Matiyew 6
6
Yezu me tsey ka sadaka
1«Wan daw ka vaw me key tek ma kuley kwar ka slam dey ma ndaw hay me ɓey ta vaw aha zlay, dakay na, masa kwar da har ma Baba kwar da 'ərlam na dakay. 2Kendzey ka key sadaka na, ka da wudey ka vaw, andza ma ndaw ta 'erneh da mey tsew ana hay, ma kam da 'ay me ɗuley mey hay, ka buwal ɗuhwa na hay, ma ndaw hay ka hasəkadəmatara bəzay ana, zlay. I ɓadakwar dərka na: taya na ka ndzafama masa ta tsoy. 3Kah ekəɗey na, kendzey ka key sadaka na, kwa har gula ɗek na ka sərada tek ma har zəmay ɗek me key ana zlay, 4ma sadaka ɗek ana ka ndzey da masasuɗok, arka Baba ɗek ma nəkada tek eɗek a hana me key da masasuɗok ana na, a da madaka.»
Yezu me tsey ka me ɗuley mey
5Kendzey ka ɗulam mey na, ka da kam andza ma ndaw ta 'erneh da mey tsew ana hay, zlay; taya a wuɗam me ɗuley mey na, ta me lətsey da 'ay me ɗuley mey hay, ka mezlezleŋ tsəveɗ hay, ma ndaw hay ka nəkadəmata. I ɓadakwar dərka na: taya na, ka ndzafama masa ta tsoy. 6Ama kah ekəɗey, kendzey ka wuɗey me ɗuley mey na, fuləkwey a ver a ɗek, wuɗey mambaw ka vaw, ɗular mey a Baba ka tsakay ɗek ana da masasuɗok. Arka na, Baba ɗek a nəkada tek eɗek ana hana da masasuɗok ana na, a da madaka. 7Kendzey ka ɗulam mey na, ka da madama bəzay ma guma dey haɗadzidzay andza ma ndaw Zuif ahiya kakay ana hay zlay; a dzalam da 'ar ata na, i tsakwar guma haɗadzidzay na, azambay a da təɓa. 8Ka da kam andza ma ta tizlay; zləna, hərway amba kuray ka tsəham tek ana na, Baba kwar ana a sərada tek a kwar ana ma wuɗam ana.
Baba lakwa
(Lk 11.2-4)
9Kuray tok na, ɗulam mey na andza neney:
Baba lakwa kah na da 'ərlam ana,
hayna ɓadatara a ndaw hay tabiya ha na kah ana na way.
10Hayna sadərawa Slala ɗek.
Hayna tek eɗek me wuɗey ana na ka key ka dala andza na da ’ərlam ana.
11Vəlandərawa tek me zəmey ma teseɗey na ma sandar ana.
12Safandar yam ba ka meŋgəsey la ma kəmaka na, andza la na tiyatsa ma safəmata yam ka ndaw ma ŋgəsəmandar ana hay.
13Ka da mbəkafandar har ka pətənəmandar zlay.
Amana ləhadandərawa ba da har ma Ndaw me pətəney ndaw ana.
14Akwa na, haɗaw ka safəmata ha yam ka meŋgəsey ma ndaw hay na, Baba kwar ma 'ərlam a da safakwar yam tiyatsa; 15ama haɗaw ka safəmata ha yam ka ndaw hay kakay na, Baba kwar ma 'ərlam a da safakwar aha yam ka meŋgəsey kwar hay kakay tey.
Yezu me tsey ka sumaya
16Kendzey ka kam aha sumaya na, ka da kam magwam andza ma ndaw ta 'erneh da mey tsew ana hay zlay: a həɓam 'ərdey na, ma ɓada na, ndaw hay ka sərafəmata a kam aha sumaya. I ɓadakwar dərka na: taya na ka ndzafama masa ta tsoy. 17Ama kah ekəɗey na, kendzey andza ka key aha sumaya na, wetsey wurdey a 'ar, pəra dey ba, 18ma ndaw hay ka sərafəmaka ka key aha sumaya zlay, amana Baba ɗek ŋga daha da masasuɗok ana; Baba ɗek ma nəkada da masasuɗok ana na, a da madaka.
