MARKUS 14

Tong kelunan ja'au pitah jalan ke' réh omok mematai Yésus

(Mat. 26:1-5, Luk. 22:1-2, Yoh. 11:45-53)

1 # Kel. 12:1-27 La'ah duah dau teka irah Yahudi juk maneu' Dau Ja'au Paska ngan Dau Ja'au Roti éh bé' pu'un tawan pekevat, tovoo' inah irah pengeja'au imam ngan irah guru éh nebaraa' tong Surat Musa, pitah jalan dokoo' ngamit Yésus ngan selem-selem ke' réh juk mematai Éh. 2Ka' ha' irah ja'au nah, Mai lu' mematai Éh sioo' Dau Ja'au nah da' dai kelunan pinaa' betéé' pekayau da', ha' réh.

Tong redo éh mosoo' anyuu' tong Yésus

(Mat. 26:6-13, Yoh. 12:1-8)

3 # Luk. 7:37-38 La'ah Yésus pu'un tong leboo' Betania tong lamin Simon éh kelunan kapéé' rai, tovoo' Yésus kuman tuai jah redo mihin jah gutun anyuu' éh ma'an mu'un belih néh éh senuai jin lakat anyuu'. Iah memila' gutun inah ke' néh mujek anyuu' inah tong ulun Yésus. 4La'ah jelua' kelunan éh pu'un sinah, merek réh ngan redo inah, pepané réh belah irah ke', ka' ha' réh, Kineu' redo inah maneu' éh kenat, darih mu'un énéh neu' néh kenat nah ne'. 5Kineu' énéh ke' néh bé' melih anyuu' inah? Omok réh mena' teleu' ato rigit pirek tong néh, boh éh omok mena' rigit inah ngan kelunan kari kepéh, ha' réh. Sa'at mu'un ha' réh maneu' redo inah.

6Bang ka' ha' Yésus ngan réh, Mai keh petusah redo inah, kineu' keh maneu' éh kenat. Jian mu'un penganeu' néh ngan ké' nah ne'. 7#Kel. 15:11 Kelunan kari ngelayau éh pu'un ngan ka'ah, hun mah-mah keh juk nolong réh, omok keh nolong réh. Bang Akeu' teu' bé' Ku' ngelayau pu'un ngan ka'ah da'. 8Redo inah pu'un éh pika Akeu', inah iah mujek anyuu' inah tong usah Ké' barei' petenup usah Ké' tong dau Ké' tenanem réh da'. 9Seruh keh jian-jian, mai keh ngelepan éh, semah-semah irah bara' rengah jian pah tipo tana', adang réh pu'un bara' tong penganeu' redo inah, ha' Yésus ngan réh.

Tong Yudas pitah jalan ke' néh omok memalo Yésus

(Mat. 26:14-16, Luk. 22:3-6)

10La'o inah Yudas Iskariot, jah usah jin belah irah bakéh Yésus éh jah poloo' duah usah nah, tavin irah pengeja'au imam, ke' néh pakat tong jalan néh omok mena' Yésus ngan réh. 11Jian kenin réh menéng ha' néh juk mena' Yésus ngan réh, irah jajii' mena' rigit ngan Yudas hun néh mena' Yésus ngan réh da'. Boh Yudas pitah jalan hun mah éh omok mena' Yésus ngan réh.

Yésus kuman pemung ngan irah bakéh Néh

(Mat. 26:17-25, Luk. 22:7-14,21-23, Yoh. 13:21-30)

12Avéé' tong Dau Ja'au Roti éh bé' pu'un tawan pekevat, inah éh dau réh mematai domba Paska. Irah bakéh Yésus neteng éh, ka' ha' réh, Lamin mah éh jalan tam petenup ka'an Paska, ha' réh.

13Boh Yésus nyohoo' duah usah tai leboo', ka' ha' Néh, Jian koh tai tong leboo', pu'un jah lakei' selalang ngan koh sinah dat, pu'un éh nyu'un jah tajau baa'. 14Jian koh kivu éh taket tong lamin néh ngan bara' ngan kelunan éh pu'un tong lamin inah, Pu'un ha' Guru neteng, Semah lamin éh jalan Iah ngan irah bakéh Néh omok kuman Paska. 15Boh lakei' ja'au inah omok bara' jah lamin ngan koh, lamin inah ja'au éh, ngan petevan éh, ngan kekat éh juk penakai koh petenup tong dau ja'au iteu', pu'un éh tong lamin inah, sinah koh tai petenup éh, ha' Yésus ngan roh.

16Boh rawah bakéh Néh tai, pu'un roh na'at kekat inah mu'un barei' éh benara' Yésus ngan roh iri' boh roh petenup penguman Paska irah Sinah.

