Saint Marc 10
10
1Da Jésus mi ourou an ndourou, ka do̱li gui sél koukoula an guèl Judée, an fal mbi Jourdain. Da ro̱kè njoukouli mi kaïn ndoï ba aféké guè monè, da kème to̱ko̱ fèn hi kli ba aféké, mahana ka do fèn ndingna nè.
2Da pharisienli mi gui monè, ka oui nè: Ka mboro guingna yé mabongkè an njoukou mi yèng waïn nè lé? Kli oui nè on ba baï ko̱ klime ji léna nè. 3Da Jésus mi féré sa, ka sa hi kli: Moïse mi sa bi njaka baï ba fèn lé? 4Da klime sa ba: Moïse mi yèng mboro an klime dé takarata hi kli an klime wal hana, ka yèng waïn. 5Da Jésus mi sa hi kli: Baï toul go̱ro̱ o̱ baï ko̱ na bang mono ko̱ Moïse mi dé bina baïnjaka guingna on hi oui. 6Da ka titili mossona koukoula Ouone mi mosso wonron njoukou kira waïn; 7baï on ko̱ wonron njoukou ma yèng baba nè tèn ma nè, 8ka ba mbo̱lo̱ jing waïn nè, da kli séré bon ma tèn ba naïn‐mone mbéo. Mono on, kli tane ti séré ba aféké ya, da kli ba naïn‐mone mbéo bo̱l. 9Mono fèn ko̱ Ouone mi ba bi hana tou, tane ti ba an njoukouna mi sél kon ya.
10An bil voulou njou‐séna bongli mi kaïn oui nè toul saon baï on ba aféké. 11Da kème sa hi kli: Njoukouna ko̱ mi yèng waïn nè, ka é waïn aféké, kème nding maïn jing ba waïn nè; 12da tokoré waïn mi yèng wa nè, ka é wonron aféké kè nding maïn tou.
13Da klime fan lélé goundi gui monè, baï an kème da kli. Da njou‐séna bongli mi to kli on ko̱ mi ya lélé goundi on gui. 14Da ko̱ Jésus mi ko̱ on, go̱rè mi sé nè, da kè sa hi kli: Oui yèng lélé goundi an klime gui moni, ka tane dèn kli bi ya; baï ko̱ bilkaou a Ouone ba baï akli on ko̱ mi mahana ka lélé goune aïnli. 15Babaï, mi mè sa hi oui, njoukouna ko̱ mi tane ya bilkaou a Ouone mahana ka ba lélé goune ya, yé kè ba rina bilkè tane tiya. 16Da kème bi kli bi ndo̱kè ka same kli, da goukou ndo̱kè toul kli.
17Da ko̱ Jésus mi sé domboro, njoukouna mbéo mi ngou guè monè, ka houkou an mbèlè, ka oui nè: Bèla njou‐to̱ko̱nafèn, yé mè nding ba fèn an mème ya pélé yana kambèlè lé? 18Da Jésus mi sa hi nè: Baïfèn da mome di mi ba bèlakè lé? Bèla njoukou mbéo tane tiya, bo̱l ba Ouone ka ho̱kè. 19Mo toutou bina baïnjaka guingna lé? Mo i njoukou ya; mo nding maïn ya: mo ri fèn ya; mo tane sa bongbaï wo̱ko̱ ya; mo tane vaïnfèn ya; mo dik baba no tèn ma no. 20Da kème sa hi nè: Njou‐to̱ko̱nafèn, mè pane bouna fal fèn aïnli bon ko̱ mème pane ka goune bo̱l tèn kassénaï. 21Da Jésus mi ènrèn guè monè ka sé hang‐è, da sa hi nè: Fèn mbéo mi nak mo tou; mo sé ka jo̱l fèn noli bon ko̱ na ndo̱ko̱, ka hi foïna njoukouli, da yé mo ma kaou ka nguèra an nonkala. Da mo gui ka sé fali. 22Da nonè mi gok tou baï toul baï aïn, da kème ourou ka go̱ro̱ séta; baï ko̱ kème jing fènli nyèta. 23Da Jésus mi ènrèn gui ki bèl monè, ka sa hi njou‐séna bong nèli: Mi lata jing kli on ko̱ jing nguèra baï rina bilkaou a Ouone! 24Da laou a njou‐séna bongli mi sé siya baï toul baïnjaka on ko̱ Jésus mi sa. Da Jésus mi kaïn sa ba aféké, ka sa hi kli. Goune nili, mi lata jing kli on ko̱ bi hang kli toul nguèra baï rina bilkaou a Ouone! 25On laïya baï an chameau mi tèn lo̱ko̱ tène, ka lata baï an nguèra njoukou mi ri bilkaou a Ouone. 26Da laou a njou‐séna bongli mi kaïn sé siya nyèta, da klime sa jing hana: Da yé guème ma bongkè baï kouna lé? 27Da Jésus mi ènrèn guè mone kli mbilili ka sa: Mbéya a njoukouli manabongkè tane tiya, da tane ti on jing Ouone ya; baï ko̱ mbéya Ouone fènli bon mi mabongkè.
