Luka 2

Ya Yɛsu

(Mat 1:18-25)

1Akwa saka nda, Kaisar Augustus hyanǝba kuɗahu apǝri ka ndǝ tsǝba sapǝr ndzǝ nam akur kuhyikur Rauma. 2(Əni ani rǝbwa kǝr nam tangkǝma nam tǝ ndǝ tara 'ya akwa zaman tǝ Kiriniyus ani gumnar diyir Siriya.) 3Ba waima ka tǝra akwa mǝlmǝrni akuya ka rǝbwa kǝrni.

4Ani Yusufu yɛ hyati ka ngyar mǝlmǝr Nazarat nam akwa Galili tǝ dzǝ ka mwari akwa mǝlmǝr Baitalahami akwa diyir Yahudiya, mǝlmɛ nam tǝ ndǝ ya kuhyi Dauda akwa. Yusufu mwari akwanda ni akuya dzǝ sǝba akwa dǝrǝr Dauda. 5Dzǝ mwar vwam aka Maryamu mwala thlathlarni nam aka hur tara baga ya, akuya ka dar rǝbwai kǝra dar. 6Tǝ dar tsu akwanda, sakar yarni ka 'ya, 7ba dzǝ ka yai yarkǝmar ni, zǝr sal. Tǝ dzǝ ka pǝru tǝni akwa zaɓi, dzǝ ka panyi tǝni akwa kumbawal, kadǝbar fǝr kǝtǝ ata dar akwa vui dlu mǝthlǝɓi.

Ndzǝr Bǝla ba Ndzǝr Hyantǝr Hyal

8Ba ndzǝr ɓǝla yarɛ adai ada ndzai ata babal abǝla ata hǝiya mǝlmɛ tǝ dar ada wul mawiyir dar avǝrvǝri. 9Ndǝr hyantǝr Thlaku ni ka sǝba ala dar, ba parakǝr nggakur Thlaku ni ka mbǝlkǝrdzi ala dar. Ani dar ka ɗǝmnti hyivǝr. 10Ama ndǝr hyantǝr Hyal ni ka gha ala dar, “Ta gǝr ta hyivǝr. Kadǝbar Yi si ala gǝri aka ndǝrǝr Hyal nam sǝɗa, nam ani sǝr kutsari aka dǝna ala sanga ndzi. 11Asǝna akwa mǝlmǝr Dauda ndǝ yaba ala gǝri Ndǝr Mbati; dzǝ ani Kǝrsti#2:11 Masiha: “Kǝrsti ni” (Akwa nyar Gǝriku) ba “Masiha ni” (Akwa nyar Ibrahim) gyapu ada nkǝrɛ “Ndǝ nam tǝ ndǝ Pukǝr Mal ni”; kadamwa akwa vǝrsu 26. Thlaku ni. 12Əni ata ndzai ala gǝri parsu nam tǝ gǝri ata wula: gǝri ata ɓui mbǝghyiwa tǝ ndǝ tara pǝru akwa zaɓiyir mbwaghɛ, ba tǝ ndǝ tara panyi tǝni akwa kumbawal.”

13Kura aka yakǝn, nda hangkur ndzǝr hyantǝr Hyal nam atahyal tara kǝltsǝnidzi kaka ndǝr hyantǝr Hyal ni, dar ada hǝm Hyal apǝri,

14“Nggakur ala Hyal nam ati ta sang,

ba akwa dunya ndzai lapiyakur ala ndzǝ nam tǝ Hyal ada nga sǝɗar dar.”

15Sakatǝ ndzǝr hyantǝr Hyal yarɛ ni tara tǝra alǝtahyal ka ngyar tǝ dar, ndzǝr ɓǝla yarɛ ni ka nkǝrɛ ala kǝma dar, “Ngyar ka mur mwari akwa Baitalahami ka mur wula sǝ nam tara 'ya, nam tǝ Thlaku tara gha ala muri sǝ ata kǝrni.”

16Antǝ dar ka mwari bǝtǝbǝtu dar ka ɓui Maryamu aka Yusufu, ba mbǝghyiwa ni ada pi akwa kumbawal. 17Sakatǝ ndzǝr ɓǝla yarɛ ni tara wula tǝni, dar ka tsǝba sanga sǝ nam tǝ ndǝr hyantǝr Hyal tara gha ala dar ata kǝra zǝrǝrni, 18ba sanga ndzǝ nam tara ngati ndǝr ni, dar ka lǝkwa ndatǝdzi ata kǝra sǝ nam tǝ ndzǝr ɓǝla yarɛ ni tara tsǝba ala dar. 19Ama Maryamu nǝni dzǝ ngǝzi sanga sǝ yarɛ ni, tǝ dzǝ ada ɗǝnga sǝ ata kǝra dar akwa ɗǝfari. 20Ndzǝr ɓǝla yarɛ ni dar ka ɓiti asi tǝ dar ada la nggakur ba hǝm Hyal, akuya ka sanga sǝ nam tǝ dar tara ngati ba wula tǝ ntsɛ, nam tara 'yatǝdzi tsu apa tǝ ndǝr hyantǝr Hyal tara nkǝrɛ ala dar.

