Halloo 30
30
1Raaheeli Yaaqobich ikke bushoonolla shiyaane bi tunetoyich, bi maneen qanaatahan. Ebich Yaaqobin “Bushoon taach imbe; ebi tuno qayigaata, qitemmi taane” iyan.
2Yaaqobiyoo Raaheelin oogichii kaareꞌi, “Ta, ne maacoon dookkiti Yeeri taane?” iye.
3Raaheeliyoo, “Ebiyoche, ta gonnee Biili beetine. Bi waan gibe; ta qoodoon shibuye; bi shiyemmi bushiishoo ta bushiishoo tunebe” iyan.
4Raaheeli bi gonnee Biilin mechee tuniyaꞌa Yaaqobich immahan. Yaaqobiyoo bi waan giyiye. 5Biili xifaa anaami bushoon Yaaqobich shiyahan. 6Raaheeliyoo “Yeeri taach nallite; ta qolloon waayeꞌi anaami bushoon taach immite” iyan. Ebich ebi bushoo shigoon, Daani#30:6 Daani geto, “Taach nallite” getone. iyaa shigiihan.
7Raaheelichi gonnee Biili wochinnoon xifaa guttinnee anaami bushoon Yaaqobich shiyahan. 8Raaheeliyoo “Kupphe qiiccoon ta maneena qiiccaꞌa wochite” iyan. Ebich bushoo shigoon, Nifitaali#30:8 Nifitaali geto, “Qiicco” getone. iyaa shigiihan.
9Liyiyoo bushee shimon neechiti bi tunoon ariyaꞌa, bi gonnee Zilifin mechee tuniyaa Yaaqobich immahan. 10Zilifiyoo xifaa anaami bushoon Yaaqobich shiyahan. 11Liyiyoo “Ye ixee gaawo!” iyaa bushoo shigoon, Gaadi#30:11 Gaadi geto, “Ixee gaawo” getone. iyan.
12Liyichi gonnee Zilifi wochinnoon xifaa guttinnee anaami bushoon Yaaqobich shiyahan. 13Liyiyoo “Am shaahoon taan emirikkite. Illa maacheenaꞌo taan emirechi gettemminaꞌone” iyan. Ebich bushoo shigoon, Aseeri#30:13 Aseeri geto, “Emiroo” getone. iyaa shigiihan.
14Teepphoo qecceebeeti goorooch Roobeeli budooch hammiye. Dudayimoon#30:14 Dudayimo, “Bi xepphoon woyee bi aafoon gennoo maagaata, bushoo shiijjee beetone” ii boonoshi iberiibeeti mixone. daneꞌi deebii bi indee Liyich immiye. Raaheeliyoo Liyin “Doogena ne bushoo deebiti dudayimoochee taach imbe” iyan.
15Liyiyoo wochaꞌa, “Ta kenoon ne bogo giishetenane, wotta ta bushoo taach deebiti dudayimoon ‘Taach imbe’ ne ii beeto?” iyan.
Biyoo “Ne bushoo deebiti dudayimoochee taach ne imiichaa, Yaaqobi hanaach ne waan qebe” iyan.
16Yaaqobi xum budoochee bi waataa, Liyi kechaa biinna danaꞌa ishichiyan: “Ta bushoo dudayimoona hanaachich neen ta kemetoyich, ta waaniye ne qeyemmo” iyan. Yaaqobiyoo aroobee xum Liy waan giyii qeyiye.
17Yeeriyoo Liyichi qolloon waayehe. Biyoo xifahan; uuchinnee anaami bushoon Yaaqobich shiyahan. 18Liyiyoo “Ta gonneen ta kenoyich ta immetoyich, Yeeri taach qoccite” iyan. Ebich bushoo shigoon, Yisakoori#30:18 Yisakoori geto, “Qoco” getone. iyaa shigiihan.
19Liyi wotta xifahan; shirittinnee anaami bushoon Yaaqobich shiyahan. 20“Yeeri gaawe bi wojjoon taach immite. Biich shiritte anaami bushiishoon ta shiyetoyich, illa ta keno taan oogiyemmone” iyan. Ebich bushoo shigoon, Zebulooni#30:20 Zebulooni geto, “Oogiyoo” getone. iyaa shigiihan.
21Aroyee gubb maache busheen shiyahan; bi shigoonoo, Diini iyaa shigiihan.
22Yeeriyoo Raaheelin gabiye; bi qolloon waayeꞌi, bi shiyemmoyich bi maacoon qechiye. 23Biyoo xifaa anaami bushoon shiyahan. “Yeeri ta yeelloon ta waanee wokkiite” iyan. 24“Doono Yeeri guttinnee anaami bushoon taach daakkibe” iyaa bushoo shigoon, Yooseefi#30:24 Yooseefi geto, “Taach daakkibe” getone. iyan.
Yaaqobi Bi Shumaayechon Labaanina Tookkii Yibbaato
25Raaheeli Yooseefin bi shiyetoyee gubb, Yaaqobi Labaanich ishichiye: “Aaf ta waati ta kexonaa ta showoonooch wotteree ta hammemmoyich daaggibe. 26Am shaahoon neech ta maddeto gaata ariibeeto neene; boonoshicha iyaa neech ta maddeti ta mecheenaꞌonaa ta bushiishoonon taach ne imaa hambona” iye.
