Matiyew 7
7
Yezu me tsey ka sariya me key ka ndaw
(Lk 6.37-38, 41-42)
1«Ka da kam sariya ka ndaw zlay, aza Bay'ərlam ka da kafakwar sariya zlay tey. 2Hərway sariya kwar ana, ma kafəmata ka ndaw hay ana na, a da kafəmakwar na andza ha tey. Gwada kwar ma wadəmatara tek a ndaw hay ana na, a da wadəmakwar da huɗa tey. 3Ɗagay ka zerɗey guzer da dey ma malam eɗek na, ka mey? Duŋgwazl da dey ɗek ana na, ka sərafa ha təŋga ɗaw? 4Ɗagay ka ləvar a malam eɗek: ‹Äada, i zəgadəkawa guzer ba da dey ɗek›, na teŋgey? Azlakwa duŋgwazl da dey ɗek ana tok na! 5Kah ndaw mbaɗa ha zləna, kuɗa duŋgwazl ba da dey ɗek ana ɗagay, azambay ka nəkada dey haya hayaha, ma zəgadərawa guzer na da dey ma malam eɗek ana tok.» 6«Ka da vəladəmatara tek ma kuley hay a gədey hay zlay. Ka da kuyadəmatara tek ma wuiya kwar hay a gaduru hay zlay, zləna a da ndarsləmata ba, arka a da mbəɗafəmakwar dey na, a da ŋgərɗəmakwar.»
Ma ɗuley mey a Baba
(Lk 11.9-13)
7«Tsəham, aza a vələmakwar; səpam, aza ka ndzafam; fam, mambaw aza a wuradəmakwar. 8Akwa na, kwa way way a tsəhey na, a vəlamar. Ndaw ka səpey ba na, a ndzefey. Ndaw ana ka fey mambaw ba na, a wuradəmara. 9Ɗagay andza ndaw ana da walaŋ a kwar, kendzey wawa ŋga a tsəhafa peŋ na, a da vəlar ŋgwa na, way? 10Dakay na kendzey a tsəhafa kəlef na, a da vəlar govaŋ ɗaw? 11Kuray eɗey seweɗ ana hay tekeɗe na, ka səradama me vəley tek hayna hay a wawa kwar hay tok na, sakwa Baba kwar ma 'ərlam a da vəlatar tek hayna a ndaw ma tsəhafama na hay sakay tok ɗaw?»
Yezu a ɓada tsəveɗ ma daway 'ay Bay'ərlam
(Lk 6.31)
12«Ana tok na, tek a kwar tabiyaha, na kuray ma wuɗam ndaw hay ka kadəmakwar ana hay na, kadəmatara a taya na tey: hərway neney na Mewey ta ndaw sek hay.»
Tsəveɗ hay tsew
(Lk 13.23-24)
13«Fuləkwam na ta mambaw na tsəzlehehe na. Mambaw zlepetem ana ta tsəveɗ na fatata na na, a dada ndaw a slam me zəɗey. Ama har a vatar a ndaw hay na, a dawam na, ta huɗa. 14Mambaw ma daway a mendzey na, tsəzlehehe ha, tsəveɗ ana na ma ŋgaɗətsa ha, arka ndaw ma ndzafama na hay na, nekəɗey dada.»
A səradama vəɗe ma tek na ka bəzey ŋga na
(Mt 12.33; Lk 6.43-44)
15«Wam daw ka vaw hərway ma ndaw sek maləwaɗay ana hay. A səmawa ka tsakay kwar na, a təradama vaw na, təɓaŋ ahiya, ama da huɗa na taya dəvar ahiya a buwam ndaw. 16Ka da səradəmata ba tsana, ka mber a ta na hay ma kam ana. Ɗaɗa ka ŋgəlam gwanah da vəɗe dzəgew ɗaw? Dakay na ɗuwaz da vəɗe hwelelŋ ɗaw? 17Kəɗey tok na, mendzey ma vəɗe ma tek hayna na a yam bəzey ta na haya hiya. Amana vəɗe ma tek dzedzey ana na, a yey bəzey haya kakay ahiya tey. 18Vəɗe ma tek hayna na a yey bəzey haykakay ana kakay. Na dzedzey ana tey na, kwa a slafa me yey bəzey hayna kakay tey. 19Mendzey ma vəɗe ma tek me yey bəzey haya kakay ana na, a rətsəma ba, a kəladama a waw. 20Andza neney tok na ka səradəmata na ka bəzey ta na hay.»
Gawla ma Yezu hayna hay
(Lk 6.46; 13.27)
21«Ndaw ma ləvaya: ‹Bay’ərlam Bay’ərlam!› na, ɗa ma fuləkwada a Slala ma ’ərlam kakay, a dafa na, me key tek andza ma Baba ɗaw da 'ərlam me wuɗey ana. 22Pas ana ŋga na na, ndaw hay haɗadzidzay a da ləvəmaya: ‹Bay’ərlam, Bay’ərlam! La tsəmawa guma andza ma ndaw sek hay na ta mezəley ɗek kakay ɗaw? Ta mezəley ɗek na, la ka ɓəlam fakalaw hay kakay ɗaw? Ta mezəley ɗek na, la kam ɗeɗew hay haɗadzidzay kakay ɗaw?› 23Arka i da ləvatar: ‹Ɗaɗa i ka səradəkurawa tikay; kəmaya vaw ba ka tsakay ɗaw, kuray a neney ma kam tek haya kakay ana!»›
Yezu me tsey ka 'ay ana hay daha tsew
(Lk 6.47-49)
24«Kəɗey na mendzey ma ndaw ma tsənada guma ɗaw a neney hay, i me tsey ana na, ma kada mber na, ma malada ŋga na na ta ndaw ma dzala 'ar aha, me key 'ay ŋga ka ’ar ma pəray. 25Yam ma pawa, papəlay aha, ta vavəray aha, me vey ta slam ma 'ay ana hana, amana kwa 'ay ana ka mbəzley kakay. Hərway bəzay ma 'ay ana hana, ma ka ha ka ’ar ma pəray. 26Mendzey ma ndaw ma tsənada guma ɗaw a neney hay, i me tsey ana, ma kada mber kakay na, ma malada ŋga na na, ta ndaw me dzeley 'ar kakay ana, ma ka 'ay ŋga ka ’ar ma wuyeŋ. 27Yam ma pawa papəlay aha ta vavəray aha na, me vey ta slam ma 'ay ana hana na, ma mbəzlada ba, a da key ma ŋga na, me zəɗey ɗuhwa ha.»
Mazlaɓ ma Yezu
(Mk 1.22; Lk 4.32)
28Arka andza Yezu ma ndəvada guma ŋga neney hay me tsey na, ndaw ana ma kusa na hay ma rəzlaya ta metetəkey ŋga na. kambəlaɓa; 29hərway a tatəkadata na andza ma ndaw ta mazlaɓa aha zləna, andza ma ndaw me sesəkey Mewey ta hay tikay.
अहिले सेलेक्ट गरिएको:
Matiyew 7: MOF
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Le Nouveau Testament en langue Mofu © 2007 Alliance Biblique du Cameroun
