Luka 24

Yezu bi toone wone

Matiyu 28:1-10; Maake 16:1-8; Jɔn 20:1-10

1Wɛ na wora de puli dɛ dem na saŋe siu dɛ dem to,#24:1 Ko kuri mo ye ‘Sunday’ tetete. kaana bam ma zaŋe ba gwoni tega ba vo yibeeli dem jei sem. Ba maa jege terale nwi selo ba na lage ba ma turi Yezu yera yam to. 2Ba na yi jei sem to, ba ma na we kandwɛ delo ya na pe bɔɔne dem ni to bibili de tigi dáa ne. 3Ba ma vo ba zo bɔɔne dem wo. Ba maa wo nɛ dé Teiru Yezu yera yam da. 4Ba boboŋa ma vugimi de ba na wó ke tei. Ba na zege da konto to, nɔɔna balei ma pɔpɔ ba nwoŋi ba zege ba tei ne, ye ba zo gwaaro telo na nyeene pele-pele to. 5Foone ma ja kaana bam. Ba ma tiiri ba chɔɔle ba yuni tega ne. Nɔɔna bam laam ma ta de-ba ba we, “Bɛŋwaane mo á kare á beeri wolo na ŋwe to twa wone? 6O nam tere ywo. Wɛ bi‑o mo. Guli-na kolo o déem na tage de abam maŋa kalo o ta na wo Galili ne to, 7ye o we, ba jege se ba ja omo Nabiin-bu wom ba ke nɔn-chechɔgero jeŋa ne, se ba daare ba pa‑o dagara yuu ne ba go, ye o laam jwoori o bi da yatɔ dɛ ne.”#Matiyu 16:21; 17:22-23

8Nɔɔna bam na tage konto to, kaana bam laam ma guli Yezu ya na tage kolo to. 9Ba ma zege yibeeli dem jei sem ne ba jwoori ba vo ba ta de Yezu nɔɔna fuga-dedoa kam, de balo maama na tɔge ba wora to. 10Kaana bam konto mo ye Mary Magadala, de Joanna, de Mary wolo na ye Jemsi nu to, ko woli de kaana balo na tɔge de-ba to. Banto maama maa wora ba tɛ kolo na ke to ba bere Yezu totoŋa nakwa bam. 11Nɔɔna bam na nigi to, ba maa wo pɛ se kaana bam taane dem jege kuri, ye ba wo sɛ ba ni. 12Ko daare Piita ma zaŋe lela o duri o vo yibeeli dem jei sem se o nii. O na yi da to, o ma tiiri o nii bɔɔne dem wone ye o na gare-jale dem yerane na tigi da. O ma jwoori o viiri ye ko ke‑o yaau de kolo na ke to.

Yezu na veere o tete tei to

Maake 16:12-13

13Dɛ dem konto ne mo Yezu tɔgena bam balei maa wo chwoŋa ne ba maa vei teo kodwoŋi, ko yere mo Emayus. Teo kom konto ye nenɛɛne mɛɛla yarepɛ mo de Jerusalem. 14Ba na maa vei to, ba maa ŋɔɔne kolo maama na ke to. 15Ba na ŋɔɔne ye ba bwɛ daane konto to, Yezu ma to ba wone o tɔge de-ba o via. 16Ba na tɔge daane konto to, ba yia ma pugimi pa se ba wo lɔre‑o.

17Yezu ma bwei-ba o we, “Bɛ wonnu mo abam jege á ŋɔɔna ye á via?” Ba na nigi konto to, ba ma zege ye ba yiga nyɔne. 18Ba dedoa yere mo Kelopasa. O ma ta de Yezu o we, “Nɔɔna balo maama na zoore Jerusalem ne to maŋe ba lɔre wo-kamunnu telo na ke da leile konto to. Bɛ nam mo ye nmo yerane wo nigi?” 19O ma bwei-ba o we, “Bɛ wonnu mo konto?”

