Matìyò 17
17
Yeso bə̀ŋə̀ se njàndi njandi
(Mag 9:2-13; Lug 9:28-36)
1Anyumə̀ ne Yeso ya ghàmi inug imbə̀ʼ ìwi iwu, ineg ya chè tìfughə wì niŋ Pità tì Jem fɔrɔ Jɔn ne ya ifi ìwi Jem, mbi kɔʼ ghò ikaŋ iwum mɔ̀ʼɔ məyi mbɔb mbɔb. 2Anyumə̀ ne mbɔb ya pe angu, məd ya bə̀ŋə̀ inɔb imbìghè. Ìfe məd yaya se zùʼə kwàʼ icheg nyùmə̀. Ndwi məd yaya bə̀ se njàndi njandi. 3Mbi ŋa zə̰, Muse tì Èlayijà du inɔb imbìghè. Mbɔb ya dù ane ko se ghàmà tì Yeso. 4Pità ya zə̰ ane, ghà abə Yeso gha, “Anɔŋisəg! Ze bɔ̀ŋ gha tì we aŋa. Àghò mə kɔ̀ŋ, mə biri kɔd izuŋ itad aŋa, àze afibì ine, àze afibì abə Muse, àzin afibì abə Èlayijà.”
5Icheg ne wì yaya kiri ghamà, pàʼ ne yaya fùyə njànda ya kəndi awɔb mbɔb məjìm. Gì mɔ̀ʼɔ ya si ghàm inga pàʼ ze gha, “Aŋa ya ìmə Ŋwan ne mə̀ taŋ kɔ̀ŋ. Ìmə fìŋ ze taŋ bɔ̀ŋɔ̀ imbə̀ʼ aməd. Mbə̀ zug anug ne we ghà!”
6Anyumə̀ ne mə̀mə̀nənùg mbe ya zughi gì ze, mbɔb ya taŋ bɔ si gùg aseg ikubə. 7Si ya gha, Yeso ya ghò bètì awɔb, ghà inɔb gha, “Mbə̀ nɔʼɔ titighe. Imbə̀ʼ mbə̰ bɔ awən.” 8Anyumə̀ ne mbɔb ya nɔ̀ri itog nèn, chəyi mbɔb ya ywirì bàd wə̀d ndəŋ chèyi ane Yeso məd tèzìʼì.
9Anyumə̀ ne mbɔb yaya swìʼe ikaŋ iwum we, Yeso ya pati awɔb gha, “Imbə̀ʼ mbə̰ nɔ̀ʼ mə̀tì anug ne mbə̀ bari abə wə̀d mɔ̀ʼɔ pè ane nyumə̀ ne Ŋwiye fə zwemni Ŋwan Wə̀d iwu.”
10Mə̀mə̀nənùg mbe ya biri ibo gha, “Aton ne mə̀chwitì mə̀nɔ̀ʼɔ̀ mbe gha Èlayijà bèrì ni bi yeʼe bɔŋ Wə̀d we ne Ŋwiye zɔ̀ʼi àkə gha?”
11Wì ya ywìtì inɔb gha, “Èlayijà bèrì ni bi yeʼe imbə̀ʼ ywiri tangi inug ijìm icheg ne mbi ya bi yaʼ. 12Mə ghà inən gha, Èlayijà ya fə yeʼe, si ya gha, chəyi bəd ya kyeri aməd. Mbɔb ya ghì inug ibo icheg ne ze ya bɔ̀ŋi inɔb. À ya bə̀ icheg ne Ŋwan Wə̀d biri zə̰ ngəʼ inga ìtɔb tikye ibo.”
13Anyumə̀ ne wì ya gha ane, itog abə mə̀mə̀nənùg mbe ya kə zen gha wì yaya ghàmà inɔb yaʼ imbə̀ʼ Jɔn we ne yaya nàʼà mənib.
Yeso ghù ŋwan mbaŋà ne azwighi tibɔ̀ŋ yaʼi inga məd
(Mag 9:14-29; Lug 9:37-43a)
14Anyumə̀ ne Yeso tì mə̀mə̀nənùg məd ya nɔ̀ʼi ikaŋ ywirì swìʼi bə̀ndì ghò abɔ̀ʼ inɔ̰ bəd we, wə̀d mɔ̀ʼɔ ya ghò abə Yeso pè gɔ̀m itog inwḭ ibo imbìghè, si gha, 15“Masà, dìgre igun ìmə ŋwan. Aghɔn tìsùʼ ze taŋ nàʼà ngəʼ ibo. Məd we sàʼà gùghə̀ inga ijəŋ, bə̀ sàʼà gùghə̀ inga mənib. 16Mə kə̀ niŋ aməd yèʼe abə ìmbe mə̀mə̀nənùg, si ya gha, chəyi tì mbɔb ghù aməd.”
