋ́anɩ nyúzɔ̀ɔ̀ ʋ́ wlʋ̀ kʋ́, ʋ́mʋ́ nyʋa kɔ́kɔ́mnɩ́ bhlie. 14Mà srínitòyilɛ̀ɛ̀ a nyúzɔ̀ɔ̀ ʋ́ bhlibhlie ka nyakalɩ kʋ́, nyʋaá à bhliú a, a nɩ́ zù.
Kpɔkplá Lagɔ a nékʋ́cinyɔ
(Lúkɩ 6.43‑44)
15A mányɩ kpɔkplá lagɔ̀ɔ̀ a nékʋ́cinyʋa kʋ́. Á yile amɔ mʋ́ bhlábhlɩ́ bhísakʋ́, bhè á di nyù nànɩ́ klá a mnɩ́ a vʋvʋvʋ̀ʋ. 16Á nɩnɩgbɩ̀ɛ̀ ɩ́mɩ́ a na ká bhá lé a ká á yɩbhlɩ. A lɛ́bhɛɛ! A nɩ́ a zà glàyʋ nyníci kpaká yɩ́ sa à, lé á nɩ́ a zà sáà tɩtɔ nyníci su yɩ́ sa. 17Suó ʋ̀ na a, námabhi ʋ́ trʋɛ, ɩ́zà suó ʋ̀ nyù a, nyumo bhi ʋ́ trʋɛ. 18Náma su nɩ́ trʋ nyumobhi, lé nyumo su nɩ trʋ sáà námabhi. 19Sié fɩ́ɛ́ ɩ̀ nɩ́ trʋ námabhi a, áa díí kʋ́ lé á pálɩɩ́ kosuú. 20Naa nyʋaá à cíé kpɔkplá Lagɔ̀wɔ̀lɩ̀ɛ̀ a, á nɩnɩgbɩ a na ká bhá lé a ká á yɩbhlɩɩ̀.
Cícíwɔlɩ yà nɩnɩgbɩ sɔ́ a dɔ̀
(Lúkɩ 13.25‑27)
21Nyʋa fɩ́ɛ́ à srʋɛ mɔ́ mà Kanyɔ, Kanyɔ a, a lɔ̀fɩ́ɛ́ ɛ̀ nɩ́ a ká Lagɔ a Léyibhlɩɛ́ a mnɩ́ pla! Mà nyɔ ká Lagɔ a Léyibhlɩɛ́ a mnɩ́ pla a, ɔ́ ka lé ɔ ká wɔlɩ́ɛ́ ɩ Tʋ́ Lagɔ̀ɔ̀ ɔ̀ kʋ̀ lagɔɔ́ a yrá a nɩ. 22Tɩ́tɩ́ plɔyruo kʋ́, nyʋa kɔ́kɔ́mnɩ́ yi mɔ́ yrá mà: Kanyɔ, Kanyɔ, nà ŋnɩ́ mʋ́, à nɩ́ lɛ́ Lagɔ a niwɔlɩ cíi? Nà ŋnɩ́ mʋ́ à nɩ́ lɛ́ nyumozìzi jɩ́ɩ? Nà ŋnɩ́ mʋ́ à nɩ́ lɛ́ lɛ̀wɔ̀lɩ kɔ́kɔ́mnɩ́ɛ́ nɩɩ? 23Bhʋ́ na ká á srʋ mà: Nɩ́ a zà amɔ yɛ́, a wlʋ́ mɔ́ɔ yɩ́kʋ́! Bhàlʋ̀nyʋa yɩ.
Ghlɩ sɔ́ a núnúó
(Lúkɩ 6.47‑49)
24Nyɔɔ́ nà kà wɔlɩ́ɛ́ fɩ́ɛ́ ɩ́ cí lɛ́ a, nú lé ɔ̀ kɩ̀ɩ̀ nɩ a, ɔ́ wlʋ́ mànɩ́ fíke nyɔɔ́ ɔ̀ pá ɔ wlʋ́ kíké wlú. 25Nyú yi bhla, ʋ́ yi gblʋ́ʋ, nyíé yi yíe, vʋ̀vɔ̀lʋ a céàna yi yi, mà cémʋ́ kíké wlú ɔ́ pá wlʋɔ́ a, ʋ nɩ́ bhli. 26Ɩ́ zà nyɔɔ́ nɩ̀ nú ná cícíwɔlɩ lé ɔ̀ nɩɩ́ nɩ a, bhʋ́anɩ nyɔɔ́ wlʋ́ mànɩ́ nɩnà nyɔ̀ɔ̀ ɔ̀ pá ɔ wlʋ nyíbòdú a mnɩ́ a. 27Nyú bhla lé nyɩ́é yíe lé vʋ̀vɔ̀lʋ kádʋ yi a, cémʋ́ ɔ́ wlʋɔ́ nyíbòdú a mnɩ́ ɔ́ pálʋʋ́ a, vʋ̀vɔ̀lʋ̀ɔ̀ yi a, ʋ́ bhli lé ʋ́ lɔ̀fɩ́ɛ́ ŋátɔ.» 28Mà Zozíi bhɩa cícíé zɔ̀ a, nyʋa fɩ́ɛ́ à pʋ ɔ cícíwɔlɩ nyúkwlí a, neé mnaá. 29Ɔ cícíwɔlɩɛ́ a mnɩ́ kʋ pɔ́wa, ɔ nɩ́ cɩ́a lɔ̀ a másɛnyʋa bhísakʋ́.
Nu geselecteerd:
Matíe 7: NEY
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© (Active), Wycliffe Bible Translators, Inc. All rights reserved.