HAGONEGAHANI 19
19
O Loti ki gava tenia i Sotome
1Igê na manurahitana ngekana na vererua na angero karu ata i Sotome. I ngekana o Loti ki oga so igê na maani para na hinua. Matena i bâsirerua, ngaia ki aharaga ma ki ura râ vurusirerua. Ngaia ki bêrusu tangarerua ma ki vi: 2“Bamane, muru râ me noga i pasiku. Muru tanani uga ma kamuru mauru i pasiku. I gomaha i mahogo muru riterite ma kamu kahu arâ nikâ. Ma ngairerua karu arami, karu vi: “Mareha. Igê na bungiana i ngekê igamirua kamuru gâga igê na mahera na hinua.”
3Mo Loti ki ama ni tugurirerua nga. Tahema ngairerua karu banu henia i ruma iana. O Loti ki bonasira na kariana ka hahi na bereti ma ka hagarêa na ngêra koro tangarerua. Matena i nanê na ngauha, ngairerua karu ngê. 4Matena i mamênga, vi garu mauru, ma na mane ni Sotome ka rihia na ruma. Na ara ni mane hato i hinua ka oga i ngekana: na mane na gapu haoru ma na bani mane. 5Ngaira ka hagangere i metara, ka hagatea o Loti, ka vi: “I he ngairerua nga na mane garu ata me i manurahi akê i pasimu? Kasirerua hura me tangagami!” Na mane ni Sotome ka tenia viga paronga era henirerua.
6O Loti ki hura ma ki purusia murisiga na maani ruma. 7Ngaia ki vi tangara, ki vi: “Bamane, be vi tangagamu, siana kamu katokato vikana. Na tarana i erataga ngekana 8Bâ, inê kê nahunirerua ka kareku gi rua, garu pe meramêru rârâ na mane. Naka be torererua hura me tangagamu. Igamu ma mu girara. Ma siana kamu katoa ta na tarana tangarerua na mane, garu oga i ruma iaku. Ma ki tuguhiê, gê bâbâsurirerua.”
9Ma ngaira ka aramia o Loti, ka vi: “Igo na mahuara gu gava taramani! Ti kanigo go ramonigami? Gu gava, i era ma kami katogo berasigo ngavê teharirerua na mane gi rua i pasimu agê.” Ngaira ka bugurenia râ o Loti ma ka ura râ tanga na maani ruma, hanana viga hogea. 10Ma na mane i rarona na ruma karu tagara hura, karu bahenia banu o Loti ma karu raburia na maani ruma. 11Ma hemuri ngairerua karu katora ka guru na ara ni mane hato i metara, hanana siana ka tarahua na maani ruma.
12Na mane gi rua ngegana karu vi tanga o Loti, karu vi: “Manga tani o karemu se ka karemu, se na hungâmu se na ruma iamu ma ka gâga i hinua ikê, gu merahura, 13suria igamirua kamuru page ruhuruhua na hinua ikê. Na Araha ki bani rongoa na rongoha era renira na enoni i hinua ikê ma ki hagatorangenigamirua, hanana vigamuru ruhuruhua i Sotome.”
14Vikê o Loti ki râ i pasita na mane, viga auragirerua ka karena ma ki vi tangarerua, ki vi: “Garigari! Gava pania na hinua ikê. Na Araha ki sugi ruhuruhua na hinua ikê.” Ma ngairerua karu takusia ma, vi ngaia ki hagaruru. 15Igê na kahuagana na tangiana na angero karu hagasusua o Loti, karu vi: “Garigari vego! Meragava kaniamu ma ka karemu gi rua, i era ma kamu me, matena na Araha ki ruhuruhua igê hinua.” 16O Loti ki takoherua. Ma na Araha ki takuia. Tahema na mane girua ngegê karu urura hura o Loti, kaniana ma ka karena gi rua tenia na hinua. 17Memuri ta na hitangiterua na angero ki vi: “Mu masimasi tange manavami. Siana kamu sirasira bê aporo. Siana kamu rêra so igê na maruguna. Mu gaha tagere igê na hungani, i era ma kamu me.”
