Matius 11
11
1Jadi, Yesus moonji'i boko potunju' nantai ko koduo bolas murid-Nyo. Lopas nantai, Sio botula' doi' su'utn mongajar huatan momboritoan Kabar Boi' di boko kota sia'.
Yesus ongko Yohanes Pombaptis
(11:2-19)
(Luk. 7:18-35)
2Yohanes Pombaptis tongahan ado dalapm ponjara.#11:2: Herodes momansu'an Yohanes Pombaptis ko dalapm ponjara. Kisahnyo ado di Matius 14:3-4. Io mondinga' mongona'i pogota'an Yesus Kristus. 3Ongko Yohanes monyiuh boko murid-nyo ko Yesus pakai' botakutn, “Duatn ninam Rajo Inyo Dijanjian Allah? Kata'an Sio urakng bukai? Kata'an koi gola' ija' monanti kodatakan-Nyo?”
4Yesus monimbas sia', “Bobali' kaitn ko Yohanes. Padahan ko io mongona'i somuo inyo udah kaitn tiat huatan dinga'. 5Urakng buto moniant. Urakng lumpuh bojalatn. Urakng boponyakit kulit inyo bogola'i jadi nyamanam. Urakng tingal mondinga'. Urakng mati bobali' hidup agi'. Kabar Boi' diboritoan ko urakng jaro. 6Diborokati urakng inyo co monula' Aku!”#11:6: Somuo urakng Yahudi udah manah monantian kodatakan Rajo Inyo Dijanjian Allah, inyo disobut ‘Kristus’. Banya' urakng salah bopikir Rajo ni'in paca'an monyolamant'an banso Israel doi' kokuasa'an koraja'an di dunia ni'in. Yesus mongajar mongona'i pombebasan doi' dosa, kosolamant'an doi' kuaso jahat. Ongko, porbuatan huatan pomandiran Yesus kinyo cucu' agatn pikiran huatan harapan sia'. Apo dalapm perikop ni'in Yesus mombaba' urakng pakai' morenungan dalapm hati oca' yakitn obai Sio nantai Rajo Inyo Dijanjian Allah nantai.
7Lopas koduo murid Yohanes nantai botula', Yesus mula'i monjolasan ko urakng banya' mongona'i sopo Yohanes sobondarnyo. Kato Yesus, “Timpu Yohanes bodiapm di padakng pasir, kaitn botula' ko su'utn pakai' moniant la'apo? Pasti kinyo bayo honda' moniant solamba'i rumput inyo boguyakng ditiup angin, pan? Obai rumput kinyo pontikng.#11:7: Kiasan ni'in ado duo rotinyo: Sia' datakng ko padakng pasir pakai' moniant Yohanes mo inyo jouh lobih pontikng doi' rumput. Huatan, Yohanes kinyo gangga'-gua'an sama'an rumput inyo mudah diguyakng angin. Yohanes pocayo huatan mongajar agatn yakitn. 8Jadi, kaitn botula' ko su'utn pakai' moniant la'apo? Pasti kinyo pakai' moniant urakng inyo bopakaian mahal. Urakng inyo bopakaian mahal bodiapm dalapm istana bukainyo di padakng pasir.#11:8: Yesus monokatan, biar pan Yohanes jaro, sia' moanggap io cucu' dihormati. 9Jadi, kaitn botula' ko su'utn pakai' moniant la'apo? Pasti pakai' moniant siku' urakng nabi, bai? Apo, dinga'anbo ni'in. Io lobih pontikng doi' siku' urakng nabi biaso. 10Obai timpu joman komai ado nabi inyo monulis pomandiran Allah mongona'i Yohanes ni'in: ‘Dinga'anbo! Aku paca'an monyiuh utusan-Ku mondoholu'i Duatn. Utusan-Ku nantai paca'an momposiapan boko urakng pakai' kodatakan Duatn.’#11:10: 10 Doi' buku Nabi Maleakhi 3:1
