Cenisihs 42
42
Coosap Wiicihkiweya' Kii'ishinisha'omintc Iicipahkiink Cinaacimiicimenitc
1Cekap (Jacob) itahsh kiinoontam eayaanik miicim Iicipahkiink (Egypt), miihsh kaa'inaatc okosihsa', “Wekonen itahsh wenci mihci kakanawaapantiyek,” okii'inaa'. 2#Act 7.12. Miitahsh kaa‑ani'inaatc, “Inashke ninoontam eayaak iinsan miicim Iicipahkiink; maacaak ishaak weti ciawi ataaweyek, cipimaatisiyank, cikawaskatehsiwank,” okii'inaa'. 3Coosap (Joseph) itahsh wiicihkiweya' kaakii mitaahcinitc kii‑ishaawa' Iicipahkiink ekii anta ataawenitc miicim. 4Cekap tahsh kaawiin okiih pakitinaahsiin Pencimanan (Benjamin) Coosapoon kaakii owiicihkiwemikonitc, ciwiiciiwaanitc wiicihkiweyini. Mii hsa kaaihkitotc, “Ninaniisaanenimaa kekoonini cishi maanshihsetc,” kii‑ihkito.
5Isriyal (Israel) tahsh okosihsa' kiihpi takwiiwa' i'imaa mekweya'ii i'i kaakiih pi takohshininitc kaapi anta ataawenitc miicim, aaniihsh kaye Kenan (Canaan) ahkiink kaawiin kiiayaahsinoon miicim. 6Coosap itahsh okiih tipentaan i'i misiwe ahkiini; wiin kaye kaakii ataamikotc kahkina i'imaa ahkiink kaakii ayaanitc. Ahpii tahsh Coosap wiicihkiweya' kaahpi takohshininitc, mihtahkamik kii‑ishi animihkohtaawa' eshi'ayaatc. 7Shemaak itahsh iko ehwaapamaatc wiicihkiweya' okii nihsitawinawaa'. Kaawiin itahsh wiin okii nihsitawinaakohsii'. Kii‑ishihcikehkaaso tahsh ekihkenimaahsik, miihsh kaaishi nishki kanoonaatc, “Aaniinti kiinawaa wenciiyek,” ekii'inaatc.
Miihsh kaa'ikotc, “Kenan ahkiink nintoociimin, ewiih pi ataaweyaank miicim,” okii'ikoo'.
8Aana tahsh Coosap ekii nihsitawinawaatc wiicihkiweya', kaawiin itahsh wiin okii nihsitawinaakohsii'. 9#Gen 37.5-10. Miitahsh kaaishi maamihkawitc kaakii ishi pawaanaahpan, miihsh kaa'inaatc, “Kiinawaa ohsha okiimoosaapiik! Kipiishaam ewii waapantamek aanti eshi kanawencikaatehsinok nintahkiiminaan,” okii'inaa'.
10Miitahsh kaaishi nahkwehtaakotc, “Kaawiin ohsha, nintookimaaminaan! Niinawint hsa kitanohkii'aakanak nimpiishaamin ewii ataaweyaank miicim. 11Niinawint hsa kahkina peshik inini nintookosihsimikonaan; weweni hsa nintishi'ayaamin, kaawiin wiin okiimoosaapiik nintinowihsiimin.”
12Shaakooc itahsh okii'inaa', “Kaawiin iitok! Mii hsa 'i kaaonci piishaayek ewii waapantamek aanti eshi kanawencikaatehsinok nintahkiiminaan!” okii'inaa'.
13O'o tahsh okii'ikoo', “Niinawint hsa kitanohkii'aakanak ninkii mitaahshiniishimin eowiicihkiwentiyaank, ekiih peshikotc nintetenaan kaaishitaatc Kenan ahkiink. Maawaci ohshimenshimaa tahsh owiitapimaan nintetenaanin, kotak itahsh a'a niicihkiweyinaan kaawiin pimaatisihsii,” kii‑ihkitowa'.
