Saint Marc 9
9
1Da kème sa hi kli: Babaï, mi mè sa hi oui, an wora kli on ko̱ mi o guèl aïn, hanali ba houl tane tiya, ambèl ko̱ klime ko̱ guina bilkaou a Ouone jing njèran.
2Da afal name difala‐mbéo Jésus mi ya Pierre, da Jacques, tèn Jean jing nè, da kè hé sé jing kli guè laou gangna souraguèl hana mbéo, ka foli. Da kème féré monè an none kli; 3da la nèli mi gui cha ta, ka poukou maïya, mahana ka neige, ko̱ fèna mbéo an koukoula aïn mi tane ma baï poukouna ma rou ya. 4Da Élie kira Moïse mi tèn gui mone kli, kli sa kèna jing Jésus. 5Da Pierre mi féré sa, ka sa hi Jésus: Rabbi, dadaon an name kaou guèl aïn; da an name bara tenteli saï, aïn mbéo ba baï no, da aïn mbéo ba baï a Moïse, da kènkè ba baï a Élie. 6Baï ko̱ kème tane ga tou tènrèn none baï on baï féra sanakè ya, baï ko̱ klime hou wè ka waou. 7Da yiri mbame mi gui goukou kli da bounaka mi ba gui ka bil yiri mbame on, ka sa: Kè on ba Goune ni ko̱ mème sé hang‐è nyèta: oui la nè! 8Koukoulion njou‐séna bongli mi ki ènrèn bèl mone kli, ka tane ko̱ njoukouna mbéo ya, bo̱l ba Jésus ka ho̱kè on jing kli.
9Da ko̱ klime yé dira an toul souraguèl, Jésus mi gna bi njaka kli, an klime tane sa bong fèn on ko̱ klime ko̱ hi njoukouna mbéo ya, bo̱l tèn ko̱ Goune a njoukou mi tome an wora houli da. 10Da klime pèng baï aïn jing ba hana fèn kli, ka ki oui hana ba saon tomna an wora houli on ba fèn lé.
11Da njou‐séna bongli mi oui nè, ka sa: Baïfèn da njou‐to̱ko̱na bong guingnali mi sa ba: Yé Élie ma gui ti dambèl lé? 12Da kème sa hi kli: Ka babaï yé Élie ma ti gui ti dambèl, da féré rèk fènli bon mahana ka tang ambèl. Da mahana ka on ko̱ mi dé baï toula Goune a njoukou, ko̱ yé kè ma to̱ko̱ssé jing fènli nyèta, da yé kli ma aili nè lé? 13Da mème sa hi oui, ko̱ Élie mi ndé gui kèng tou, da klime ndé nding jing nè mahana on ko̱ klime jiji, mahana ka on ko̱ mi dé baï toulè.
14Da ko̱ klime tèn gui bèl mona njou‐séna bong nèli, kli ko̱ ro̱kè njoukouli nyèta jing kli, da njou‐to̱ko̱na bong guingnali mi njaka jing kli. 15Da koukoulion ko̱ ro̱kè njoukouli on bon mi ko̱ Jésus, laou kli mi sé siya nyèta, da klime ngou guè monè baï namna nè. 16Da kème oui kli: Baï toul fèn da ouime njaka jing kli lé? 17Da njoukouna mbéo an wora ro̱kè njoukouli on mi féré sa hi nè: Njou‐to̱ko̱nafèn mè ya goune ni gui mono ko̱ mi kaou jing esprit mbo. 18An guèl on, ko̱ mi yé ndingna nè, mi wou nè bou koukoula; da kème mboukou ka son sélè, ka kaou bouboulè da go̱ko̱ nyèta. Da mème sa jo̱jo̱ a njou‐séna bong noli an klime ni esprit aïn tèn kala an bilè, da kli tane mabongkè ya. 19Da Jésus mi féré sa hi kli ka sa: O! mèran njoukou aïnli ko̱ kaou ka ba ndouri, yé mè kaou jing oui bongkè di ane dé? Yé mè panran oui bo̱ko̱ ro̱ko̱ ane dé? Oui ya nè gui moni. 20Da klime ya nè guè mona Jésus. Da ko̱ goune mi yé ko̱na Jésus koukoulion esprit mi youkouri nè mingta; da kème lé bou koukoula, ka ki monè mboukouna. 21Da Jésus mi oui baba nè ba: Fèn aïn mi nding nè ma saka ro̱ko̱ ane tou lé? Da kème féré sa hi nè ba: Nding nè ko̱ kème pane ba goune. 22Bo̱ko̱ ro̱ko̱ta esprit aïn mi wou nè bou hèlè tèn an bil mbi, baï ina nè. Da tokoré ba mome mabongkè baï ndingna fèna, ko̱ na passé, ka lé mbèla. 23Da Jésus mi sa hi nè: Tokoré ba mome mabongkè! Fènli bon mi mabongkè jing njoukou on ko̱ mi la bilaou. 24Koukoulion baba a goune on mi wan njaka, ka sa: Mè la bilaou! lémbèl ndingna ka ndouri ni! 25Da ko̱ Jésus mi ko̱ ro̱kè njoukouli on mi ngou baï ndoïna jing hana, kème gna bi njaka esprit dakame on, ka sa hi nè: Mo esprit mbo da esprit chomna soukou, mè sa bi njako̱, mo tèn kala an bila goune aïn, ka tane kaïn féré ri bilè ba aféké ya. 26Da esprit on mi wan njaka, ka youkouri goune aïn mingta, da tèn kala. Da goune aïn mi kaou bo̱ro̱bo̱to̱k, mahana ka houl, mono on njoukou hanali nyèta mi sa ba, kème hou tou. 27Da Jésus mi ba ndo̱kè, ka ko̱ko̱ nè bi siya. Da kème ourou siya.
