Matius 12
12
Pongajaran Yesus mongona'i Ari Sabat#12:1: Ari Sabtu, husus torahat huatan sombayakng pakai' urakng agama Yahudi
(12:1-14)
(Luk. 6:1-11; Mrk. 2:23–3:6)
1Timpu Ari Sabat, Yesus ongko boko murid-Nyo bojalatn molalu'i lakau gandupm. Boko murid-Nyo mooso kolaparan, jadi sia' momokis tangka'i gandupm ongko momua'inyo. 2Boboropo pomimpitn agama Yahudi doi' kolompok Farisi moniant nantai. Ongko sia' bopandir ko Yesus, “Porotiancam! Porbuatan boko murid Duatn nantai salah! Obai, ado porintah Allah dalapm Hukupm Torat inyo morarakng urakng bokorojo timpu Ari Sabat.”
3Timbas Yesus ko sia', “Pasti kaitn kalo mombaco Buku Suci mongona'i kisah Rajo Daud huatan boko urakng inyo tuyut io. Timpu sia' mooso kolaparan, 4Daud mansu' ko dalapm Rumah Allah,#12:4: Watu nantai, Rumah Allah ija' bobontu' sobuah kemah bosar. monguti' roti inyo udah diposombahan ko Allah. Monurut Hukupm Torat bayo boko imam ulih bopua' roti nantai. Apo timpu nantai, Daud momua'inyo. Io moonji'i ko boko urakng inyo tuyut io pakai' momua'inyo jam. #12:4: Kisah mongona'i Rajo Daud ni'in ado di buku 1 Samuel 21:16. Poraturan mongona'i roti nantai ado di buku Imamat 24:5-9. 5Pasti kaitn pan kalo mombaco dalapm Hukupm Torat mongona'i boko imam. Timpu Ari Sabat, sia' botugas di dalapm Rumah Allah. Obai nantai sia' molanggar hukupm Sabat. Apo sia' kinyo dianggap bosalah. 6Apo dinga'anbo! Watu ni'in ado sosuatu#12:6: Yesus bomasud obai Sio lobih bokuaso daripado somuo poraturan agama. ‘Sosuatu’ di si'itn rotinyo Yesus mo, Koraja'an Allah, huatan Porjanjian Boharu inyo Allah pulah agatn monsio. Kito co monjadi umant Allah agatn caro monaati porintah huatan poraturan agama dalapm Hukupm Torat. Apo caronyo ia'an kito gola' pocayo ko Yesus. inyo lobih pontikng daripado Rumah Allah. 7Dalapm Buku Suci ado totulis pomandiran Allah ni'in: ‘Daripado momposombahan kurbatn bonatakng ko Aku, Aku lobih honda' oca' kaitn mooso salu' agatn urakng bukai.’#12:7: Doi' buku Hosea 6:6. Soumpamonyo kaitn mongoroti masud pomandiran Allah nantai, pasti kaitn kinyo monyalahan boko urakng kinyo bosalah. 8Obai Ana' Monsio ia'an Tuhatn inyo bokuaso tohadap Ari Sabat.”
9Yesus moninggalan tompat nantai ongko mansu' ko dalapm rumah sombayakng boko urakng Farisi. 10Di santai ado urakng inyo longannyo mati sopia'. Boko urakng Farisi nantai bogoyap kosalahan Yesus, oca' ulih monuduh-Nyo. Jadi, sia' botakutn ko Yesus, “Ulih cado monyamani urakng watu Ari Sabat?”
11Apo Yesus bopandir ko sia', “Aman, umpamonyo, ado di antaro kaitn ado siku' domba. Aman domba nantai jatu' ko dalapm lubakng timpu Ari Sabat, pasti kaitn paca'an bokorojo mongoluaran domba nantai doi' dalapm lubakng nantai. 12Nah, pasti monsio jouh lobih borogo daripado domba. Obai nantai, kito ulih bulah koboi'an watu Ari Sabat.” 13Ongko, kato Sio ko urakng inyo longannyo mati sopia' nantai, “Uluran longan kolai!” Timpu urakng nantai mouluran longannyo, io nyamanam. Longannyo monjadi sehat samo agatn longan inyo sopia'nyo. 14Apo boko urakng Farisi nantai koluar ongko bulah gogadatn pakai' mombunuh Yesus.
