MARKUS 13

Yésus bara' tong pengebéé Umaa' Allah

(Mat. 24:1-2, Luk. 21:5-6)

1Hun Yésus lakau jin Umaa' Allah, pu'un jah bakéh Néh pané ngan Néh, O Guru, jian mu'un layan umaa' iteu', kenat péh kekat bateu' éh palaa' réh suai éh, ha' néh. 2Ka' ha' Yésus mipa éh, Tong kekat éh ta'an keh iteu', pu'un jah dau kepéh temurei' kekat bateu' inah guram awah, ha' Néh.

Tong penusah ngan pengeketa

(Mat. 24:3-14, Luk. 21:7-19)

3La'ah hun Yésus mokoo' tengéé' tong tokong Saitun nyeripa Umaa' Allah, tai Péterus ngan Yakub, ngan Yohanes, ngan Anderias ke' réh selem-selem neteng éh, ka' ha' réh, 4Kineu' kelebéé' ke' néh kenat da'. Kineu' éh telana' néh hun néh lepah danii' da', ha' réh.

5Ka' ha' Yésus kepéh, Mavaa' keh jian-jian dai kelunan petawang keh. 6Uban pinaa' kelunan pu'un tuai lem ngaran Ké' éh bara' ka', Akeu' teu' néh Tuhan ne', ha' réh, ke' réh omok petawang kuraa'-kuraa' kelunan. 7La'ah hun keh menéng rengah kelunan pekayau, kenat péh tong tana' keh siteu' kenat péh rengah kelunan pekayau tong tana' éh juu' péh, mai keh pua ngan besau kenin. Adang kekat-kekat inah pu'un tenah, bang bé' jak éh inah éh ga' néh mu'un, ha' néh. 8Adang jah arong kelunan juk ngayau jah arong kelunan, ngan irah éh pu'un lem nihau jah peritah, juk betéé' tai pekayau ngan irah éh lem nihau irah peritah éh jah kepéh. La'ah tovoo' inah péh tong kuraa'-kuraa' tana' pu'un tegen tana' ja'au mu'un, kenat péh pu'un la'au' éh ja'au mu'un. Kekat inah barei' kesakit redo teka néh juk nganak, hun anak néh juk pelohoo' mu'un, pu'un éh pelapah sakit mu'un kepéh, barei' inah lah tong kekat penusah inah.

9Mavaa' keh jian-jian, adang pu'un kelunan ngamit keh ngan mihin keh tai besara'. Adang réh pu'un mipok keh tong lamin sebayang, ngan mihin keh tai tong jumen kelunan éh ja'au ngan irah raja' péh uban keh ngelan tong Akeu', inah kepéh, dokoo' keh omok bara' Rengah Jian ngan réh. 10Teka kekat penusah inah pu'un avéé', adang ha' tebaraa' Ké' pu'un benara' réh ngan kekat arong kelunan tenah. 11#Mat. 10:17-20, Luk. 12:11-12 La'ah hun réh ngamit keh ngan mihin keh tai besara' da', mai keh medai seruh kineu' jalan keh omok mipa kekat ha' réh da', uban tovoo' réh ngamit keh da', adang Tuhan pu'un mena' pengejam néh ngan keh ke' néh omok nolong keh pané. Uban kekat ha' keh da', bé' éh jin kenin keh tengéé', bang jin Sahéé' Ni'ai. 12La'ah adang pu'un kelunan mena' padéé' usah néh ngan réh ke' réh mematai éh, kenat péh irah tamen tong anak réh, kenat péh irah anak tong tinen tamen réh ke' réh mematai éh. 13#Mat. 10:22 Adang kekat kelunan leko keh mu'un-mu'un uban pengelan keh tong Akeu', bang irah éh ngeretep pah avéé' ga' néh, kelunan inah éh omok alaa' urip kepéh, ha' Yésus ngan réh.

Yésus bara' tong pengebéé leboo' Yérusalem

(Mat. 24:15-28, Luk. 21:2-24)

14 # Dan. 9:27, 11:31, 12:11 Ka' ha' Yésus kepéh, Hun mah keh na'at iah éh keleko keh mu'un éh tuai ngebéé kekat ineu'-ineu' péh pu'un nekedéng tong retek éh bé' tekep néh maneu' kenat, hun néh pu'un kenat, jian kekat kelunan éh pu'un tong tana' Yudea tioo kelap tai tokong. Kelunan éh pu'un purung tong ha' ké' iteu', jian éh nesen éh. 15La'ah kelunan éh pu'un mokoo' tong patah, mai éh masek tong lamin néh alaa' livah néh, bang kelap awah. 16#Luk. 17:31 Kelunan éh pu'un tong térék néh, mai éh moléé' tai lamin néh ke' néh alaa' pakai néh. 17Hun kekat penusah inah pu'un avéé' dat, tusah mu'un ngan irah redo éh nemaléé' ngan irah éh pu'un anak si'ik. 18Jian keh sebayang dokoo' penusah inah mai éh pu'un teneng tong ka'ah tovoo' laséh éh genin. 19#Dan. 12:1, Pol. 7:14 Uban kekat penusah inah adang néh pelapah ja'au jin kekat penusah éh pu'un tong tana' jin lepah, inah éh jin bu'un Allah suai tana' rai pah avéé' hun iteu' péh. Adang néh bé' pu'un kenat kepéh vam. 20Hun Tuhan bé' ngeti'eng jaka' jalan penusah inah jin kekat dau néh ngukum réh kenat, bé' pu'un séé'-séé' éh omok murip. Bang uban Iah pika irah éh kevéléé' Néh, bé' penusah inah pu'un avéé' lebéé' mu'un, ha' Néh.

