Matíe 6
6
Zozíi pápa cémʋ́ á nyɛ́ lɛ́ ŋazɩ̀nyʋa a
1«A mányɩ a Lagɔ̀nɔ̀nʋ̀ɔ̀ kʋ́, a ná nɩ dʋdʋ̀ dʋdʋ̀gbɩ nyʋa nɩ ka amɔ yɩ́gɔ̀ ŋwʋ́! A nɩ nɩ dʋdʋ̀ dʋdʋ̀gbɩ a, a Tʋ́ɔ́ ɔ̀ kʋ̀ lagɔɔ́ a, ɔ nɩ́ ka kɛ́zɔ̀ amɔ dàzɩ̀. 2Nɩ̀ nyɛ́ ŋazɩ̀nyɔ lɛ́ a, nà nɩ lé nyʋa ká saá yɩbhlɩɩ̀, cémʋ́ yrʋnyʋa nie lɛ́ zúfʋcɛcɩghlɩɛ́ a mnɩ́ yà tríi jɩ̀ sɔ́ a, áa nie sɩ́tɛ̀ lé nyʋa ká á dʋdʋ̀ lé a ká á ŋwnú fa. Náa srʋɛ amɔ cɩ́cása, a sɩ́tɛ̀ a wɔlɩ́ɛ́ ka ŋnɩ́ lé á ya wá má sɩsɔɔ́ dàzɩ̀. 3Mà mɔ̀, nà lilisɔ nɩ nyɛ́ ŋazɩ̀nyɔ lɛ́ a, nà kɔmɩsɔ ná yɩbhlɩ saá. 4Bhʋ́ a tányɩɛ́, lɛ́ɛ́ ɩ̀ nyɛ́ ŋazɩ̀nyɔ a, ɛ́ wɔlɩ́ nɩ́ flʋzɔ̀, bhʋ́alɛ́ ɩ̀ Tʋ́ Lagɔ̀ɔ̀ yì wɔlɩ́ɛ́ fɩ́ɛ́ a, ɔ́ yi kɛ́zɔ̀ mɔ̀ dàzɩ̀.
Cégbá mʋ́ á bhibhie a
5A nɩ bhibhie Lagɔ a, a ná nɩ yrʋnyʋa bhísakʋ́, ámá á nynʋ́vʋlɛ zúfʋcɛcɩghlɩɛ́ yà nyɩ́zɛ̀glàgbɩ sɔ́ kʋ́, dɛ́ á yi kʋ lé á yi bhibhie lé nyʋa yi á dʋdʋ̀ a. Cɩ́cása a mnɩ́ a náa srʋɛ amɔ mà, Lagɔ ká á dàzɩ̀ a, ɩ́mɩ́ a nɩ mʋ́mɔ a, ɔ́ ya wá ámá sɩsɔɔ́ dàzɩ̀. 6Mà mɔ̀, nɩ̀ cí mànɩ́ kà Lagɔ bhibhie a, pla wlʋdrèè mnɩ́ yrè nɩ́ kʋ a lé kà bhibhie, mà ɩ̀ Tʋ́ Lagɔ̀ɔ̀ ɩ̀ cílelɛ́ gɔ̀ a, ɔ́ kʋ dɛ́ɛ́ ɩ̀ zúzùò a, wɔlɩ́ɛ́ fɩ́ɛ́ ɩ̀ yrá a, ɔ́ yìi, ɔ́ yi mɔ̀ dàzɩ̀.
7A nɩ bhibhie a, wɔlɩdrèè a yrálɛ́ áa múóó a ná bhá á kʋ́ a ka á sábhla lé a ká mʋ́ trʋma, nyʋaá à nɩ́ Lagɔ yì a, bhísakʋ́; á dùòkʋ́ a nɩ cí wɔlɩ́ kɔ́kɔ́mnɩ́ a, bhʋ́ Lagɔ yi á bhibhiewɔlɩɛ́ nú. 8A ná nɩ ámá bhísakʋ́, mà a Tʋ́ Lagɔ yì wɔlɩ́ɛ́ a yrá a, fɩ́ɛ́ lé a ká lɛ́ bhibhiè.
Zozíi cɩ́a ɔ́ kʋjɩ̀nyʋ̀àà cémʋ́ á bhibhie Lagɔ a
(Lúkɩ 11.2‑4)
9Sɩ́tɛ̀ mʋ́ a ka lé a ká bhibhie:
À Tʋ́ɔ́ ɔ̀ kʋ ɔ̀ lagɔɔ́ a,
Nà ŋnɩ́ɛ́ ɩ blɔ̀.