Yesus ia'an Polayatn Allah inyo topilih
(12:15-21)
15Apo Yesus mongotohu'i gogadatn boko urakng Farisi nantai. Jadi, Sio botula' doi' su'utn. Banya' urakng tuyut Sio, huatan Sio monyamani somuo sia'. 16Apo Sio morarakng sia' momadahan mongona'i sopo Sio.#12:16: Sia' inyo dinyamani mongotohu'i Yesus nantai Kristus, ia'an Rajo Inyo Dijanjian Allah. Apo ado boko urakng inyo kinyo pocayo nantai. Yesus bolupm honda' botikakan mongona'i nantai tolalu bosar obai Sio ija' ado pokoroja'an di dunia ni'in. Potikakan nantai paca'an bulah urakng honda' mombunuh Sio. Apo watu nantai inyo ditontuan Allah pakai' Sio mati di kayu salib ija' bolupm datakng. 17Kojadian nantai tojadi oca' pomandiran Allah monjadi nyata. Timpu joman komai Nabi Yesaya monulis pomandiran Allah nantai dinga' ni'innan:
18“Ninam Urakng inyo molayati Aku. Aku udah momilih Sio.
Aku mongasihi Sio. Sio monyonangan hati-Ku.
Aku paca'an moonji'i Roh-Ku ko Sio.
Huatan Sio paca'an momboritoan ko somuo banso obai Aku paca'an molabuhan koadilan.#12:18: Ayat ni'in pan ulih bomasud, Yesus paca'an momboritoan caronyo urakng ulih monjadi bondar di hadapan Allah.
19Io kinyo paca'an botikakng. Io kinyo paca'an bosaro borakng.
Jadi boko urakng kinyo paca'an mondinga' saro-Nyo di boko jalatn.
20Io kinyo momutusan buluh inyo lokus;
huatan kinyo moniup pompolitoan inyo honda' buta'.
Io kinyo botongga' sampai koadilan monang.#12:20: Ado boboropo komungkitan pakai' roti ayat ni'in. 1) Yesus monunju'an koboi'an-Nyo ko boko urakng oca' sia' monjadi sadar Allah nantai adil. DAMO 2) Yesus bojuakng oca' boko urakng ulih disolamant'an doi' hukupan dosa sia'. DAMO 3) Yesus bojuakng sampai Koraja'an Allah monang doi' Koraja'an Sitatn.
21 Boko urakng doi' somuo banso paca'an pocayo obai Sio paca'an monulukng sia'.”
Yesus dituduh momakai kuaso Rajo Sitatn
(12:22-37)
(Mrk. 3:20-30; Luk. 11:14-23, 6:43-45)
22Lopas nian ado urakng inyo dirasu'i roh jahat dibaba' ko Yesus. Urakng nantai buto huatan bisu. Yesus monyamani io sampai io ulih moniant huatan bopandir agi'. 23Ongko, banya' urakng di santai monjadi hiratn. Kato sia', “Mungkitn Yesus ni'in ia'an Rajo doi' koturutan Daud!”#12:23: Rajo doi' koturutan Daud nantai sobut'an bukai pakai' Kristus, ia'an ‘Rajo Inyo Dijanjian Allah’.
24Boboropo pomimpitn agama Yahudi doi' kolompok Farisi mondinga' nantai. Apo sia' bopandir, “Io monundukng boko roh jahat momakai kuaso Rajo Sitatn!”#12:24: Boko buku Porjanjian Boharu doi' Buku Suci inyo asli ditulis dalapm BASO. Yunani. Dalapm ayat ni'in, BASO. Yunani momakai sotilah Beelzebul. Nantai ia'an damo duato. Tiat 2 Raj 1:2. Dalapm perikop ni'in, sotilah nantai dipakai pakai' Rajo Sitatn.
