Cenisihs 41
41
Coosap Kiiwiintamawaatc Aaniin Eshihsininik Kaakii'ishipawaacikenitc Kihciokimaan
1Niishopipoon tahsh kaaishkwaa ishihsenik, Kihciokimaa i'imaa Iicipahkiink (Egypt) kaakii ayaatc, kii‑ishi pawaacike iinsan ekii niipawitc i'imaa ciikipiik Naayal (Nile) siipink. 2Ekiih pawaanaatc niishwaahso (7) pishihkiwa' ekiih pionci akwaasiinitc i'imaa siipink ekii maminokaamonitc, wiinke kaye ekii minonaakosinitc. Miitahsh iinsan kaaishi maacii miicinitc mashkohsiin. 3Inashke tahsh kaye okiih pawaanaa' niishwaahso (7) pishihkiwa' naake miinawaa ekiih pionci akwaasiinitc i'imaa Naayal siipink wiinke ekiih kawaskatenitc, wiinke kaye ekii maanaatisinitc. I'imaa tahsh kiihpi niipawiwak kaashi niipawinitc kotak pishihkiwa' kaashi kishkahkamikaanik. 4Miitahsh pishihkiwak kaakiih kawaskatewaatc, kaakii maanaatisiwaatc kaye, okiih kitamwaawaa' i'i pishihkiwa' kaakii minokaamonitc, kaakii minonaakosinitc kaye. Miitahsh kihciokimaa kaaishi koshkositc. 5Miinawaa tahsh kiinipaa, miihsh miinawaa kaaishi pawaaciketc. Miihsh o'o kaaishinank. Okii waapamaan peshik pahkweshikani kihtikaanaahtikoon. Miitahsh i'imaa kaaishi waapantank niishwaahso pahkweshikaniminan eminokinkin, ekiishikininikin kaye. 6Niishwaahso (7) tahsh kaye kotak pahkweshikaniminan i'imaa kiionci saakikinoon ekiih shiikoshkaakin ekiih paankwaahsinkin kaye ewaapaninoowenik. 7Ini tahsh pahkweshikaniminan kaakiih shiikoshkaakin okiih kitanaawaan ini pahkweshikaniminan kaakii minokininikin, kaakiih kiishikininikin kaye. Miitahsh kihciokimaa Peroo (Pharaoh) kaakii ishi koshkositc. Miihsh kaaishi kihkentank ekiih pawaaciketc. 8#Dan 2.2. Ehkishepaawakaninik tahsh wiinke kiioncaanimentam. Miitahsh kaaishi antomaatc kahkina memaantaawisinitc, kekiihtaawentaminitc kaye ininiwa' kaakii ayaanitc i'imaa Iicipahkiink. Kaawiin tahsh awaac pankii awiyan okiih kihkentansiini aaniin keinwehtoonitc kaakii ishi pawaaciketc.
9A'a tahsh kaakiih pimiwitootc kihciokimaan ominihkwaakanini okii'inaan kihciokimaan, “Kiwiintamawin hsa noonkom kaakiishikahk aaniin kaaishi mamaashiiyaan. 10Niinawint hsa 'a kaakii niikaanisitc okimaawi ciipaahkwewinini kikii nishki'ikoonaapan. Kikii ishi kipa'onaam itahsh owaahkaa'ikanink a'a kaatipenimaatc okanawencike'. 11Aapitink itahsh ehtipihkahk kekoon ninkii ishi pawaacikemin. Ini tahsh nimpawaacikaninaanin pepahkaan kii‑inwehcikaatewan. 12A'a hsa oshkiniiki Hiiparoo (Hebrew) ninkii wiici kipa'okoomaanaan, kaakiih pamiihtawaatc ini kaatipenimaanitc okanawencike'. Mii hsa awe kaawiintamawankitc kaakii ishi pawaacikeyaank. Miitahsh kaaishi wiintamawiyamintc aaniin kaaishihsininikin nimpawaacikaninaanin. 13Mayaa tahsh iko kii‑ishihseni kaakii ihkitotc. Kikiih kiiwe anohkii'ish kaakii inanohkiiyaampaan. Kikii akoonaa tahsh wiin a'a kaakii niikaanisitc ciipaahkwewinini,” okii'inaan.
