Jɔn 9
9
Yezu puri lilwei yia
1Yezu déem ma vo o maa kɛa. O ma na nɔɔno wodwoŋi ba na maŋe ba lo‑o ye o ye lilwei. 2O kwaga tɔgena bam ma bwei‑o ba we, “Berem tu, wɔ keim-balwaaro mo pɛ ba lo nɔɔno wom ye o ye lilwei? Ko ye o tete keim-balwaaro mo naa o tiina keim-balwaaro mo tei konto?” 3Yezu ma leiri-ba o we, “O na ye lilwei to, ko dae o tete mo na ke wo-balwaaro naa o tiina mo na ke to ŋwaane. Ko nam ye se nɔɔna mo wane ba lɔre lanyerane we Wɛ jege dam, de o na wó ke wo-kenkagele o pa‑o tei to. 4Wɛ mo toŋe-ne. Debam nam jege se dé taa ke o totoŋa yam mo ye wea ta wora. Maŋa daare fenfee yerane se dé taa toŋa. Tega lage ka yi, ye nɔɔn-nɔɔno daa bá wane o toŋe Wɛ totoŋa yam. 5Amo ye pwooni tu mo. Amo ta ná wo logo baŋa ne, pwooni wó taa wo nabiina tei ne.”#Jɔn 8:12
6O na tage konto o ti to, o laam ma twe lileeru o de tega ne. O ma viiri teero de-te, ye o daare o ke-te nɔɔno wom yia ne o pupugi. 7O ma ta de nɔɔno wom o we, o véi o su o yia yam Siloam chɔgɔ kom ne. (Chɔgɔ kom yere dem kuri mo ‘Atoŋe’.) Nɔɔno wom ma vo o su o yia yam. O ma jwoori o ba ye o laam nae fase.
8O sɔŋɔ tiina de balo maama na maŋe ba yei‑o ye o ye lwooru to ma na‑o, ye ba tɛ ba we, “Ko dae nɔɔno wonto mo yeini o jei o lwoori to na?” 9Badaara maa tɛ ba we, “Ko ye wonto mo.” Badaara maa we, “Ko dae wonto, se ba nye daane mo.”
Nɔɔno wom tete ma ta o we, “Amo mo konto.” 10Ba ma bwei‑o ba we, “Nmo yia yam ke tɛ mo ya puri?” 11O ma leiri o we, “Nɔɔno wolo yere na ye Yezu to mo ke teero o ma pupugi amo yia yam, ye o ta-ne o we, a véi Siloam chɔgɔ kom a su a yia yam. A ma vo a su, ye a laam nae.” 12Ba ma bwei‑o ba we, “Konto nɔɔno wom bɛ?” O ma leiri-ba o we, “Amo yeiri o jei.”
13Ba laam ma ja nɔɔno wolo ya na ye lilwei to ba ja vo Farisi tiina bam tei. 14Dɛ dem Yezu déem na ke teero tem o ma puri nɔɔno wom yia yam to ya ye Juu tiina siu dɛ mo. 15Konto ŋwaane Farisi tiina bam daa ma bwei nɔɔno wom ba we, o yia yam ke tɛ mo ya puri? O ma ta-ba o we, “O ke teero mo a yia ne. A ma su-ya, ye a laam nae.”
16Farisi tiina bam badaara ma ta ba we, “Nɔɔno wom na ke konto to, o wo nwoŋi Wɛ tei, kolo ŋwaane o ba tɔge siu dɛ chullu tem.” Badaara de maa tɛ ba we, “O nam na ke wo-kenkagela yanto dwoŋi to, o bá wane o taa ye nɔn-chechɔgero. Wɛ mo wo o tei ne.” Konto ma pa popɔra ba ba wone.
17Ba laam ma jwoori ba bwei nɔɔno wom ba we, “O nam na pɛ nmo yia yam puri to, nmo nam tɛ o taane n we bɛ mo?” O ma leiri o we, “O ye Wɛ ni-jwoŋinu mo.”
18Juu tiina dedɛɛra bam maa ba lage se ba sɛ we nɔɔno wom ya maŋe o ye lilwei mo, ye o laam ba o nae. Konto ŋwaane, ba ma bwoŋi nɔɔno wom tiina se ba bwei ba nii. 19Ba ma bwei-ba ba we, “Abam bu mo tento na? Ba loge‑o lilwei mo na? O nam ke tɛ mo o nae leile konto?” 20Nɔɔno wom tiina bam ma leiri ba we, “Debam yei we o ye debam bu mo. Dé ta yei we ba loge‑o lilwei mo. 21Dé nam yeiri o laam na ke tei o nae, ye dé ta yeiri wolo na puri o yia yam. Abam nam bwei-na o tete, se o ye nɔn-kweo mo. O tete wó wane o leiri abam.” 22O tiina bam na tage konto to, ba déem kɔre Juu tiina dedɛɛra bam mo. Banto ya maŋe ba ke ni dedwe se nɔɔno wolo ná sɛ we Yezu mo ye Wɛ Dam Tu wom, se ba le konto tu ba jeerim diga kam ne. 23Mo kokuri o tiina bam chem, ye ba ta ba we, ba nam bwei nɔɔno wom tete, se o ye nɔn-kweo mo.