25Apo Yesus mongotohu'i pikiran sia'. Jadi, Io bopandir ko sia', “Aman sobuah koraja'an topocah dalapm boko kolompok inyo hala bomusuhan, pasti koraja'an nantai paca'an bonaso. Aman boko urakng dalapm sobuah kota hala bomusuhan, pasti kota nantai kinyo ulih botahatn. Aman boko anggota sokoluarga hala bomusuhan, pasti koluarga nantai paca'an hancur. 26Ubo nian jam di dalapm Koraja'an Sitatn. Aman Rajo Sitatn monundukng boko roh jahatnyo, rotinyo korajaan-nyo tobagi-bagi. Io molawatn dirinyo siku'. Pasti korajaan-nyo kinyo ulih botahatn. 27Apotolagi', soumpamonyo Aku monundukng roh jahat momakai kuaso Rajo Sitatn, rotinyo boko pongikut kaitn monundukng roh jahat agatn kuaso Rajo Sitatn jam. Boko pongikut kaitn siku' paca'an mongatoan nantai salah! 28Apo, inyo bondar ia'an Aku monundukng roh jahat agatn kuaso Allah. Ongko, nantai rotinyo Koraja'an Allah udah datakng ko kaitn.#12:28: Agatn kodatakan Yesus, sia' ulih moniant kuaso Koraja'an Allah udah mula'i mongalahan kuaso Koraja'an Sitatn. 29Potimbakancam gambaran ni'in: Aman siku' urakng honda' momansu'i rumah urakng inyo kuat oca' morampas bando barakngnyo, pasti io gola' mongobat urakng inyo kuat nantai holu'ai. Hoyu' io ulih morampok rumah nantai.#12:29: Yesus bomasud Sio samo sama'an urakng inyo mongobat urakng inyo kuat nantai. Sio molawatn Rajo Sitatn oca' urakng ulih monjadi anggota koluarga Koraja'an Allah daripado koraja'an Sitatn. 30Urakng inyo co momihak ko Aku, sobondarnyo io molawatn Aku. Urakng inyo cado mongumpulan bosamo agatn Aku, sobondarnyo monyongkayoannyo.#12:30: Poumpamoan ni'in ulih boroti urakng inyo cado bokorojosamo agatn Yesus, sobondarnyo morusa' pokoroja'an-Nyo. DAMO ulih jam boroti lobih jolas, urakng inyo cado bokorojosamo mombaba' boko urakng lobih dampikng ko Allah, sobondarnyo mombaba' boko urakng lobih jouh doi' Allah. 31Jadi, dinga'anbo: Sotiap urakng inyo bodosa damo mohayam, urakng nantai ulih diamputi. Apo urakng inyo mohayam tohadap Roh Allah, urakng nantai kinyo paca'an diamputi. 32Sotiap urakng inyo momadahan sosuatu inyo monontakng Ana' Monsio, urakng nantai ulih diamputi. Apo sotiap urakng inyo mohayam Roh Allah, urakng nantai kinyo kalo paca'an diamputi. Urakng nantai kinyo paca'an ulih diamputi di dunia ni'in damo di dunia inyo paca'an datakng.
33 Sotiap urakng dikonal doi' porbuatannyo samo sama'an sotiap tontanaman dikonal doi' buahnyo. Aman sokayu' tontanaman boi', ongko buahnyo boi' jam. Aman sokayu' tontanaman kinyo boi', ongko buahnyo kinyo boi' jam.#12:33: Doi' ayat 23-24 ado songkayo pondapat mongona'i sopo Yesus. Boko urakng Farisi mongatoan kuaso-Nyo doi' Rajo Sitatn. Apo ado boko urakng inyo mongotohu'i obai kuaso-Nyo doi' Allah. Jadi, di si'itn Yesus bomasud Sio ulih dikonal doi' porbuatan-Nyo inyo boi'. Boko urakng Farisi ulih dikonal doi' porbuatan sia' inyo jahat, sia' buhau huatan hala monyalahan urakng bukai. Apotolagi' sia' kinyo pocayo obai Yesus nantai Kristus, ia'an Rajo Inyo Dijanjian Allah. 34Uai kaitn urakng Farisi inyo jahat huatan licik sama'an ular biso!#12:34: Mungkitn kiasan ular ni'in rotinyo Rajo Sitatn. Kinyo mungkitn kaitn momandiran boko hal inyo boi' obai kaitn jahat. Obai, boko pomandiran inyo koluar doi' mulut urakng, koluar doi' dalapm hati urakng nantai. 35Urakng inyo boi' momandiran boko hal inyo boi' obai hatinyo boi'. Sobali'nyo, urakng inyo jahat momandiran boko hal inyo jahat obai hatinyo jahat. 36Jadi, dinga'anbo ni'in: Timpu Ari Ponghakipan Allah nononyo, sotiap urakng gola' botanggukng jawab agatn sotiap pomandiran inyo kalo dipandirannyo agatn sombarakan. 37Obai boko pomandiran kaitn siku'nam inyo paca'an digunoan pakai' momutusan aman kaitn paca'an dianggap bondar di hadapan Allah damo aman kaitn paca'an dihukupm Allah.”
Yesus monogur urakng banya' inyo monuntut Sio pakai' molabuhan lobih banya' mujisat agi'
(12:38-42)
(Luk. 11:29-32)
38Lopas nian boboropo guru agama Yahudi huatan boko urakng Farisi bopandir ko Yesus, “Guru, koi honda' moniant Duatn bulah suatu mujisat inyo mombutian Allah moutus Duatn.”
