मर्कूस 2:13-28

शेयर गर्नुहोस्

मर्कूस 2:13-28 पवित्र बाइबल (NERV)

येशू फेरी समुद्रतिर जानुभयो, र धेरै मानिसहरूले उहाँलाई पछ्याउन थाले, अनि येशूले तिनीहरूलाई शिक्षा दिनुभयो। येशू तालतिर जानु हुँदै थियो, उहाँले अल्फयासको छोरो लेवीलाई देख्नुभयो; लेवी कर-कार्यलयमा बसिरहेको थियो। येशूले तिनलाई भन्नुभयो, “तिमी म सँग हिंड।” लेवी जुरूक्कै उठ्यो, र येशूलाई पछ्याउन लाग्यो। त्यस दिन, येशूले लेवीको घरमा नै खाना खानुभयो। त्यहाँ धेरै कर-उठाउनेहरू, पापीहरू येशू अनि उहाँका चेलाहरूसित खाना खाइरहेका थिए। त्यहाँ धेरै मनिसहरू थिए जसले येशूलाई पछ्याउन लागेका थिए। केही शास्त्रीहरूले (तिनीहरू फरिसीहरू थिए) येशूलाई पापीहरू र कर उठाउनेहरूसँग खाना खाइरहेका देखे। तिनीहरूले येशूको चेलाहहरूलाई भने, “किन उहाँले कर उठाउनेहरू र पापीहरू सँग खाना खानु भएको हो?” येशूले यी कुरा सुन्नु भयो, अनि उहाँले तिनीहरूलाई भन्नुभयो, “निरोगीहरूलाई वैद्यको आवशयकता पर्दैन, रोगी मानिसहरूलाई नै वैद्यको आवश्यकता पर्छ, र म धर्मिहरूलाई बोलाउन यहाँ आएको होईन, तर म पापीहरूलाई बोलाउन यहाँ आएको हुँ।” यूहन्नाका चेलाहरू, र फरिसीहरू उपवास बसेका थिए, केही मानिसहरू येशूकहाँ आए अनि भन्न लागे, “यूहन्नाका चेलाहरू उपवास बसेका छन् अनि फरिसीहरूका चेलाहरू पनि उपवास बसेका छन् तर तपाईका चेलाहरू किन उपवास बस्दैनन्?” येशूले जवाफ दिनुभयो, “जब कुनै विवाह हुन्छ, दुलहाका अतिथिहरू तिनीहरूलाई दुलहा तिनीहरूको साथ रहुन्जेलसम्म उपवास बस्ने कारण छैन। उनी तिनीहरूकोसाथमा भएसम्म