17Hun dau tahup Yésus tai ngan irah bakéh Néh, tai lamin inah. 18#Msm. 41:10 Tovoo' réh kuman, ka' ha' Yésus ngan réh, Akeu' bara' mu'un ngan ka'ah, pu'un jah usah jin belah ka'ah juk memalo Akeu', jah usah éh kuman ngan Ké' hun iteu', ha' Néh.

19Mujah kenin irah bakéh Néh seruh, siget-siget usah réh neteng éh ka', séé' énéh Tuhan, séé' éh juk maneu' éh kenat, kineu' énéh da', akeu' énéh, ha' réh mujah seruh.

20Ka' ha' Yésus kepéh, Adang néh pu'un jah usah jin belah ka'ah, iah éh petovoo' ngan ké' tilan ka'an lem pigan iteu'. 21Adang Anak Kelunan pu'un penatai réh pekua' barei' ha' lem surat Allah bara' éh, bang tusah mu'un-mu'un ngan kelunan éh memalo éh nah. Pelapah jian hun kelunan inah pohoo' néh bé' pu'un tong tana', ha' néh.

Tong penguman sohoo' Tuhan

(Mat. 26:26-30, Luk. 22:15-20, 1 Kor. 11:23-25)

22Tovoo' réh kuman Yésus alaa' roti ngan sebayang, bara' jian kenin ngan Allah, boh Éh memutui éh ke' Néh mena' éh ngan irah bakéh Néh. Ka' ha' Néh, Jian keh alaa' iteu', iteu' néh seleket usah Ké', ha' Néh.

23Boh éh alaa' sawan baa' buaa' agun ngan Iah sebayang bara' jian kenin ngan Allah, boh Éh mena' éh ngan réh kepéh, irah béé mesep baa' inah. 24#Kel. 24:8, Yer. 31:34 Ka' ha' Yésus kepéh, Iteu' néh seleket dahaa' Ké' éh nena' Ké' ngeliwah kekat kelunan, dahaa' Ké', inah éh maneu' jajii' Allah pu'un petem. 25La'ah Akeu' bara' ngan ka'ah, jin la'o iteu' bé' Akeu' mesep baa' buaa' agun éh kepéh, pah avéé' Ké' mesep éh maréng tong tana' maréng éh lem nihau Allah, ha' Néh.

26Boh réh nyanyi, la'o réh nyanyi tai réh tong tokong Saitun.

Yésus bara' Péterus juk ngaken bara' bé' iah jam Yésus

(Mat. 26:31-35, Luk. 22:31-34, Yoh. 13:36-38)

27 # Sak. 13:7 Ka' ha' Yésus ngan réh, Adang kekat ka'ah pu'un kelap ngan bet Akeu', barei' ha' lem surat Allah pu'un bara', ka' éh, Allah mematai Gembala boh kekat domba nah purat. 28#Mat. 28:16 Bang la'o Ké' betéé' murip kepéh, pu'un Ku' tai Galilia saa' tenah ka'ah, ha' Néh.

29La'ah ka' ha' Péterus mipa éh, Na' péh kekat irah éh jah bet ka'au' dat, bé' akeu bet Ke', ha' Néh.

30Ka' ha' Yésus kepéh, Seruh ke' jian-jian tong ha' Ké' iteu', Bé' jak iap sakui ngelangéé' duah koléé' merem da'ap dat, adang ko' pu'un ngaken teleu' koléé' bara' bé' ke' jam Akeu', ha' Néh.

31Gahang mu'un Péterus mipa éh kepéh, Bé' mu'un ku' bara' Akeu' bé' jam ka'au' dat pa' péh réh mematai ku' bé' mu'un ku' bara Akeu' bé' jam ka'au', ha' néh. Kenat ke' ha' irah pinaa' nah kepéh.

Yésus sebayang tong pulah Getsemani

(Mat. 26:36-46, Luk. 22:39-46)

32Avéé' réh tong pulah Getsemani, ka' ha' Yésus ngan irah bakéh Néh, Jian keh mokoo' siteu' kelebéé' Ké' sebayang da', ha' Néh.

33Boh éh mihin Péterus, Yakub ngan Yohanes ngan Néh. Besau kenin Néh, pua mu'un-mu'un kenin Néh, 34ka' ha' Néh ngan réh, Juk matai Ku' neu' kebesau kenin Ké' ne', jian keteleu' mokoo' siteu' ngan nerepan, ha' Néh ngan réh.