14Kihciokimaa tahsh okii naacinisha'waan Coosapoon (Joseph). Aahpici tahsh kakitaahtap kiinaasihkikaniwiwan kaakii ishi kipa'omintc anaamahkamik. Coosap tahsh kiihkashkipaaso, kiimeshkocihkonaye kaye. Miihsh kaapi ishi anta waapamaatc kihciokimaan Peroon. 15Kihciokimaan tahsh okii'ikoon, “Ninkiih pawaacike. Kaawiin tahsh awiya okihkentansiin aaniin eshihsininik. Ninaanoontam hsa e'ikooyan, ahpii enoontaman pawaacikanan ekashkihtooyan ewiintaman aaniin eshihsinkin,” okii'ikoon.
16Coosap tahsh kii‑ishi nahkwehtam, “Kaawiin niin kekoon nintaayaahsiin nimpimaatisiwinink keonci wiintamawinaampaan. Kishemanitoo hsa mayaa kika wiintamaak eshihsininik kipawaacikan,” okii'inaan.
17Coosap itahsh okii'ikoon Peroon, “Ninkii inaapantaan iinsan eniipawiyaan ciikipiik Naayal siipink. 18Kiionci akwaasiiwak itahsh i'imaa siipink niishwaahso pishihkiwak ekii minokaamowaatc, ekii minonaakosiwaatc itahsh kaye, mashkohsiini ekii miiciwaatc. 19Naake miinawaa kiihpi akwaasiiwak niishwaahso kotak pishihkiwak ekiih kawaskatewaatc, ekii maanaatisiwaatc itahsh kaye. Kaawiin wiihkaa nimpi waapamaahsiik pishihkiwak o'omaa Iicipahkiink i'i ciahpiihci maanaatisiwaatc. 20Iki tahsh kaakiih kawaskatewaatc, kaakii maanaatisiwaatc pishihkiwak okiih kitamwaawaa' i'i niishwaahso pishihkiwa' kaakii minokaamonitc nihtam kaakii akwaasiinitc. 21Mihsawaa tahsh iko ekii amwaawaatc i'i pishihkiwa', kaawiin cikii kihkentaakwaninik; miiko peshikwan kaaishi maanaatisiwaatc kaakii ishinaakosiwaahpan. Miitahsh kaaishi koshkosiyaan. 22Miinawaa tahsh ninkiih pawaacike. Ninkiih pawaataanan niishwaahso pahkweshikaniminan eminokinkin, ekiishikinkin itahsh kaye ekii onci saakikinkin peshik pahkweshikanaahtikonk. 23Naake itahsh kiihpi saakikinoon kotak niishwaahso ekiih shiikoshkaakin, ekiih paankwaahsinkin itahsh ewaapaninoowek. 24Kaakiih shiikoshkaakin itahsh okiih kitaanaawaan ini kaakii minokininikin. Ninkii wiintamawaak itahsh iki memaantaawisiwaatc, kaawiin itahsh awaac peshik awiya okiih kashkihtoohsiin ciwiintamawitc.” 25Coosap tahsh okii'inaan kihciokimaan, “Ini hsa niishin kipawaacikanan peshikwan ishihsinoon. Kishemanitoo ohsha niiyaak kiwiintamaak aaniin waa‑ani ishihciketc. 26Iki hsa niishwaahso kaakii maminokiwaatc pishihkiwak kaakiih pawaanatwaa, mii hsa 'i niishwaahso pipoon. Ini kaye niishwaahso pahkweshikaniminan kaakii minokiwaatc kaakiih pawaanatwaa, mii hsa 'i kaye niishwaahso pipoon. Ini hsa niishin kipawaacikanan peshikwan ishihsinoon. 27Iki tahsh kaakiih kawaskatewaatc pishihkiwak otaanaank kaakii onci akwaasiiwaatc, iki kaye pahkweshikaniminan kaakiih shiikoshkaakin, kaakiih paankwaahsinkin ewaapaninoowenik, mii hsa 'iwe niishwaahso pipoon kaawii miicimihkaahsinok. 28Miitahsh eninaan, Kishemanitoo ohsha kiwaapanta'ik aaniin waa‑ani ishihciketc. 29Inashke tahsh niishwaahso pipoon minihk wiinke takihci wenootan miicim o'omaa misiwe Iicipahkiink. 30I'i tahsh kii‑ishkwaa ishihsek, niishwaahso pipoon hsa kaawiin ta‑ayaahsinoon miicim. I'i hsa kaakii ishi wenootahk miicim tawanentaakwan o'omaa misiwe Iicipahkiink. I'i hsa kaawii miicimihkaahsinok wiinke tanihshiwanaacihcikemakan o'omaa misiwe ahkiink. 31I'i tahsh kaawii ishi wenoocihsek miicim o'omaa Iicipahkiink, kaawiin awaac takihkentaakwahsiinoon, aaniihsh i'i kaawii ayaahsinok miicim waawiinke takihci waahsitaawihcikemakan. 32Miitahsh i'i niishwaa kaakii onci ishi pawaacikeyan, kehcinaac iko Kishemanitoo eonentank aaniin waaishiwepaninik. Aahpici kaye wiipa i'i taishiwepan.”
