Luka 23

Pilata bwei Yezu taane

Matiyu 27:1-2, 11-26; Maake 15:1-15; Jɔn 18:28–19:16

1Juu tiina nakwa kɔgɔ kom maama déem ma zaŋe ba ja Yezu ba ja vo gɔmena tu Pilata tei. 2Ba ma bobo se ba taa ŋɔɔne taane dem ba pa‑o ye ba we, “Debam nɛ nɔɔno wonto na jege dé teo kom nɔɔna mo o gane-ba pa ba tusi. O maa bere-ba we ba yé taa lae lampwoo ba pae logo kom Pa-faro wom. O maa kwori o bere o tete we o ye pɛ mo, Wɛ Dam Tu wom.”

3Pilata na nigi konto to, o ma bwei Yezu o we, “Nmo mo ye Juu tiina bam pɛ na?” Yezu ma leiri‑o o we, “Nmo na tage kolo to mo konto.”

4Pilata ma ta de Juu tiina kaanem yiga tiina bam, de nɔn-kɔgɔ kom maama o we, “Amo wo nɛ nɔɔno wonto na ke kolo o chɔge to se a bwei‑o se o leiri.”#1 Piita 2:22 5Ba ma tiini ba ŋɔɔne taane dem ye ba kwaane ba ta ba we, “O nam yeini o tole Judea teene dem maama o pae se bobɔga to nɔɔna bam wone. O déem bobo o ke konto dwoŋi Galili ne mo ye o laam yi ywo-seeni.”

6Pilata na nigi konto to, o ma bwei-ba se o nii nɔɔno wom ye Galili tu mo na. 7O na tu o lɔre we Yezu nwoŋi teo kolo Herodi na tei to, o ma pa se ba ja‑o ba vo wonto tei se o di taane dem, kolo ŋwaane Herodi de tɔge o wo Jerusalem ne maŋa kam konto ne.

8Pɛ Herodi na nɛ Yezu to, o maa jege wopwolo dedɛ, kolo ŋwaane o ya maŋe o ni o ŋwa ye o tiini o lage se o na‑o. O maa lage se o nii, Yezu wó ke wo-kenkagele o bere‑o na.#Luka 9:9 9O ma kwaane o bwei‑o wonnu dedɛ. Yezu maa wo sɛ se o leiri‑o kolokolo. 10Juu tiina kaanem yiga tiina bam de ba zamesem tiina bam maa tɔge ba zege da ye ba tiini ba ŋɔɔne taane dem de baare ba pa‑o. 11Herodi de o soja tiina bam laam ma twe Yezu dedɛ, ye ba jege‑o ba mɔna. Ba ma pa o zo gare-nyenno, ye ba daare ba pa se o jwoori o vo Pilata tei. 12Dɛ dem konto ne Herodi de Pilata ma di badwoŋo daane, ye ba déem ya chuli daane mo.

13Pilata ma pa se Juu tiina kaanem yiga tiina bam, de ba nakwa bam, de nɔɔna bam maama la daane o tei ne. 14O ma ta de-ba o we, “Abam na saŋe nɔɔno wonto amo tei ne to, á tɛ á we o ye wolo na gane á teo kom nɔɔna bam pa ba tusi to. Amo nam bwei‑o mo abam tei ne se a nii, ye a wo nɛ kolo o na ke o chɔge ye á ja‑o ko ŋwaane to. 15Herodi de wo nɛ kolo o na chɔge to. Mo kokuri o pɛ se o jwoori o ba debam tei. Á ta‑á yei we kolokolo tera ko na wó pa se ba ja‑o ba go. 16Konto ŋwaane amo wó pa se o na waarem mo ye a daare a yage‑o.”

[ 17Pilata déem nam jege se o le peeno dedoa o pa-ba ba kuri dem ŋwaane.] 18Nɔn-kɔgɔ kom maama laam ma laare de kwor-dɛa ba we, “Ko ná ye nɔɔno wonto, ja‑o n go. Dé nam lage se n le Barabas n yage n pa debam.” 19Barabas maa ye wolo ba déem na ke peena diga ne o na ke jara de ba teo kom dedɛɛra ye o go nɔɔna to ŋwaane.

20Pilata maa lage se o le Yezu o yage. O daa ma ta de nɔɔna bam se ba sɛ konto. 21Ba ma chem, ye ba tiini ba laare baŋa baŋa ba we, “Nam pa‑o dagara yuu ne n go.”

