Cenisihs 43
43
Coosap Wiicihkiweya' Kiihkiiwe'ishaanitc Iicipahkiink Pencimanan Kiiwiiciiwaanitc
1Aanciihke tahsh wiinke kiiani kakwaatakentaakwan i'imaa ahkiink ekii ayaahsinok miicim. 2Ahpii tahsh kaahkitaawaatc kahkina miicim kaakii onci ataawewaahpan Iicipahkiink (Egypt), otetewaan okii'ikowaan, “Maacaak miinawaa kiiwe ishaak cianta ataaweyek pankii keyaapi miicim kemiiciyank,” okii'ikowaan.
3Coota (Judah) tahsh okii'inaan oteten, “A'a ohsha inini weweni ninkii ayaankwaamimikonaan o'o ekii'ininankitc, ‘Kaawiin hsa kika waapamihsiim kiishpin piwiiciiwaahsiwek kiicihkiweyiwaa.’ 4Kiishpin itahsh ishinisha'watc nihshiimenshinaan ciwiiciiwiyamintc, ninka ishaamin ihsa cianta ataawehtamaakooyan miicim. 5Kiishpin itahsh wiin wii‑ishinisha'waahsiwatc, kaawiin ninka ishaahsiimin. Aaniihsh o'o ninkii'ikonaan a'a inini, ‘Kaawiin hsa kika waapamihsiim kiishpin piwiiciiwaahsiwek kiicihkiweyiwaa,’ ” mii 'i kaa'inaatc oteten.
6Isriyal (Israel) tahsh kii‑ihkito, “Wekonen itahsh wenci kihci maanentami'iyek ekii wiintamawek a'a inini eayaawimek keyaapi kotak kiicihkiweyiwaan.”
7O'o tahsh okii'inaawaan, “A'a ohsha inini memintake ko ninkiih kakwecimikonaan niinawint onci, nintinawemaakaninaani' itahsh ekii'ishiyamintc, ‘Kitetewaa na keyaapi pimaatisi? Kitayaawaawaa na keyaapi kotak kiicihkiweyiwaa?’ ekii'ishiyamintc. Ninkii nahkwehtawaanaan itahsh aaniin kaakii ishi kakwecimiyamintc. Aaniin itahsh kekii inamantamaankipan o'o ci‑ihkitotc, ‘Piinaahkek hsa kiicihkiweyiwaa?’ ”
8Coota itahsh okii'inaan oteten Isriyalan, “Pisaan ishinisha'o a'a kwiiwisenhs ciwiiciiwitc, shemaak itahsh ninka maacaamin. Kiinawint itahsh, kekiin itahsh, kiniicaanihsinaanik kaye cipimaataskatewaatc. 9Niin hsa piko ninka ahpi pakitinaan nimpimaatisiwin wiin onci; kika tootaw ihsa kopisaan niin ciopapaamisiwiniyaan kiishpin kekoon ishihsetc. Kiishpin pikiiwewinaahsiwak ishi pakitinaahsiwak itahsh eshi'ayaawatc, taka hsa niin nehpic iko ninka anaamentaakos enaahsamiiyan. 10Kiishpin itahsh onsaam kinwesh ontamiihsehsiwaankipan, aasha niishink weti nintaakiih pionci takohshinimin,” kii‑ihkito. 11Otetewaan itahsh Isriyalan (Israel) kii‑ihkitowan, “Kiishpin itahsh miiehtako eshinaakwanokwen, o'o hsa ishihcikek, piina'amok hsa maawac wenishihshinkin kihtikaaniwi kekoonan o'omaa ahkiink wenci nihtaawikinkin, cimiinek a'a inini miikiwaanan ci‑inwaatenikin. Ono kaye maaciitook, shishopiikiiwinan (balm), pankii aamoowi siinsipaahkwat (honey), takosehkwaanan (spices), pikiwi minaako'on (myrrh) kaye, pistaaciyoowi pakaanak (pistachio), almaantiwi pakaanak (almond) kaye. 12Maaciinihk itahsh kaye niishink minihk shooniyaa, oncitako ishinaakwan cikiiwewinek minihk kaakiih piinsotc shooniyaa kimashkimotiwaank eshi paahkiikinikaatekin. Maakishaa awiya kiiwaniitootamotok i'i kaakii onci ishihsek. 13Maaciinihk itahsh kaye kihshiimenshiwaa, shemaak ci‑ishaayek a'a inini. 14Taka hsa kaaMaawaci mashkawisiitc Kishemanitoo oka ishi'aan ini ininiwan cikoohpaateniminek cipakitinaatc ini kotak kiicihkiweyiwaan, Pencimanan (Benjamin) kaye cipikiiwe wiiciiwinimek. Niin itahsh mii 'i emehtinamaakooyaan niniicaanihsak, wiinke nimashashkonikoo!” kii‑ihkito.