39Apo timbas Yesus ko sia', “Boko urakng di joman ni'in kotakng jahat ongko kinyo sotia ko Allah. Sia' monuntut suatu tando. Apo bayo sobuti' inyo paca'an dionji'i ko sia', bayo mujisat sama'an inyo tojadi ko Nabi Yunus timpu joman komai. 40Yunus ado di dalapm porut ikatn bosar somanah tigo ari tigo malapm.#12:40: Tiat buku Yunus 1:17. Ubo nian jam Ana' Monsio paca'an di dalapm pasaran somanah tigo ari tigo malapm.#12:40: Yesus dipasar watu ari Jumat. Ongko bobali' hidup watu ari Minggu. 41Watu Ari Ponghakipan nononyo, boko urakng Niniwe paca'an bobali' hidup huatan mohakipi boko urakng joman ni'in. Obai, boko urakng Niniwe komai botongga' bulah dosa sia' kali sia' mondinga' borito inyo dibaba' Yunus. Apo di si'itn ado inyo lobih bokuaso daripado Yunus. 42Watu Ari Ponghakipan nononyo, ratu doi' nogori Syeba di doerah Solatatn pan paca'an bobali' hidup huatan mohakipi boko urakng di joman ni'in. Obai, joman komai ratu nantai datakng doi' hujukng bumi pakai' mondinga'an pomandiran pintar-corodi' doi' Rajo Salomo.#12:42: Kisah Ratu Syeba ado di buku 1 Boko rajo 10:1-13. Apo ni'in ado inyo lobih bokuaso daripado Rajo Salomo.” #12:42: Apo boko urakng Yahudi, sobagai umant pilihan Allah, monyangko obai sia' lobih boi' daripado boko urakng inyo bukainyo urakng Yahudi. Apo banya' urakng Yahudi kinyo pocayo obai Yesus nantai Kristus, ia'an Rajo Inyo Dijanjian Allah. Jadi masud Yesus, watu Ari Ponghakipan nono, sia' paca'an dituduh di hadapan Allah ulih boko urakng inyo bukainyo urakng Yahudi sama'an ratu doi' negara Syeba huatan boko urakng doi' kota Niniwe.
Yesus momporingant'i oca' boboi' agatn kuaso jahat
(12:43-45)
43 Ongko Yesus mongajar agatn poumpamoan ni'in: “Aman roh jahat koluar doi' siku' urakng, roh nantai bokolilikng ko boko tompat inyo gorinsakng pakai' bogoyap tompat torahat. Apo io kinyo mondapat'annyo. 44Ongko, io bopandir, ‘Aku bobali' agi' ko urakng inyo udah aku tinggalan!’ Watu io sampai ko urakng nantai, io mondapat'an urakng nantai samo sama'an rumah inyo borosih huatan toatur, apo puakng. 45Ongko io botula', botomu agatn tujuh roh bukainyo inyo lobih jahat doi' io. Sia' somuo datakng, mansu' ko dalapm urakng nantai, ongko bodiapm di santai. Koponsuahannyo, koadaan urakng nantai monjadi lobih rusa' doi' inyo asalnyo. Nantaiam jam inyo paca'an tojadi agatn boko urakng jahat joman ni'in.”#12:45: Yesus bomasud sotiap urakng gola' bulah koputusan mongona'i sopo Sio sobondarnyo. Urakng co ulih ‘puakng’. Urakng inyo co bulah koputusan huatan totap cubo ‘puakng’, ponsuahannyo paca'an monjadi jahat.
Koluarga Yesus inyo sobondarnyo
(12:46-50)
(Mrk. 3:31-35; Luk. 8:19-21)
46Pontongahan Yesus ija' bopandir agatn urakng banya' nantai, datakam indai agatn boko somadikan-Nyo. Sia' bodiritn di luar, honda' botomu Sio apo co ulih. 47Jadi, ado urakng momadahan ko Sio, “Indai Duatn agatn boko somadikan Duatn ado di luar, honda' botomu agatn Duatn.”
48Apo Yesus bopandir ko urakng nantai, “Pikirancam mongona'i sopo indaiku huatan sopo somadikan-Ku.” 49Yesus monunju' ko boko murid-Nyo kapikng bopandir, “Boko urakng ninam indaiku huatan boko somadikan-Ku! 50Somuo urakng inyo molabuhan kohonda' Allah Bopai-Ku di sorugo ia'an indaiku huatan boko somadikan-Ku.”
अहिले सेलेक्ट गरिएको:
Matius 12: TBDS
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