24Ba ma jwoori ba bwoŋi nɔɔno wom ba na loge‑o lilwei to, ye ba ta ded‑o ba we, “Nam kɔre Wɛ se n ta chega. Debam yei we nɔɔno wom konto ye nɔn-chechɔgɔ mo.” 25O ma leiri-ba o we, “Amo yeiri nɔɔno wom konto ye nɔn-chechɔgɔ naa o dae. Kolo yerane amo na yei to mo ye a déem ye lilwei mo, ye a laam ba a nae.” 26Ba ma bwei‑o ba we, “O ke tɛ mo o puri nmo yia yam?” 27O ma leiri o we, “Amo maŋe a ta a bere abam, ye á wo sɛ se á cheigi. Bɛ mo ye abam daa lage se á bwei á nii? Abam de ga wó ta‑á lage se á ta‑á tɔge nɔɔno wom kwaga mo na?”
28O na tage konto to, ba ma twe‑o ye ba we, “Ko ye nmo mo tɔge o kwaga. Ko dae debam mo tɔge‑o. Debam nam tɔge Moses bera yam mo. 29Dé yei we Wɛ déem ŋɔɔne de Moses. Ko daare ko ná ye nɔɔno wonto, dé maŋe dé yeiri o na nwoŋi mɛ to.” 30O ma leiri-ba o we, “Aaa. Ko ye kolo na tiini ko so amo to mo! Abam yeiri o na nwoŋi mɛ, ye wonto mo puri amo yia yam. 31Dé yei we Wɛ ba jwoŋi nɔn-chechɔgero taane. Ko ye nɔɔna balo na nege‑o ye ba kikia tɔge o boboŋa na lage tei to mo o jwoŋa. 32Ko zege logo baŋa boboa ne se ko ba ko yi zem to, nɔɔn-nɔɔno ta wo puri wolo ba na loge‑o lilwei to yia kɔtaa. 33Nɔɔno wonto ya bá wane o ke wo-kenkagele dento dwoŋi, ko ná dae we o seene o nwoŋi Wɛ tei.” 34Ba ma jwoori ba leiri‑o ba we, “Bɛ mo ye n boŋe se n kwaane n bere debam? Ba loge nmo ye n maŋe n ye wo-balwaaro tu mo.” Ba laam ma zeili‑o se o daa yé tɔge o zo ba jeerim diga kam.
35Yezu déem ma ni we ba le nɔɔno wom ba jeerim diga kam wone. O ma vo o beeri nɔɔno wom. O na nɛ‑o to, o ma bwei‑o o we, “Nmo sɛ Nabiin-bu wom de n wo maama na?” 36Nɔɔno wom ma leiri o we, “Amo tu, ta n bere-ne o na ye wolo to, se a wane a sɛ‑o.” 37Yezu ma ta ded‑o o we, “Nmo maŋe n na‑o. Amo mo ye Nabiin-bu wom, a zege a ŋɔɔne de nmo.” 38O laam ma ta o we, “Amo tu, a sɛ.” O ma kuni dwoona Yezu yiga ne o zuli‑o.
39Yezu ma ta o we, “Amo tu logo konto baŋa se a pɔɔre nɔɔna daane de ba bochara na ye tei to mo. Balo na ye lilwoa to yia wó ba ya puri. Balo nam na jege yi-poro to yia wó ba ya dwei.” 40Farisi tiina badaara na wora to ma ni o na tage tei to. Ba ma bwei‑o ba we, “Nmo lage n bere we debam ye lilwoa mo na? Dé yi nam poore.” 41Yezu ma leiri-ba o we, “Abam ya ná ye lilwoa Wɛ chega kam seeni, á wɛleera ya bá taa wo á yuu ne. Ko daare, á nam na bere we á jege yi-poro to, á wɛleera ta wo á yuu ne mo.”
अहिले सेलेक्ट गरिएको:
Jɔn 9: KBG
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2020, Ghana Institute of Linguistics, Literacy and Bible Translation (GILLBT)