त्यहाँ उपवास हुन सक्तैन। तर समय आउनेछ जब दुलहालाई तिनीहरूबाट अलग लगिन्छ, त्यसबेला तिनीहरूले उपवास बस्छन्। “कसैले पनि पुरानो वस्त्रमा नयाँ कपडाको टुक्रा टाल्दैन। यदि उसले त्यसो गरे त्यो टालो खुम्चिनेछ अनि वस्त्रबाट निस्कने छ। तब प्वाल अझ ठूलो हुनेछ। त्यसरी नै, कसैले पनि नयाँ दाखरस पुरानो दाखरसको मसकमा खन्याउन चाहँदैन, किनभने नयाँ दाखरसले त्यो मसक नै फुटाउँछ, अनि दाखरस र दाखरसको मसकहरू दुवै नष्ट हुन्छ, यसर्थ मानिसहरूले नयाँ दाखरस नयाँ मसकमा भर्न मन पराउँछन्।” विश्रामको दिनमा, येशू आफ्ना चेलाहरूसँगै अन्नका खेतहरू भएर जाँदै हुनुहुन्थ्यो, चेलाहरूले हिँडदै गर्दा अन्नका बालाहरू टिप्न लागे। फरिसीहरूले यो देखेर येशूलाई भने, “तपाईंले देख्नु भयो, तपाईका चेलाहरूले के गरिरहेकाछन् विश्रामको दिनमा यसो गर्नु व्यवस्थाको विरूद्ध हो।” येशूले भन्नुभयो, “तिमीहरूले कहिल्यै पढेका छैनौ, कि जब दाऊद अनि उनका साथीहरू भोकाएका थिए, अनि खानेकुरा चाहन्थे, त्यस बेला दाऊदले के गरे यस्तो घट्ना प्रधान पूजाहारी अबियाथाको समयमा भएको थियो। दाऊदले, परमेश्वरको भवनमा पसेर परमेश्वरलाई चढाइएको रोटी खाएका थिए। अनि मोशाको व्यवस्था अनुसार खालि पूजाहारी हरूले रोटी खान सक्छन् दाऊदले आफ्नो साथमा भएका सबै मानिसहरूलाई पनि केही रोटीहरू दिए।” त्यसपछि येशूले फरिसीहरूलाई भन्नुभयो, “विश्रामको दिन मानिसहरूलाई सहयोग गर्नु भनेर नै शुरू भएको हो। विश्राम दिनको नियमहरू पालन गनैर्पर्छ भनेर मानिसहरू बनेको होइन। यसैले मानिसको पुत्र नै शावाथ दिनको पनि प्रभु हो।”