Yezu me tsey ka zleley da 'ərlam
(Lk 12.33-34)
19Ka da kwarsam zleley ma dala zlay, hərway tol hay ta mamok hay a zəmama ba, ya mahal hay a sləlama ’ay a hulama ba. 20Ama haya kwarsam na zleley ma 'ərlam, hərway da huɗa na, kwa mamok, kwa tol a zəmama kakay, kwa mahal hay a sləlama ’ay a hulama kakay. 21Hərway da slam ana zleley ɗek ŋga da huɗa na, mevel eɗek a da key na da huɗa tiyatsa.
Yezu me tsey ka waw me nəkey dey ma vaw
(Lk 11.34-36)
22Lalam ma vaw na dey. Kendzey dey ɗek hayaha na, vaw ɗek tabiyaha kərem na a da key na, da waw me nəkey dey. 23Ama, haɗaw dey ɗek haykakay tey na, vaw ɗek tabiyaha kərem, a da key na, da ləvaŋ tey. Haɗaw tok na waw me nəkey dey da kah ana, ləvaŋ aha na, a da tərey na, ləvaŋ waray!
Bay'ərlam tsukuɗu, sumkwo ɗaw?
(Lk 16.13)
24Ɗaɗa ndaw a slafa me key gawla ma 'ay, da 'ay ndaw hay tsew kakay: dakay na, ka rəsa ndaw naŋgar ba na, a da wuɗa ndaw naŋgar; dakay ka dzəmama mey ba ta ndaw naŋgar na, a da rəsa ndaw naŋgar. Ka slafama me key mber ma Bay ma Bəla, ta na ma sumkwo kakay.
Yezu me tsey ka me pey 'ar
(Lk 12.22-31)
25Nəkafama i ma tsakwar andza neney na, hərway ka da dzalam 'ar ka mendzey kwar, ka tek a kwar ma da zəmey, kwa ka vaw kwar ana: i da pam ka vaw mey zlay. Mendzey na, a fəna tek me zəmey kakay ɗaw? Tapay ma vaw kwar ana na, a fəna zana me kəley ka vaw kakay ɗaw? 26Nəkam dey ka ɗiyeŋ ma 'ərlam hay: a sləkam kakay, kwa a tsuwam kakay, a kəzlam tek a dey kakay; amana Baba kwar da 'ərlam a vəlatar aha tek me zəmey. Ka fənəmata ɗiyeŋ hay pew pew kakay ɗaw? 27Ndaw da walaŋ a kwar ma slafa ma səkada mendzey ŋga nekəɗey, ta 'ar aŋga me dzeley na, way? 28Ɗagay ka dzalam 'ar ka zana na, ka mey? Nəkafəmata ka meverzey ma tek hay da kusof a gəlam na teŋgey; a yam vaw kakay, a ɗəmam gogumay kakay, 29i ləvakwar: Salomoŋ ta 'ar aŋga da maram aŋga tabiyaha tekeɗe na ɗaɗa ka slafa me pey zana andza ma meverzey naŋgar asləta da huɗa kakay. 30Haɗaw Bay ma Bəla a kəlatar zana ka vaw a guzer hay da ley andza ha na, teseɗey na taya daha, medew na a da kuyadəmata a waw na, a kuray na a da vəlakwar a fəna kakay ɗaw, kuray a neney ta me pey ’ar nekəɗey ana hay. 31Ka da dzəmam ka vaw ta me ləvey aha: i da zəmakwa mey? I da sakwa mey? Dakay na i da kəlakwa ka vaw mey zlay. 32Tek a neney tabiyaha ma səpa tessle mandzara me sesəkey vaw na, ndaw Zuif ahiya kakay ana hay. Zləna Baba kwar ma 'ərlam na, a sərada tek a kwar ma sakwar tabiya na hay seŋgey. 33Haya səpam ka mey na, Slala ma Bay'ərlam ta dzerey ŋga, arka sa na hay tabiyaha na a da vəladəmakwar ka 'arra. 34ka da dzəmam ka vaw, medew na i da kam teŋgey zlay. Medzeley 'ar ma medew na, ka ndzara a medew ana təŋga. Ka meney ka meney na, me yey vaw ŋga na, a sley ɗa.
अहिले सेलेक्ट गरिएको:
Matiyew 6: MOF
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Le Nouveau Testament en langue Mofu © 2007 Alliance Biblique du Cameroun