10Nà nɩnɩgbɩɛ ɩ yi
Na wàwàlɛɛ́ kʋ lagɔɔ́ a ɛ
Kwlíi sáà dʋ̀dʋ kʋ́!
11Nyɛ́ àyɩ zɩmnɛ́ a yruó a lelilɛ,
12Cémʋ́ à ciele nyʋa a,
Cie àmɔ̀ sɩ́tɛ̀,
13Naá sa àmɔ̀ wlɩgɔ̀,
Lé a ka nyumoé nɩ,
Mà sa ʋ́ ayɩ neé!
[Máà mɔ̀ zi kʋ́,
Mɔ̀ kà pɔ́wa lé mɔ̀ à ŋwʋ́ɛ́ kpá
Kɔ́ lé kɔ́ a mnɩ́!
Ɩ kʋ saá.#6.13 Á má wɔlɩdrèè lɩ̀à, bhlagɔ̀gɔ̀bɔ̀gwɩ̀ɛ̀ fɩ́ɛ́ a mnɩ́ a nɩ́ jɩ́jràlɔ̀.]
14A nɩ cie a lía a á nyumoé a, a Tʋ́ɔ́ ɔ̀ kʋ ɔ̀ lagɔɔ́ a, ɔ́ yi sáà amɔ ciè. 15Mà a nɩ nɩ́ a lía cie a, a Tʋ́ɔ́ kʋ̀ lagɔɔ́ a, ɔ nɩ́ ka lɛ sáà amɔ ciè.
Zozíi pápa cémʋ́ á pʋ́lɛ kleé a
16A nɩ pʋ́ʋ kleé a, a ná nyɔnɔ̀ a kwɛ́ɛ́ yrʋnyʋa bhísakʋ́: Ámá nɩ̀ pʋ́ʋ kleé lé à nyɔnɔ a kwɛ́ lé nyʋa ká saá yɩbhlɩ mà kleé mʋ́ á pʋ́lɛ. Cɩ́cása a mnɩ́ náa srʋɛ amɔ mà á nɩ pɛ́ɛ fɩ́ɛ́ ɛ́mɛ́ á yɛ́ lɛ́ sɩ́tɛ̀. 17Mà mɔ̀, nɩ̀ pʋ́ʋ kleé a, wɔlɔ klʋ́ lé nyidò dàŋwóni, 18bhè nyʋa nɩ ka saá yɩbhlɩ mà, kleé mʋ́ ɩ̀ pʋ́lɛ, mà ɩ̀ Tʋ́ Lagɔ yɛ́ mɔ̀ kʋ́, ɔ́ a múó coco yì saá mà kleé mʋ́ ɩ̀ pʋ́lɛ a, ɔ́mɔ́ nà kà mɔ̀ dàzɩ̀.
Zɩkpa zɔ̀ a léyri lé lagɔ̀duú a léyri
(Lúkɩ 12.33‑34)
19A nɩ nɩ a, a ná mʋ́mɔ zɩkpa zɔ̀ a léyri a lilíé, mà ŋwɔnʋ́ lé wlɔ̀sʋ ʋ́ʋ ŋátɩɩ́, lé ghlíighlíinyʋa wáta kpli lé á yríií. 20Mà lagɔ̀duú a léyri a lilíé a nɩ mʋ́mɔɔ̀, mɔ̀ɔmɔ̀ nɩ́ ŋwɔnʋ́ yà wlɔ̀sʋ sɔ́ kʋ, lé ʋ kɩ́ɩ́ ŋáta lé ghlíighlíinyʋa nɩ́ sáà mɔ̀ɔmɔ̀ kʋ lé a ká kpli wáta lé a ká ghlíi. 21Mà dɛ́ nyɔ ŋwʋ́lɛ ɔ́ gbakalɩmalɛ sá a, bhʋ́ ɔ duo kʋɛ.
Yɩ́ ŋwɔ́ɔ yrúkanyɔ a nápɛ
22A lɛ́bhɛɛ, yɩ́ ŋwɔ́ɔ nyɔ a nápɛ. Nà yɩ́ nɩ kplɔ a, ɛ́ ŋana nà lɔ̀fɩ́ɛ́ kʋ́. 23Mà nà yɩ́ nɩ bhlá mɔ̀ a, nɩ́ yɛ́ kʋ́, cúcú a mnɩ́ ɩ̀ kʋ̀. Nà nápɛɛ́ kʋ̀ mɔ̀ mʋ́ a, ɛ nɩ nɩ́ ŋana a, cúcúkpe a mnɩ́ ɩ̀ kʋɛ!