35Tai éh juu' si'ik jin réh, mohong éh tong tana' ngan sebayang, menyat Tuhan nolong éh, hun néh omok, mai pengeketa inah teneng tong Iah. 36Ka' ha' Néh sebayang, O Amam, O Amam, Kekat ineu'-ineu' péh omok éh neu' Ko'. Mai ke' buhaa' pengeketa iteu' teneng tong Akeu', bang jian Ke' kivu pengeloo' Ko', mai Ke' kivu kenin Ké' awah, ha' Néh.

37La'o Néh sebayang kenat, moléé' Éh tavin réh teleu' bakéh Néh kepéh. Inah Iah na'at réh pegen awah, boh Éh pané ngan Péterus, ka' ha' Néh, Simon, kineu' ke', pegen ke' ne'. Kineu', bé' ke' omok ngeretep sapét jah jam kei, ha' Néh. 38Boh éh pané ngan réh béé, ka' ha' néh, Nerepan keh ngan sebayang, dai keh teneng tong tenupat Sitan. Kenin keh keloo' keh maneu' jian, bang usah keh lemoo', ha' néh.

39Tai éh tengéé' ke' néh sebayang kepéh, pekua' ha' néh sebayang bu'un ri'. 40Boh éh moléé' tavin réh kepéh, pegen kiri' keto, bé' réh omok to'ot. Bé' réh jam ineu' éh ke' réh pané ngan Yésus.

41Tong keteleu koléé' néh tavin réh kepéh, boh éh pané ngan réh, ka' ha' néh, Kineu', pegen keto keh kei. Hun iteu' to'ot lah keh, jaka' néh lepah avéé'. Na'at keh Hun iteu' anak kelunan juk nena' lem penyukat kelunan penyala'. 42Betéé' keh, inah savéé' kelunan éh memalo Akeu', ha' Néh ngan réh.

Tong réh ngamit Yésus

(Mat. 26:47-56, Luk. 22:47-53, Yoh. 18:3-12)

43Lem Yésus to pané ngan irah éh bakéh Néh, inah savéé' Yudas, éh jah usah jin belah irah jah poloo' duah usah bakéh Néh rai. Pinaa' kelunan pemung ngan néh, ketem po'é ngan pipok, kelunan éh senohoo' irah pengeja'au imam, ngan irah guru éh nebaraa' tong Surat Musa ngan irah pengeja'au kelunan Yahudi. 44Kelunan éh memalo Yésus, pu'un éh bara' ngan irah pinaa' lepah, ka' ha' néh, kelunan séé'-séé' éh narek ké' da', kelunan inah éh penitah keh nah. Jian keh ngamit éh ngan mihin éh ketai, kenat ha' néh ngan irah.

45La'ah tuai Yudas tavin Yésus, ka' ha' néh, O Guru, ha' néh. Boh éh tioo makung Yésus ke' néh marek éh. 46Boh réh ngamit Yésus ngan mengen éh gahang. 47Pu'un jah usah jin belah irah bakéh Yésus éh sinah, tioo menat po'é néh ke' néh mesap kelingen jah kelunan éh ripen Imam éh pengeja'au kekat imam. 48La'ah ka' ha' Yésus ngan réh, Kineu' ka'ah tuai siteu' ketem po'é ngan pipok juk ngamit Akeu' barei' kelunan éh maneu' sa'at mu'un. 49#Luk. 19:47, 21:37 Siget-siget dau Ku' pu'un ngan keh tong Umaa' Allah ngan nebaraa' keh, ngan bé' keh ngamit Akeu'. Bang adang kekat ha' lem surat Allah juk avéé' béé, ha' Néh ngan réh.

50Boh kekat bakéh Néh kelap ngan bet Éh tengéé'.

51La'ah pu'un jah lakei' lemanai memakai selirut kapan, bé' pu'un pakai néh mu'un, pu'un éh kivu Yésus. Boh irah juk ngamit lakei' inah kepéh, 52pega' selirut néh kamit réh, tioo kelap éh ketem ugai néh.

Yésus saa' jumen Komiti sebayang Yahudi

(Mat. 26:57-68, Luk. 22:54-55,63-71, Yoh. 18:13-14,19-24)

53La'ah pu'un réh mihin Yésus tai tong lamin Imam éh pengeja'au kekat imam, kekat irah pengeja'au imam, pemung ngan Pengeja'au pohoo' Yahudi, ngan irah guru éh nebaraa' tong Surat Musa, pu'un réh petipun sinah. 54Pu'un Péterus kivu Yésus jin juu', tai éh masek lamin Imam éh pengeja'au kekat imam iri'. Sinah éh tai pemung ngan kelunan éh mavaa' lamin ke' néh ngereu' ngan irah. 55Kekat pengeja'au imam, ngan kekat irah Komiti sebayang Yahudi, pu'un réh pitah jalan ke' réh omok pesala' Yésus ngan ngukum éh matai, bang bé' pu'un sala' Néh. 56Pinaa' kelunan pu'un pané maneu' Yésus, bang ha' réh kenyo awah, bé' réh pekua' ha'.

