MARKUS 15

Yésus saa' jumen Pilatus

(Mat. 27:1-2,11-14, Luk. 23:1-5, Yoh. 18:28-38)

1La'ah bé' jak dau peka rema, kekat irah pengeja'au imam pemung ngan irah pengeja'au kelunan Yahudi, ngan irah guru éh nebaraa' tong Surat Musa, ngan kelunan éh ja'au éh jah, jin Komiti sebayang Yahudi petipun ke' réh pakat. Pu'un réh ngejeret Yésus ngan mihin éh tai Pilatus. 2Boh Pilatus neteng éh kepéh, ka' ha' néh, Kineu' éh, ka'au' néh Raja' pohoo' Yahudi, ha' néh.

Ka' ha' Yésus mipa éh, Kenat néh éh barei ha' ko' nah, ha' Néh.

3Kekat irah pengeja'au imam pinaa' ha' réh pané maneu' Yésus juk pesala' éh. 4Pilatus neteng éh kepéh, ka' ha' néh, Kineu' ke', bé' ke' juk pané bara' ineu'-ineu' péh tong jalan réh pesala' ngan maneu' ke' inah, ha' néh.

5Bang bé' Yésus pané bara' ineu'-ineu' péh, béé kenin Pilatus.

Tong réh ngukum Yésus matai

(Mat. 27:15-26, Luk. 23:13-25, Yoh. 18:39—19:16)

6La'ah siget-siget ta'un tovoo' irah Yahudi maneu' Dau Ja'au Paska, malai Pilatus ngelepu jah kelunan jin lamin tutup, séé'-séé' awah éh keneloo' réh. 7La'ah pu'un jah kelunan tong lamin tutup nah ngaran néh Barabas, iah pu'un pemung ngan irah éh mematai kelunan tovoo' réh betéé' kenin pekayau rai. 8Hun kelunan pinaa' petipun ke' réh menyat Pilatus ngelepu jah kelunan barei' kemalai réh, 9Pilatus tioo neteng réh, ka' ha' néh, Kineu' kenin keh, keloo' keh ku' ngelepu Raja' pohoo' Yahudi kei, ha' néh. 10Kejam néh irah pengeja'au imam mena' Yésus ngan néh nah uban irah nyelepéé' kenin awah.

11Bang irah pengeja'au imam nah pebetéé' kenin kelunan pinaa' ke' réh menyat Pilatus ngelepu Barabas. 12Ka' ha' Pilatus ngan irah pinaa', Hun néh kenat, Ineu' éh keneloo' keh naneu' ké' tong kelunan éh benara' keh Raja' pohoo' Yahudi ha' néh.

13Pelapah irah ngeradau bara', Mematai éh tong salib, ha' réh.

14Ka' ha' Pilatus kepéh, Ineu' kesa'at naneu' Néh, rih ha' néh.

Jaa' jaa' néh réh ngeradau kepéh, Mematai éh tong salib, ha' réh.

15La'ah uban Pilatus juk ngejian kenin réh, iah ngelepu Barabas mena' éh ngan réh. Boh éh nyohoo' réh mipok Yésus ngan mihin éh ke' réh mematai éh tong kayeu' salib.

Tong irah seradu peja' Yésus

(Mat. 27:27-31, Yoh. 19:2, 3)

16La'ah irah seradu mihin Yésus tai awaa' lamin pengeja'au peritah, ke' réh tebai irah seradu éh jah kepéh. 17Pu'un réh pekerayung Yésus palaa' kerayung rep-rep, ngan irah ngeleleng inan suha' ketem suha' néh ke' réh pepekah éh tong ulun Yésus. 18Boh réh barei' seva' éh ke' réh peja' éh awah, ka' ha' réh, Tabi' Raja' pohoo' Yahudi, ha' réh. 19Boh réh mipok ulun néh, ngan nyula' éh, ngan ngejekuu' lep réh tong jumen Néh barei' seva' Éh. 20La'o réh peja' Éh kenat, irah mega' kerayung rep-rep nah kepéh boh réh mena' pakai nah ke' ri' kepéh, la'o inah irah mihin Éh tai retek réh juk mematai Éh tong kayeu' salib.

Tong réh mematai Yésus tong kayeu' salib

(Mat. 27:32-44, Luk. 23:26-43, Yoh. 19:17-27)

21 # Rum. 16:13 Lem réh lakau inah, peselalang réh ngan jah kelunan ngaran néh Simon, kelunan inah tuai jin leboo' néh tengéé' juk tai leboo' Yérusalem, inah réh ngamit éh ke' réh nyohoo' éh nyu'un kayeu' salib Yésus nah. Simon nah, iah éh tamen Aleksander rawah Rupus jin tana' Kirene. 22Avéé' réh tong retek tana' éh ngaran néh Golgota, éh sin néh, Tulang Ulun. 23Pu'un réh mena' baa' agun pekulup ngan tawan mun ngan Yésus, bang bé' éh mesep éh. 24#Msm. 22:19 La'ah irah memaku' Éh tong kayeu' salib, ngan petulat livah Néh belah irah ke', ngan irah nyunga' lubun ke' réh omok jam séé' omok alaa' livah Néh inah. 25Teka dau pelakei' irah nyalib Éh tong kayeu' salib. 26Tong salib inah irah memaku' surat ha' réh pesala' Yésus nah ka' éh. Raja' pohoo' Yahudi. 27La'ah irah nyalib duah usah kelunan éh maneu' kereja' sa'at Pemung ngan Néh jah saa' na'au' Néh jah saa' kabéng Néh. 28#Yes. 53:12 Pu'un éh kenat dokoo' pesukup ha' éh senurat lem Surat Tuhan, Iah pu'un pemung ngan kelunan éh penyala', ha' néh.

