HAGONEGAHANI 20
20
O Abarahamo mo Abimeleki
1O Abarahamo ki pania i Mamere ma ki râ i Negeve, na apanena i Kanani bê râ tanga i Esipito. Ngaia ki oga i tagua i bererogaterua i Katesi me Suru. Ma i muri, matena i oga i Gerara, 2ngaia ki hagarongo rârâ, vi ka Sara ki mareha vi kaniana ma kesina hete. Vikê na maneraha o Abimeleki ni Gerara ki vi ka torea me ka Sara tanga. 3I ta na bungiana God ki vora tanga igê na maruteha, ma ki vi: “Igo ko page meme, suria igo ko torea na gete i bani êragi kani ikê.”
4Ma o Abimeleki ki pe memêru rârâ ka Sara. Tahema ngaia ki vi tanga God, ki vi: “Araha, inê kê pe katoa rârâ na tarana era henia. Tahema i pe oto, vigu mutegami, inê ma na kariaku. 5O Abarahamo marena kani visia vi kesina, ma na gete ki vi vikana nogana. Inê kê girara, vi na parongaku ki oto. Inê kê pe katoa rârâ ta na marâ vige era.”
6Igê na maruteha ngekana God ki arami, ki vi: “Inê kê bani girara, vi i oto na parongamu. Tahema inê kê urapusigo ko pe haritoheê ma ko pe kari hagarangia rârâ ka Sara. 7Hoi, gu vatea aporo o vaniana. Ngaia ka na poropete. Ngaia ki page avarasiê tangago, hanana siana ko meme. Ma ki manga go pe vatea aporo, be vi tangago, igamu kamu page meme, igo ma na kariamu hato.”
8Igê na mahogotana i tangi me nikâ, o Abimeleki ki unihakura me na gavumane hato iana ma ki hagarongora renia na tarana i tarahua. Ngaira ka magu ngavê. 9Ma hemuri o Abimeleki ki unia me o Abarahamo ma ki hagatea, ki vi: “Na ta ko katoa tangagami? Na tarana i era manga i he kanigê katoa tangago, tahema go hagamakigami, inê ma na kariaku? Na tarana go katoa tangê ngekana, ki komani erataga ngavê. 10Tanu hega go kato vikana?”
11O Abarahamo ki vi: “Inê kê takusia ma, vi na enoni ikê ka pe hagahigasia God ma ka page nahuiê kê meme, hanana ga torea kaniaku. 12Ngaia monari kini kesiku. Ngaia kini ka karena o vaemaku ma ki mareha vi ka karena kenaku. Menê kê êragia. 13Matena God ki vi tangê, kê hura pania i pasina o vaemaku tangagi na agua getigi, inê kê vi tanga kaniaku, kê vi: “I ngekê ki na matena tangago, go tototo suriê igê. Gu hagarongo rârâ, vi o veogamu kani inê.”
14Vikê o Abimeleki ki vatea aporo ka Sara tanga o Abarahamo ma ki haganahunia nikâ renira na sipi, na puruka, na goti ma na kare vurivuri, na ani mane ma na ani hehene. 15Ngaia ki vi tanga o Abarahamo, ki vi: “Go girara go gâga igê ma na ani mavê na mako igê na arahanga iaku.” 16Ma ki vi tanga ka Sara, ki vi: “Inê be vatea o veogamu na rehagaro na maani na siliva, hanana gê hagatanga monari, vi igo ki oto na parongamu. Na ara ni enoni hato ka page girara, vi igo ko pe katoa rârâ ta na marâ i era.”
17-18Suria na tarana i tarahua ka Sara kaniana o Abarahamo, tahema na Araha ki katoa na gete hato i ruma iana o Abimeleki ka gomara. Vikê o Abarahamo ki avarasia God tanga o Abimeleki. Tahema God ki katora ka girara ga apara kare aporo: ngaia ma kaniana ma na gete vurivuri iana.
अहिले सेलेक्ट गरिएको:
HAGONEGAHANI 20: KCB
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2011 Bible Society of the South Pacific