17Yeso ya ywìtì gha, “Chəyi iwaŋ bəd gho̰ tèchɔ̀ŋ beri ibḛfiŋ. Mbɔb mbe ghìyə̀ inug ne chəyi mbi koʼi. Mə kə ywìri chughi tì inən ane agha ne sa iye? Mə̀ kə anìŋ ywìri nyimi fìŋ tì inən ane agha ne bə sa iye? Mbə̀ niŋ ŋwan mbaŋà we yèʼe nàʼ inum.” 18Ane, mbi ya niŋ ŋwan we ghò nàʼ ibo. Wì ya ghàm kyen abə azwighi tibɔ̀ŋ ze, ze chè dù inga ŋwan we. Ane, Aghɔn ŋwan we ya mèg məyi kwàʼ anyumə̀ we.
19Mə̀mə̀nənùg mbe ya ghò abə Yeso anjìm anjìm pè bìri ibo gha, “Aton ne chəyi tì mba kə̀ chì azwighi tibɔ̀ŋ ze àkə gha?”
20Wì ya ywìtì inɔb gha, “À ya imbə̀ʼ icheg ne ìwən ibḛfiŋ bɔri. Mə gha tesiʼ inən gha, mbə̰ mə̀ bèrì ibḛfiŋ ne kə icheg titam mostàd#17:20 Fitam azed mostàd yaʼ isighì isighì icheg fitam azed furəsìgad. , mbə̰ mbe tì mbə̰ ghà abə iwum gho̰ gha, ‹Nɔ̀ʼɔ aŋa ghò ayin!› Wi bə̀ nɔ̀ʼ ghò. Chəyi anug mɔ̀ʼɔ biri nɔ̀ʼ chè awən.” 21[Chəyi tì iku azwighi tibɔ̀ŋ gho̰ dù ne chəyi mbə̀ chughi njèg chàʼra Ŋwiye.]
Yeso ywìrì ghàm imbə̀ʼ ìwi iwu
(Mag 9:30-32; Lug 9:43b-45)
22Anyumə̀ ne Yeso tì mə̀mə̀nənùg məd ya fète a Galìli, wì ya ghà inɔb gha, “Mbi biri fèn Ŋwan Wə̀d abə bəd mɔ̀ʼɔ, mbi zweti aməd. 23Bəd mbe biri zweti aməd, si ya gha Ŋwiye biri zwemni aməd ane iwu ane ineg pe ane itad.” Anyumə̀ ne mə̀mə̀nənùg mbe ya zughi anug azo̰, ze ya nàʼ ngəʼ inɔb, mbɔb se sɔ̀mnɔ̀.
Yeso nàʼ ikab tag mbàn Ŋwiye
24Anyumə̀ ne Yeso tì ìmbi mə̀mə̀nənùg ya pe a Kàpenàwum, bəd mbe ne yaya fète tag mbàn Ŋwiye ya ghò abə Pità pè bìri ibo gha, “Àkə chəyi ìwən Àchwitìnùg gho̰ we nàʼà tag mbàn Ŋwiye?”
25Pità ya bḛ gha, “E! Məd we nàʼà tag mbàn Ŋwiye.”
Anyumə̀ ne Pità ya gho pè nyi inga nəb, Yeso ya ghàm ibo bìri gha, “Sayimùn, àghò kɔ̀ndi gha? Məfɔn mbe igun isəg kə nìŋə ikab ighi iywin kə̀ ikab mə̀tag abə mə̀we? Mbɔb kə nìŋə abə ìmbɔb bəd aben kə̀ abə bəd tìsɔ̀ʼ?”
26Pità ya ywìtì gha, “Mbɔb ya nìŋə məkab mbe abə bəd tìsɔ̀ʼ.”
Yeso ya si ghà ibo gha, “Ane ya gha, chəyi ìmbɔb bəd aben beri ni ya nàʼà mə̀tag mbe. 27Si ya gha, ni ghì gha imbə̀ʼ bəd nɔ̀ʼ gaŋ tì ina, ndò gho màʼ saʼ inga atəŋ gwì su. Niŋ su mbègtog ze ne àghò gwi, fìʼì ichug məd, àghò biri bàd ikab inga. Chìye ikab we ghò nàʼ inɔb atog ine bə̀ fɔrɔ atog inum.”
Nu geselecteerd:
Matìyò 17: MBTP
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2019 CABTAL