15Miitahsh iki wiicihkiweyimaak kaaishi maaciitoowaatc miikiwaanan, niishink kaye minihk shooniyaan kaakii maaciinaawaahpan, Pencimanan kaye ekii maaciinaawaatc. Kii‑ishaawak itahsh Iicipahkiink ekii inaahsamikaapawiwaatc eshi'ayaanitc Coosapoon (Joseph). 16Ahpii tahsh Coosap ewaapamaatc Pencimanan ewiiciiwaanitc, okiih kanoonaan ininiwan kaapamiihtaakotc owaahkaa'ikanink ekii'inaatc, “Piish iki ininiwak niwaahkaa'ikanink. Nihshi aya'aawihsh kekwayaanci'atc. Iki hsa ininiwak ninka wiici wiihsiniimikook naawahkwenik,” okii'inaan. 17Miitahsh kaaishihcikenitc ini ininiwan Coosap kaakii'inaatc, okii ishiwinaani kaye i'i ininiwa' owaahkaa'ikanink.
18Wiicihkiweya' itahsh kiihsekisiwa' ahpii eshiwinimintc owaahkaa'ikanink. O'o hsa kii‑inentamoo', “Mii hsa 'omaa wenci piinikooyaank a'a shooniyaa kaakiih kiiwe miinikooyaank kaakiih piinsotc nimashkimotinaanink nihtam o'omaa kiihpiishaayaankipan. Kehcinaac ninka otihtinikonaan, kiihshaakooci'iyamintc itahsh, mii 'i ketootaakoyaank cikakwaataki anohkii'iyamintc, ciotaahpinaatc itahsh kaye nimaanshimihtatimoominaani',” kii‑inentamook. 19Eshi ishkwaantemiwaninik itahsh i'i waahkaa'ikan eani ayaawaatc, okiih kanoonaawaan Coosapoon pemiihtaakonitc. 20O'o tahsh okii'inaawaan, “Nintookimaaminaan, taka pisintawihshinaam, nihtam o'omaa kaahpiishaayaankipan ninkiih pi ataawemin miicim. 21Ahpii tahsh ehkipihciiyaank ewiih kapehshiyaank, epaahkinamaank itahsh nimashkimotinaanin, kahkina entahshiyaank ninkii mihkawaanaan nishooniyaaminaan, kahkina iitok i'imaa ekii ayaatc kaashi paahpaahkiikinikaatekin nimashkimotinaanin. Kahkina tahsh ninkiih pikiiwewinaanaan. 22Kotak itahsh kaye shooniyaa ninkiih piinaanaan ewii ataaweyaank miicim. Kaawiin itahsh ninkihkenimaahsiwaanaan awenen kaahkiiwe piina'waakwen nimashkimotinaanink,” kii‑ihkitowak. 23O'o tahsh okii'ikowaan, “Miiko 'i, keko sekisihkek. KiKishemanitoomiwaa ohsha, kitetewaa kaye oKishemanitooman kikii miinikowaa shooniyaan i'imaa kimashkimotiwaank. Ninkiih tepinaa ohsha kaakiih tipa'amawiyek,” okii'ikowaan. Miitahsh kaaishi piinaanitc Simiyanan (Simeon) eshi'ayaawaatc.