29 # Msm. 22:8, 109:25, Mrk. 14:58, Yoh. 2:19 La'ah irah éh lapah Sinah gilei' réh na'at Yésus ngan peja' Éh, ka' ha' réh, Nah! Ka'au' rih de' bara' ke' juk mikah Umaa' Allah ngan maneu' éh kepéh lem teleu' dau awah kunah ko' rai, 30tuhun ke' jin kayeu' salib nah ko' pepurip usah ko' ke', ha' réh.

31Kenat péh irah pengeja'au imam ngan irah guru éh nebaraa' tong Surat Musa, irah péh peja' Yésus, ka' ha' réh pané belah irah ke', Nah! Iah rih de' omok éh pepurip kelunan éh jah, bang bé' Iah omok pepurip usah Néh tengéé' 32Hun néh mu'un iah Raja' pohoo' Israel, éh purip, tuai senohoo' Allah, jian iah tuhun jin salib, dokoo' améé' na'at éh ngan ngelan tong Néh ha' réh. Kenat péh ha' rawah éh senalib réh pemung ngan Yésus nah peja' Éh.

Tong pematai Yésus

(Mat. 27:45-56, Luk. 23:44-49, Yoh. 19:28-30)

33La'ah dau pejek pelapah merem pah tipo tana', avéé' dau kuba'. 34#Msm. 22:2 Hun dau kuba' Yésus pané ngan ja'au ha', ka' ha' Néh, Eloi, Eloi, lama sabakhtani, ha' Néh. Sin tong ha' Néh inah, O Allah Ké', O Allah Ké', kineu' Ke' bet Akeu', ha' Néh.

35Jelua' irah kelunan éh pu'un sinah, hun réh menéng ha' Néh kenat, boh réh bara', ha' Néh tebai Elia ine' ha' réh. 36#Msm. 69:22 Pu'un jah usah pemung ngan réh sinah alaa' lamut ke' néh maham éh lem baa' agun boh éh nedok éh palaa' kayeu' nekedeu' éh tavin Yésus ke' néh mena' éh tong ujun Yésus. Ka' ha' néh, Mokoo' jak tam, barang Elia juk tuai alaa' éh jin salib da', ha' néh.

37La'ah Yésus pané ja'au ha', tioo béé laset Néh.

38 # Kel. 26:31-33 Livah éh neu' réh tapé tong umaa' Allah, pejéé' kua' ke ja'au, jin bau pah avéé' ra'. 39Pengeja'au seradu éh nekedéng saa' tenah salib nah na'at tong pematai Yésus nah, boh éh bara', Adang kelunan iteu' Anak Allah mu'un ha' néh.

40La'ah pu'un kuraa' redo sinah, jin juu' si'ik réh na'at éh kenat, pemung ngan irah pu'un Salome, Meriam Magdalena, ngan Meriam éh tinen Yakub ngan Yoses. 41#Luk. 8:2-3 Pu'un réh kivu Yésus kelebéé' Néh pu'un tong tana' Galilia ke' réh nolong Éh lepah nah. Pinaa' redo éh jah péh éh pu'un ngan réh sinah, irah éh kivu Yésus tai Yérusalem rai.

Tong réh nanem patai Yésus

(Mat. 27:57-61, Luk. 23:50-56, Yoh. 19:38-42)

42La'ah teka dau tahup inah Yusup kelunan jin Arimatia nah avéé', 43Iah jah usah jin belah pengeja'au Komiti sebayang Yahudi. Éh senepah réh mu'un, Iah péh mena jaka' Allah pu'un tuai pengeja'au réh. La'ah dau Yésus matai nah, inah éh dau réh petenup teka Dau Posot. Makang kenin Yusup tai menyat Pilatus kejeraa' iah alaa' patai Yésus. 44Tekejet Pilatus menéng ha' Yusup bara' Yésus lepah matai, uban bé' éh lebéé' jin hun réh memaku' éh nah. Pilatus tebai pengeja'au irah seradu ke' néh neteng éh, kuraa' kelebéé' Yésus nah lepah matai rih. 45Hun iah menéng ha' pengeja'au seradu bara' Yésus lepah matai, boh éh kejeraa' Yusup alaa' patai Yésus. 46Tai Yusup melih livah kapan ke' néh alaa' patai Yésus, ke' néh mutup éh palaa' livah inah, boh éh modoo' éh lem luvang tanem bateu'. Boh éh ngeluvit jah bateu' ja'au matep ubaa' luvang inah. 47Meriam Magdalena ngan Meriam tinen Yoses na'at éh kenat, ngan kejam roh retek Yusup modoo' patai Yésus nah.

Nu geselecteerd:

MARKUS 15: PNT

Markering

Deel

Kopiëren