MARKUS 12

Ha' tapan tong kelunan éh mihau pulah agun

(Mat. 21:33-46, Luk. 20:9-19)

1 # Yes. 5:1-2 La'o inah Yésus bara' jah ha' tapan ngan irah pengeja'au imam, ngan guru éh nebaraa' tong sohoo' lem Surat Musa ngan pengeja'au kelunan Yahudi, ka' ha' Néh, Pu'un jah kelunan maneu' pulah agun. La'ah iah memagin pulah inah ngan maneu' luvang tana' jalan néh meték buaa' inah, ngan maneu' jah lamin bau ke' néh omok na'at ngan petitau kekat pulah inah. La'o inah iah nyohoo' kelunan éh kereja' pegaji', mihau pulah inah kelebéé' néh lakau tai tana' éh jah. 2Tovoo' pulah inah bu'an, iah nyohoo' jah kelunan sohoo' néh tai tavin kelunan éh kereja' pegaji' nah, dokoo' néh omok alaa' tulat buaa' agun nah. 3Pelapah irah ngamit kelunan sohoo' néh inah ke' réh mipok éh ngan nyohoo' éh moléé' awah, bé' irah mena' ineu'-ineu' ngan néh. 4La'ah lakei' ja'au éh pu'un pulah inah, iah nyohoo' jah kelunan sohoo' néh éh jah kepéh tai tavin irah. Pu'un réh mipok ulun néh ngan pekenyaa' éh. 5Jah koléé' kepéh iah nyohoo' jah kelunan sohoo' néh éh jah tai kepéh, ngan pu'un réh mematai éh. La'ah pinaa' kelunan kepéh sohoo' néh tai, jelua' nipok réh, jelua' kepéh penatai réh. 6Bé' pu'un séé' la'ah éh omok sohoo' néh tai kepéh, bang anak usah néh éh kemurung néh, iah awah éh omok tai kepéh. Inah éh nyohoo' anak néh tavin réh, ka' ha' néh, Adang réh pu'un ngerera' tong anak ké' iteu' dat, ha' néh. 7Bang irah kelunan éh kereja' pegaji' pané belah irah ke', ka' ha' réh, Inah savéé' anak lakei' ja'au rit, tuai tam mematai éh boh tam omok alaa' pulah iteu' anah itam mu'un da', ha' réh. 8Boh réh tai ngamit anak inah ke' réh mematai éh, boh réh bet patai néh jin pulah inah, ha' Néh.

9Ka' ha' Yésus kepéh, Hun réh mematai anak néh nah, kineu' kenin lakei' ja'au nah tong irah éh mihau pulah nah. Adang iah pu'un tuai ngan mematai kekat irah éh kereja' pegaji' nah dat, ngan tebai kelunan éh jah kepéh mihau pulah néh inah dat. 10Kioo' ké' adang keh pu'un purung ha' lem surat Allah éh bara' ka',

Bateu' éh nebet tukeng lamin uban réh seruh bé' éh jian,

bateu' inah éh pu'un jian mu'un.

11 # Msm. 118:22-23 Tuhan éh maneu' éh jian mu'un.

Jian mu'un penganeu' néh kenat, ha' Yésus ngan réh.

12La'ah irah pengeja'au irah Yahudi pitah jalan juk ngamit Yésus uban réh jam ha' tapan inah, ha' Néh maneu' irah ke'. Bang na' péh irah juk ngamit Yésus, medai réh uban kelunan pinaa', inah piso jin Yésus.

Tong irah neteng tong bayan sukai

(Mat. 22:15-22)

13La'ah pu'un kuraa' kelunan éh kivu adet Parisi ngan kelunan irah éh kivu Herodis senohoo' irah ja'au tavin Yésus dokoo' réh omok pesala' Éh neu' kuraa'-kuraa' ha' peneteng réh. 14Ka' ha' réh ngan Yésus, O Guru, améé' jam adang ka'au' jah kelunan éh teneng, bé' ka'au' netah kenin ngan kelunan séé'-séé' péh, kenat péh bé' ke' seruh tong layan kelunan awah, ka'au' bara' tong kekat ha' Allah mu'un ngan kekat pengeloo' Allah ngan kelunan. Jian ke' bara' ngan améé', kineu' améé', tekep mé' mena' sukai mé' ngan Raja' Rum. Kineu', bé' mé' tekep. Kineu' ha' ko' da', ha' réh pané ngan Yésus.

15Bang Yésus jam réh juk pesala' éh awah ke' réh neteng éh kenat, boh éh pané ngan réh, ka' ha' Néh, Uban ineu' keh tupat Akeu', tuai jah rigit pirek keh nah ké' na'at éh, ha' Néh.

