Halloo 28
28
1Ebich Yisaaqi Yaaqobin ceeggiꞌi diiriye; biichoo ishichiye: “Amoommo tunetaa Kanaaneenaꞌochi maache bushiishoo daggoochee mecheen shaaggaahine. 2Tiyiree Mesopotaamee showooch beeti ne indinihoo Batuꞌeel waan hambe. Aroochee ne iyoo Labaanichi maache bushiishoo daggoochee mecheen shaage. 3Beshe Hakkechi Nuggishoo neen diiribe; shiyi shiijjereree meeti aagetoon ne tunemmoyich tuniibe; ne shiijjereenaꞌonoo meechibe. 4Yeeri Abrahamich bi immiti, newoo and iibboo tunaꞌa ne beeti hini showoon iristo tuniiree neech bi immemmoyich, Abrahamich bi immiti diiroon neennaa ne shiijjereenaꞌonoyich imbe” iye.#Hal. 17:4-8 5Yisaaqiyoo Yaaqobin daachiihe. Biyoo tiyiꞌi, biinnaa bi manoo Esayinochi iyoo tuneti, Araamee asho Batuꞌeelichi bushoo Labaani beeti Mesopotaamee showooch hammiye.
Esayi Bare Mecheen Shaago
6Yisaaqi Yaaqobin diiriꞌi, mecheen bi shaaggemmoyich Mesopotaamee showooch bi daachiyoon, bi diiriyooba, “Kanaanee maache bushiishoo daggoochee mecheen shaaggaahine” bi geton, 7Yaaqobiyoo bi nihoonaa bi indeenochi getoon waayeꞌi, Mesopotaamee showooch bi hamonoo Esayi waayehe. 8Ebina Kanaaneenaꞌochi maache bushiisheenaꞌo bi nihoo Yisaaqina am shaahoon shichetinaꞌo gaata, ariihe. 9Ebich Esayi Ishmaꞌeel waan hammiye. Abrahami bushoo Ishmaꞌeeli shiyiti, Nebayootichi manee Mahalaatin bi mecheenaꞌo toommooch daakkii shaaggiye.
Beeteelaa Yaaqobi Gummiti Gumo
10Yaaqobi Beershaabee tiyiꞌi, Karaan waan hammiye. 11Hammiibee ikke xaaꞌooch bi shaggaahaa, aabe giyetoyich, are xaaꞌooch qeyiye. Arooch beeti xaqqeenaꞌo daggoochee ikkoon tiijjii, qoyeꞌi tokketehe. 12Gumonoo gummiye. Ebi gumona showooch neexeti, bi cilloo shimaajj tuggeti daqqelloon beeggiye; Yeerichi maraakeenaꞌoo ebi daqqelloona kechii kindii beeheete. 13Doono Yeeriyoo ebi daqqellee tookk neexee beehe; ishichiinoo iye: “Ne nihinihoo Abrahamichi Nuggishoo, ne nihoo Yisaaqichi Nuggishoo, Doono Yeeri taane. Hini ne qeyaabeeti showoon neennaa ne shiijjereenaꞌonoyich immemmo taane.#Hal. 13:14-15 14Ne shiijjereenaꞌon showee toommeexi qacoochoommon meechemmo taane; boonoshiyoo aabi-gimo waaninaa aabi-keyo waanina, dambi-waaninaa deshi-waanina gaminnemminaꞌone. Showee toommeexi aageteenaꞌo bulli neennaa ne shiijjereenaꞌona diireyemminaꞌone.#Hal. 12:3; 13:16; 22:18 15Waayebe; ta neenna tookkaa beeto taane; ne hammaabeeti xaaꞌoo bulliich neen quyemmo taane; hini showooch neen wochiree deebemmo taane; ta getteto bullin neech ta tuniimmi wottoon, ciroona neen qayaachemmo taane” iye.
16Yaaqobiyoo tokketoochee tiyiꞌi, “Iberoon Doono Yeeri hini xaaꞌooch beetone; tunebaani ta ebin ariyaano taane” iye. 17Biyoo shattiꞌi, “Hini xaaꞌoo am shaahoon shattiihe! Hini Yeerichi kexoani, baroon tuneyaache; ebiyoo shimaajji kelloone” iye.
18Yaaqobi bi dechara maaddoona tiyiye. Qoyeꞌi bi qeyiti xaqqoon tiijjii, giimboochoommon xogii neechiye. Ebi xaqqee toommoochoo zayitoon ukkiye. 19Ebi xaaꞌoon, Beeteeli#28:19 Beeteeli geto, “Yeerichi kexo” getone. ii shigiihe. Shiichiꞌi ebi katemoo, Luuzi gettee beehe.
20Arooba Yaaqobi ishichii mookkehe: “Yeero, taanna tookkaa ne tunegaata, ta hammaabeeti gommooch taan ne quyegaata, ta maayemmi maayoon, ta tahemmi tahoonoo taach ne imigaata, 21ta nihoo kexooch diggoona taan ne wochigaata, Doono Yeero, neech ta goyinnemmi ta Nuggishoo tunemmo neene; 22hini ta neechiti xaqqo Yeeri ne kexo tunemmone; taach ne immemmi mooyo bulliicheenoo aashiroochee ikke beeroon neech immemmo taane” iye.
Nu geselecteerd:
Halloo 28: KBRC
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
SIM International, 2020.
