Saint Marc 6
6
1Da Jésus mi ourou an ndourou, ka do̱li sé guè dodok pou nè, da njou‐séna bong nèli mi sé fali.
2Ko̱ name sabbat mi tèn tou, kème tissaon baï to̱ko̱na fèn an bil synagogue. Ko̱ njoukouli nyèta mi la baï nè, laou kli mi sé siya, da kli sa: Da on njoukou aïn mi jing fèn aïnli an hane dé? Da chokna on ko̱ mi hi njoukou aïn ba fèn lé? Da njèran pinali on ko̱ kème nding ka ndo̱kè on ba fèn lé? 3Kè ba njou?-?salapandé ya lé, goune a Marie, yine nèli ba Jacques, da Joses da Jude tèn Simon ya lé? Da njo̱‐waïn fèn nèli mi ndé kaou woro na ya lé? Da kè tèn jing kli ba fèn bèna.
4Da Jésus mi sa hi kli: Njoukouna tane aïli prophète ya, wara an dodok pou nè ya, tèn an wora dodok yine nèli, tèn an wora njou‐voulèli ya. 5Da Jésus mi tane ma baï ndingna njèran pinali ya, bo̱l ba goukouna ndo̱kè toula njou‐jangma hanali ka haï mone kli. 6Da laou‐è mi sé siya baï ko̱ klime kaou ka ndouri.
Da kème sèrè mane pouli toutoul, ka to̱ko̱ fèn hi kli.
7Da Jésus mi di kli on botoulè‐séré guè monè, ka tissaon baï pina kli sé séré séré, kème hi kli njèran an toula esprit dakamli. 8Da kème wara kli baï an klime tane bi fèna mbéo sé jing kli an domboro ya, bo̱l ba di bana; tane ti jing tarou ya, tane koto, tane mbo̱ri an bil ngou ya; 9ka bou ba sabo̱ko̱, da tane bouna la dala fal hana séré ya.
10Da kème sa hi kli: Bil voul hana ko̱ ouime ri guè ndourou, oui kaou ndourou bo̱l tèn ko̱ ouime ourou an pou on. 11Tokoré an pou hana ko̱ klime tane ga pame oui ya, maléba klime tane la baï abaï ya, ko̱ ouime yé oura an pou on, oui to sassal an sabo̱ko̱ baï ko̱ ba sana bongbaï hi kli.
12Da klime sé, ka sa mboura bi kala ba dadaon an njoukouli mi hèkè békéfèn. 13Da klime ni zabololi nyèta tèn kala ka bi nome toula njou‐jangma nyèta, da mone kli mi haï.
14Da ko̱ nanjoukaou Hérode mi la tiri baï a Jésus, baï ko̱ ling‐è mi ti maïya kème sa: Jean‐Baptiste mi tome an wora houli da mono baï on mi ko̱ kème nding njèran pinali. 15Da njoukou hanali mi sa: Kè ba Élie. Da afékéli mi sa: Kè ba kène prophète hana mbéo an wora prophèteli. 16Da ko̱ Hérode mi la baï on, kè sa: Jean on ko̱ mème koung solè jinguèl mi tome tou.
17Baï ko̱ ba Hérode fènè mi ko̱ pi jinguèl ka ya Jean, da bou nè voul jo̱bo̱ baï toula Hérodias, waïn a Philippe ko̱ ba mbé yine nè; baï ko̱ Hérode mi ya Hérodias tèn ba waïn nè. 18Da ba baï aïn ko̱ Jean mi sa jinguèl hi Hérode: Ka mboro guingna, mo tane ma baï yana waïn a yine no ya. 19Mono on ko̱ hèrè mi ba Hérodias maïya jing Jean, da kème ji baï ina nè. Da ba baï ko̱ kème tane ga mabongkè ya; 20baï ko̱ waou mi i Hérode baï toula Jean ta, baï ko̱ kème toutou ko̱ Jean ba njou‐guédék da tangna fofoto, da kème pèng nè bèlta, da ko̱ kème la baï a Jean laou‐è mi sé siya, da kème la baï nè kara nè.
21Da ko̱ name mapélékè tou ko̱ loukou name tèna Hérode mi gui tou, kème mosso name gnèna laka baï toula nanjou nèli, da baï toula kabita nèli, tèn loukou njoukou hanali an guèl Galilée. 22Da ko̱ goune waïn a Hérodias mi ri guè guèl kaouna ka ndandaï; da baï ko̱ kème bi wélé toula Hérode ta, tèn kli on ko̱ mi son laka jing nè. Da nanjoukaou mi sa hi goune waïn on: Mo oui fèn on ko̱ mome jiji, da yé mè ma hi mo. 23Da keme hanfèn hi goune waïn on ba: Yé fèn on ko̱ mome oui mi, yé mè ma hi mo, tongna ba baï wala hanguèl bilkaou ni hi mo. 24Da kème tèn kala ka sa hi ma nè: Yé mè oui ba fèn lé? Da ma nè mi sa hi nè ba: Toula Jean‐Baptiste. 25Da koukoulion goune waïn mi ngou féré fal ri sé guè mona nanjoukaou, ka oui nè ba: Mè ji mo hi ba toula Jean‐Baptiste bou bil tassi hi mi koukoulion. 26Da go̱ra nanjoukaou mi sé nè maïya; da ba baï aïn ko̱ kème ti hanfèn tou, da baï toula kli on ko̱ mi son laka jing nè, kè tane ji ba dènakè jing goune waïn on ya. 27Koukoulion nanjoukaou mi pi tourougou hana mbéo an bèl monè, ka sa bi njakè baï an kème sé ka gui jing toula Jean‐Baptiste. 28Da kème sé ka koung sola Jean an bil voul jo̱bo̱, ka bi toulè bou bil tassi, ka gourou hi goune waïn on, da goune waïn on mi ya ka sé rou guè mona ma nè. 29Da ko̱ njou‐séna bongli a Jean mi la baï on, kli gui ka bi houla Jean, ka sé goro nè an bil pal.