21Ha' Yésus kepéh, La'ah hun pu'un kelunan bara' ngan keh, Iteu' néh Kristus, ngan sinah Kristus pu'un, mai keh ngelan ha' réh. 22Adang pu'un kuraa'-kuraa' kelunan tuai éh bara' réh Kristus, bang bé' éh Kristus. Kenat péh tong kelunan éh bara' ha' Tuhan, adang pu'un kuraa'-kuraa' usah réh éh bara' réh tuai sohoo' Tuhan ke' réh nebaraa' kelunan, bang bé' éh sohoo' Tuhan kenat. Kenat péh omok réh maneu' kuraa' telana' éh ja'au éh ngebéé kenin kelunan ke' sadat lavo' awah, hun néh omok pah avéé' kelunan éh kevéléé' Tuhan péh juk kelavo' réh. 23Mavaa' keh jian-jian, pu'un Ku' bara' kekat iteu' ngan ka'ah hun néh to bé' jak pu'un, ha' Yésus ngan réh.

Tong Tuhan Yésus tuai kepéh

(Mat. 24:29-30, Luk. 21:25-28)

24 # Yes. 13:10, Yeh. 32:7, Yol. 2:10,31, 3:15, Pol. 6:12 Ka' ha' Yésus kepéh, La'ah la'o kekat penusah inah, bé' pu'un ada maten dau, kenat péh laséh, 25#Yes. 34:4, Yol. 2:10, Pol. 6:13 kekat kenyuhai pu'un pelohoo' jin langit, ngan kekat-kekat éh jah tong langit pu'un piso jin retek néh bu'un. 26#Dan. 7:13, Pol. 1:7 Boh Anak Kelunan pu'un avéé' lem jah avun ngan kekat penyukat ngan pengaren Néh kepéh. 27La'ah pu'un Iah nyohoo' meliket Néh tai avéé' tong kekat tana' ke' réh tipun kekat kelunan éh kevéléé' Néh, inah éh kekat réh béé pah tipo tana', ha' Yésus ngan réh.

Ha' tapan tong inah buaa' ara

(Mat. 24:36-44)

28Ka' ha' Yésus kepéh, Seruh keh tong inan buaa' ara. Hun keh na'at éh ngelerong adang keh jam bé' lebéé' la'ah da', adang néh bu'an. 29Barei' inah péh hun keh na'at kekat penusah inah pu'un avéé', jian keh nesen jaka' Tuhan tuai kepéh lepah danii'. 30Seruh keh jian-jian, kekat éh benara' ké' iteu' adang éh pu'un kenat sioo' urip kelunan Yahudi éh murip hun iteu'. 31Langit ngan tana' juk salai béé, bang kekat ha' éh benara' Ké' iteu', adang néh pu'un pelinguh, ha' Yésus.

Tong kelunan bé' jam jaka' Tuhan tuai kepéh

(Mat. 24:36-44)

32 # Mat. 24:36 Ka' ha' Yésus kepéh, Tong dau Ké' pu'un tuai kepéh, bé' pu'un kelunan séé'-séé' péh éh jam éh, meliket tong seruga péh bé' jam éh, usah ké' tengéé' péh, bé' Ku' jam éh, Tamen Ké' awah éh jam éh. 33Mavaa' keh jian-jian, mai keh telalau awah, uban bé' keh jam hun mah tatek Ké' tuai da'. 34#Luk. 12:36-38 Barei' ha' tapan tong kelunan lakau tai tana' juu'. Teka néh tai lakau, iah bara' kuraa'-kuraa' kereja' ngan kelunan sohoo' néh, nyohoo' réh maneu' éh kelebéé' néh lakau nah. Kenat péh iah nyohoo' kelunan mavaa' tong usit tapé néh mavang savéé' néh, jian réh mavaa' éh mu'un. 35Hun néh kenat jian ka'ah péh mavaa', uban bé' keh jam hun mah pengeja'au lamin inah pu'un moléé' kepéh. Barang iah pu'un tuai sioo' dau tahup péh, barang lepok merem péh, barang dau dileu' péh, barang dau peka ngivun péh. 36Mavaa' keh dai keh pegen ngan telalau awah, boh éh beleka' pu'un tuai ngan na'at keh pegen keto. 37Tong éh benara' Ké' ngan keh iteu', inah ke' éh benara' Ké' ngan kekat kelunan kepéh, inah éh, mavaa' keh, ha' Yésus ngan réh.

Nu geselecteerd:

MARKUS 13: PNT

Markering

Deel

Kopiëren