33“Taka tahsh kihciokimaa oka nanaantawaapamaan ininiwan keayaankwaamisinitc, kekiihtaawentaminitc kaye. Miiwan tahsh ini keinahsaatc cimaamawi kanawaapantaminitc Iicipahki. 34Taka kaye kihciokimaa oka onaapamaa' kotak ininiwa' keni aanihke kanawaapantaminitc o'o Iicipahkiini. Oka otaahpinaanaawaa kaye niishin kekoon minihk entahso mitaahso kenihtaawikininik i'i ahpii niishwaahso pipoon kaawii wenooci miicimihkaanik. 35Iki hsa ininiwak oka mooshakinaanaawaa kahkina miicim i'i ahpii niishwaahso pipoon kaawii minohsenik. Taka kaye tamiinaawak cikashkihtoowaatc maano cina'ihsitoowaatc pahkweshikaniminan, taka kaye oka kanawentaanaawaa i'imaa kaatahsinkin ootenawan. 36I'i tahsh miicim kaawii maawacihcikaatek, mii hsa 'iwe kemiicinaakaatek ahpii niishwaahso pipoon kaawii ayaahsinok miicim aasha kekaa kaawii ishihsek o'omaa Iicipahkiink. Iki tahsh pemaatisiwaatc o'omaa ahkiink kaawiin takawaskatehsiwak,” okii'inaan.
Coosap Kii'ishi'intc Ci'okimaahkantank Iicipahki
37Kihciokimaa Peroo (Pharaoh) i'i kaye otaanihkewikimaama' okii minwaapantaanaawaa i'i kaakii wii ishihcikenaaniwaninik. 38Kihciokimaa tahsh okii'inaa' otaanihkewikimaama', “Wiihkaa na kika mihkawaanaan inini o'o ci‑ishi'ayaatc, Kishemanitoon otahcaahkoni keayaanitc opimaatisiwinink,” kii‑ihkito. 39Kihciokimaa tahsh okii'inaan Coosapoon (Joseph), “Kishemanitoo tahsh ekii waapanta'ihk o'o kahkina, kaawiin hsa kotak awiya ishi'ayaahsii ciayaankwaamisitc, kaawiin kaye awiya i'i ahpiihci kakiihtaawentansii. 40#Act 7.10. Kiin hsa kika okimaahkantaan nintahkiim. Kahkina tepenimakwaa pemaatisiwaatc kika na'ihtaakook aaniin keinaahkonikeyan. Niin tahsh ehta ekihciokimaawiyaan kika niikaanishkawin. 41Inashke kitoonakimin kahkina cinaakacihtooyan o'o Iicipahki (Egypt).” Mii 'i kihciokimaa kaa'inaatc Coosapoon. 42#Dan 5.29. Kihciokimaa Peroo okii kihcikonaan okihciokimaawi naapiisonan ekiih pihsihkamoonaatc Coosapoon onisiikinincaaninink. Okiih pihsihkamoonaan kaye eonishihshininik kashkiikiiwin kaasenipaawekaninik. Okii naapihkamoonaan kaaosaawi shooniyaa waapihkowaninik sakapaaneyaapinhs. 43Okiih miinaan okimaawi tihtipitaapaanaahkwan ciaapaci'aanitc cionci kihkentaakosinitc ehkihci inentaakosinitc. Shimaakanihsha' kaakanawencikenitc okii ani niikaaniihtamaako' ehshaahshaakowenitc, “Tawiik, tawiik!” Okii okimaawi'aan tahsh citipentaminitc misiwe Iicipahki.
44Peroo okii'inaan Coosapoon, “Keyaapi niin ninkihciokimaaw! Kaawiin tahsh awiya Iicipahkiink kekoon taishihcikehsii paanimaa kiin ihkitowatc,” okii'inaan. 45Coosap itahsh kiimiinaa wiinsowin ci‑ishinihkaasotc Saahpinaaht Paaniiya (ZaphenathPaneah), ihkwewan kaye kiimiinaa kewiiwitc Aasinaaht (Asenath) eshinihkaasonitc. Ini tahsh oteten a'a ihkwe Paatipira (Potiphera) kii‑ishinihkaasowan, ekii kihci anami'ewikimaawinitc i'imaa ootenaank Iili'apolis (Heliopolis).