30Da njou‐mboro‐pinali mi ndoï jing hana guè mona Jésus, da klime to̱ko̱ bong fènli bon on ko̱ kli nding, tèn fènli bon on ko̱ klime to̱ko̱ hi njoukouli. 31Da Jésus mi sa hi kli: Oui fèn baï mi sé guè woropa ka foli da yan tana baï zada. Baï ko̱ njoukouli nyèta mi hanran siya gui ka féré, da guèl sona laka tiya. 32Da klime sé guè bil kombone ka ourou baï séna woropa ka foli. 33Da ko̱ njoukouli mi ko̱ kli ko̱ klime guè oura, da njoukouli nyèta on ko̱ mi toutou none kli, tèn njoukouli mane pouli ka pime bon mi ndoï ka ngou fal kli ka bo̱ko̱ kli, da ti ta mbèl kan soko hi kli. 34Ko̱ Jésus mi yé tèna kala an bil kombone, kème ko̱ rokè njoukouli nyèta, ka ko̱ kli passé ta, baï ko̱ klime kaou mahana ka badouali on ko̱ njou‐kora badoua kli mi tane tiya. Da kème tissaon baï to̱ko̱na fènli nyèta hi kli.
35Da ko̱ séssé mi ri tou, njou‐séna bong nèli mi guè monè, ka sa hi nè: Guèl aïn ba woropa da guèl mi lé tou; 36mo sa hi kli an klime sé guè njaka wakali tèn pouli ko̱ na diya, baï zéna laka sona kli fèn kli. 37Da kème féré sa, ka sa hi kli: Oui hi laka hi kli an klime son. Da klime sa hi nè: Mo ji ba name sé ka zé tarou ka pata bongkè‐dioui‐faltoulkè?-?séré gui, ka hi kli an klime son lé? 38Da kème sa hi kli: Tarou ro̱ko̱ hane an ndo̱ko̱ baï lé? oui sé ènrèn an name ko̱. Da afal ko̱ klime ko̱ tou, kli féré sa ba: Tarou dioui da njouïli séré. 39Da Jésus mi sa bi njaka kli baï kaouna joup joup ka douk an toul do̱lo̱ pa. 40Da klime kaou koukoula ka ba douk bon, hanali mi ndoï mane té‐té da afékéli mi ndoï mane bongkè‐dioui‐dioui. 41Da kème bi tarou on dioui tèn njouïli séré on, da ènrèn sé guè nonkala, kè same, ka haou tarou on, da kè hi njou‐séna bong nèli baï walakè hi kli, da kème ndé wal njouïli on séré kon bongkè hi kli bon. 42Da kli bon mi son, ka mba. 43Da klime fan gara boutoukèli mba karo botoulè‐séré, tèn gara njouïli kéng. 44Da kli ko̱ mi son laka on wonron njoukouli hèdi ténakè‐bongkè‐dioui.
45Koukoulion kème sa hi njou‐séna bong nèli, an klime hé kombone gata ka sé guè mboro héla lèkè dambèl hi nè, guè Bethsaïda ko̱ kè fènè mi pane sana hi ro̱kè njoukouli on an klime sé. 46Afal ko̱ kème yèng kli, kè sé guè toul souraguèl baï hiouna Ouone.
47Da ko̱ bèlaléou mi lé tou, kombone mi na an none loukou mbi, da Jésus mi o amè ka ho̱kè bo̱l an koukoula. 48Kè ko̱ klime héré la maïya; baï ko̱ koukouna mi kou mingta jing kli. Ka hangnachoung hèdi l’heure tomna ènran fèn an nèngkè, Jésus mi guè mone kli, ka sé yan none loukou mbi da kème ji tana kli. 49Da ko̱ klime ko̱ nè baï séna toul loukou mbi, kli kèrè ka laou kli on ba gajéna, da klime wan njaka guè siya; 50baï ko̱ kli bon mi ko̱ko̱ nè, da waou mi i kli maïya. Da koukoulion kème sa baï guè hi kli, ka sa: Bi hang baï guè tiya, mè mini, oui ngou waou ya! 51Da kème guè mone kli ka hé bil kombone, da koukouna on mi o. Da klime kaou yéléme; 52baï ko̱ klime tane ga kéré toul njèran pina tarou on ya, da go̱ro̱ kli mi pane name bang.
53Da afal ko̱ klime hé sé héla lèkè tou, klime kan an koukoula guèl a Génésareth, ka gna kombone bi bèl nguéng. 54Da ko̱ klime tèn kala an bil kombone, koukoulion njoukouli mi tou nona Jésus, 55da kli ngou mane pouli an ndourou bon, ka tissaon baï hola njou‐jangmali an bil toko klili, ka fan kli gui guèl on ko̱ klime la ba Jésus makaou ndourou. 56Mane guèli bon on ko̱ kème tèn rou, an bil pouli maléba an bil loukou pouli, maléba an wakali klime fan djou‐jangmali kon guèl zénacho̱ko̱li, ka sa jo̱jo̱ nè an klime da ba njaka la nè bo̱l. Da njoukouli bon on ko̱ mi da ba njaka la nè, mono, mone kli mi haï bèlta.
Nu geselecteerd:
Saint Marc 6: KBN1947
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Published by the British and Foreign Bible Society in 1947.
