Matìyò 16
16
Mə̀Farìsi tì mə̀Sadùsi gha Yeso ghiyə ayeti anug
(Mag 8:11-13; Lug 12:54-56)
1Mə̀Farìsi tì mə̀Sadùsi ya ghò abə Yeso ni zweʼri aməd, pè ghà ibo gha, “Àghò ghiyə ayeti anug ni chwi gha à ya Ŋwiye nàʼi ika ine.”
2Yeso ya ywìtì inɔb gha, “Àmə si ikwikwiri, mbə̰ ya ghà gha, ‹Isiŋi biri bɔ̀ŋ imbə̀ʼ icheg ne àbɔ̀ŋɔ ze bàŋà.› 3Àsi isusu, mbə̰ ya ghà gha, ‹Tèchɔ̀ŋ, afim biri chè imbə̀ʼ icheg ne nyùmə̀ we bàŋà, isiŋi bə̀ ndwìʼè.› Mbə̰ kyèri ni tòʼrì inug imbə̀ʼ àbɔ̀ŋɔ, à yaʼ inug ne dùwə̀ inga nyùmə̀ isəg gho̰, chəyi mbə̀ kyeri. 4Iwaŋ bəd gho̰ ne ghìyə̀ inug tibɔ̀ŋ ne chəyi mbe bə̀ nɔ̀ŋɔ̀ fìŋ igun Ŋwiye ya kə̀bə̀ ni bàd yaʼ ayeti anug. Si ya gha, chəyi Ŋwiye biri ghì ayeti anug inən chèyi ane àze ne ya du abə Jonà.”
Yeso ya ghàm ane, si nɔ̀ʼ sàŋì awɔb ghò yi.
Inug imbə̀ʼ àfòrì
(Mag 8:14-21)
5Anyumə̀ ne Yeso tì mə̀mə̀nənùg məd ya bani atəŋ ze ghò ijin iywin, mə̀mə̀nənùg məd ya nèbì ni niŋ ngə̀ŋ. 6Yeso ya ghà inɔb gha, “Mbə̀ we awən imbə̀ʼ àfòrì mə̀Farìsi tì mə̀Sadùsi.”
7Mə̀mə̀nənùg mbe ya ghàm anug ze mbɔb mbɔb gha, “Wì ya ghà ane imbə̀ʼ icheg ne chəyi tì niŋi ngə̀ŋ yèʼe aŋa.”
8Yeso ya kyeri anug ne mbɔb yaya ghàmà. Ane, wì ya ghà inɔb gha, “Mbə̰ ya kwàʼ bəd ne ibḛfiŋ kə! Aton ne mbə kə ghàmà mbə̰ mbə̰ gha chəyi mbə̀ niŋi ngə̀ŋ yèʼe aŋa àkə gha? 9Àkə chəyi ìmbən itog kiri zḛ? Àkə chəyi mbə̀ wendi anug imbə̀ʼ chiŋ ngə̀ŋ te tita̰ ne mbaŋà chuʼ ita̰ ya jəghi? Anyumə̀ ne mbə̀ ya feti ibəʼri ighi, àkə tiko tisə̀ʼə ne ibəʼri ighi mbe ya sweghi inga? 10Àkə chəyi mbə̀ bə wèndi chiŋ ngə̀ŋ ìsàmbe te ne bəd chuʼ ikwè ya jəghi fɔrɔ àbùʼì ne mbə̀ ya feti inga tiko? 11Aton ne chəyi ìmbən itog kiri zḛ gha kayi imbə̀ʼ ngə̀ŋ ne mə ghàmà àkə gha? Ane, mbə̀ we awən imbə̀ʼ àfòrì mə̀Farìsi tì mə̀Sadùsi.”
12Anyumə̀ we, àzɔb atog ya kə zen gha Yeso yaya ghà inɔb gha mbe we awɔb imbə̀ʼ inug ne mə̀Farìsi tì mə̀Sadùsi yaya chwìte, kayi imbə̀ʼ àfòrì ne mbe zìyè inga ngə̀ŋ.
Pità ghà gha Yeso ya Wə̀d we ne Ŋwiye chɔ̀ʼi
(Mag 8:27-30; Lug 9:18-21)
13Anyumə̀ ne Yeso ya pè inga aba aben ze a Kàserìyà Fìlipì, wì ya biri abə mə̀mə̀nənùg məd gha, “Bəd kə gha Ŋwan Wə̀d ya we?”
14Mbi ya ywìtì gha, “Bəd mɔ̀ʼɔ mbe gha, à ya Jɔn we ne yaya nàʼà mənib ywìrì bə̀ndì yèʼe. Mbi mɔ̀ʼɔ mbe gha, à ya Èlayijà. Mə̀mbin mbe gha, à ya Jèrìmayà kə̀ wə̀d mɔ̀ʼɔ abɔ̀ʼ bədkə̀n Ŋwiye mbe aneg.”
