Halloo 29
29
Yaaqobi Labaani Kexooch Shago
1Yaaqobi Beeteelee tiyiꞌi, aabi-keyo waan beeti asheenaꞌo showooch hammii shaggiye. 2Aroochoo ikke gaddooch keejje kuxona bageenaꞌonaa emmisheenaꞌona miqqeꞌi beeti gaꞌooch aachi oppoon beeggiye; bageenaꞌonaa emmisheenaꞌona arooch boonoshi beeto, are oppoochee aacon boonoshi uchii beetoyichiye. Ebi oppee kello oogeti xaqqoona keppheetone. 3Bageenaꞌonaa emmisheenaꞌona bulli oppee gashoona kiceetoyee gubb, qiddeenaꞌo xaqqoon oppee kelloochee tiijjiꞌi, boonoshich aacon kittii uchii beeheete. Boonoshi uchii michiitoyee gubb, oppee kelloon ebi xaqqoona wochii kepphee beeheete.
4Yaaqobiyoo qiddeenaꞌon “Ta maneenaꞌote! Aabekkeeniye ittoshi waato?” ii echehe.
Boonoshiyoo “Karaaneeniye no waato” iyeete.
5“Nakoori bushoochi bushoo Labaanin ariihote?” iye.
Boonoshiyoo “Eeha, ariihone” iyeete.
6Yaaqobiyoo “Diggeebeete?” iye.
Boonoshiyoo “Eeha, diggoone. Okk ebeege, bi bushee Raaheeli bageenaꞌona tookkaa waabeeti” iyeete.
7Yaaqobiyoo “Batt showoo womikkeyaanoone; gijjeenaꞌo kiceyemmi saato toonoone. And bageenaꞌoyich aacon uchiꞌi, amoyich gaddooch wochaachote?” iye.
8Boonoshiyoo “Gijjeenaꞌo bulli kiceetaa, oppee kelloochee xaqqo tiijjeyaan beetaa hakkaachone. Aroyee gubbiye bageenaꞌoyich aacon no uchemmo” iyeete.
9Yaaqobi asheenaꞌona tookkii yibbaatooch bi beetaa, Raaheeli, qiddee bi tunetoyich, bi nihoochi bageenaꞌona tookkaa arooch shaggahan. 10Yaaqobi bi iyoo bushee Raaheelinaa bi iyoo Labaanichi bageenaꞌonon bi beeggiyooba, aachi oppo beetooch hammiꞌi, xaqqoon oppee kelloochee tiijjiye. Bi iyoo Labaanichi bageenaꞌoyich aacon kittii uchiye. 11Aroochee Raaheelin shummiye; oogichiinoo eeppiye. 12Yaaqobiyoo bi nihoo xiboonaa Ribiqichi bushoona bi tunoon Raaheelich gettiye. Raaheeliyoo woccaa hammaa bi nihoyich ebi mooyon gettahan.
13Labaaniyoo bi manee bushoo Yaaqobi womon waayeꞌi, biinna daneya afaafinoona woccii waahe. Tiqqeꞌinoo shummiye; kexooch daammii giijjiye. Yaaqobiyoo tuneti mooyo bullin Labaanich gettiye. 14Labaaniyoo “Iberoon ne ta meeno, ta damoo neene” iye.
Yaaqobi Liyinaa Raaheelinon Shaago
Yaaqobi ikke agenoon Labaan waan bi kotetoyee gubb, 15Labaani biich “Ta xiboo ne tunetoyich, baad cikki taach shuune beeyenne? Neech ta qoccemmo amo gaata taach gete” iye.
16Labaanich gutte maache bushiisheenaꞌo beetinaꞌone; qaabbeechi shigo Liyi, guucheechoo Raaheeline. 17Liyi aaf gishiishe bi tunemmona, Raaheeli damoon keqqichaabeeti, mallet gaawe busheene. 18Yaaqobiyoo Raaheelin shunniye; ishichiinoo iye: “Ne guuche bushee Raaheelin taach ne immemmo tunegaata, shabaatte naton neech shuunebona” iye.
19Labaaniyoo “Bare ashich ta imoyee, neech ta imo gaawiye; taanna tookki beebe” iye. 20Yaaqobi Raaheelicha iꞌi, shabaatte naton shuunehe. Biin oogichii bi shunnitoyich, shabaatte nato biich aricheyaanoon beshehe.
21Shabaatte nato ciiretoyee gubb, Yaaqobi Labaanin, “Ebiyoche, neennaa taanna taajjeti taajjo ciiretone. Ta mecheen taach ne imaa shaagona” iye.
22Ebich Labaani are bi showeexi asheenaꞌo bullin kiciꞌi gaaroon geddiye. 23Xum Labaani bi qaabbe bushee Liyin daammii Yaaqobich immiye. Yaaqobiyoo Liyina tookkii qeyiye. 24Labaaniyoo bi gonnee Zilifin gonnee tuniiꞌi Liyich immitone.
25 Dechara maaddoona Yaaqobi ciinniꞌi, Liyi bi tunoon ariihe. Ebich Yaaqobi Labaanin “Amoyich ebin taach shuunenne? Neech ta maddeto, Raaheelicha iyaa toone? Amoyich taan dawushinne?” iye.
26Labaaniyoo wochiꞌi, “Qaabbee beetaa guucheen shaakkiyoo, no showee doyoo toonoone. 27Hini gaaree shabaattoon ne ciichimmona, bare shabaatte naton taach ne shuunemmo tunegaata, guucheen immemmo taane” iye.
28Yaaqobiyoo ebin deꞌa iye. Liyina tookkii shabaatte qemon yagiye. Aroochee Labaani bi bushee Raaheelin Yaaqobich immiye. 29Bi gonnee Biilinoo gonnee tuniiꞌi Raaheelich immiye. 30Yaaqobiyoo Raaheelin shaaggiye. Raaheelin Liyiyee beshii shunniye. Bare shabaatte natonoo Labaanich shuunehe.
Yaaqobich Bushiishoo Shiijjo
31Doono Yeeriyoo Liyi shucheyaane bi tunoon beeggiꞌi, bushoon bi shiyemmoyich, bi maacoon qechiye; tunebaani Raaheeli xaafeene. 32Liyiyoo xifaa anaami bushoon shiyahan. “Doono Yeeri ta iritoon beeggitone. Iberoon ebiyee bekk ta keno taan shunnemmone” iyan. Ebich bushoo shigoon, Roobeeli#29:32 Roobeeli geto, “Ebiyoche, anaami bushoo” geto woyee “Ta duꞌoon beeggite” getone. iyaa shigiihan.
33Wotta xifaa anaami bushoon shiyahan. “Shicheti ta tunoon Doono Yeeri bi waayetoyich, hini bushoon taach daakkite” iyan. Ebich bushoo shigoon, Simooni#29:33 Simooni geto, “Waayete” getone. iyaa shigiihan.
34Wotta xifaa anaami bushoon shiyahan. Biyoo “Keejje anaami bushiishoon ta shiyetoyich, illa ta keno ta waan katinnemmone” iyan. Ebich bushoo shigoon, Lewi#29:34 Lewi geto, “Katino” getone. iyaa shigiihan.
35Andoo xifaa anaami bushoon shiyahan. Biyoo “And Doono Yeerin galletoye” iyan. Ebich bushoo shigoon, Yihudi#29:35 Yihudi geto, “Galleto” getone. iyaa shigiihan. Ebiyee gubb, shimon neechiyan.
Nu geselecteerd:
Halloo 29: KBRC
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
SIM International, 2020.