Ndǝ Si aka Yɛsu akwa Fǝr Hyal

21 # Fǝr 12:3; Luk 1:31 Sakatǝ zǝr ni tara 'ya vǝr ntsisu, ani ndǝ ka thlakatsa alari, ba ndǝ ka vǝti alari thlǝmɛ Yɛsu, thlǝm nam tǝ ndǝr hyantǝr Hyal tara gha kǝmata kǝl hurǝrni.

22Sakatǝ sakar kǝtsǝntadzǝr dar 'ya apa tǝ Mabariyir Musa tara gha, Yusufu aka Maryamu kǝtǝ Yɛsu atǝra akwa Ursalima akuya ka dar hamnta tǝni ala Thlaku, 23#Sǝb 13:2,12(apa tǝ ndǝ tara rǝbwai akwa mabariyir Thlaku, “Kǝlara zǝr sal nam yarkǝma tǝ ndǝ yai ka ndǝ hamnta tǝni ala Thlaku”), 24#Fǝr 12:6-8ba ka dar hamnta kǝdlǝrsu apa tǝ mabariyir Thlaku tara gha: “Adlakukyala sǝɗɛ wala madar kǝtǝpǝr sǝɗɛ ani tǝ ndɛ ata thlakǝr wuya.”

25Akwa saka nda, ndǝ laka adai nam ada ndzai akwa Ursalima nam tǝ thlǝmari Simiyaun, dzǝ ndǝ nam kal-kal ba dzǝ ndǝr vǝkǝr sǝlai ala Hyal. Dzǝ ada sǝkǝ vǝr nam tǝ Hyal ata siya mbati Izǝraila, ba dzǝ aka Mambǝl Kartǝ ata kǝrari. 26Mambǝl Kartǝ gha alari apǝri dzǝ adi ata nti kura dzǝ ata wuti Kǝrsti nam tǝ Thlaku tara 'ya alkawalari ni wɛ. 27Mambǝl ni tara lǝkwa ɗǝfari ka hau tǝni, dzǝ ka lǝkwa fǝr Hyal. Sakatǝ ndzǝr yar Yɛsu tara si aka Yɛsu zǝr waza ni akuya ka dar 'yati alari sǝ nam tǝ mabari tara nkǝrɛ ka ndǝ 'ya, 28ani Simiyaun mwar ka kǝtǝ zǝr ni akwa tsiyari ba dzǝ ka usar Hyal, apǝri:

29“Thlakǝrna, apa tǝ gǝ tara kǝl alkawal,

kulini ngyar zǝr kǝiyir ngɛ ka dzǝ tǝra lapiya,

30Akuya ntsawai kǝ wuti mbatǝdzǝr ngɛ,

31Mbatǝdzi nam tǝ gǝ ɗǝmhǝi akǝma sanga ndzi,

32 # Isa 42:6; 49:6; 52:10 Paraku akuya ka tsanti whalǝr ngɛ ala ndzǝ kura Yahudi ba

ba ka dzǝ si aka nggakur ala ndzǝr ngɛ Izǝraila.”

33Atǝgǝra zǝrǝrni aka angǝri ka ndatǝdzi, ata kǝra sǝ tǝ Simiyaun tara gha ata kǝrari. 34Antǝ Simiyaun ka vǝkǝr ala dar barka, ba dzǝ ka nkǝrɛ ala Maryamu, angǝra zǝrǝrni: “Hyal tsarba zǝrǝrni akuya ka dzǝ ndzai zǝr nam ata nkai ba ata hyanti ndzǝ laka hang akwa Izǝraila, ba dzǝ ata ndzai parsu nam tǝ Hyal ani tara hya ama ndzǝ hang ngǝla tǝni, 35ani ka sǝ nam tǝ ndzǝ hang ada ɗǝnga akwa ɗǝfa dar ata sǝba ata babal. Ba damitsǝnidzi ata ntsavui ɗǝfa gǝ apa katsakar.”