Lagɔɔ, mà moníi
(Lúkɩ 16.13)
24Nyɔ nɩ́ ka míi lé ɔ ká kanyʋa a sɔ́ gà zrɩɩ̀. Ɔ kɩ́ɩ́ nɩ a, ɔ́ yi múó mʋ́ gblɩ̀, lé ɔ́ yi ànɔ wà. Ɩ́zà ɔ yà múó sɔ́ yi núnuù lé ɔ nɩ́ ka ànɔ yɩ́ sra. Nyɔ nɩ́ ka míi lé ɔ ká Lagɔ gà zrɩɩ̀, lé ɔ ká moníi gà zrɩɩ̀.
Lagɔ nyɛ́ àmɔ̀ lɩ́ɛ́ fɩ́ɛ́ à yrá a
(Lúkɩ 12.22‑31)
25Náa srʋɛ ɩ́ lɛ́ amɔ mà: A ná bhɔtɔ a zɩkpa a zà lé a ká cí mà: Bhè dɛ́gbá à yi lelilɛ yɛ́ lé à yi li a? A ná bhɔtɔ sáà á kpɩkpɩ a zà lé a ká cí mà: Bhè dɛ́ gbá à yi kótu bhá lé à yi mʋ́ pla a? Nyɔ a zɩkpa ka gbʋ́ lé á zi lelilɩ kʋ́. Lé nyɔ a kpɩkpɩ ka sáà gbʋ́ lé ɩ́ zi kótu kʋ́.
26A dʋdʋ̀ lagɔɔ́ a nimni, ɩ nɩ́ glɩ lelilɩ, ɩ nɩ́ sáà lelilɩ a saŋwʋ̀da ka, sɩ́tɛ̀ ɩ́ kʋ bhè a Tʋ́ɔ́ ɔ̀ kʋ̀ lagɔɔ́ a ɔ́ fínilɩɩ́! Bhè nyɔ ka gbʋ́ lé ɔ́ zi nimne kʋ́ a! 27Á nyièdɩ a nyɔ gbá yi míi lé ɔ̀ yi bhobho àààn lé ɔ́ bhobhoé yi yru a múó bhá lé ɛ́ yi ɔ́ zɩkpa zɔ̀ a yri kʋ́ ŋwʋ́ a? 28Bhè lɛ́gbá kʋ̀ʋ lé kóti wɔlɩ́ bhlá amɔ a? A dʋdʋ̀ caá flɛ́lɩ jɩ̀ a, a dʋdʋ̀ cémʋ́ ɩ námɛ kʋ a, ɩ nɩ́ zrɩɩ, ɩ nɩ́ bhla sáà loku. 29Mà náa srʋɛ amɔ mà sɩ́tɛ̀ ɩ́ kʋ lé lóo á wlele wá Salomɔ́ɔ a, ɔ̀ li wá kɔ́ a léyrié fɩ́ɛ́ a, ɔ mʋ́plakotu a námɛ nɩ́ flɛ́lɩyie a múó námɛɛ́ zi. 30Klá a mnɩ́ a pití kʋɛ ʋ́ zɩmnɛ́, lé zrɩ nɩ zɩ a, á ŋwʋ́ɩ́ kosu, sɩ́tɛ̀ ɩ́ kʋ bhè Lagɔ yrʋ́ɩ, amɔ Lagɔ nɩ́ ka míi lé ʋ́ ká yrʋ́ʋ? A Lagɔ a fádùò nɩ́ zù! 31A ná bhɔtɔ lé a ká cí mà: Bhè dɛ́gbá à yi lelilɛ yɛ́ɛ a? 32Bhʋ́anɩ wɔlɩ́ɛ́ fɩ́ɛ́ lɩ̀à, nyʋaá à nɩ́ Lagɔ yì a, ámá bhobuí. Mà amɔ, lɛ́ a gbʋ́ nɩ bhlá amɔ a, a Tʋ́ɔ́ ɔ̀ kʋ̀ lagɔɔ́ a, ɔ́ yìi. 33A jɩ́ fɩ́ɛ́ Lagɔ a Léyibhlɩɛ́ a mnɩ́ a námawɔlɩɛ́ kʋ̀ mɔ̀ a kʋ́, a bhli lagɔ̀nyùzɔ, bhʋ́ lɩ́ɛ́ fɩ́ɛ́ a yrá a, Lagɔ yi amɔ mɩ́ nyɛ́. 34A ná bhɔtɔ kɛ́ɛ̀lɛ a zà! Mà zrɩ̀ɛ̀ ɛ̀ zɩɛ a, ɛ́mɛ́ la ɛ́ wɔlɩ́. Yru lé ʋ́ ka ʋ mɔ̀glʋ̀ a wɔlɩ́.»
Nu geselecteerd:
Matíe 6: NEY
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© (Active), Wycliffe Bible Translators, Inc. All rights reserved.