28Da Pierre mi tissaon baï sana hi nè: Mo ko̱ na yèng fènli bon baï séna falo̱. 29Da Jésus mi féré sa: Babaï, mi mè sa hi oui, njoukouna ko̱ mi yèng voulè, maléba yindi, maléba njo̱‐waïn fènli, maléba baba, maléba ma, maléba goundi, maléba tèn koukoula baï touli da baï toul bèlabaï, 30yé kè ma ya voulouli mane bo̱ko̱ té kassénaï, da yindi, da njo̱‐waïn fènli da ma, da goundi, tèn koukoula ta toulkè, tèn jing fèn to̱ko̱nassé kéng, ka name on ko̱ nding baï guina, ko̱ ba yana kambèlè. 31Da njoukouli nyèta ko̱ ba titilikè ma féré tèn sèkèrèkè, da sèkèrèkèli ma féré tèn titilikèli.
32Da kli pane domboro, baï héna sé guè pou Jérusalem, da Jésus mi ti dambèl hi kli. Da laou kli mi sé siya, da kli ko̱ sé falè sé ka ba waou. Da Jésus mi kaïn ya kli botoulè‐séré ba aféké ka tissaon sana bong fènli on bon ko̱ nding baï guina monè hi kli. 33Mono, ko̱ name hé sé guè pou Jérusalem, yé kli ma souti Goune a njoukou ka hi nè bi ndo̱ka loukou sacrificateurli da njou‐to̱ko̱na bong guingnali. Da yé kli ma kon barabaï houl toulè, ka hi nè bi ndo̱ka Gentili. 34Da yé kli ma gaï nè ka san same kon toulè, da jo̱ nè, ka i nè; da afal name saï, kè ma tome.
35Jacques da Jean goundi a Zébédée, mi gui mona Jésus, da sa hi nè: Njou‐to̱ko̱nafèn, na ji an mome nding mahana on ko̱ name oui mo baï ama. 36Da kème sa hi kli: Oui ji an mème nding ba fèn hi oui lé? 37Da klime sa hi nè: Mo hi na an name kaou, njoï mbéo an mboro wonron ndo̱ko̱, da njoï mbéo an mboro waïn ndo̱ko̱, ko̱ mome kaou an bil jonafèn no. 38Da Jésus mi sa hi kli: Oui tane tou fèn on ko̱ ouime oui ya. Oui ma baï njona kopo on ko̱ mème njo lé? maléba oui ma baï yana baptême mahana ka baptême on ko̱ mème ya baptême lé? 39Da klime sa hi nè: Na mabongkè. Da Jésus mi sa hi kli: Ka babaï yé oui ma njo kopo mahana ka on ko̱ mème njo, da yé oui ma ya baptême mahana ka baptême on ko̱ mème ya baptême; 40da baï kaouna mboro wonron ndo̱ko̱ ni maléba mboro waïn ndo̱ko̱ ni, tane ti ba baï ni baï hinakè ya; da ba baï akli on ko̱ mi badi ka mosso guèl mahana ka on baï toul kli. 41Da ko̱ garakèli on bo mi la baï aïn, go̱ro̱ kli mi sé kli nyèta jing Jacques da Jean. 42Da Jésus mi di kli guè monè, ka sa hi kli: Oui toutou ko̱ zaworoli a gentili mi ba njaka kli, da loukou njoukou klili mi na gangna kli. 43Da tane ti on an woro baï ya. Da njoukouna ko̱ mi ji tèna ba loukou njoukou an woro baï, yé kè ma tèn ba njou‐bakara hi oui; 44da njoukouna ko̱ mi ji tèna ba titilikè an woro baï, yé kè tèn ba koï abaï bon. 45Baï ko̱ Goune a njoukou mi tane ga gui ba baï yana bakara ya, da ba baï ndingna bakara, tèn baï hina yana nè baï chona njoukouli nyèta.
46Da klime gui tèn pou Jéricho. Da ko̱ Jésus mi ourou an pou Jéricho kira njou‐séna bong nèli tèn ro̱kè njoukouli, Bartimée ko̱ ba njou‐foukoura none, goune a Timée, mi kaou bèl domboro baï ndouna fèn. 47Da ko̱ kème la ko̱ ba Jésus an pou Nazareth, kè tissaon baï wana njaka guè siya, ka sa: Jésus Goune a David, mo nding haïo hi mi! 48Da njoukouli nyèta mi to nè, an kème kaou ka njakè; da kème wan njaka mingta guè siya guèbambèl: Goune a David, mo nding haïo hi mi! 49Da Jésus mi koung o, ka sa: Oui di nè gui. Da klime di njou‐foukoura none on, ka sa hi nè: Mo bi hang‐o̱ guè tiya, mo ourou siya, ba kè di mo. 50Da kème yèng la bou, ka ourou koukoulion, da gui mona Jésus. 51Da Jésus mi féré sa hi nè, ka sa: Mo ji an mème nding ba fèn jing mo lé? Da njou‐foukoura none on mi sa hi nè: Rabbouni, baï an mème ko̱ guèl. 52Da Jésus mi sa hi nè: Mo sé fèno, mbo̱l tounassaon no mi kou mo tou. 53Koukoulion kème ko̱ guèl, da sé fala Jésus guè domboro.
Nu geselecteerd:
Saint Marc 10: KBN1947
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Published by the British and Foreign Bible Society in 1947.