28Da ko̱ Jésus mi ri guè bil voulou tou, njou‐séna bong nèli mi oui nè ka foli: Baïfèn da name tane ma baï nina esprit on ya lé? 29Da kème sa hi kli: Esprit mahana ka aïn tane ma baï tèna kala ka mbora aféké ya, da bo̱l ba ka mboro hiouna Ouone ka chang laka.
30Klime tèn kala an ndourou, da ta ka bil pou an guèl Galilée, Jésus mi tane ji ba njoukouna mbéo mi tou on ya. 31Baï ko̱ kème to̱ko̱ hi njou‐séna bong nèli, ka sa ba: Yé kli ma souti Goune a njoukou bi ndo̱ka njoukouli; da kli ma i nè. Da ko̱ klime i nè, afal name saï kè ma tome. 32Da njou‐séna bong nèli mi tane ga tou saon baï aïn ya, da waou mi i kli baï ouina nè.
33Da klime tèn gui pou Capernaüm. Da ko̱ kème kaou bil voulou, kè oui kli: Oui kèrè ka bo̱ko̱ go̱ro̱ baï an domboro ba fèn lé? 34Da klime kaou yime, baï ko̱ klime njaka jing hana an domboro baï toul guème ko̱ ta toula ba nèli lé? 35Da kème kaou, ka di kli botoulè‐séré, da sa hi kli: Tokoré njoukouna mi ji guina titilikè, yé kè ma féré tèn sèkèrèkè, da nding bakara hi kli bon. 36Da kème ya lélé goune mbéo ka ba nè bi hanguèl kli, da bi nè bi ndo̱kè, ka sa hi kli. 37Njoukouna ko̱ mi ya lélé goune hana mbéo mahana ka aïn ka ba ling ni, kè ndé ya ba mè. Da njoukouna ko̱ mi ya mi, mi tane ga ya ba mè ya, da ya ba kè on ko̱ mi pi mi.
38Jean mi sa hi nè: Njou‐to̱ko̱nafèn na ko̱ njoukouna ko̱ mi ni zabololi tèn kala ka bil ling‐o̱; da name dèn nè bi, baï ko̱ kème tane ga sé fala ya. 39Da Jésus mi sa: Oui tane dèn nè bi ya; baï ko̱ njoukouna mbéo tane tiya ko̱ ma nding njèran pinali ka bil ling ni, da afal koukoulion kè ma baï sana bèlya kon touli. 40Baï njoukouna ko̱ mi tane pong na ya mi jing na. 41Baï njoukouna ko̱ mi hi ba mbi njona ka yong mbéo hi oui baï njonakè, ka bil ling ni, baï ko̱ oui ba njou‐séna bongli a Christ, babaï, mi mè sa hi oui, kè ba bo̱la toul ndo̱kè tane tiya.
42Da njoukouna ko̱ mi nding fèn an hana mbéo an wora lélé goune aïnli ko̱ mi la bilaou mi bèn, dadaon baï nè an klime gna loukou kone nène bi solè, ka wou nè bou loukou mbi.
43Da tokoré ndo̱ko̱ mi tèn jing mo ba fèn bèna, mo koung nè guèfal. 44Dadaon an mome sé ka komoron ka ndo̱ko̱ guè guèl yana, ta séna jing ndo̱ko̱ séré guè guèl hèlè on ko̱ hou ya. 45Da tokoré bo̱ko̱ mi tèn jing mo ba fèn bèna, mo koung nè guèfal. 46Dadaon an mome sé ka komoron ka bo̱ko̱ guè guèl yana, ta séna jing bo̱ko̱ séré ko̱ mi wou kli bou guèl hèlè on ko̱ mi hou ya. 47Da tokoré nono mi tèn jing mo ba fèn bèna, mo go̱ko̱ro̱ nè guèfal. Dadaon an mome ri bilkaou a Ouone jing none mbéo ta séna jing none séré, ko̱ mi wou kli bou guèl hèlè; 48an guèl on ko̱ wa kli mi hou ya, da hèlèkè mi tane hou ya. 49Baï ko̱ njoukouli bon mi tèn rita jing tome ka hèlè. 50Tome mi bèlta; da tokoré rinakè mi tèn, kè ma féré ka kaïn ri ba aféké ane dé? 51Oui kaou jing tome an bil baï fèn baï, da oui kaou jing go̱ro̱ iki an woro baï.
Nu geselecteerd:
Saint Marc 9: KBN1947
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Published by the British and Foreign Bible Society in 1947.