Ba ma leiri ba we, “Ko ye kolo na ke Nazarete tu Yezu to mo. O ye Wɛ ni-jwoŋinu mo ye Wɛ dam wo o tei ne. Nɔɔna bam maama pɛ se o kikia de o ni taane maama taa jege dam, ye Wɛ de bere we konto ye chega. 20Debam kaanem yiga tiina bam de dé teo kom nakwa bam ma zaŋe ba ja‑o ba saŋe, pa se ba ve o bora, ye ba we o maŋe se o te. Ba laam ma daare ba pa‑o dagara yuu ne ba go. 21Debam nam ya jege teena we wonto mo ye wolo na wó ŋwe Isarele dwi tiina bam wɛleera jene o ma jwoŋi-ba o yage to. De konto maama, zem mo jege da yatɔ konto na ke to. 22Kolo na daare to mo ye debam kɔgɔ kom kaana badwonna vei o yibeeli dem jei sem ba na kolo na sɔɔre debam yera to. Ba ma vo tetete 23ye ba wo nɛ o yera yam da. Ba ma jwoori ba ba ba ta ba bere debam we ba nɛ wo-kenkagele mo. Ba ma na Wɛ malese, ye se ta de-ba we Yezu daa ta ŋwe mo. 24Debam nɔɔna bam badwonna de ma zaŋe ba vo yibeeli dem ne. Ba ma na we ko seene ko ye nenɛɛne kaana bam na tage tei to. Ko daare Yezu tete mo ba wo nɛ.”

25Yezu laam ma ta de nɔɔna bam o we, “Á boboŋa tera na? Bɛ mo ye á ware á sɛ Wɛ kwora kalo o sampwori sem na yeini ba tɔɔle faŋa faŋa to? 26Ko dae mo Wɛ Dam Tu Krista wom na jege se o na yaara yalo, ye o daare o di Wɛ telaao o jwoŋi o paare to na?” 27O laam ma maŋe kolo maama na popone o ŋwaane ko tiŋi Wɛ tɔnɔ kom ne to o bere-ba. O ma bobo o pa ba lɔre Moses berem dem kuri, ye o daare o bere-ba faŋa faŋa Wɛ sampwori sem berem dem kuri na ye tei to.

28Ba na maa vei to, ba ma vo ba twɛ teo kolo ba na lage ba vo to. Yezu ma ke ne o na maa kɛ yiga mo tei. 29Nɔɔna bam maa wo sɛ ye ba kwoori‑o ba we, “Tega lage ka yi. Nam zo n peini debam tei ne.” O ma sɛ ye o da o zo.

30O ma jeini se o di wodiu de-ba. O ma kwei bworobworo ye o ke Wɛ lei ko ŋwaane. O laam ma fɔ bworobworo kom o maŋe o pa-ba. 31O na ke konto to, ba yia daa wo pugimi ye ba laam lɔre‑o. Ba na lɔre‑o to, o ma pɔpɔ o jei ba yiga ne ye ba daa wo nɛ‑o. 32Ba laam ma ta daane ba we, “Nmo wo nɛ na? Dé na tɔge daane chwoŋa ne ye o ŋɔɔne o bere debam Wɛ tɔnɔ kom wonnu tem kuri na ye tei to, dé ya ba tiini dé jege wopwolo na?”

33Ba ma zaŋe lela ba jwoori ba vo Jerusalem teo kom wo. Ba na yi da to, ba ma na o nɔɔna fuga-dedoa kam de nɔɔna badwonna bam na lage daane jeiga dedoa. 34Banto maa tɛ ba we, “Ko ye chega mo. Dé Teiru Yezu seene o bi toone wone. O tu o bere o tete de Simon mo.” 35Nɔɔna balei bam de ma maŋe kolo na ke chwoŋa ne to ba bere-ba. Ba ma daare ba maŋe Yezu na fɔge bworobworo kom ye ba laam lɔre‑o tei to.