मर्कूस 2:13-28 नेपाली नयाँ संशोधित संस्करण (NNRV)

उहाँ फेरि एक पल्‍ट समुद्रको किनारमा जानुभयो। अनि मानिसहरूको एउटा ठूलो भीड उहाँकहाँ आयो, र उहाँले तिनीहरूलाई शिक्षा दिनुभयो। त्‍यसपछि जाँदैगर्दा उहाँले अल्‍फयसका छोरा लेवीलाई कर उठाउनेहरूको ठाउँमा बसिरहेका देख्‍नुभयो र तिनलाई भन्‍नुभयो, “मेरो पछि लाग।” तिनी उठेर उहाँको पछि लागे। उहाँ लेवीको घरमा भोजन गर्न बस्‍नुहुँदा कर उठाउने धेरै जना र पापीहरू पनि येशू र उहाँका चेलाहरूका साथमा बसिरहेका थिए। किनकि उहाँलाई पछ्याउनेहरू धेरै थिए। उहाँ पापीहरू र कर उठाउनेहरूसँग खाइरहनुभएको देखेर फरिसी दलका शास्‍त्रीहरूले उहाँका चेलाहरूलाई भने, “तिनी किन कर उठाउनेहरू र पापीहरूसँग बसेर खान्‍छन्‌?” यो सुनेर येशूले तिनीहरूलाई भन्‍नुभयो, “निरोगीहरूलाई वैद्यको खाँचो पर्दैन, तर रोगीहरूलाई मात्र पर्छ। म धर्मीहरूलाई होइन, तर पापीहरूलाई बोलाउन आएको हुँ।” यूहन्‍नाका चेलाहरू र फरिसीहरू उपवास बस्‍तथिए। मानिसहरूले आएर उहाँलाई भने, “यूहन्‍नाका चेलाहरू र फरिसीका चेलाहरू उपवास बस्‍तछन्, तर तपाईंका चेलाहरू किन उपवास बस्‍दैनन्‌?” येशूले तिनीहरूलाई भन्‍नुभयो, “के दुलहा तिनीहरूका साथमा रहुञ्‍जेल जन्‍तीहरू उपवास बस्‍छन्‌ र? जहिलेसम्‍म दुलहा तिनीहरूका साथमा हुन्‍छन्‌ तिनीहरू उपवास बस्‍दैनन्‌। तर समय आउनेछ, जब दुलहा तिनीहरूबाट अलग गराइनेछन्, तब तिनीहरू त्‍यस दिन उपवास बस्‍नेछन्‌। “कसैले पुरानो लुगामा नयाँ कपड़ाको टालो हाल्‍दैन, नत्रता टालेको कपड़ा फाटिनिस्‍कन्‍छ, अर्थात्‌ नयाँ पुरानोबाट फाटेर निस्‍कन्‍छ, र फटाइ झन्‌ नराम्रो हुनेछ। अनि कसैले नयाँ दाखमद्य पुरानो छालाको मशकमा हाल्‍दैन, नत्रता त्‍यस दाखमद्यले छालाका मशकहरू फुटाइदिन्‍छ, र दाखमद्य र मशक पनि नष्‍ट हुन्‍छन्‌। तर नयाँ दाखमद्यचाहिँ नयैँ भाँड़ामा हालिन्‍छ।” एक शबाथ-दिन उहाँ अन्‍नका खेतहरूबाट भएर जाँदैहुनुहुन्‍थ्‍यो। त्‍यताबाट जाँदा उहाँका चेलाहरूले हिँड्‌दाहिँड्‌दै अन्‍नका बाला टिप्‍न लागे। यो देखेर फरिसीहरूले उहाँलाई भने, “हेर्नुहोस्, शबाथ-दिनमा जे गर्नु अनुचित छ तिनीहरू किन त्‍यही गर्दछन्‌?” उहाँले तिनीहरूलाई भन्‍नुभयो, “जब दाऊद र तिनीसँग हुनेहरू खाँचोमा परेका र भोकाएका थिए तब दाऊदले के गरे? के तिमीहरूले कहिल्‍यै पढ़ेका छैनौ? प्रधान पूजाहारी अबियाथारको पालोमा परमेश्‍वरको भवनमा तिनी पसे, र परमेश्‍वरलाई चढ़ाइएको रोटी खाए, जो पूजाहारीले बाहेक अरूले खान अनुचित छ, र त्‍यो रोटी तिनको साथमा हुनेहरूलाई पनि दिए।” तिनीहरूलाई उहाँले भन्‍नुभयो, “शबाथ-दिन मानिसको लागि बनेको हो, मानिस शबाथ-दिनको निम्‍ति होइन। यसैकारण मानिसको पुत्र शबाथ-दिनको पनि प्रभु हो।”

