Saint Marc 7
7
1Pharisienli tèn njou‐to̱ko̱na bong guingna hanali, ko̱ mi ourou gui ka pou Jérusalem, mi ndoï jing hana guè mona Jésus. 2Da ko̱ klime ko̱ ko̱ njou‐séna bong nè hanali mi son laka jing dakame an ndo̱ko̱ kli, on mi sa ba kli tane ga tourou ya. — 3Baï ko̱ pharisienli tèn Juifli bon, tokoré klime tane ga tourou ndo̱ko̱ kli tang fofoto ya, kli tane son laka ya, baï ko̱ klime pèng tang dofèn a tangchidoli; 4da ko̱ klime féré gui ka guèl zénacho̱ko̱ kli, tane ga son laka ya, wara ko̱ klime ti so mbi ambèl da. Da gara tang dofèn afékéli on nyèta ko̱ klime pèng, mahana ka toura kopo da ili, tèn ili woé. — 5Da pharisienli tèn njou‐tokona bong guingnali mi oui nè: Baïfèn da njou‐séna bong noli mi tane sé fal tang dofèn a tangchidoli ya lé? 6Da Jésus mi sa hi kli: Ésaïe mi to̱ko̱ bong njaka Ouone tang ka babaï toul baï, oui njou‐mongnafènli, mahana ka on ko̱ mi dé:
Njoukou aïnli mi dik mi ka ba njaka kli,
Da go̱ro̱ kli mi na dita jing mi.
7Da klime hiou mi bo̱on,
Da guingna ko̱ kème to̱ko̱ ba bina baïnjaka guingna a njoukouli.
8Oui yèng bina baïnjaka guingna Ouone, ka bou fal tang dofèn a njoukouli. 9Da Jésus mi sa hi kli: Oui aili bina baïnjaka guingna Ouone ka babaï, an ouime pèng ba tang dofèn abaï. 10Baï ko̱ Moïse mi sa ba: Mo dik baba no da ma no, maléba kè ko̱ mi poukou baba nè da ma nè, dadaon ma an kème hou. 11Da ouime sa abaï ba: Tokoré njoukouna mi sa hi baba nè da ma nè: Bèlafèn on ko̱ mème tou baï hina mo ba corban, on mi sa ba, fèn hina offrande hi Ouone. 12Mono on, oui mi dèn nè baï an kème tane nding fèna mbéo hi baba nè da ma nè ya, 13da ouime moungnourou baïnjaka Ouone jing tang dofèn baï, ko̱ ouime sa. Da ouime ndé nding gara fèn afékéli nyèta mahana ka on kéng.
14Da Jésus mi kaïn di ro̱kè njoukouli on guè monè, ka sa hi kli: oui bon oui la baï ni, ka tou nguite. 15Fèna mbéo an kala njoukou tane tiya, ko̱ mi sé bilè, ka nding nè tèn ba dakame, da ba fènli on ko̱ mi tèn gui kala an mona njoukou, mi ko̱ nding njoukou tèn ba dakame. 16Tokoré njoukouna ko̱ soukè mi outa, dadaon an kème la.
17Afal ko̱ kème ourou an mona ro̱kè njoukouli on, ka ri sé guè bil voulou tou, njou‐séna bong nèli mi oui nè baï toul saon ébèlbaï aïn. 18Da kème sa hi kli: Oui kéng oui tane ga ti jing cho̱kna ya lé? Oui tane ga toutou ko̱ fèna an kala ka sé guè bila njoukou da tane ma baï ndingna nè tèn ba dakame ya, ya lé? 19Baï ko̱ fèn on mi tane sé guè ba bil go̱ra njoukou ya, da mi sé guè ba bilè, da afal on mi tèn kon pa, da mi nding lakali bon gui guédék tou. 20Da kème sa: Fèn on ko̱ mi tèn gui kala an mona njoukou, mi ko̱ nding njoukou tèn ba dakame. 21Baï fèn on ko̱ mi tèn gui kala an bilkè, an bil go̱ro̱ njoukouli béké kèrafèn, ba ndingna rome, rinafèn, ina njoukou, ndingna maïn, 22fanahang, sénafèn da vaïnafèn, tèn nzala fanahang fèn, da bina none fal fèn, poukounafèn, ndoïna, fèn èna. 23Békéfèn aïnli bon mi tèn gui ka ba bilè, da nding njoukou tèn ba dakame.
24Da Jésus mi ourou an ndourou, ka do̱li sé guè koukoula an guèl Tyr da Sidon. Da kème ri guè bil voul hana mbéo, ka tane ji ba njoukouna mbéo mi tou on ya; da kème lé mouna monè pélé. 25Da koukoulion waïn hana mbéo ko̱ goune waïn nè an lélékè mi jing esprit dakame, kème la tiri baï a Jésus, ka gui monè ka lé bou koukoula bèl bo̱kè. 26Waïn aïn ba Grec an guèl Syro‐phénicien. Kè sa jo̱jo̱ a Jésus, an kème ni zabolo tèn kala an bila goune nè. 27Da Jésus mi sa hi nè: Mo yèng an bila goundi mi ti mba ti dambèl da; baï ko̱ on tane ti bèlta ya baï yana tarou an ndo̱ka goundi, ka wou bou hi nvali. 28Da waïn on mi féré sa, ka sa hi nè: Ii, Nanjou, da nvali ko̱ mi kaou bo̱ko̱ table mi son goune boutou tarou a goundi. 29Da Jésus mi sa hi nè: Mbo̱l sana baï on, mo sé fèno, zabolo mi tèn kala an bila goune waïn no tou. 30Da waïn aïn mi féré sé fènè guè bil voulè, ka ko̱ goune waïn on mi na bou bil to̱ko̱, da zabolo mi tèn kala tou.
31Da afal on Jésus mi ourou an bil sél koukoula guèl Tyr ka sé mboro Sidon, ka do̱li sé guè guèl loukou mbi Galilée, da sèrè ya pou Décapole.
32Da klime ya njou‐chomna soukou gui monè, ko̱ mi sa baï boukbouk, ka sa jo̱jo̱ nè an kème goukou ndo̱kè toulè. 33Da Jésus mi ya nè, ka ourou an bèl mona ro̱kè njoukouli on, ka sé guè mbora lèkè ka foli, da kème bou njangnaran ndo̱kè sé guè bil soukè, ka da léme sélè jing san same njakè. 34Da Jésus mi bi nonè guè siya, ka ènrèn sé guè nonkala ka lé hang‐è, da sa hi nè: Ephphatha, on mi sa ba, mo bourou. 35Da koukoulion soukè mi bourou, da sal léme sélè mi sél, da kème sa baï dèdèlèlè. 36Da kème gna bi njaka kli an klime tane sa bongkè hi njoukouna mbéo ya; da ko̱ kème gna bi njaka kli pou ta, klime sa bong baï on an nona ro̱kè guèbambèl. 37Da laou kli mi sé siya maïya, da klime sa ba: Kème nding fènli bon bèlta tou; njou‐chomna soukouli mi la baï, da mboli mi sa baï.
Nu geselecteerd:
Saint Marc 7: KBN1947
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Published by the British and Foreign Bible Society in 1947.