22O daa ta ma ta de-ba o ke betɔ o we, “Bɛŋwaane mo? Bɛ wo-lɔŋɔ mo o kea? Amo wo nɛ kolo o na ke o chɔge pa se ko maŋe se dé go‑o to. Konto to, amo wó pa se o na waarem ye a daare a yage‑o.”

23Ba daa ta maa tiini ba kwaana ba laare de kwor-dɛa ye ba tɛ de baare ba we, ba jege se ba pa‑o dagara yuu ne mo ba go. Ba na tiini ba ŋɔɔne de ni-dɛɛre konto to, 24ko ma pa se Pilata sɛ se o ke kolo ba na lage to. 25O ma pa ni we, ba le nɔɔno wolo ba na lage se o yage o pa-ba to. Wonto mo ye wolo ba ya na jaane ba ke peena diga ne o na ke jara de ba teo kom dedɛɛra ye o go nɔɔna to ŋwaane. O ma daare o ke Yezu ba jeŋa ne se ba wane ba ke‑o ne ba boboŋa na lage tei to.

Ba jaane Yezu ba vo ba pa dagara yuu ne

Matiyu 27:32-56; Maake 15:21-41; Jɔn 19:17-30

26Soja tiina laam ma ja Yezu ba maa kɛa. Ba na maa vei to, ba ma na nɔɔno wodwoŋi, o yere mo Simon. O nwoŋi Kurene mo. O déem ya nwoŋi gaao mo o ba o yi teo wo o maa kɛa. Ba ma zi‑o ye ba daare ba daŋe dagara kam o bakala baŋa ne pa se o zeŋe-ka o tɔge Yezu kwaga o ja vo. 27Teo kom nɔn-kɔgɔ déem maa tɔge Yezu kwaga. Kaana de maa tɔge ba wora ye ba tiini ba keeri dedɛ o ŋwaane. 28Yezu ma pipiri o nii-ba ye o we, “Jerusalem kaana bam, yé ta‑á keeri-na amo ŋwaane. Á nam ta‑á keeri á pae á tete de á bia. 29Ko nam wó ba ko yi maŋa kam abam na wó ta we, ‘Kaane wolo maama na ye kadega to ye yu-ywoŋo tu mo. Wolo na maŋe o wo loge bu pa o ŋɔge yele to jege yu-ywoŋo dedɛ.’ 30Yaara maŋa kam konto ná yia, nɔɔna wó lwoori peero tem de zwonnu tem we, te to ba baŋa ne te kwoli-ba.#Hosea 10:8 31Ta‑á nii-na ba na ke wo-lwanno tei leile konto. Mini na jege da-lɛa de di konto to, ko ná tu ko ye da-kora, ko bá tiini ko taa ye lɛɛro ko dwoi konto na?”

32Ba déem ma ja ŋweena balei ba vo se ba woli de Yezu ba go. 33Ba ma vo ba yi jeiga kalo yere na ye ‘Yu-kwoli-champoa Peo’ to. Ba laam ma ja Yezu ba pa dagara kam yuu ne. Ba ma ja ŋweena bam de ba pa dagare sedwonna baŋa ne. Ba ma chwi dedoa Yezu jazem ne. Wowom maa wo o jagwia ne. 34Ba na page Yezu dagara kam yuu ne konto to, o ma lwoori Wɛ o we, “Amo Kwo, yage n ma n chɛ-ba, se ba yeiri woŋo kolo ba na ke to.”

Ba ma kwei o gwaaro tem se ba pɔɔre ba pa daane. Ba ma ta jɔrɔ se ba nii wɔ mo wó twori kolo o na lage to.

35Nɔn-kɔgɔ kom maa zege da ba nia. Juu tiina nakwa bam nam ke‑o ba mɔna ye ba we, “O yeini o jwoŋi nɔɔna ŋwea. O ná seene o ye Wɛ Dam Tu Krista wolo o na kuri to, o nam jege se o jwoŋi o tete ŋwea mo.”

36Soja tiina bam de maa ke‑o ba mɔna, ye ba jege sa-nyɔna ba suŋi o yiga ne. 37Ba maa we, “Nmo ná seene n ye Juu tiina bam pɛ, se n jwoŋi n tete ŋwea se dé nii.”