57Pu'un jelua' kelunan nekedéng maneu' Yésus, bang ha' réh kenyo awah. 58#Yoh. 2:19 Ka' ha' réh, Pu'un mé' menéng ha' kelunan iteu' rai bara' iah juk mikah Umaa' Allah iteu' éh neu' uleu', ngan teleu' dau la'o inah kepéh boh éh juk maneu' jah maréng éh bé' omok neu' kelunan, kenat éh ha' néh, ha' réh. 59Bang bé' réh pu'un pemekat ha' réh pekua'.

60La'ah Imam éh pengeja'au kekat imam, nekedéng saa' jumen réh béé ke' néh neteng Yésus, ka' ha' néh, Kineu' ke', bé' ke' keloo' pané ineu'-ineu' mipa ha' réh tong jalan réh maneu' ke' nah, ha' néh.

61Bang Yésus mokoo' kelem awah, bé' éh pané ineu'-ineu' péh. Jah koléé' kepéh Imam éh pengeja'au kekat imam inah neteng éh, séé' ke' ka'au' éh Kristus Kei. Kineu', ka'au' nah néh anak Allah éh matek jian, ha' néh.

62 # Dan. 7:13 Ka' ha' Yésus, Oo', Akeu' néh éh, ha' Néh, Adang ka'ah pu'un na'at Akeu' mokoo' saa' na'au' Allah kenajung pemung ngan Néh, ngan ka'ah na'at Akeu' hun ké' tuai kepéh lem avun jin seruga, ha' Néh.

63Pelapah Imam éh pengeja'au kekat imam nah mejéé' pakai néh, ka' ha' néh, bé' tiken lu' menéng ha' kelunan éh jah kepéh bara' tong kesa'at Néh, 64#Ima. 24:16 Ka'ah lepah menéng ha' Néh ngesa'at Allah, kineu' kenin keh seruh éh.

Pelapah irah béé pané maneu' pemekat ha', adang iah sa'at, tekep ngukum éh matai deke', ha' réh.

65La'ah jelua' réh nyula' Yésus ngan ngejeret livah tong maten Néh ke' réh mipok Éh. Séé' mipok ke' nah, ha' réh maneu' Iah. Kenat péh irah kelunan éh kereja' mavaa' Umaa' Allah, irah tepap Éh.

Tong Péterus ngaken bara' bé' iah jam Yésus

(Mat. 26:69-75, Luk. 22:26-62, Yoh. 18:15-18,25-27)

66La'ah Péterus pu'un mokoo' keto ngereu' tong lamin. Tuai jah redo éh kelunan sohoo' Imam éh pengeja'au kekat imam. 67Hun redo inah na'at Péterus ngereu' pemung ngan irah sinah, iah kepuh éh, ke' néh tioo pané ngan néh, ka' ha' néh, ka'au' pu'un pemung ngan Yésus éh kelunan jin Nasaret rai de', ha' néh.

68Boh Péterus ngaken, ka' ha' néh, Bé', bé' éh akeu' dat, bé' akeu' jam kelunan éh kunah ko' inah ne', ha' néh. Iah tioo piso jin sinah tai mokoo' tong awaa'. Pelapah pu'un iap ngelangéé'.

69Redo iri' na'at iah tai sinah, iah bara' éh kepéh ngan irah, ka' ha' néh, Lakei' iteu' nah rai pu'un pemung ngan réh irai, ha' néh. 70Jah koléé' kepéh Péterus ngaken bara' bé' pu'un éh kenat.

Bé' lebéé' la'o inah, irah kelunan éh pu'un sinah, irah kepéh maneu' Péterus, ka' ha' réh, Adang ka'au' pu'un pemung ngan réh irai, ka'au' éh kelunan jin Galilia, ha' réh.

71Boh Péterus pané pesupa, ka' ha' néh, Pu'un akeu' pané mu'un, bé' akeu' pané kenyo, hun akeu' kenyo, jian Allah ngukum ku'. Bé' mu'un ku' jam kelunan éh kunah keh nah ne', ha' néh.

72Pelapah pu'un iap ngelangéé' kepéh, boh Péterus petavéé' kenin tong ha' Yésus iri', Bé' jak iap sakui ngelangéé' duah koléé', teleu' koléé' ke' ngaken bara' bé' ke' jam Akeu', ha' rai. Hun Péterus petavéé' kenin tong ha' Yésus pané kenat, tioo mangaa' éh ngan besau kenin.

Nu geselecteerd:

MARKUS 14: PNT

Markering

Deel

Kopiëren