16Boh irah mena' jah rigit pirek ngan Néh. Boh Iah neteng réh kepéh, Gaben ngan ngaran séé' Iteu',

Ha' réh, Raja' Rum.

17Hun néh kenat ha' Yésus Jian Keh mena' ngan Raja' Rum kekat éh anah Raja' Rum ngan jian keh mena' ngan Allah kekat éh anah Allah, ha' Néh. Béé kenin réh menéng ha' Yésus pané kenat.

Tong kelunan Saduki neteng tong pengebetéé' jin patai

(Mat. 22:23-33, Luk. 20:27-40)

18 # Peng. 23:8 La'ah pu'un kuraa' kelunan éh kivu adet Saduki tavin Yésus. Irah Saduki bé' irah ngelan kelunan éh matai omok betéé' murip kepéh. 19#Ula. 25:5 Inah irah neteng Yésus, ka' ha' réh, O Guru, pu'un ha' lem Surat Musa bara' ka', Hun pu'un jah lakei matai bé' jak éh pu'un anak ngan redo néh, jian padéé' Lakei éh matai nah alaa' redo baleu' inah kepéh dokoo' anak roh' da', seleket anak Lakei' éh matai nah. Kenat ha' jin Surat Musa rai de', ha' réh. 20Ha' réh kepéh, Pu'un tujuu' usah kelunan éh pepadéé', éh tuken jin irah nah alaa' redo, bé' lebéé' matai lakei' inah, bé' mena rawah pu'un anak. 21Boh padéé' néh éh tadin jin lakei' éh matai nah, alaa' langoo' néh redo baleu' nah, lakei' inah péh matai bé' mena rawah pu'un anak. 22Kenat péh avéé' tong siget usah réh teleu' padéé' lakei' éh matai nah, irah péh matai kepéh éh bé' mena réh pu'un anak. La'o inah redo baleu' inah péh matai lah. 23Hun néh kenat lah da' tong dau Tuhan pebetéé' ngan purip kelunan jin patai, séé' jin belah irah éh tujuu' usah nah lah éh omok alaa' redo inah, uban kekat irah éh tujuu' usah nah rai pu'un réh lepah pemung ngan redo inah, ha' irah Saduki neteng Yésus.

24Ka' ha' Yésus mipa réh, Sala' mu'un penyeruh ka'ah, kejam keh uban ineu'? Ka'ah bé' jam sin tong ha' lem surat Allah ngan bé' jam penyukat Allah, ha' Néh. 25Hun mah kelunan éh lepah matai pebetéé' Tuhan kepéh, Irah pekua' meliket tong seruga, Irah bé' tiken alaa' redo kepéh. 26#Kel. 3:6 Kineu' tong pengebetéé' kelunan matai, bé' keh jam ha' lem Surat Musa éh bara' telo kayeu' mahang bang bé' éh potong rai. Uban dalem surat inah pu'un éh bara' tong ha' Allah ngan Musa, ka' ha' Néh, Akeu' éh Allah éh kenelan Abraham, ngan Ishak ngan Yakub, ha' Néh. 27Uban néh kenat, Iah Allah kelunan éh murip bé' éh Allah kelunan éh lepah matai, sala' mu'un penyeruh keh kenat, ha' Néh.

Jah sohoo' Tuhan éh ja'au mu'un

(Mat. 22:34-40, Luk. 10:25-28)

28La'ah jah guru éh nebaraa' tong Surat Musa pu'un éh ngan irah éh menéng ha' Yésus pané ngan irah Saduki lepah nah, kejam néh Yésus jam mu'un mipa ha' irah kelunan iri', boh éh tavin Yésus ke' néh pané ngan Néh. Ka' ha' néh, Jin kekat éh sohoo' Tuhan, éh mah éh pelapah ja'au éh tekep ke' mé' kivu mu'un, ha' néh.

29Ka' ha' Yésus mipa éh, Éh pelapah ja'au éh tekep kenivu mu'un, iteu' éh, O kekat kelunan Israel, Tuhan Allah éh kenelan lu', Iah awah éh Tuhan mu'un. 30#Ula. 6:4-5 Tekep ke' murung Tuhan Allah ngan kekat kenin ko', ngan kekat urip ko', ngan kemekat penyeruh ko', ngan kekat pengegahang ko', inah éh sohoo' Néh éh pelapah ja'au. 31#Ima. 19:18 Sohoo' éh keruwah inah éh, Tekep ke' murung padéé' ko' pekua' ke' murung usah ko' tengéé'. Bé' pu'un ineu'-ineu' sohoo' éh jah éh pelapah ja'au jin duah sohoo' iteu', ha' Yésus ngan néh.