11Jadi poniant'an, obai Yohanes nantai pontikng daripado somuo urakng bukai di dunia ni'in sampai watu ni'in. Apo somuo anggota koluarga Koraja'an Sorugo, tomansu' inyo palikng kinyo pontikng, somuo sia' lobih pontikng daripado Yohanes nantai.#11:11: Somuo posisi urakng di Koraja'an Allah lobih pontikng doi' posisi la'apo aja' di dunia (tomansu' posisi Yohanes di dunia sobagai nabi inyo kotakan pontikng). 12Tangga'i Yohanes Pombaptis momboritoan Kabar Boi' sampai watu ni'in, ado boko urakng inyo monontakng Koraja'an Sorugo.#11:12: Boko urakng monontakng Koraja'an Sorugo obai sia' kinyo bopikir Yesus ia'an Rajo Inyo Dijanjian Allah inyo momorintah Koraja'an nantai. Agatn kokorasan, sia' bousaha mongalahan Koraja'an Sorugo. 13Sampai kodatakan Yohanes, somuo nabi huatan Hukupm Torat monyampaian posatn doi' Allah mongona'i boko hal inyo paca'an tojadi. 14Di dalapmnyo pan ditulis mongona'i urakng inyo samo sama'an nabi Elia inyo paca'an datakng. Aman kaitn honda' pocayo, Yohanes Pombaptis nantai urakng inyo samo sama'an nabi Elia.#11:14: Hal ni'in dinubuat'an di buku nabi Maleakhi 4:5-6. Yohanes samo sama'an Elia obai kododuonyo hidup biaso mo huatan bopakaian kasar. Sia' bopandir molawatn boko urakng jahat (tomansu' boko rajo damo boko pomimpitn inyo jahat). Sia' moanjuran urakng pakai' botongga' bulah dosa ongko monyonangan hati Allah. 15Aman bokolindakan, dinga'an pomandiran-Ku agatn boi'.
16Boko urakng joman ni'in samo sama'an boko bobia' kocit inyo monggaso di pasar. Boko bobia' nantai dudu' mondorah ko boko pokawalannyo, 17‘Koi moniup sulikng obai koporindakan apo kaitn kinyo bonari. Koi bonyanyi lagu bulikng-undu' apo kaitn kinyo monangis.’
18Obai Yohanes Pombaptis datakng, kinyo makatn, kinyo minum, apo sia' bopandir, ‘Io korasu'an sitatn!’ 19Lopas nian Ana' Monsio datakng. Sio makatn, Sio minum, apo sia' bopandir Sio urakng kaha', pomabu', ‘Kawal ponagih pajak huatan urakng bukai inyo bodosa.’ Apo sia' salah obai porbuatan urakng mombutian aman urakng nantai bondar-bondar bisi kopintar-corodi'an doi' Allah kata'an cado.”