18Ma o Loti ki arami, ki vi: “Araha, siana ki manga ngekana. 19Igo ko bani koro tangê, suria go hagatahiê. Ma ku bâ, na hungani ngegana ka hagatê ngavê tangê. Na aruhuruhunga ki page tarahuê. Inê kê page me ma ki bara ve ata râ i ngekana. 20Hoi, gu bâsia na kere hinua ikana. Ngaia ki pe hagatê ngavê. Gu nakê be gava râ be oga igê. Bâsia, ngaia ki na kere hinua sisite. Inê kê page tahitahi i ngekana.”
21Na angero ki arami, ki vi: “Ua, i koro ma! Vikana inê be naka mavê na hinua ngekana, mareha be ruhuruhua. 22Garigari! Tangotango! Siana kamu hagarihu tangê vigê ruhuruhua i Sotome.”
Suria o Loti ki visia na agua ngekana vi kere hinua sisite, tahema ga hêtana vi Soare.
23O Loti ki ata i Soare, matena i akê me na arito. 24Na Araha ki parama, ma ki kasi so hurirerua i Sotome me Gomora na hê karekare ni sivi. 25Ngaia ki ruhuruhua i Sotome me Gomora, na maruguna hagenani, na enoni hato igê ma na ara ni marâ hato ga akê igê na mako. 26Ma kaniana o Loti ki sira aporo ma ki vora renia na u na solo.
27Igê na mahogotana i tangi me, o Abarahamo ki gaha tanga na agua, i bani ura igê i maana na Araha. 28Ngaia ki bâsigi so i Sotome ma i Gomora ma na maruguna hagenani, ma ki rigia na asêsuna na mako i manga na asêsuna na bagagi raha. 29Matena God ki ruhuruhurerua na hinua i na maruguna i oga igê o Loti, ngaia ki takusia tare o Abarahamo, ma ki naka o Loti ki gava ki tahi.
30Suria o Loti ki magu, vige oga i Soare, tahema ngaia ma ka karena gi rua ka tagere igê na hungani ma ka oga igê na vaba. 31Ka karena hagenago ki vi tanga kesina, ki vi: “Vaemakerua ki gêmêa, ma ikê ki mareha rârâ igê na mane, hanana vige auragirerua, karu apara kare. 32Nika râ garu hagatonomia vaemakerua renia na vaini, ke aripo na maana, hanana igerua karu memêru ke hagaobaragagerua, karu apara kare.” 33Igê na bungiana ngekana ngairerua karu hagatonomia renia na vaini ma ka karena hagenago ki memêru. Ma o Loti ki pe hagare rârâ, suria na vaini ki ruguhia ngavê.
34Ki tangi me nikâ, ka karena hagenago ki vi tanga kesina, ki vi: “Inê kê mêru henia i na bungi. Garu hagatonomia nikâ i rikini bungi hanana go memêru nogamu. Garu kato vikana hanana ge hagaobaragagerua, karu apara kare.” 35I bungi me ma ngairerua karu hagatonomia nikâ, ki aripo na maana, ma ka karena hemuri ki memêru. Nikâ o Loti ki pe hagare rârâ, suria na vaini ki ruguhia ngavê. 36Ngekana nga hanana o Loti i hagaobararerua ka karena marena. 37Ka karena hagenago ki apara na kare mane. Ngaia ki hêtana vi o Moaba. Ngaia ki na êvarita na Moabita, ga gâga i ngekê. 38Ka karena hemuri ki apara nogana na kare mane. Ngaia ki hêtana vi o Benami. Ngaia ki na êvarita na Amonita, ga gâga i ngekê.
अहिले सेलेक्ट गरिएको:
HAGONEGAHANI 19: KCB
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2011 Bible Society of the South Pacific