मर्कूस 2:13-28 नेपाली समकालीन संस्करण (NCV)

एकपल्ट फेरि येशू तालको किनारतिर जानुभयो। एउटा ठूलो भीड उहाँकहाँ आयो, अनि उहाँले तिनीहरूलाई सिकाउन थाल्नुभयो। हिँड्दै गर्नुहुँदा उहाँले अल्फयसको छोरो लेवीलाई कर उठाउनेहरूको अड्डामा बसिरहेको देख्नुभयो। येशूले तिनलाई भन्‍नुभयो, “मेरो पछि लाग।” अनि तिनी उठे र उहाँलाई पछ्याए। एक दिन येशू लेवीको घरमा भोजन गरिरहनुहुँदा, धेरैजना कर उठाउनेहरू र पापीहरू, उहाँ र उहाँका चेलाहरूसित खाइरहेका थिए; किनकि उहाँलाई पछ्याउनेहरू धेरै थिए। जब व्यवस्थाका शिक्षकहरू जो फरिसीहरू थिए, उहाँलाई पापीहरू अनि कर उठाउनेहरूसित खाइरहनुभएको देखे, तब तिनीहरूले उहाँका चेलाहरूलाई सोधे: “तिनी किन कर उठाउनेहरू र पापीहरूसित खान्छन्?” यो सुनेर येशूले तिनीहरूलाई भन्‍नुभयो, “निरोगीलाई त चिकित्सकको आवश्यकता पर्दैन, तर रोगीहरूलाई मात्र पर्छ। म धर्मीहरूलाई होइन, तर पापीहरूलाई बोलाउन आएको हुँ।” एकपल्ट यूहन्‍नाका चेलाहरू र फरिसीहरू उपवास बसेका थिए; केही मानिसहरूले येशूकहाँ आएर उहाँलाई सोधे, “किन यूहन्‍नाका चेलाहरू र फरिसीहरूका चेलाहरू उपवास बस्छन्, तर तपाईंका चेलाहरूचाहिँ बस्दैनन्?” येशूले जवाफ दिनुभयो, “दुलहा साथमा हुँदा उहाँका पाहुनाहरू कसरी उपवास बस्‍न सक्छन्? जबसम्म दुलहा तिनीहरूसित हुन्छन्, तिनीहरू त्यसो गर्न सक्दैनन्। तर बेला आउनेछ, जब दुलहा तिनीहरूबाट लगिनेछन्, अनि त्यस दिन तिनीहरू उपवास बस्‍नेछन्। “कसैले पनि पुरानो वस्त्रमा नयाँ टालो सिलाउँदैन। यदि उसले यसो गर्छ भने नयाँ टालो घट्छ र पुरानोबाट च्यात्तिएर जान्छ, अनि त्यो फटाइ झन् नराम्रो हुन्छ। त्यसै गरी कसैले नयाँ दाखमद्य पुरानो छालाको थैलोमा खन्याउँदैन, नत्र भने त्यस दाखमद्यले छालाहरू फुट्छन्, अनि दाखमद्य र छालाको थैलो दुवै नष्‍ट हुनेछन्। त्यसो हुन नदिन उसले नयाँ दाखमद्य नयाँ छालाको थैलोमै राख्नुपर्दछ।” एक विश्रामदिन येशू अन्‍नका खेतहरूबाट भएर जाँदैहुनुहुन्थ्यो; अनि उहाँका चेलाहरू पनि हिँड्दै गर्दा तिनीहरूले खानका निम्ति अन्‍नका बाला टिप्न थाले। फरिसीहरूले उहाँलाई सोधे, “हेर्नुहोस्, किन यिनीहरूले विश्रामदिनमा उचित नहुने काम गरिरहेका छन्?” उहाँले जवाफ दिनुभयो, “के तिमीहरूले कहिल्यै धर्मशास्त्र पढेका छैनौ, दाविदले आफू र आफ्ना साथीहरू भोकाएको र खाँचोमा परेका बेला, के गरेका थिए? प्रधान पूजाहारी अबियाथारको समयमा, तिनी परमेश्‍वरको भवनभित्र पसे, र परमेश्‍वरलाई अर्पण गरिएको रोटी खाए, जो व्यवस्थाअनुसार केवल पूजाहारीहरूले मात्र खान उचित थियो। अनि तिनले केही भाग आफ्ना साथीहरूलाई पनि दिए।” तब येशूले तिनीहरूलाई भन्‍नुभयो, “विश्रामदिन मानिसहरूको लागि बनाइएको हो, तर मानिस विश्रामदिनको निम्ति होइन। यसकारण मानिसका पुत्र विश्रामदिनको पनि प्रभु हुन्।”

मर्कूस 2:13-28 सरल नेपाली पवित्र बाइबल (सरल नेपाली)