27Labaaniyoo “Eke ikke mooyon neech getona. Doono Yeeri ne naboona taan bi diiroon ta nuggisheenaꞌo taach bekkiitinaꞌone. 28Ta waanee ne qaawaabeeti shumaayoon gete. Ta aroon neech immemmo taane” iye.
29Yaaqobiyoo ishichiye: “Am shaahoon neech ta maddeto gaata, ne gijjeenaꞌon aabichaꞌa shiimaa ta quyeto gaata ariibeeto neene. 30Ta womoyee aaf, neech beeti gijjeenaꞌo giishecheenaꞌone. And oogeton meettitinaꞌone. Ta naboona Doono Yeeri neen diiritone. Ishigaata, ta hajjee kexoyich ta shuunemmo aatane?” iye.
31Labaaniyoo “Amoon neech imbote?” ii echehe.
Yaaqobiyoo ishichiye: “Amoonolla taach immaahine. Neen ta echemmi ikke mooyon baach ne tuniigaata, wochinnoon ne bageenaꞌonaa emmisheenaꞌonon quyemmo taane. 32Hanaach ne bageenaꞌonaa emmisheenaꞌona daggooch guudiree, bageenaꞌo daggoochee kushaakusheenaꞌon, bureenaꞌonaa aaꞌinaꞌonon, ebiyoommon emmisheenaꞌo daggoochee kushaakusheenaꞌonaa bureenaꞌonon badd kichemmo taane; eboshiyoo ta shumaayoo tunebeete. 33Ebich gubb ta shumaayoon haddoyich ne waahooba, gibeneeto ta tunoon ariyoon hakkemmo neene. Emmisheenaꞌo daggoochee kushaakushoonaa buroona woyee ta bagee baaddeenaꞌo daggoochee aaꞌo tuneyaano bi danegaata, gaayoon tuniiree taan haddibe” iye.
34Labaaniyoo “Deꞌa, gaawiye. Ne gettetoommon tunebe” iye. 35Tunebaani arooba Labaani koorechinaꞌonaa bureenaꞌona tuneti emmishee baaddeenaꞌo bullin, ebiyoommon wotta maache emmisheenaꞌo daggoochee, kushaakusheenaꞌonaa bureenaꞌo bullinon, amee naccolla boonoshi qeddooch beetinaꞌo bullin, bagee baaddeenaꞌo daggoochee aaꞌinaꞌo bullin bariiꞌi, bi anaami bushiishoona quyiihe. 36Aroochee Labaani biinnaa Yaaqobina daggooch keejje qemi gommon wokkii geddiye. Echeti Labaanichi bageenaꞌonaa emmisheenaꞌonon Yaaqobi quyee beehe.
37Aroochee Yaaqobi maacaa naccoo tuneti mixinaꞌoochee#30:37 Ebi xaaꞌoochaa keejje mixinaꞌo getteetinaꞌo boonoshi tunetaa Kafi showoochaa aricheyaaneenaꞌo boonoshi tunetoyich, boonoshi shigo kooreeyaanoone. gaare gumbeenaꞌon deebiye. Gumbeexi naccoo bekkemmoyich tunii, gumboon shachiye. 38Bageenaꞌonaa emmisheenaꞌona aacon ucha waabee boonoshi ciinnemmoyich, ebi bi shachiti gumbeenaꞌon aachi goonee daggooch, boonoshi ciinooch geddiye. Aacon ucha boonoshi waa beehooba, helliꞌi shuggee beeheete; 39gumbeenaꞌo aafoochaa shuggeeꞌi, koorechinaꞌon, kushaakusheenaꞌonaa bureenaꞌonon shiyiheete. 40Yaaqobiyoo ebi bagee baaddeenaꞌon bara geddiye; echetinaꞌonoo Labaanichon tuneti koorechinaꞌonaa aaꞌinaꞌonochi ciinooch neechiye. Ebiyoommona bageenaꞌon biich meechiye; areenaꞌonoo Labaanichinaꞌoyee bariihe. 41Wode ceene bageenaꞌonaa emmisheenaꞌona gumbeenaꞌo beetoochaa boonoshi shuggee beehooba, gumbeenaꞌon aachi yegillee daggooch boonoshi ciinooch geddii beehe. 42Tunebaani giidaalli dalleenaꞌochi ciinooch gumbeenaꞌon gedaanoone; ebich giidaalli dalleenaꞌo Labaanichinaꞌo tunemmona, wode ceeneenaꞌo Yaaqobichinaꞌo tuneheete. 43Ebiyoommi gommona Yaaqobi oogeti gaannechon tunehe; meeti bagoonaa emmishoonon, gaaleenaa kuroonon, ebiyoommon wotta meeti gonneenaa guunonon danehe.
Nu geselecteerd:
Halloo 30: KBRC
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
SIM International, 2020.