46Coosap tahsh nihsimitana kiihtahso pipoonwe i'i ahpii kiiniipawitc enaahsamiinitc Peroon kaakiih kihciokimaawinitc i'imaa Iicipahkiink. Coosap tahsh i'imaa kiionci maacaa kaakii ishi'ayaanitc kihciokimaan, misiwe ekiih papaa ishaatc i'imaa Iicipahkiink. 47Niishwaahso pipoon tahsh wiinke kiiwenoocihse i'i ahki, niipiwa' ekii oshi'oomakahk miicim. 48Coosap tahsh okii mooshakinaan kahkina miicim niishwaahso pipoon kaakii wenoocihsenik i'imaa Iicipahkiink, eshi waootenawaninik ekii ishi'ayaahtootc. Waahkaaya'ii tahsh okii ayontinaan kaakii ayishi ootenawaninik i'i miicim kaakii na'ahtootc. 49Taapishkoo tahsh mihtaawank kaatahsininik kihcikamiink kiihtahsinini miicim Coosap kaakii maawantoonank. Kiinoonte kipihcii tahsh ehtipakintankipan, aaniihsh onsaam kiihpaahtiinatinini.
50Cipwaa ocihcihsenik ciayaahsinok miicim, niishin Coosap okosihsa' okii nihtaawikihtamaakoon Aasinaahtoon, kaakii otetenitc Paatipira kaakii anami'ewikimaawinitc ootena Iili'apolis kaakii ishinihkaatenik. 51Coosap okii ishinihkaanaan nihtam kaakii nihtaawikinitc okosihsan Manaahsa (Manasseh).#41.51 Manaahsa (Manasseh): I'iwe ishinihkaasowin Manaahsa kaa'icikaatek, cimaamihkawinaaniwansinok, mii 'iwe enihtaakwaninik kaaishikiishwewaatc Hiiparoowak. I'i tahsh kaakii onci ishinihkaanaatc, “Kishemanitoo kii‑ishihcike cimaamihkawihsiwaan kahkina kaakiih piishi maanshihseyaan, kaye nintete owaahkaa'ikanink kaa‑ayaanitc,” kii‑ihkito. 52Kotak ini okosihsan okii ishinihkaanaan Iihpariyam (Ephraim). I'i tahsh kaakii onci ishinihkaanaatc, “Kishemanitoo nimiinik apinoonciisha' o'omaa kaaishi kakwaatakihtooyaan,” kii‑ihkito.
53I'i tahsh ahpii niishwaahso pipoon kaakii wenoocihsek miicim i'imaa Iicipahkiink, kekahpii hsa kiihpoonihse. 54#Act 7.11. Miitahsh niishwaahso pipoon kaakii ayaahsinok miicim kaaishi maacihsek, ekii ishihsenik Coosap kaakii ihkitotc. Misiwe kaawiin kiiayaahsinoon miicim. I'imaa tahsh wiin Iicipahkiink, kiiayaa miicim. 55#Jhn 2.5. Ahpii tahsh pemaatisiwaatc i'imaa Iicipahkiink kaakii ishitaawaatc enoontehsewaatc miicim, okiih kanoonaawaan kihciokimaan cimiinikowaatc miicim. Kihciokimaa tahsh okii'inaa' kahkina pemaatisinitc, “Coosap anta waapamihk; aaniin hsa ko eninek ishihcikewaahk.” 56Misiwe tahsh awahshime kiiani ishiwepan, miicim ekii ayaahsinok o'omaa ahkiink. Coosap tahsh okiih paahkinaanan kahkina waahkaa'ikanan kaakii ishi ahtootc miicim, ekii ataawenitc i'i pemaatisinitc Iicipahkiink kaakii ayaanitc. 57Kahkina tahsh pemaatisiwaatc ahkiink kiihpiishaawak Iicipahkiink ekii ataamaawaatc Coosapoon miicim aaniihsh kiikihci wahsitaawihse misiwe ahkiink ekii ayaahsinok miicim.
Nu geselecteerd:
Cenisihs 41: OJBR
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Ojibwe Shorter Bible (Roman Script) © 2008 Canadian Bible Society