Yesus monogur boko urakng diboboropo kota inyo kinyo pocayo ko Sio
(11:20-24)
(Luk. 10:13-15)
20Yesus bulah kotakng banya' mujisat di boboropo kota di doerah Galilea. Apo boko urakng di boko kota nantai totap kinyo botongga' bulah dosa ongko kinyo monyonangan hati Allah. Jadi Yesus monogur sia' agatn koras. Kato-Nyo, 21“Allah paca'an mohukupm kaitn urakng kota Khorazim ongko urakng kota Betsaida. Aku udah molabuhan banya' mujisat di tongah-tongah kaitn. Soumpamonyo, Aku bulah boko mujisat nantai di kota Tirus ongko Sidon,#11:21: Khorazim ongko Betsaida ia'an boko kota urakng Yahudi di doerah Galilea. Yesus molabuhan banya' mujisat di su'utn pakai' moniant'an kuaso-Nyo doi' Allah. Apo sia' kinyo pocayo ko Yesus. Tirus ongko Sidon nantai boko kota urakng inyo bukainyo urakng Yahudi, inyo tokonal obai kojahatannyo. pasti boko urakng di su'utn udah botongga' bulah dosa. Pasti sia' udah momakai pakai'an bulikng-undu' ongko mongguguran habu di pucu' kopala' sia' pakai' monunju'an sia' bulikng obai dosanyo. 22Dinga'anbo! Timpu Ari Ponghakipan Allah nono, hukupan ko kaitn di Khorazim huatan Betsaida paca'an lobih borat daripado hukupan ko boko urakng jahat di Tirus ongko Sidon nantai. 23Huatan kaitn inyo di laman Kapernaum. Jangan bopikir kaitn paca'an dihormati huatan paca'an mansu' sorugo! Kaitn paca'an dibuakan ko noraka! Obai Aku udah bulah boko mujisat di tongah-tongah kaitn. Soumpamonyo, Aku molabuhan boko mujisat di kota Sodom, pasti boko urakng di su'utn botongga' bulah dosa. Ongko, kota nantai kinyo gola' dihancuran sama'an inyo udah tojadi timpu joman komai. Soumpamonyo ubo nian, kota nantai tontu ija' bodiritn sampai ari ni'in. 24Dinga'anbo! Timpu Ari Ponghakipan Allah nononyo, hukupan ko kaitn di Kapernaum paca'an lobih borat daripado hukupan ko boko urakng jahat di Sodom nantai.”#11:24: Kisah Sodom ado di buku Kojadian 19:1-29.
Yesus mombaba' urakng inyo bobobatn borat pakai' monjadi murid-Nyo
(11:25-30)
(Luk. 10:21-22)
25Timpu nantai Yesus bodoa, “Bopai, Duatn umputn somuo dunia ni'in. Aku bosukur obai Duatn kinyo moombakan somuo nantai doi' urakng pintar-corodi', apo#11:25: Boko urakng ni'in sama'an boko guru inyo ahli dalapm porintah huatan poraturan Allah ongko pomimpitn agama Yahudi doi' kolompok Farisi. Biar pan sia' pintar huatan bopondidikan, sia' kinyo pocayo Yesus ia'an Kristus, ia'an Rajo Inyo Dijanjian Allah. Tiat 1 Korintus 1:18-31. Duatn monyatoan somuonyo nantai ko masrakat kocit. 26Ihai, Bopai, caro nantai monyonangan hati Duatn!”
27 Ongko Yesus bopandir ko boko urakng, “Bopai-Ku udah moonju' somuo hal ko Aku. Co nyiant siku' pan inyo mongonal Ana' solaitn Bopai, nyiant siku' pan inyo mongonal Bopai solaitn Ana', huatan boko urakng inyo dipokonalan Ana' agatn Bopai.
28Datakngcam ko Aku, somuo kaitn inyo uyuh jorih monanggukng boko kosusahan inyo borat.#11:28: Timpu joman Yesus, boko pomimpitn agama Yahudi momborat'i boko urakng agatn banya' poraturan agama inyo uyuh dilabuhan. Aku paca'an moonji'i sonang-nyaman ko kaitn. 29Tuyut'i cam porintah-Ku. Bolajarcam doi' Aku, obai Aku lomah-lombut huatan rondah hati. Aman kaitn molabuhan nantai, ongko jiwa kaitn paca'an mooso sonang. 30Obai, ajaran-Ku kinyo mouyuhi dilabuhan huatan porintah-Ku mudah mo ditaati.”#11:30: Teks asli, baso Yunani, momakai gambaran ‘kuk’ di si'itn. Sobuah kuk dipulah doi' kayu huatan digunoan pakai' mohubukan duo iku' sapi damo korobau, oca' sia' korojo samo mondudus bobatn inyo borat.
अहिले सेलेक्ट गरिएको:
Matius 11: TBDS
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