36Mwala laka nam tǝ dzǝ nabi adai, thlǝmari Hannatu, nkwar Fanuwɛl, kulfǝr Asar. Dzǝ 'ya magya wur-wur dzǝ ndzai akwi salǝrni fá murfwɛ ɗiɗi, 37ani salari ka nti. Dzǝ ka ndzai kuɗǝghum har tǝ dzǝ 'ya fá ntsisǝthani kapu fwaɗu.#2:37 Walakuɗǝghum dzǝ 'ya fá ntsisǝthlani kapu fwaɗu tǝ dzǝ ada ndzai kura aka salǝrni atakǝmaduku. Dzǝ ta saga ngyar fǝr Hyal wɛ, ama dzǝ ada vǝkǝr sǝlai ala Hyal vǝri aka tsǝtsi tǝ dzǝ ada 'ya asam ba aduwa. 38Ata saka ǝnda ani dzǝ ka sǝmbwa adzǝ dar, dzǝ ka gwaditsǝni ala Hyal, dzǝ ka ndǝrɛ ata kǝra zǝrǝrni ala sanga ndzǝ nam ada sǝkǝ pǝlidzǝr Ursalima.

39 # Mat 2:23 Sakatǝ Yusufu aka Maryamu tara kurai sanga sǝ yarɛ nam tǝ mabariyir Thlaku tara gha ka ndǝ 'ya, ani dar ka ɓakta tǝra akwa mǝlmǝr dar Nazarat akwa Galili. 40Zǝr ni kǝ kǝli, ba dzǝ ka ndzai aka dǝna; dzǝ ghǝighǝi aka bǝrkawakur, ba ɗakur Hyal adai ata kǝrari.

Yɛsu, Zǝr Waza, akwa Fǝr Hyal

41 # Sǝb 12:1-27; Mab 16:1-8 Kǝlara fá ndzǝr yar Yɛsu ada tǝra akwa Ursalima akuya ka Wudzǝr Ngǝmba. 42Sakatǝ Yɛsu tara 'ya fá kum kapu sǝɗɛ, dar ka tǝra akwa wudzǝr apa tǝ dar tara tsǝli. 43Aghǝla tǝ wudzǝr ni tara kuri, ndzǝr yarni ɗu akwa whalɛ tǝ dar angwada lǝhǝi, ama Yɛsu, zǝr waza ni, ka hyati aghǝli tsu akwa Ursalima, kura aka zǝndǝr ndzǝr yarni. 44Dar kǝtǝ apǝri dzǝ vwam kaka ndzǝr dar, akuya ǝni dar ka mwari taman ɓuktsi pathlu. Aghǝla ǝni dar ka lǝkwa bara tǝni akwa ntsa ndzǝr dar kaka pazǝrni yarɛ. 45Ama dar ta ɓui tǝni wɛ. Akuya ǝni dar ka ɓakta ɓiti ka lǝkwa Ursalima kadǝbar ka dar lǝka bara tǝni. 46Aghǝla vǝr makǝr tǝ dar ata kǝra bara tǝni, ani dar ka siya ɓui tǝni akwa fǝr Hyal ada ndzai akwa ntsa malǝm yarɛ. Dzǝ ada nga tǝ dar, ba dzǝ ka yu tǝ dar sǝr yuwɛ. 47Kǝlara ndzǝ nam tara ngati tǝni dzǝ ada ndatǝdzi ata kǝra whal nam tǝ dzǝ ada ngaba su ba whal nam tǝ dzǝ ada sǝnau ala dar. 48Sakatǝ ndzǝr yarni tara wula tǝni, dar ndatǝdzi, ani angǝri ka nkǝrɛ alari, “Zǝrana, kami tǝ gǝ 'ya ala yar sǝ apani? Yar aka babar ngɛ faya tá ntsǝ ka bara tǝngɛ.”

49Dzǝ ka sǝnau ala dar apǝri, “Kami tǝ gǝri ada bara tǝra? Gǝr ta zǝndi apǝri ata 'ya ɗaku ka Yi ndzai akwa kǝiyir bana #2:49 Laka rǝbwa tsai yarɛ 'ya kǝthlǝr tǝ Bana tara lai. wɛ?” 50Ama dar ta ngaba ka fati thlǝla ndǝr ni wɛ.

51Ani dzǝ ka hyati ka nuti tǝ dar atǝra akwa Nazarat ba dzǝ ada ngandǝrǝr dar. Ama angǝri ngǝzi sanga sǝ yarni akwa ɗǝfari. 52#1Sam 2:26; Kar 3:4Ba Yɛsu kǝli akwa bǝrkawakur ba ndzaiyir dzɛ, akwa maiwakur akǝma Hyal aka akǝma ndzi.

अहिले सेलेक्ट गरिएको:

Luka 2: CKL

हाइलाइट

शेयर गर्नुहोस्

कपी गर्नुहोस्