मत्ती 10:2-8

ती बाह्र प्रेरितहरूका नाउँ यिनै हुन्: पहिलो पत्रुस भनिने सिमोन, अनि तिनका भाइ अन्द्रियास; जब्दीका छोरा याकोब र तिनको भाइ यूहन्‍ना; फिलिप अनि बारथोलोमाइ; थोमा अनि कर उठाउने मत्ती; अल्फयसको छोरो याकोब अनि थेदियस; सिमोन कनानी अनि यहूदा इस्करियोत, जसले उहाँलाई धोका दियो। यी बाह्र जनालाई येशूले यस्ता अधिकार दिएर पठाउनुभयो: “गैरयहूदीहरूको बीचमा नजाओ, अनि सामरीहरूका शहरहरूमा नपस। बरु इस्राएलका हराएका भेडाहरूकहाँ जाओ। तिमीहरू गएर यो समाचार प्रचार गर: ‘स्वर्गको राज्य नजिक आएको छ।’ रोगीहरूलाई निको पार, मरेकाहरूलाई जीवित बनाओ, कुष्‍ठरोगीहरूलाई निको बनाओ, भूत आत्माहरू धपाओ। तिमीहरूले सित्तैंमा पायौ, सित्तैंमा देओ।