15Yeso ya biri inɔb gha, “Àsi mbə̰, mbə̀ kə gha mo ya we?”
16Sayimùn Pità ya ywìtì gha, “Àghò ya Wə̀d we ne Ŋwiye zɔ̀ʼi, Ŋwan ìwi Ŋwiye we ne yaʼi izɔm.”
17Yeso ya ywìtì gha, “Ŋwiye ziye àbɔrɔ̀bɔd igun ine, àghò Sayimùn, ŋwan Jɔn imbə̀ʼ icheg ne kayi wə̀d-aku ghi àghò kyèri anug azo̰. À ya ìmə Mbaʼ ne yaʼi ikaŋ àbɔ̀ŋɔ ghi àghò kyèri. 18Mə ghà tesiʼ ine gha, Àghò ya Pità#16:18 Aton ane Pità ane ìngam Grig ya igho. . Àghò ya igho we ne mə̀ biri kɔd ifeti bəd Kristo igun. Chəyi ika inga aben iwu bəd biri bèrì ika ni nimni ifeti we. 19Mə biri nàʼ afiʼì anug ìfɔ̀n ikaŋ ine. Anug ne àghò to̰ igun isəg, Ŋwiye biri bə ton ikaŋ àbɔ̀ŋɔ. Anug ne àghò bḛ igun isəg, Ŋwiye biri bə bḛ ikaŋ àbɔ̀ŋɔ”.
20Wì ya si taŋ pàti mə̀mə̀nənùg məd gha imbə̀ʼ mbɔb gha awɔb abə wə̀d mɔ̀ʼɔ gha məd ya Wə̀d we ne Ŋwiye zɔ̀ʼi.
Yeso ghà inug imbə̀ʼ ìwi iwu
(Mag 8:31–9:1; Lug 9:22-27)
21Ni ko ane nyùmə̀ we ne Pità ya mə̀ti wə̀d ne Yeso yaʼi ìwiwən, Yeso ya ko se mə̀tə̀ icheg ne wì mənyìʼ ghò a Jèrusalèm abə mə̀mə̀nənùg məd. Wì ya mə̀tì icheg ne wì biri zə̰ ngəʼ nɔʼ nɔʼ ikye abo abə itog bəd inga aben tì itog bəd mbàn Ŋwiye fɔrɔ mə̀chwitì mə̀nɔ̀ʼɔ̀. Wì ya gha, mbi biri mənyìʼ zwèti yi, àsi igun aneg ne pè ane itad, Ŋwiye zwemni aməd ane iwu.
22Pità ya niŋ aməd ghò iban ko kyḛ aməd gha, “Anɔŋisəg, Indèʼ ka! Imbə̀ʼ iku anug gho̰ nɔ̀ʼ zə̰ yi awe!”
23Yeso ya ghabri ghà abə Pità gha, “Sàtàn! Nɔ̀ʼɔ inum anjìm! Àghò we kə̰ ìmə inɔnjì. Chəyi àghò nɔŋi ìwe ikɔndi igun anug ne Ŋwiye kə̀bi. Àghò nɔ̀ŋì ìwe ikɔndi yaʼ məyi igun anug ne wə̀d-aku we kə̀bə̀.”
24Yeso ya si ghà abə mə̀mə̀nənùg məd gha, “Wə̀d mɔ̀ʼɔ mə̀ kə̀b ni yaʼ àmə àmə̀nənùg, tengàŋ mənyìʼ ton inug mbe ne nyàmnyɔd məd ze ghə̀ʼrə̀ si bèʼì àzi azed abaʼri bèni abɔ̀ʼ inum. 25Aton ya gha, wə̀d ne kə̀bə̀ ni kyèmbì ìwi ìtḛ̀, tengàŋ bìri sam ìtḛ̀ we. Àsi wə̀d ne sami ìwi ìtḛ̀ imbə̀ʼ amə, tengàŋ biri jəg ìtḛ̀ we. 26Wə̀d kə mə̀ bèrì ighi igun isəg aŋa ijìm si sam ìwi ìtḛ̀, chùd ne angu àkə aghə? Kə̀ aghi ne tì wə̀d nàʼ ni zon ìwi ìtḛ̀, àkə aghə? 27Ŋwan Wə̀d tì ìmbi mbè angirə̀ biri yeʼe tì ighumni we ne Mbaʼ məd nàʼi ibo, pè nàʼ chùd abə wə̀d imɔʼ imɔʼ icheg ne ìfàʼì wə̀d chwi.
28Mə gha tesiʼ inən gha, bəd mɔ̀ʼɔ mbe abɔ̀ʼ ina aŋa ne chəyi mbi biri ku witì mbi bàd Ŋwan Wə̀d ne we yèʼe icheg ifɔn.”
Nu geselecteerd:
Matìyò 16: MBTP
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2019 CABTAL