येशू फेरि गालील तालको किनारमा जानुभयो। थुप्रै मानिसहरू उहाँकहाँ जम्‍मा भए र उहाँले तिनीहरूलाई शिक्षा दिनुभयो। त्‍यहाँबाट जाँदैगर्दा उहाँले एक जना कर उठाउने मानिसलाई भन्‍सारमा बसिरहेको देख्‍नुभयो। तिनी अल्‍फायसका छोरा लेवी थिए। अनि येशूले तिनलाई भन्‍नुभयो, “मेरो पछि लाग।” यो सुनेर लेवी उठेर येशूको पछि लागे। येशू लेवीको घरमा पाहुना भएर चेलाहरूसँगै खान लाग्‍नुभएको थियो। उहाँका पछि लागेका धेरै जना कर उठाउने र अरू पापी मानिसहरू पनि उहाँसँगै खान बसे। फरिसी भन्‍ने कट्टर धार्मिक समूहका केही मानिसहरूले येशूलाई यसरी कर उठाउने मानिस र अरू पापीहरूसँग बसेर खाइरहेका देखेर उहाँका चेलाहरूलाई भने, “उहाँले किन यस्‍ता कर उठाउने र पापी मानिसहरूसँग बसेर खाएको?” तिनीहरूका कुरा सुनेर येशूले जवाफ दिनुभयो, “डाक्‍टर त निरोगीलाई होइन, रोगीलाई पो चाहिन्‍छ। त्‍यसरी नै म धर्मीलाई होइनँ, तर पापीलाई बचाउन आएको हुँ।” केही मानिसहरूले बप्‍तिस्‍मा दिने यूहन्‍नाका चेला र फरिसी भन्‍ने कट्टर धार्मिक समूहका मानिसहरू उपवास बसेका बेलामा येशूकहाँ आएर सोधे, “बप्‍तिस्‍मा दिने यूहन्‍नाका चेला र फरिसीका चेलाहरू उपवास बस्‍छन्, तर तपाईंका चेलाहरूचाहिँ किन उपवास बस्‍दैनन्?” येशूले तिनीहरूलाई जवाफ दिनुभयो, “के विवाहमा डाकिएका जन्‍तीहरू भोज नखाईकन जान्‍छन् र? दुलहासँग हुँदा त कोही पनि भोकै बस्‍दैनन् नि! तर त्‍यस्‍ता दिनहरू पनि आउनेछन्, जब दुलहालाई तिनीहरूबाट छुट्टाउनेछन्, तब तिनीहरू उपवास बस्‍नेछन्। “फेरि पुरानो लुगालाई कसैले पनि नयाँ टालाले टाल्‍दैन। नत्र नयाँ टालो खुम्‍चिएर पुरानो लुगालाई च्‍यात्‍छ र झन् ठूलो प्‍वाल पारिदिन्‍छ। “अझै भन्‍ने हो भने, कसले ताजा दाखमद्य पुरानो छालाको थैलामा राख्‍छ र? राख्‍दैन नि! यदि राख्‍यो भने त थैलो पनि फुट्छ र दाखमद्य पनि पोखिन्‍छ। ताजा दाखमद्यचाहिँ नयाँ छालाको थैलामा नै राख्‍नुपर्छ।” पवित्र विश्रामको दिन येशू गहुँ-बारीको बाटो भएर जाँदै हुनुहुन्‍थ्‍यो। जाँदैगर्दा उहाँका चेलाहरूले गहुँका बाला टिप्‍न लागे। यो देखेर फरिसी भन्‍ने कट्टर धार्मिक समूहका मानिसहरूले येशूलाई भने, “हेर्नुहोस् त! विश्राम दिन व्यवस्थाले गर्नुहुँदैन भनेको काम पनि तपाईंका चेलाहरूले किन गर्दै छन्?” येशूले जवाफ दिएर भन्‍नुभयो, “दाऊद राजा र उनका साथीहरू हातमा केही नभएर भोकाएको बेलामा उनले के गरेका थिए? के तिमीहरूले पढेका छैनौ? अबियाथार प्रधान पूजाहारी हुँदा भवनमा पसेर दाऊदले परमेश्‍वरलाई चढाएको रोटी साथीहरूसँग मिलेर खाए। जब कि हाम्रो व्यवस्थाअनुसार पूजाहारी बाहेक अरू कसैले पनि त्‍यो रोटी खानुहुँदैनथ्‍यो। तर दाऊदले त आफैंले मात्र नखाएर आफ्‍ना साथीभाइहरूलाई पनि खान दिए,।” येशूले कुरा टुङ्ग्याउँदै भन्‍नुभयो, “मानिसहरू विश्राम दिनको लागि बनाइएका होइनन्, मानिसकै लागि पो विश्राम दिन राखिएको हो। त्‍यसैले म मानव पुत्र पवित्र विश्राम दिनको पनि मालिक हुँ।”