Yezu bere o tete o tɔgena bam

Matiyu 28:16-20; Maake 16:14-20; Jɔn 20:19-23; Kikia 1:9-11

36Yezu tɔgena bam ta na wora ba ŋɔɔne konto to, Yezu tete ma pɔpɔ o ba o zege ba tetare ne. O ma ta de-ba o we, “Yazura taa wo á tei ne.” 37Ba bochare ma di ye foone ja-ba dedɛ. Ba ma boŋe we ba nɛ chiru mo. 38O ma ta de-ba o we, “Bɛŋwaane mo á yera sae konto? Bɛ mo ye á jege bobwea amo ŋwaane? 39Fɔge-na á nii amo jea de a nɛ na ye tei to. Ko seene ko ye amo. Taane-na amo á nii. Chira ba jege ya-nɔna de kwi ne á na nae amo na ye tei to.”

40O na tage konto to, o ma bere-ba o jataala de o nɛ sem. 41Ko na tiini ko jege wopwolo ko pa-ba to, ba ta ware ba sɛ we ko ye chega, ye ba ja ba nia. O ma bwei-ba o we, “Á jege wodiu ywo-seeni se dé di na?” 42Ba ma twori ywon-saŋe ba pa‑o. 43O ma jwoŋi-de o di ba yibia ne.

44O laam ma ta de-ba o we, “Wonnu telo na ke amo to tɔge taane delo amo na maŋe a ta a bere abam maŋa kalo a ta na wo abam tetare ne to. Amo déem tage we, kolo maama na popone amo ŋwaane Wɛ tɔn-dwoŋo kom ne to jege se ko ji chega, ko ná ye kolo Moses de faŋa faŋa Wɛ sampwori sem na popone to, de kolo na popone Wɛ Seinim Lei tɔnɔ kom ne to maama.”

45O ma daare o pa se ba wo poore se ba wane ba lɔre Wɛ tɔnɔ kom na bere kolo to kuri. 46O ma ta o bere-ba o we, “Ba popone Wɛ tɔnɔ kom ne ba we, Wɛ Dam Tu Krista wom lage o na yaara dedɛ mo o te, ye o laam jwoori o bi toone wone da yatɔ dɛ ne. 47Ba daa ta popone we, o tɔgena wó vo logo baŋa dwi maama tei, ye ba da o yere ŋwaane ba bere nɔɔna we ba jege se ba leiri ba wo mo se Wɛ laam yage ba wɛleera o ma chɛ-ba. Á nam jege se á bobo Jerusalem ne mo á ta‑á tɔɔle Wɛ kwora kam konto. 48Abam ye balo na nɛ kolo maama na ke to, ye á jege se á zege chega kam konto kwaga ne á bere nɔɔna. 49Amo nam wó toŋe wolo wom amo Kwo na pwooli o ŋwaane to se o ba abam tei. Wonto wó pa se á na dam delo na nwoŋi Wɛ tei to. Á nam ta ta‑á wora teo kom wone, se á laam wó jwoŋi dam dem konto.”

50Yezu laam ma ja-ba o nwoŋi teo kom wone o ja vo o yi Bɛtania seeni. O ma zeiŋi o jea wɛyuu ne ye o swɛ ba swolim. 51O na wora o ke Wɛ zaane o yage ba yuu ne konto to, o ma yage ba tei ye Wɛ kwei‑o o ja di telaao.#Kikia 1:9-10 52Ba ma kuni dwoona ba zuli‑o ye ba laam daare ba jwoori Jerusalem de wopwolo dedɛ. 53Ba na wora to, ba wo fɔge ba kwɛ Wɛ diga kam veiŋa, ye ba tei Wɛ maŋa maama.

अहिले सेलेक्ट गरिएको:

Luka 24: KBG

हाइलाइट

शेयर गर्नुहोस्

कपी गर्नुहोस्