38Ba déem ya popone tɔnɔ se ko bere kolo o na chɔge ye ba go‑o to ba meeli o baŋa ne, ye ko we:

WONTO YE JUU TIINA PƐ MO.#Jɔn 19:19-22

39Ŋweena balo na tɔge ba page da to dedoa maa jege Yezu o twea ye o we, “Ko dae we nmo mo ye Wɛ Dam Tu Krista na? Nam jwoŋi n tete ŋwea se n daare n jwoŋi debam de n woli da.”

40Ŋweeno wodwoŋi wom ma bwɛ o badwoŋi wom o we, “Nmo ba kɔre Wɛ na? Debam maama jege waarem dedwe mo se dé te. 41Ko ná ye debam, dé waarem dem jege chega, kolo ŋwaane keim-balwaaro telo dé na ke to, ko maŋe se dé te mo. Ko daare nɔɔno wonto wo ke kolokolo o chɔge.” 42O ma daare o ta de Yezu o we, “Nmo ná tu n ba n di paare dem, se n guli amo gula.” 43Yezu ma leiri‑o o we, “A tɛ nmo chega ŋwaane to, zem dɛ dem ne nmo wó taa wo amo tei ne Wɛ ywoni jei sem ne.”

44Ko ma vo ko yi maŋa kam wɛ na tu de wo yupare baŋa ne to. Tega kam maama ma ba ka ji lim se ko vo ko yi wɛ-guni maŋa ne. 45Wea kam daa ba jege pwooni. Gare-jale delo na leigi de che Wɛ di-yun-gala kam to ma kaare belei. 46Yezu laam ma laare de kwor-dɛa o we, “Amo Kwo, a kwei a jworo a ke nmo jeŋa ne.”#Lei 31:5 O na tage konto to, o ma daare o te.

47Soja tiina bam yiga tu na nɛ kolo na ke to, o ma tei Wɛ ye o we, “Nɔɔno wonto seene o ye nɔn-ŋom mo chekke.”

48Nɔɔna balo maama na tu ba la daane se ba nii kolo na lage ko ke to de ma na ko na ke tei to. Ba na nɛ to, ba ma jwoori ba viiri ye ba wo chɔge dedɛ. 49Ko daare balo maama na maŋe ba yei‑o to, de kaana balo ya na tɔge ded‑o ba nwoŋi Galili ba ba to maa zege dáa ne ba nia.

Ba ke Yezu yera yam yibeeli wone

Matiyu 27:57-61; Maake 15:42-47; Jɔn 19:38-42

50-51Nɔɔno wodwoŋi déem mo wora, o yere mo Josɛf. O nwoŋi Judea teo kodwoŋi, ko yere mo Arimatea. O maa ye Juu tiina nakwa kɔgɔ kom nɔɔno. O maa kwori o ye nɔn-ŋom ye o tɔge chega Wɛ tei ne. Ba kɔgɔ kom ya na ke ni daane se ba ja Yezu to, o wo sɛ ba na boŋe se ba ke‑o kolo to. O maa jege teena we Wɛ paare dem wó ba o nɔɔna baŋa. 52O ma zaŋe o vo Pilata tei o lwoori chwoŋa se o vo o kwei Yezu yera yam o suli. 53Pilata na sɛ to, Josɛf ma vo o pare Yezu yera yam dagara kam yuu ne. O ma kwei gare-jale o ma pipiri o yera yam, ye o daare o ja vo o tiŋi-ya peo bɔɔne wone. Dento maa ye yibeeli delo ba déem na lugi-de peo yera ne ye ba maŋe ba wo ke nɔɔno da to.

54Dɛ dem Josɛf na ke konto to maa ye dɛ delo Juu tiina bam na jege se ba ti ba yiga ba siu dɛ dem ŋwaane to.#23:54 Ko kuri mo ye ‘Friday’. Tega lage ka yi pa se ba siu dɛ dem laam bobo.

55Kaana balo ya na tɔge de Yezu ba nwoŋi Galili to déem ma da Josɛf kwaga ba vo ba na yibeeli dem jei de o na tiŋi Yezu yera yam da tei to. 56Ba na nɛ konto to, ba ma jwoori ba vo sɔŋɔ. Ba ma vo ba lage terale nuga dwi dwi se ba ma turi Yezu yera yam. Ba siu dɛ dem laam na yi to, ba ma sii de ba totoŋa yam, ne Wɛ ni dem na bere tei to.

अहिले सेलेक्ट गरिएको:

Luka 23: KBG

हाइलाइट

शेयर गर्नुहोस्

कपी गर्नुहोस्