14Coosap itahsh okii'inaa', “Mii'iitok i'inahke kaa'ininakook, okiimoosaapiik ehtinowiyek! 15Miitahsh o'o nahke keshi anta kihkenimikooyek, kehcinaac iko kaaishi kihciokimaawitc Peroo (Pharaoh), mii 'imaa keonci kehcinaa'entaakwahk o'omaa cionci maacaahsiwek paanimaa maawac kihshiimenshiwaa piishaatc o'omaa. 16Peshik hsa kiiwenisha'ohk kaatahshiyek cinaasihkawaatc ini kiicihkiweyiwaan, kiinawaa tahsh wiin kika kipa'okoom. Miitahsh i'i nahke keshi anta kihkencikaatek ehkitoyek taka citepwewekwen. Kiishpin itahsh i'i ishihsehsinok, taapishkoo kaaishi kehcinaa'entamaan a'a Peroo ekihciokimaawitc, mii peshikwan keahpiihci kehcinaa'entamaan okiimoosaapiik iinsan ehtinowiyek!” okii'inaa'. 17Miitahsh kaaishi kipa'waatc kahkina nihsokiishik minihk.
18Nihsokiishik itahsh ekii ishihsenik, Coosap okii'inaa', “O'o ishihcikek, miihsh cipimaatisiyek, aaniihsh ninkohtaanenimaa Kishemanitoo. 19Kiishpin itahsh weweni eniniiwiwekwen, peshik hsa o'omaa ta‑ayaa kipa'otiiwikamikonk. Kotak itahsh kiinawaa cikiiweyek, ci‑ishiwitamawekwaa miicim kaanoonteskatewaatc eyaawaatc kitaawiniwaank. 20Piitamawihshiihkek itahsh kaamaawaci ohshiimenshimaawitc kiicihkiweyiwaa, kitihkitowiniwaa keonci kihkencikaatek cipimaatisiyek itahsh,” okii'inaa'.
Miitahsh o'o kaaishihcikenitc. 21O'o tahsh kiiayinitiwa', “Kehcinaac maawiin mii 'i ehtipa'amaakooyank a'a onci kiicihkiweyinaapan, aaniihsh kikii waapamaanaan aaniin kaa‑ahpiihci kakwaatakentank kiikanooninank cipapaamenimaahsiwankipan; kaawiin itahsh kikiih papaamihtawaahsiwaanaan. Miitahsh o'o noonkom kaaonci kakwaatakihseyank,” kiiayihkitowa'.
22 #
Gen 37.21,22. Oroopanan (Reuben) tahsh kii‑ihkitowan, “Kitaanakiih kanoonininim iitok itahsh cimacitootawaahsiwek a'a kwiiwisenhs, kaawiin itahsh kikiih papaamihtawihsiim. Miitahsh o'o wenci ishihseyank ehtipa'amaakoowisiyank,” kii‑ihkitowan. 23Kaawiin itahsh okiih kihkenimikohsii' Coosap enihsitohtawaatc, aaniihsh awiyan okii aanihkanoohtamaakowaan ehkakanoonitiwaatc. 24Ninkoci tahsh kiionci ishaa pinamaa eshi'ayaanitc ekii awi mawitc. Miinawaa tahsh okiih pikiiwe naasihkawaa' ekiih kakanoonaatc. Simiyanan (Simeon) tahsh okii otaahpinaan, ekii mamaancikwahpinaatc kahkina ekii waapamikotc.
Coosap Wiicihkiweya' Kiishikiiwenitc Kenan Ahkiink
25Coosap (Joseph) itahsh kiianoohkii cimooshkinahcikaatenikin omiicimi mashkimotini cipiina'ikaatenik miicim. Kiianoohkii kaye entahsopeshikonitc cikiiwemiinimintc oshooniyaamini omashkimotaaniink cishi piina'omintc. Okii miinaa' kaye kemiicinitc ani pimi ayaanitc. Miitahsh iko 'i kaahtootawimintc. 26Miitahsh kaaishi pihciwane'aanitc omaanshimihtatimoomini cipimiwitoonitc i'i miicim. Miihsh kaa‑anishi maacaanitc. 27Ehkipihciiwaatc itahsh kaakii ishi tipihkishiwaatc, peshik hsa 'a okiih paahkinaan omashkimot ewii ahshamaatc omaanshimihtatimooman. Miitahsh kaakii waapamaatc oshooniyaaman eapinitc kaashi paahkiikinikaatenik omashkimot. 28Miihsh kaa'inaatc wiicihkiweya', “Nishooniyaam ihsa naa ninkiih kiiwe miinikoo, inashke nimashkimotink piinso,” kii‑ihkito. Wiinke tahsh kiikihci koshkote'ewak. Miitahsh ehsekisiwaatc ekii ayinitiwaatc, “Aaniin itahsh inaa o'o wenci tootawinank Kishemanitoo,” ekii ihkitowaatc.