32 # Ula. 4:35 Boh guru inah pané ngan Yésus kepéh, ka' ha' néh, Teneng mu'un ha' ko', adang Tuhan Allah Iah awah éh Tuhan mu'un. 33#Hos. 6:6 Adang éh tekep kelunan murung Allah ngan kekat kenin néh, ngan kekat urip néh ngan kekat penyeruh néh ngan kekat pengegahang néh, ngan adang éh tekep kelunan murung irah éh jah pekua' néh murung usah néh tengéé'. Kejam ké' éh kenat adang éh pelapah jian hun kelunan pu'un kivu duah sohoo' inah jin hun néh mihin ka'an ngan motong éh ke' néh tavin Tuhan ngan mena' kuraa'-kuraa' pengena' éh jah ngan Tuhan, ha' guru nah pané ngan Yésus.

34 # Luk. 10:25-28 Yésus menéng ha' néh pané kenat barei' kelunan éh jam mu'un seruh, boh éh bara' ngan néh, ka' ha' Néh, ka'au' bé' ke' juu' jin Pengihau Allah, ha' Néh. La'o inah bé' pu'un séé'-séé' péh makang neteng Yésus tong ineu'-ineu' kepéh.

Ha' peneteng tong Kristus éh tuai Senohoo' Allah

(Mat. 22:41-46, Luk. 20:41-44)

35Tovoo' Yésus nebaraa' irah tong Umaa' Allah pu'un éh neteng réh ka', irah guru éh nebaraa' tong sohoo' lem Surat Musa, kineu' réh omok bara' Kristus pu'un jin pohoo' Daud. 36#Msm. 110:1 Uban Sahéé' Ni'ai ngusii' kenin Daud ke' néh bara' ka',

Tuhan pu'un bara' ngan Tuhan ké', ka' ha' néh,

Jian Ke' menyun saa' na'au' Ké' siteu',

avéé' Ké' maneu' kekat ayau Ko' inah

barei' lun gem Ko' awah, ha' néh.

37Hun Daud mateng éh Tuhan, kineu' okoo' kelunan éh pejajii' Allah nah omok tuai jin pohoo' Daud nah, ha' Yésus ngan réh.

Yésus nyohoo' réh mavaa' dai réh lavo' neu' irah guru éh nebaraa' tong Surat Musa

(Mat. 23:1-36, Luk. 20:45-47)

Kelunan pinaa' murung menéng ha' Yésus. 38La'ah tovoo' Yésus nebaraa' réh, ka' ha' Néh ngan réh, Mavaa' keh jian-jian dai keh lavo' neu' irah guru éh nebaraa' tong Surat Musa. Bau kenin réh, keloo' réh lakau pakai kerayung éh kebit dokoo' kelunan omok na'at ngan sepah réh. Hun réh tai jalan pebelih, keloo' mu'un réh menéng ha' kelunan ngajung réh. 39Kenat péh réh tong lamin sebayang, keloo' réh menyun tong retek réh omok poléng ta'an kelunan pinaa', kenat péh hun réh tai penguman ja'au. 40Pu'un réh ngebuyuk irah redo baleu' ngan alaa' kekat livah réh, kenat péh réh ngelayoo' awah réh maneu' jian neu' réh kebit ha'sebayang. Ukum réh pu'un pelapah bahat jin ukum irah éh jah, ha' Yésus ngan réh.

Tong pengena' jah redo baleu'

(Luk. 21:1-4)

41La'ah Yésus mokoo' déhéé' jalan kelunan modoo' rigit Tuhan tong Umaa' Allah. Iah na'at kuraa'-kuraa' usah réh tuai mihin rigit réh ke' réh mena' éh ngan Tuhan. Jelua' réh kelunan kaya' ngan pinaa' rigit nena' réh. 42Boh éh na'at jah redo baleu' éh kari mu'un. Tuai éh ke' néh mena' duah tasap sin. 43Boh Yésus tebai irah bakéh Néh ke' Néh bara' ngan réh, ka' ha' Néh, Redo baleu' inah mena' éh pelapah ja'au mu'un jin pengena' irah pinaa' nah. 44Kelunan kaya' nah pu'un réh mena' jin pengemutaa' réh awah, bang redo baleu' inah kari mu'un éh, pu'un éh mena' kekat éh pu'un tong iah, ha' Yésus ngan réh.

Nu geselecteerd:

MARKUS 12: PNT

Markering

Deel

Kopiëren