24Okii ishiwinikowaan itahsh ini opamiihtaaken owaahkaa'ikaniniink Coosapoon, miihsh kaaishi miinikowaatc nipiini kekisiipiikisitewaakewaatc, okii miinikowaan kaye keahshamaawaatc omaanshimihtatimoomiwaa'. 25Miitahsh kaaishi kiishaaci oninamowaatc waamiinaawaatc Coosapoon ahpii takohshininitc naawahkwenik, aaniihsh kiinoontamook ciwiici wiihsiniimaawaatc. 26Ahpii tahsh Coosap kaahpi takohshink owaahkaa'ikanink, okii miinikoo' wiicihkiweya' miikiwaanan kaakiih piitoonitc owaahkaa'ikanink. Kiianimihkohtaawa' itahsh mihtahkamik enaahsamiitc. 27Miitahsh kaaishi kakwecimaatc aaniin eshi'ayaanitc. O'o tahsh kaye okii'inaa', “Mino'ayaa na kaa‑ahkiwensiiwitc kitetewaa kaatashimek? Keyaapi na pimaatisi?” okii'inaa'.
28O'o tahsh okii'ikoo', “Kitanohkii'aakan nintetenaan hsa keyaapi pimaatisi,” okii'ikoo'. Miitahsh kaaishi animihkohtaanitc ekiih kihtenimikotc.
29Eayinaapitc itahsh okii waapamaan wiicihkiweyan Pencimanan, omaamaan kaakii okosihsinitc. Miitahsh kaaihkitotc, “Miina wa'a maawac kaaohshiimenshimaawitc kiicihkiweyiwaa kaatashintamawiyek?” Miihsh kaa‑ani ihkitotc, “Kishemanitoo kika minotootaak, ninkosihs,” kii‑ihkito. 30Kiihshaakootentam itahsh Coosap ewaapamaatc wiicihkiweyan, miihsh weyiip kaa‑ani ishi saaka'ank ekii antone'ank aanti ketanatemotc. Wiin itahsh iko opahkehcikanink kii‑ishi piintike, miitahsh weti kaahtanatemotc. 31Ahpii tahsh kaaishkwaa kisiinkwetc kiihpi saaka'am pisaan ekii ayayaatc, miihsh kaaihkitotc, “Haw, ayahshankek miicim,” kii‑ihkito. 32Pihkish itahsh Coosap kiiahshamaa, wiicihkiweya' kaye. Iicip kaaonciinitc kaye kaakii wiici wiihsiniimikotc pihkihsh kiiahshamaawa'. Iicip kaaonciiwaatc aaniihsh kaawiin okii wiici wiihsinimaahsiwaawaa' Hiiparoowa' (Hebrews), wiinke okiih kakwaanihsakentaanaawaa o'o ci‑ishihcikewaatc. 33Wiicihkiweya' itahsh kiioncishkawapiwa' enaahsamapitc, ayaantahso pipoonwenitc ekii ishi onapi'imintc, maawac wehshiimenshimaawinitc, piinihsh ini maawac sesiihkisinitc. Ehkakanawaapantinitc itahsh wiinke kiimaamahkaatentamoo'. 34Omiicimimini tahsh Coosap otatoohpowinaahkonk kiionci ahshamaawa', Pencimanan itahsh naanink minihk kiiahshamaawan ahpiihc wiin kotak awiya'. Kiiwiihsiniwa' ewiici wiihsiniimikotc, ekii minihkwenitc kaye emocikahkamikisinitc.
Nu geselecteerd:
Cenisihs 43: OJBR
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Ojibwe Shorter Bible (Roman Script) © 2008 Canadian Bible Society