29Ahpii tahsh kaaotihsaawaatc otetewaan Cekapoon (Jacob) eshi'ayaanitc Kenan (Canaan) ahkiink, okii wiintamawaawaan kahkina aaniin kaakii ishihsewaatc. 30O'o ekii'inaawaatc, “A'a hsa inini kaatipentank i'i ahkiini ninkii nishki kanoonikonaan, ekii inakiminankitc okiimoosaapiik ewaapantamowankitc i'i ahki. 31O'o tahsh nintaanakii ishi nahkwehtawaanaan, ‘Weweni ohsha nintininiiwimin, kaawiin okiimoosaapiik nintinowihsiimin. 32Nimitaahshiniishimin ohsha eowiicihkiwesiintiyaank, emihci peshikotc nintetenaan. Peshik itahsh kaawiin keyaapi ayaahsii niicihkiweyinaan a'a hsa wiin maawac kaaoshiimenshimaawitc owiitapimaan nintetenaanin noonkom kaakiishikaninik weti Kenan ahkiink.’ 33A'a tahsh kaatipentank i'i ahkiini o'o ninkii'ikonaan, ‘Mii hsa o'onahke keonci kihkentamaan tepwe weweni eniniiwiwekwen: nakanihk peshik o'omaa kiicihkiweyiwaa eshi'ayaawak. Maacaak itahsh ishiwitawihkwak miicim kaanoonteskatewaatc kitaawiniwaank. Miitahsh i'i anishi maacaak. 34Piitamawihshiihkek itahsh maawac kihshiimenshiwaa cikihkentamaan okiimoosaapiik ehtinowihsiwek, weweni tahsh ci‑ininiiwiwekwen. Kika kiiwe miinininim itahsh kiicihkiweyiwaa, miitahsh pisaan ciataaweyek, ciataamikooyek kaye kekoonan o'omaa ahkiink,’ ” kii‑inaacimowak.
35Ahpii tahsh kaahshiikonamowaatc omashkimotiwaan, mii 'i kaakii mihkawaawaatc kahkina entahshiwaatc oshooniyaamiwaan piinci mashkimotenhsink ehpaapiinsonitc piincaya'ii miicimi mashkimotihkaank. Ahpii ewaapamaawaatc, otetewaan kaye ewaapamaanitc ini shooniyaan mashkimotenhsink ehpaapiinsonitc shooniyaan, wiinke hsa kiihkoshkwentamook. 36Otetewaan itahsh Cekapoon okii'ikowaan, “Etatawe hsa kimehtinamawim niniicaanihsak: Coosap kaawiin keyaapi ayaahsii, Simiyan (Simeon) tahsh kaye, ewii maaciinek itahsh Penciman (Benjamin); kahkina hsa kekoon nipakamishkaakoon,” kii‑ihkito.
37Oroopin (Reuben) okii'inaan oteten, “Pisaan hsa nihsaahkan niishin ninkosihsak, kiishpin pikiiwewinaahsiwak Penciman. Tepweyenimihshin cikanawenimak, kika kiiwe piitamawin itahsh ahpii,” okii'inaan.
38Cekap itahsh kii‑ihkito, “Kaawiin hsa ninkosihs kikashi wiiciiwikohsiiwaa weti; inashke wiicihkiweyan kaawiin pimaatisihsiiwan, wiin ehta mihci peshiko. Kiishpin kekoon ishihsetc ani pimi ayaayek, eahkiwensiiwiyaan itahsh, keahpiihci maanentami'iyek kehcinaac nintaa nihsentamo'ikon.”
Nu geselecteerd:
Cenisihs 42: OJBR
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Ojibwe Shorter Bible (Roman Script) © 2008 Canadian Bible Society
